Read new_tumbuka_bible Mateyu 22 Bible Online

Mateyu 22 - new_tumbuka_bible bible

Mateyu 22

¹Yesu wakayowoyaso na ŵanthu ŵara mu ntharika wakati,

²“Ufumu wa kuchanya uli nga ndi karonga uyo wakanozga chiphikiro pa nthengwa ya mwana wakhe.

³Wakatuma ŵateŵeti ŵakhe kuti ŵakacheme awo ŵakachemeka ku chiphikiro cha nthengwa, kweni kuti ŵakakhumba kwizako chara.

⁴Wakatumaso ŵateŵeti ŵanyakhe kuti ŵakaŵaphalire awo ŵakachemeka kuti, ‘Ndanozga chiphikiro chane, ndakoma nkhaŵi yane na ng'ombe zakututuŵa, ndipo vyose vyanozgeka. Zaninge ku chiphikiro cha nthengwa!’

⁵Kweni ŵakuchemeka ŵara kuti ŵakalorako chara, yumoza wakaruta ku munda wakhe, munyakhe ku nchito yakhe ya malonda.

⁶Ŵanyakhe awo ŵakakharako ŵakakora ŵateŵeti ŵa karonga yura ndipo ŵakaŵatimba na kuŵakoma.

⁷Karonga wakakaripa na kutuma ŵankhondo ŵakhe, ndipo ŵakaya kakoma vigeŵenga vyose na kocha msumba wawo.

⁸Penepapo wakaŵaphalira ŵateŵeti ŵakhe wakati, ‘Nadi chiphikiro cha nthengwa chanozgeka, kweni awo ŵakachemeka kuti ŵakenerera chara.

⁹Ntheura rutani mu nkhumano za misewu ya mu msumba na kuŵachemera ku chiphikiro ichi wose awo mwamkuŵasanga.’

¹⁰Ndipo ŵateŵeti ŵara ŵakaruta mu misewu yose ya mu msumba na kuŵawunganya wose awo wakaŵasanga, ŵaheni na ŵaweme. Ntheura nyumba ya chiphikiro yikazura na ŵanthu awo ŵakachemeka.

¹¹“Para karonga wakati wanjira kukawona awo ŵakachemeka, wakawona munthu yumoza uyo kuti wakavwara malaya gha pa nthengwa chara.

¹²Karonga wakamufumba wakati, ‘Nganya we! Kasi wangunjira uli muno kwambula kuvwara malaya gha pa nthengwa?’ Ndipo iyo wakati waka chete.

¹³Ntheura karonga wakaŵaphalira ŵateŵeti ŵakhe wakati, ‘Mukakani mawoko na malundi, ndipo mumutaye kuwaro ku mdima, kwenekuko kwamkuŵa kulira na kuska mino.’

¹⁴“Chifukwa ŵanandi ŵakuchemeka, kweni ŵakusankhika ŵachoko waka.”

¹⁵Penepapo ŵaFarisi ŵakaruta kuya kapangana na umo ŵangamukorera Yesu mu kayowoyero kakhe.

¹⁶Ŵakatuma ŵasambiri ŵawo kwa Yesu pamoza na ŵanji ŵa chipani cha ŵaHerode. Iwo ŵakati, “Musambizgi, tikumanya kuti muli ŵakuneneska ndipo mukusambizga nthowa ya Chiuta mu unenesko, ndipo imwe kuti mukulorako na munthu chara, chifukwa kuti mukurumba chisko cha munthu chara.

¹⁷Sono mutiphalire ivyo mukughanaghana. Kasi kukulangurika kupereka msonkho kwa karonga wa ku Romu panji chara?”

¹⁸Kweni Yesu wakamanya uheni wawo, ndipo wakati, “Mwa ŵapusikizgi imwe, kasi chifukwa uli mukundiyezga?

¹⁹Ndirongorani ndarama ya msonkho.” Ŵakamutorera ndarama.

²⁰Ndipo Yesu wakaŵafumba wakati, “Kasi chikozgo ichi na zina ili nvya njani?”

²¹Ŵakazgora ŵakati, “Nvya karonga wa ku Romu.” Yesu wakati kwa iwo, “Ipo perekani kwa karonga wa ku Romu ivyo nvya karonga wa ku Romu, ndipo kwa Chiuta ivyo nvya Chiuta.”

²²Ŵakati ŵapulika ichi, ŵakazizwa, ndipo ŵakamusida na kuruta.

²³Pa zuŵa lenelira ŵaSaduki, awo ŵakati chiwuka cha ŵakufwa kulije ŵakiza kwa Yesu ndipo ŵakamufumba ŵakati,

²⁴“Musambizgi, Mozesi wakati, ‘Usange munthu wafwa wambula ŵana, mubali wakhe wakwenera kuhara chokoro chira na kuwuskira mphapu mukuru wakhe.’

²⁵Sono ŵakaŵako ku kwithu ŵana ŵankhonde na ŵaŵiri pa wiskewo. Wakudanga wakatora mwanakazi, ndipo wakafwa kwambula ŵana, ndipo muwoli wakhe wakaharika na munung'una wakhe.

²⁶Kukaŵa ntheura pera na wa chiŵiri, ndiposo na wa chitatu, kuya kafika na ku wa chinkhonde na chiŵiri.

²⁷Ndipo pamanyuma pa wose, mwanakazi nayo wakafwa.

²⁸Sono kasi pa chiwuka cha ŵakufwa, mwanakazi uyu wamkuŵa muwoli wa njani pakuti wose ŵakamutorapo?”

²⁹Kweni Yesu wakaŵazgora wakati, “Imwe mukwananga, chifukwa mulije kumanya malembo nanga ndi nkhongono za Chiuta.

³⁰Pakuti mu chiwuka cha ŵakufwa, kuti ŵakutora chara, nanga nkhutengwa, kweni ŵali nga mbangelo kuchanya.

³¹Kweni sono vya kuwuka kwa ŵakufwa, kasi mundaŵazge ivyo Chiuta wakayowoya kwa imwe kuti,

³²‘Ine ndine Chiuta wa Abrahamu, na Chiuta wa Yisake, na Chiuta wa Yakhobe. Iyo kuti ndi Chiuta wa ŵakufwa chara, kweni wa ŵamoyo.’ ”

³³Ndipo para mizinda yikapulika ichi, yikazizwa na kusambizga kwakhe.

³⁴Kweni ŵaFarisi ŵakapulika zgoro la Yesu kuti lachetamiska ŵaSaduki, ŵakawungana pamoza.

³⁵Yumoza wa iwo wakaŵa mumanyi-marango ndipo pakumuyezga Yesu wakamufumba wakati,

³⁶“Musambizgi, kasi dango likuru mu marango ghose ndi ndi?”

³⁷Ndipo Yesu wakati kwa iyo, “ ‘Utemwenge Fumu Chiuta wako na mtima wako wose, na mzimu wako wose, ndipo na vinjeru vyako vyose.’

³⁸Ili ndi dango likuru na lakudanga.

³⁹Ndipo la chiŵiri lakukozgana nalo ndi ilo likuti, ‘Utemwenge muzengezgani wako nga ndi umo ukujitemwera wamwene.’

⁴⁰Pa marango ghaŵiri agha ndipo pali kwima Dango lose la Mozesi na visambizgo vyose vya nchimi.”

⁴¹Para ŵaFarisi ŵakawungana, Yesu wakaŵafumba wakati,

⁴²“Kasi mukughanaghana vichi na za Mesiya? Kasi ndi Mwana wa njani?” Ŵakazgora ŵakati, “Ndi Mwana wa Davide.”

⁴³Yesu wakati kwa iwo, “Chifukwa uli Davide pakukhuŵirizgika na Mzimu, wakamuchema kuti, ‘Fumu’, apo wakati,

⁴⁴Fumu yikati kwa Fumu yane, ‘Ukhare ku woko lane la maryero, ndisuke ndizgore ŵarwani ŵako kuŵa chitambaliro cha malundi ghako.’

⁴⁵Ntheura usange Davide wakumuchema, ‘Fumu’, kasi wangaŵa uli mwana wakhe?”

⁴⁶Pakaŵavye nanga njumoza uyo wakazgorapo mazgu, ndipo kufuma pa nyengo yeneyira, pakaŵavye nanga njumoza uyo wakakangarizga kumufumba kanthu.