Read new_tumbuka_bible Mateyu 26 Bible Online

Mateyu 26 - new_tumbuka_bible bible

Mateyu 26

¹Para Yesu wakamara kusambizga vyose ivi, wakati ku ŵasambiri ŵakhe,

²“Mukumanya kuti chiphikiro cha Paska chiŵengeko para pajumpha mazuŵa ghaŵiri, ndipo Mwana wa Munthu wamkuperekeka kuti wapayikike pa mphinjika.”

³Penepapo ŵasofi ŵarara, ŵamanyi-marango na ŵarara ŵa ŵaYuda, ŵakawungana mu mphara ya Musofi Mukuru, zina lakhe Kayafa.

⁴Ŵakapangana umo ŵangamukorera Yesu mu uchenjezi mwakuti ŵamukome.

⁵Kweni ŵakati, “Tireke kumukora pa nyengo ya chiphikiro, mzire ŵanthu ŵawuske chivulupi.”

⁶Apo Yesu wakaŵa mu muzi wa Betaniya mu nyumba ya Simoni uyo wakaŵa na vyoni,

⁷mwanakazi wakiza kwa iyo na supa ya sangalawe yakuzura na mafuta gha kununkhira gha narido gha mtengo wa patali. Wakapungulira mafuta agha pa mutu wa Yesu.

⁸Para ŵasambiri ŵakhe ŵakati ŵawona ichi ŵakakaripa ŵakati, “Mwasakazirachi mafuta agha?

⁹Mafuta agha mphanyi ghanguguliskika na ndarama zinandi kuti ŵaŵagaŵire ŵakavu.”

¹⁰Yesu wakati wachimanya ichi, wakati kwa iwo, “Chifukwa uli mukumusuzga mwanakazi uyu? Iyo wandichitira ine chinthu chiweme.

¹¹Pakuti ŵakavu muli nawo mazuŵa ghose, kweni ine kuti muti muŵenge nane mazuŵa ghose chara.

¹²Mwanakazi uyu wapungulira mafuta agha pa thupi lane kulinozgera nkhanira pakusungika kwane.

¹³Nadi nkhumuphalirani kuti kose uko Uthenga Uweme uwu wamkupharazgika mu charu cha pasi, icho wachita mwanakazi uyu nacho chamkuyowoyeka kuti ŵamukumbukenge.”

¹⁴Ntheura yumoza wa ŵasambiri 12 zina lakhe Yudasi Isikariyoti, wakaruta ku ŵasofi ŵarara.

¹⁵Wakaŵafumba wakati, “Kasi mundipenge vichi para Yesu ndamupereka kwa imwe?” Ntheura iwo ŵakamupa ndarama za siliva 30.

¹⁶Kwamba nyengo yeneyira, Yudasi wakapenjanga nyengo yiweme yakumuperekera Yesu.

¹⁷Pa zuŵa lakudanga la chiphikiro cha Chingwa chambula chirungo, ŵasambiri ŵakhe ŵakiza kwa Yesu ŵakamufumba ŵakati, “Kasi mukukhumba kuti tikamunozgerani nkhu chakurya cha Paska?”

¹⁸Yesu wakazgora wakati, “Rutani mu msumba kwa munthu yunji, mukamuphalire kuti, ‘Musambizgi wakuti, nyengo yane yili pafupi, nkhukhumba kuryeramo Paska mu nyumba yako pamoza na ŵasambiri ŵane.’ ”

¹⁹Ŵasambiri ŵakaya kachita nga ndi umo Yesu wakaŵalangulira, ndipo ŵakanozga chakurya cha Paska.

²⁰Na mise, Yesu na ŵasambiri ŵakhe 12 ŵakakhara pa kurya.

²¹Apo ŵakaryanga, Yesu wakati, “Nadi nkhumuphalirani kuti yumoza wa imwe wandenderenge mphiska.”

²²Ŵasambiri ŵakaŵa na chitima chomene, ndipo yumozayumoza ŵakamba kumufumba Yesu kuti, “Kasi ndine Fumu?”

²³Yesu wakaŵazgora wakati, “Uyo wakukovya chingwa mu bakule pamoza nane, ndiyo wati wandenderenge mphiska.

²⁴Nadi Mwana wa Munthu wakuruta nga ndi umo kuli kulembekera na vya iyo mu malembo, kweni soka kwa munthu uyo wakumwendera mphiska Mwana wa Munthu! Mphanyi kukaŵa kuweme kuti munthu uyo wareke na kubabika wuwo.”

²⁵Ndipo Yudasi uyo wakamwendera mphiska Yesu wakati, “Kasi ndine, Musambizgi?” Yesu wakamuphalira wakati, “Ndiwe wayowoya ntheura.”

²⁶Apo ŵakaryanga, Yesu wakatora chingwa, wakawonga Chiuta ndipo wakachimenya na kuŵapa ŵasambiri ŵakhe wakati, “Torani ryaninge, ili ndi thupi lane.”

²⁷Wakatoraso nkhombo, wakati wawonga Chiuta wakaŵapa ŵasambiri wakati, “Mwaninge mose.

²⁸Chifukwa izi ndi ndopa zane izo zikukhozga phangano ndipo zikuthikira ŵanthu ŵanandi kuti zakwananga zawo zigowokereke.

²⁹Nkhumuphalirani kuti nditi ndimwengeso chara vya chipambi ichi cha mpheska mpaka pa zuŵa ilo ndamkumwa namwe kuphya mu Ufumu wa Ŵadada.”

³⁰Ŵakati ŵimba sumu, ŵakafuma na kuruta ku Phiri la maOlive.

³¹Ntheura Yesu wakati kwa iwo, “Usiku uno, imwe mose mukhuŵazgikenge mwa ine na kundireka ndekha nga ndi umo kuli kulembekera kuti, ‘Nditi nditimbe muliska ndipo mberere zamkumbininika.’

³²Kweni para ndawuka ku ŵakufwa, ndamkumudangirirani kuya ku Galileya.”

³³Petrosi wakazgora Yesu wakati, “Nanga wose ŵangakhuŵazgika mwa Imwe na kumurekani, ine ndekha chara.”

³⁴Yesu wakamuzgora wakati, “Petrosi, nadi nkhukuphalira kuti usiku weneuwo, tambala wandalire, wamkundikana katatu.”

³⁵Kweni Petrosi wakazgora wakati, “Nanga kungaŵa kuti ndifwe namwe pamoza, kuti ndamkumukanani chara.” Ŵasambiri ŵanyakhe wose nawo ŵakayowoya ntheura pera.

³⁶Penepapo Yesu na ŵasambiri ŵakhe ŵakaruta ku malo ghakuchemeka Getsemane. Ŵali kwenekura, Yesu wakati kwa iwo, “Kharani pano, ine nkhuruta kura kukaromba.”

³⁷Wakatora Petrosi pamoza na ŵana ŵa Zebediya ŵaŵiri, ndipo wakamba kuŵa na chitima na kukweŵeka chomene mu mtima.

³⁸Ndipo wakati kwa iwo, “Mtima wane uli na chitima chikuru chomene chakuti chinganditorera na ku nyifwa wuwo. Kharani papano, mucherezge pamoza nane.”

³⁹Wakati wendapo ka mtunda kachoko waka, wakawa kavunama na kuromba wakati, “Ŵadada, usange nchamachitiko, nkhombo iyi ya visuzgo muwuskeko kwa ine. Ndipouli kuti nga ndi umo nkhukhumbira ine chara, kweni kwakuyana na khumbo linu.”

⁴⁰Ntheura wakawerera ku ŵasambiri ŵakhe ŵatatu ŵara, ndipo wakaŵasanga kuti ŵali mu tulo. Wakayowoya na Petrosi wakati, “Kasi mwatondeka kucherezga nane nanga ndi ora limoza pera?

⁴¹Muŵe maso, murombenge kuti mureke kunjira mu kuyezgeka. Mtima ukukhumba nadi, kweni thupi ndakutomboroka.”

⁴²Wakarutaso kachiŵiri wakaromba wakati, “Ŵadada, usange mukukhumba kuti nkhombo iyi ya visuzgo yireke kundijumpha kuti mpaka ndimwe, ipo khumbo linu lichitike.”

⁴³Wakizaso ku ŵasambiri ŵakhe ndipo wakaŵasanga ŵali mu tulo, chifukwa tulo tukaŵa tunandi.

⁴⁴Wakaŵarekaso na kuruta kuya karomba kachitatu na kuyowoya mazgu gheneghara.

⁴⁵Wakiza ku ŵasambiri wakaŵafumba wakati, “Kasi muchali mu tulo na kupumula? Wonani, nyengo yafika yakumuperekera Mwana wa Munthu mu mawoko gha ŵakwananga.

⁴⁶Wukani tirutenge. Wonani wafika munthu uyo wakundendera mphiska.”

⁴⁷Apo Yesu wakaŵa wachali kuyowoya, Yudasi, yumoza wa 12 wakafika na mzinda ukuru wa ŵanthu awo ŵakatumika na ŵasofi ŵarara na ŵarara ŵa ŵaYuda, uku ŵayegha malupanga na zinthonga.

⁴⁸Kweni uyo wakamwendera mphiska wakaŵapa chimanyikwiro chakuti, “Uyo ndamkumufyofyontha ndi mweneuyo. Mukamukore.”

⁴⁹Penepapo Yudasi wakafika, ndipo wakati Yesu, “Muwonire Musambizgi.” Ndipo wakamufyofyontha.

⁵⁰Kweni Yesu wakamuphalira wakati, “Nganya, chita icho wizira.” Penepapo ŵanthu ŵara ŵakiza ŵakamukora Yesu.

⁵¹Ndipo yumoza wa awo ŵakaŵa na Yesu, wakanyoroska woko lakhe ndipo wakasorora lupanga lwakhe, wakaheta na kuwunguzura khutu la muteŵeti wa Musofi Mukuru.

⁵²Yesu wakamuphalira wakati, “Wezgera lupanga lwako mu malo ghakhe, pakuti wose awo ŵakutora lupanga ŵati ŵafwenge na lupanga.

⁵³Kasi mukumanya chara kuti ndingaromba Ŵadada sono pano kuti ŵanditumire ŵangelo ŵa nkhondo kuruska viwuru 12?

⁵⁴Sono kasi vingafiskika uli ivyo malembo ghakuyowoya kuti vikwenera kuŵa ntheura?”

⁵⁵Pa ora lira Yesu wakawuphalira mzinda ura wakati, “Kasi mwiza kandikora na malupanga na zinthonga nga ndi para ndili munkhungu? Zuŵa na zuŵa nkhakharanga mu Nyumba ya Chiuta na kusambizga, kweni kuti mukandikora chara.

⁵⁶Kweni vyose vyeneivi vyachitika mwakuti malembo gha nchimi ghafiskike.” Penepapo ŵasambiri wose ŵakamureka na kuchimbira.

⁵⁷Ndipo ŵanthu awo ŵakakora Yesu ŵakaruta nayo kwa Kayafa, Musofi Mukuru, uko ŵamanyi-marango na ŵarara ŵa ŵaYuda ŵakawungana.

⁵⁸Kweni Petrosi wakamurondezga pataliko kuya kafika ku chipanga cha Musofi Mukuru. Wakanjira mukati na kukhara pamoza na ŵalinda kuti wawone na umo ghamalirenge makani.

⁵⁹Ntheura ŵasofi ŵarara na wose ŵa mphara yikuru ya ŵaYuda ŵakapenja ukaboni wa utesi mwakuti ŵamukome Yesu.

⁶⁰Kweni kuti ŵakawusanga chara, nanga ŵakaboni ŵa utesi ŵakiza. Pa umaliro ŵakiza ŵanthu ŵaŵiri,

⁶¹ŵakati, “Munthu uyu wakayowoya kuti, ‘Nkhumanya kubwangandula Nyumba ya Chiuta na kuyizengaso mu mazuŵa ghatatu.’ ”

⁶²Musofi Mukuru wakimilira ndipo wakamufumba Yesu wakati, “Kasi ulije kanthu kakuzgorapo pa ivyo ŵanthu aŵa ŵakukupanikizgira navyo?”

⁶³Kweni Yesu wakati waka chete. Penepapo Musofi Mukuru wakaphalira Yesu kuti, “Mu zina la Chiuta wamoyo nkhukupempha kuti urape usange ndiwe Mesiya, Mwana wa Chiuta.”

⁶⁴Yesu wakati kwa iyo, “Ndimwe mwayowoya. Kweni nkhumuphalirani imwe mose kuti kwamba sono muti muwonenge Mwana wa Munthu wakhara ku woko la maryero la Chiuta Mwenenkhongono zose ndipo muti mumuwonengeso wakwiza mu maŵingu gha kuchanya.”

⁶⁵Penepapo Musofi Mukuru wakaparura malaya ghakhe wakati, “Munthu uyu watuka Chiuta. Chifukwa uli tikupenjaso ukaboni unyakhe? Sono namwe mwajipulikira matusi.

⁶⁶Kasi mukuti uli?” Ŵakazgora ŵakati, “Wakwenera kukomeka.”

⁶⁷Ntheura ŵakamufunyira mata ku maso na kumubwankhura. Ŵanji ŵakamupamantha na malupi na kuyowoya

⁶⁸kuti, “Iwe Mesiya, loska, kasi ndi njani wakupamantha na malupi?”

⁶⁹Sono Petrosi wakakhara pa baraza kuwaro, msungwana wanchito, wakiza na kumuphalira Petrosi kuti, “Iwe nawe ukaŵa pamoza na Yesu wa ku Galileya.”

⁷⁰Kweni wakakana panthazi pa wose wakati, “Kuti nkhumanya chara icho ukuyowoya.”

⁷¹Penepapo Petrosi wakafuma kuya ku chipata cha baraza, ndipo msungwana munyakhe wakamuwona wakaŵaphalira awo ŵakimilira penepara wakati, “Munthu uyu wakaŵa pamoza na Yesu wa ku Nazarete.”

⁷²Ndipo Petrosi wakakanaso wakati, “Nkhurapa nadi, munthu uyu nkhumumanya chara.”

⁷³Pakati pajumpha kanyengo kachoko waka, awo ŵakimilira penepara ŵakiza kufupi na kuyowoya na Petrosi, ŵakati, “Na unenesko wose, naweso uli yumoza wa iwo, pakuti kayowoyero kako nako kakukuchombola.”

⁷⁴Penepapo Petrosi wakamba kutemba na kurapa wakati, “Ndilije kumumanya munthu uyu.” Penepapo tambala wakalira.

⁷⁵Ndipo Petrosi wakakumbuka mazgu agho Yesu wakayowoya, ghakuti, “Pambere, tambala wandalire, wamkundikana katatu.” Penepapo Petrosi wakafumira kuwaro na kulira chomene.