Read new_tumbuka_bible Mateyu 23 Bible Online

Mateyu 23 - new_tumbuka_bible bible

Mateyu 23

¹Penepapo Yesu wakayowoya ku mizinda ya ŵanthu na ku ŵasambiri ŵakhe wakati,

²“Ŵamanyi-marango na ŵaFarisi ŵakukhara pa chitengo cha Mozesi,

³ntheura vinthu vyose ivyo ŵakumuphalirani, muchitenge na kusungilira. Kweni mureke kuchita kwakuyana na milimo yawo, pakuti ŵakupharazga, kweni ŵakuvichita chara.

⁴Iwo ŵakukaka katundu muzitu na wakuphyora na kumuŵika pa viŵegha vya ŵanthu, kweni iwo ŵenecho ŵakutondeka kumuyegha nanga nkhu munwe.

⁵Milimo yawo yose ŵakuchita mwakuti ŵanthu ŵaŵawone. Ŵakukuzga usani wa tumakarata twa mazgu gha Chiuta kuti ŵavwarenge pa maso na mawoko ghawo na kuŵika mphonje zitali ku malaya ghawo.

⁶Ŵakutemwa malo gha pachanya pa viphikiro na vitengo vya kuzirwa mu nyumba zakusoperamo.

⁷Ŵakutemwaso kuti ŵanthu ŵaŵatauzgenge na nchindi mu misika pakuŵachema kuti, ‘Musambizgi.’

⁸Kweni imwe ŵanthu ŵareke kumuchemani kuti, ‘Musambizgi,’ pakuti muli nayo musambizgi yumoza pera, ndipo imwe muli ŵenenaŵene.

⁹Ndipo mureke kumuchema munthu waliyose pano pasi kuti ‘Ŵadada,’ chifukwa muli na Wiskemwe yumoza pera uyo wali kuchanya.

¹⁰Ŵanthu ŵareke kumuchemani kuti ŵarongozgi, pakuti muli na murongozgi yumoza pera, ndiyo Mesiya.

¹¹Uyo ndi mukuru mukati mwinu, ndiyo waŵenge muteŵeti winu.

¹²Yose uyo wakujikuzga, wati wayuyurikenge. Ndipo yose uyo wakujiyuyura, wati wakwezgekenge.

¹³“Soka kwa imwe ŵamanyi-marango na ŵaFarisi! Mwa ŵapusikizgi imwe! Pakuti mukujara muryango wa Ufumu wa kuchanya kuti ŵanthu ŵareke kunjiramo. Pakuti imwe mwaŵene kuti mukunjiramo chara, nanga ndi awo ŵakukhumba kunjiramo kuti mukuŵazomerezga chara! [

¹⁴Soka kwa imwe ŵamanyi-marango na ŵaFarisi mwa ŵapusikizgi imwe! Mukumirimitizga usambazi wa vyokoro, ndipo mu upusikizgi winu, mukuromba malurombo ghatali kuti ŵanthu ŵamuwonani. Pa chifukwa ichi mwamkulangika chomene.]

¹⁵“Soka kwa imwe ŵamanyi-marango na ŵaFarisi! Mwa ŵapusikizgi imwe! Mukwendendeka ku nyanja na ku mtunda, kuti mumung'anamule munthu wize kwa imwe, ndipo para waŵa pamoza namwe mukumuzgora kaŵiri kuŵa munthu muheni chomene wakwenera kuya ku Gehena kwakuruska mwaŵene.

¹⁶“Soka kwa imwe ŵarongozgi ŵachiburumutira! Mwaŵeneimwe mukuti, ‘Yose uyo wakuzunura Nyumba ya Chiuta para wakuchita chirapo, palije kanthu. Kweni yose uyo wakuzunura golide la Nyumba ya Chiuta para wakuchita chirapo, wakujikaka na chirapo chakhe.’

¹⁷Mwa vindere vyakuburumutizgika imwe! Kasi chakuzirwa ndi nchi, golide, panji Nyumba ya Chiuta iyo yikutuŵiska golide?

¹⁸Mukutiso para munthu wakuzunura jochero pakuchita chirapo, palije kanthu. Kweni para wakuzunura chawanangwa icho chili pa jochero pakuchita chirapo chakhe, wakujikaka na chirapo chakhe.

¹⁹Mwa ŵachiburumutira imwe! Kasi chakuzirwa ndi nchi, chawanangwa panji jochero ilo likutuŵiska chawanangwa?

²⁰Ntheura para munthu wakuzunura jochero pakuchita chirapo, ndiko kuti wachita chirapo cha jochero lira na vyose ivyo vili penepapo.

²¹Uyo wakuzunura Nyumba ya Chiuta para wakuchita chirapo, ndiko kuti wakurapira Nyumba ya Chiuta na uyo wakukhara mwenemumo.

²²Ndiposo uyo wakuzunura kuchanya pakurapa, wakurapira chizumbe cha Chiuta na uyo wakukharapo.

²³“Soka kwa imwe ŵamanyi-marango na ŵaFarisi! Mwa ŵapusikizgi imwe! Mukupereka kwa Chiuta chakhumi nanga mpha ivyo ŵanthu ŵakurunga nga ndi hanyezi, sabora, na munchesi,[11] kweni mwareka vyakuzirwa vya mu marango gha Chiuta nga nkhweruzga mu urunji, lusungu na chipulikano. Ndivyo mukwenera kuchita kwambula kureka vinyakhe.

²⁴Imwe ŵarongozgi ŵachiburumutira, mukusuja nyerere mu vyakumwa vyinu, kweni mukumira ngamila![12]

²⁵“Soka kwa imwe, ŵamanyi-marango na ŵaFarisi! Mwa ŵapusikizgi imwe! Mukusuka kuwaro kwa nkhombo na ŵabakule ŵinu, kweni mukati muli kuzuzgamo kukwapura na chigoro.

²⁶Imwe ŵaFarisi ŵachiburumutira! Mudange mwasuka mukati mwa nkhombo na mu bakule, ndipo musukenge na kuwaro kwakhe.

²⁷“Soka kwa imwe, ŵamanyi-marango na ŵaFarisi! Mwa ŵapusikizgi imwe! Muli nga ndi nkhwichi iyo ŵayiphaka utoto utuŵa ndipo yikuwoneka yakutowa kuwaro, kweni mukati muli kuzura viwangwa vya ŵanthu ŵakufwa na vyakuvunda vyose.

²⁸Ndimo muliri na imwe wuwo. Kuwaro mukuwoneka kuŵa ŵarunji panthazi pa ŵanthu, kweni muli kuzura na upusikizgi na ubendezi.

²⁹“Soka kwa imwe, ŵamanyi-marango na ŵaFarisi! Mwa ŵapusikizgi imwe! Mukuzenga mararo ghakutowa gha nchimi na kutozga nkhwichi za ŵanthu ŵarunji.

³⁰Ndipo mukuti, ‘Tiŵengeko ise mu mazuŵa gha ŵasekuru, mphanyi tikaŵavye kovwirana nawo pakukoma nchimi.

³¹Ntheura mukujipanikizgira mwekha kuti ndimwe ŵa mu mphapu ya awo ŵakakoma nchimi.

³²Sono ipo fiskani icho ŵawiskemwekuru ŵakamba.’

³³Njoka imwe! Mwa mphapu za vipiri! Kasi mwamkugwentha uli ku weruzgi uwo ukuya namwe ku Gehena?

³⁴Pa chifukwa ichi, nditumenge nchimi, ŵanthu ŵamahara, na ŵamanyi-marango. Ŵanyakhe mwizamkuŵakoma na kuŵapayika pa mphinjika. Ŵanji mwizamkuŵathyapula mu nyumba zinu zakusoperamo, ndipo ŵanji mwizamkuŵasuzga pakuŵazikizga kufuma ku muzi uwu kufikira ku muzi unyakhe.

³⁵Ntheura mrandu wa ndopa za ŵarunji wose izo zikathika pa charu, kufuma pa ndopa za Abelu murunji mpaka pa ndopa za Zakariya mwana wa Barakiya uyo mukamukomera mu Nyumba ya Chiuta pakati pa Malo Ghakupatulika na jochero la sembe, wize pa imwe.

³⁶Nadi nkhumuphalirani kuti chilango cha vyose ivi chiti chizenge pa muwiro uwu.

³⁷“We Yerusalemu, Yerusalemu! Ukukoma nchimi na kuŵadina na mawe awo ŵakatumika kwa iwe! Kasi nkhalinga ako mphanyi nkhawunganya ŵana ŵako pamoza nga ndi umo nyatazi wakuwunganyira twana twakhe kusi ku mapapindo ghakhe, kweni iwe ukukana!

³⁸Wonani sono, Nyumba ya Chiuta yiti yikhare mapopa.

³⁹Nadi nkhukuphalira kuti, muti mundiwonengeso chara mpaka muyowoye kuti, ‘Ngwakutumbikika uyo wakwiza mu zina la Fumu.’ ”