Read new_tumbuka_bible Mateyu 24 Bible Online

Mateyu 24 - new_tumbuka_bible bible

Mateyu 24

¹Para Yesu wakafumanga mu Nyumba ya Chiuta na kuruta, ŵasambiri ŵakhe ŵakiza kwa iyo na kumurongora kazengekero ka Nyumba ya Chiuta.

²Yesu wakaŵazgora wakati, “Asi, mukuviwona vyose ivi? Nadi nkhumuphalirani, kuti kwamkuŵavye nanga ndi libwe limoza pano ilo lamkukhara pa libwe linyakhe kwambula kuwiskikira pasi.”

³Para Yesu wakakhara pa Phiri la maOlive, ŵasambiri ŵakhe ŵakiza kwa iyo ku udesi. Ŵakamufumba ŵakati, “Mutiphalire, kasi vinthu ivi vizamkuŵako pauli, ndiposo kasi chimanyikwiro chakurongora kwiza kwinu na umaliro wa charu chamkuŵa chivichi?”

⁴Yesu wakaŵazgora wakati, “Chenjerani, paŵavye munthu wamupuruskani.

⁵Chifukwa ŵanandi ŵamkwiza mu zina lane na kuyowoya kuti, ‘Mesiya ndine,’ ndipo ŵamkuŵapuruska ŵanthu ŵanandi.

⁶Mwamkupulika chiwawa cha zinkhondo za pafupi, ndiposo na mbiri ya zinkhondo zakuchitika kutali. Mungakenjerwanga, pakuti vya ntheura vikwenera kuŵako, kweni umaliro uchali undafike.

⁷Pakuti mtundu wamkuwukira mtundu unyakhe, ndipo ufumu wamkuwukira ufumu unyakhe. Kwamkuŵako njara na vindindindi mu malo ghakupambanapambana.

⁸Vyose vya ntheura ivi vili nga ndi vyakuŵinya ivyo mama wakupulika pambere wandababe.

⁹“Penepapo ŵamkumuperekani ku visuzgo ndipo ŵamkumukomani. Ŵamitundu yose ŵamkumutinkhani chifukwa cha zina lane.

¹⁰Pa nyengo yeneyira ŵanthu ŵanandi ŵamkutaya chipulikano chawo, ndipo ŵamkwenderana mphiska na kutinkhana.

¹¹Ndipo nchimi zitesi zinandi zamkuwoneka na kupusika ŵanthu ŵanandi.

¹²Chifukwa chakwandana kwa ubendezi, kutemwa kwa ŵanthu ŵanandi kwamkuzizima.

¹³Kweni mweneuyo wamkuzizipizga kufika ku umaliro, ndiyo wamkuponoskeka.

¹⁴Uthenga Uweme wa Ufumu wamkupharazgika mu charu chose kuti uŵe ukaboni ku ŵamitundu yose. Penepapo umaliro uti wizenge.”

¹⁵“Ntheura para mwamkuwona chanthontho chakukazuzga chira icho chikayowoyeka na nchimi Daniyele, chikwimilira mu malo ghakupatulika, (Uyo wakuŵazga wapulikiske),

¹⁶penepapo awo ŵali mu Yudeya ŵakachimbilire ku mapiri.

¹⁷Uyo wali pachanya pa nyumba, wareke kwikha kuya katora ivyo vili mu nyumba yakhe.

¹⁸Uyo wali ku munda, wareke kuwerera ku nyumba kuya katora chakuvwara chakhe.

¹⁹Kweni soka ku ŵanakazi awo ŵizamkuŵa na nthumbo na awo ŵizamkonkheska twana mazuŵa agho!

²⁰Rombaninge kuti kuchimbira kwinu kureke kwiza kaŵako mu nyengo ya chiwuvi, panji pa zuŵa la Sabata.

²¹Chifukwa pa nyengo yira kwamkuŵa suzgo yikuru, yeneiyo kuti yikaŵako na kale chara, kufuma ku mutendeko wa charu kufika mpaka sono, ndipo kuti yamkuŵakoso chara yakuŵa nga ndi iyi.

²²Kweni mazuŵa agho gharekenge kudumurizgika, mphanyi palije munthu wakuponoskeka. Kweni ghakadumurizgika chifukwa cha ŵakusoreka ŵakhe.

²³“Pa nyengo yeneiyo usange munthu wamkuyowoya kwa imwe kuti, ‘Wonani Mesiya wali pano!’, panji ‘Wonani yura para!’ Mungaya kapulikananga chara.

²⁴Pakuti ŵamesiya ŵa utesi na nchimi za utesi zamkuwuka ndipo zamkurongora vimanyikwiro vikuru na minthondwe mwakuti usange nchamachitiko ŵapusiske na ŵakusoreka ŵa Chiuta wuwo.

²⁵Wonani ndamuphalirani nkhanira.

²⁶“Sono usange wakuti kwa imwe, ‘Wonani wali mu mapopa! Mungayangako chara.’ Panji usange ŵakuti ‘Wonani wali mu chipinda cha mukati mwa nyumba,’ mungaya kapulikananga chara.

²⁷Chifukwa kwiza kwa Mwana wa Munthu kwamkuŵa nga ndi leza mweneuyo para wakumwetuka ku mafumiro gha dazi, wakuwoneka mpaka ku manjiliro ghakhe.

²⁸“Pakuti apo pali chitanda, ndipo makuŵi ghamkuwungana pamoza.”

²⁹“Kweni maluŵiro, pamanyuma pa visuzgo vya mazuŵa ghara, dazi lamkufipiskika, ndipo mwezi nawo kuti wamkuŵala chara. Nyenyezi zamkumbotoka kufuma kuchanya, ndipo nkhongono za mu mlengalenga zamkusunkhunyika.”

³⁰Penepapo chimanyikwiro cha Mwana wa Munthu chamkuwoneka kuchanya, ndipo ŵanthu ŵa mafuko ghose gha mu charu ŵamkutengera. Ŵamkumuwona Mwana wa Munthu wakwiza mu maŵingu, wali na nkhongono na uchindami ukuru.

³¹Ndipo wamkutuma ŵangelo ŵakhe na kulira kwa mbata yikuru, kuti ŵakawunganye ŵakusoreka ŵakhe ku mphepo zinayi, kufuma mphererekezgo yimoza ya charu na kuya kafika ku mphererekezgo yinyakhe.

³²“Sono sambiraniko chisambizgo kufuma ku khuni la chikuyu. Para mukuwona kuti minthavi yakhe yayamba kusunda na kuŵa na mahamba, manyani kuti chifuku chili pafupi.

³³Ntheura pera, para mwamkuwona vyose vyeneivi vikuchitika, manyani kuti wali pafupi, ndipo wali pa muryango.

³⁴Nadi nkhumuphalirani kuti, vyose ivi vyamkuchitika pambere ŵanthu ŵa muwiro uwu ŵandafwe.

³⁵Kuchanya na charu cha pasi vimarenge, kweni mazgu ghane kuti ghati ghamarenge chara.

³⁶“Kweni vya zuŵa lira nesi ora, palije munthu uyo wakumanya, nanga ndi ŵangelo ŵa kuchanya nanga ndi Mwana, kweni Ŵadada pera.

³⁷Nga ndi umo kukaŵira mu mazuŵa gha Nowa, ntheuraso ndimo kwamkuŵira para Mwana wa Munthu wakwiza.

³⁸Nga ndi umo kukaŵira mu mazuŵa ghara pambere chigumura chindafike, ŵanthu ŵakaryanga na kumwa, ŵanarume ŵakatoranga ŵanakazi, ndiposo ŵanakazi ŵakatengwanga mpaka likiza zuŵa ilo Nowa wakanjirira mu ngaraŵa.

³⁹Ndipo kuti ŵakamanya kanthu chara kufikira pa zuŵa la chigumura, icho chikaŵakukura wose. Ntheura ndimo kwamkuŵira para Mwana wa Munthu wakwiza.

⁴⁰Pa nyengo iyo ŵanthu ŵaŵiri ŵamkuŵa mu munda, yumoza wamkutorekapo, munyakhe wamkukharapo.

⁴¹Ŵanakazi ŵaŵiri ŵamkuska pa lwara lumoza. Yumoza wamkutorekapo, munyakhe wamkukharapo.

⁴²Ntheura muŵe maso, pakuti mukulimanya chara ora ilo Fumu yinu yizirenge.

⁴³Kweni manyani ichi kuti mwene-nyumba wamanyenge ora lakufikira munkhungu, mphanyi wakukhara maso kwambula kuzomerezga kuti munkhungu wagumure nyumba yakhe.

⁴⁴Ntheura namwe muŵenge ŵakunozgeka chifukwa Mwana wa Munthu wamkwiza pa ora ilo mulije kughanaghanako.

⁴⁵“Kasi ndi muteŵeti nju uyo ngwa kugomezgeka na wa mahara, mweneuyo sekuru wakhe wali kumwimika pachanya pa ŵa mu nyumba yakhe kuŵapa iwo chakurya chawo pa nyengo yakwenerera?

⁴⁶Ngwa kutumbikika muteŵeti uyo para sekuru wakhe wamkwiza, wamkusanga wakuchita ntheura.

⁴⁷Nadi nkhumuphalirani kuti, sekuru wakhe wamkumwimika kuŵa mulinda pa vyose ivyo wali navyo.

⁴⁸Usange muteŵeti muheni yura wakughanaghana kuti, ‘Sekuru wane wachedwa,’

⁴⁹ndipo wakwamba kutimba ŵateŵeti ŵanyakhe, wakurya na kumwa pamoza na ŵaloŵevu,

⁵⁰penepapo sekuru wa muteŵeti yura, wati wizenge pa zuŵa ilo walije kugomezga kuti wizenge na pa nyengo iyo ŵalije kuyimanya.

⁵¹Ndipo wizamkumulanga na kumuŵika pamoza na ŵapusikizgi. Kwenekura ŵanthu ŵamkulira na kuska mino.