Read new_tumbuka_bible Mateyu 27 Bible Online

Mateyu 27 - new_tumbuka_bible bible

Mateyu 27

¹Na mulenje machero ghakhe, ŵasofi ŵarara wose pamoza na ŵarara ŵa ŵaYuda, ŵakawungana pamoza kuti ŵapangane umo ŵangamukomera Yesu.

²Ŵakamukaka na kuruta nayo kwa Pilato mukuru wa chigaŵa.

³Para Yudasi uyo wakamwendera mphiska, wakawona kuti Yesu wakapika mrandu kuti wakomeke, wakajinyumwa ndipo wakawezga ndarama 30 za siliva kwa ŵasofi ŵarara na ŵarara ŵa ŵaYuda.

⁴Wakati, “Ndananga pakumwendera mphiska munthu wambula mrandu kuti wakomeke.” Kweni iwo ŵakati, “Kasi tili nacho na kanthu ise? Manyi wekha.”

⁵Yudasi wakataya pasi ndarama zira mu Nyumba ya Chiuta, wakaruta, ndipo wakaya kajikaka.

⁶Ŵasofi ŵarara ŵakasora ndarama zira ŵakati, “Kwakuyana na dango, ichi nchambula kulangurika kuti tiŵike ndarama izi mu thumba la ndarama za Nyumba ya Chiuta, pakuti ndi ndarama za mrandu wa ndopa.”

⁷Ntheura ŵakati ŵazomerezgana ŵakatora ndarama zira na kugula munda wa muwuvi wa viŵiya kuti ghaŵe malo ghakusungapo ŵalendo.

⁸Sono munda ura ukuchemeka, “Munda wa Ndopa” na lero wuwo.

⁹Penepapo mazgu gha nchimi Yeremiya ghakafiskika agho ghakuti, “Ŵakatora ndarama za siliva 30, zeneizo ŵaIsraele ŵakazomerezgana kuŵa mtengo wa munthu,

¹⁰ndipo ŵakagura munda wa muwuvi wa viŵiya nga ndi umo Fumu yikandilangulira.”

¹¹Sono Yesu wakimilira panthazi pa mukuru wa chigaŵa uyo wakamufumba kuti, “Kasi ndiwe karonga wa ŵaYuda?” Yesu wakazgora wakati, “Ndimwe mwayowoya.”

¹²Kweni para ŵasofi ŵarara na ŵarara ŵa ŵaYuda ŵakamupachanga, kuti wakazgorapo kanthu chara.

¹³Ntheura Pilato wakati kwa Yesu, “Asi ukuvipulika ivyo ŵakukupanikizga navyo?”

¹⁴Ndipo wakazgora kanthu chara, nanga ndi lizgu limoza pa ivyo ŵakamupachanga navyo. Ntheura mukuru wa chigaŵa wakazizwa.

¹⁵Pa nyengo ya Chiphikiro chilichose cha Paska, kakaŵa kaluso ka mukuru wa chigaŵa kuŵasutulira mukayidi yumoza mweneuyo ŵanthu ŵakakhumba.

¹⁶Pa nyengo iyo kukaŵa mukayidi yumoza wakumanyikwa chomene zina lakhe Baraba.

¹⁷Sono para ŵanthu ŵakawungana, Pilato wakaŵafumba wakati, “Ndi njani uyo mukukhumba kuti ndimusutulirani, Baraba panji Yesu uyo wakuchemeka Mesiya?”

¹⁸Pakuti wakamanya kuti ŵakamupereka Yesu chifukwa cha bina.

¹⁹Pa dera pa ichi, apo Pilato wakakhara pa chitengo cha kweruzgira, muwoli wakhe wakamutumira mazgu ghakuti, “Ureke kuchita nayo kanthu munthu murunji uyo pakuti ndasuzgika chomene usiku uno pakulota vya iyo.”

²⁰Kweni ŵasofi ŵarara na ŵarara ŵa ŵaYuda ŵakakhuŵirizga mzinda wa ŵanthu kuti ŵarombe Baraba, kweni ŵamukome Yesu.

²¹Mkuru wa chigaŵa wakati kwa iwo, “Kasi ndi njani wa ŵaŵiri aŵa uyo mukukhumba kuti ndimusutulirani?” Ŵakazgora ŵakati, “Mutisutulire Baraba!”

²²Pilato wakaŵafumba wakati, “Kasi sono ndichitechi nayo Yesu uyo wakuchemeka Mesiya?” Wose ŵakazgora ŵakati, “Mupayikani pa mphinjika!”

²³Pilato wakaŵafumba, “Chifukwa? Kasi wanangachi?” Penepapo wose ŵakachemerezga chomene ŵakati, “Mupayikani pa mphinjika!”

²⁴Para Pilato wakawona kuti chikumwandulirapo kanthu chara, kweni chivulupi pera ndicho chikuwuka, wakatora maji na kugeza mu mawoko panthazi pa mzinda wakati, “Ndilije mrandu pa nyifwa ya munthu uyu murunji, manyani mwekha.”

²⁵Ŵanthu wose ŵakazgora ŵakati, “Mrandu wa nyifwa yakhe uŵenge pa ise na pa ŵana ŵithu.”

²⁶Penepapo Pilato wakaŵasutulira Baraba, ndipo wakati wamuthyapula Yesu, wakamupereka kuti ŵamupayike pa mphinjika.

²⁷Ntheura ŵasilikari ŵa mukuru wa chigaŵa ŵakamutorera Yesu ku baraza la nyumba ya mukuru wa chigaŵa, ndipo ŵakawunganyiska ŵasilikari ŵanyawo wose na kumuzingirizga Yesu

²⁸Ŵakamuvura malaya ghakhe na kumuvwarika laya liswesi.

²⁹Ŵakaruka mphumphu ya minga na kumuvwarika pa mutu wakhe, ndipo ŵakamukorezga ndodo mu woko lakhe la maryero. Ntheura ŵakajikama panthazi pakhe na kumugoska ŵakati, “Muwonire Karonga wa ŵaYuda!”

³⁰Ŵakamufunyira mata na kumupoka ndodo yira ndipo ŵakamutimba nayo pa mutu.

³¹Ŵakati ŵamugoska ŵakamuvura laya liswesi lira na kumuvwarika malaya ghakhe ndipo ŵakaruta nayo kuya kamupayika pa mphinjika.

³²Apo ŵakarutanga, ŵakakumana na munthu wa ku Kurene zina lakhe Simoni. Ndipo ŵasilikari ŵakamuchichizga kuyegha mphinjika ya Yesu.

³³Ŵakati ŵafika pa malo agho ghakuchemeka kuti Gologota gheneagho ghakung'anamula kuti, “Malo gha Bwaza,”

³⁴ŵakamupa vinyo kuti wamwe ilo ŵakasazgako nduru. Kweni wakati walicheta, wakakana kumwa.

³⁵Ŵakati ŵamupayika Yesu pa mphinjika, ŵakagaŵana vyakuvwara vyakhe pakuchita mphenduzgo.

³⁶Ndipo ŵakakhara pasi na kumulindirira penepara.

³⁷Pachanya pa mutu wakhe, ŵakaŵikapo malembo gha mrandu wakhe ghakuti, “Uyu ndi Yesu Karonga wa ŵaYuda.”

³⁸Ndipo ŵankhungu ŵaŵiri ŵakapayikika nayo pamoza, yumoza ku maryero, munyakhe ku la mazere.

³⁹Ndipo awo ŵakajumphangapo ŵakamutukanga na kupukunya mitu yawo,

⁴⁰ŵakati, “Iwe ukatenge ukumanya kubwangandula Nyumba ya Chiuta na kuyizenga mu mazuŵa ghatatu, usange ndiwe nadi Mwana wa Chiuta, jiponoska na kukhira pa mphinjika.”

⁴¹Ntheura pera ŵasofi ŵarara na ŵamanyi-marango na ŵarara ŵa ŵaYuda ŵakamugoskanga ŵakati,

⁴²“Wakaponoska ŵanthu ŵanyakhe, kweni kuti wakumanya kujiponoska yekha chara. Usange ndi karonga wa Israele, wakhire sono pa mphinjika ndipo titi tipulikane nayo.

⁴³Wakugomezga mwa Chiuta, sono Chiuta wamuthaske, usange wakumukhumba. Pakuti iyo wakatenge, ‘Ndine Mwana wa Chiuta.’ ”

⁴⁴Ŵankhungu nawo, awo ŵakapayikika pamoza na Yesu, ŵakamutombozganga ntheura pera.

⁴⁵Kufuma pa 12 koloko kufika pa 3 koloko kukaŵa chisi pa charu chose.

⁴⁶Pafupi na nyengo ya 3 koloko, Yesu wakachemerezga na mazgu ghakuru wakati, “Eli, Eli, Lamasabakatani!” Ndiko kuti, “Chiuta wane, Chiuta wane, kasi mwandisidirachi?”

⁴⁷Awo ŵakimilira penepara ŵakapulika ndipo ŵakati, “Munthu uyu wakuchema nchimi Eliya.”

⁴⁸Penepapo yumoza wa iwo wakachimbira wakaya katora sipanje na kuyibizga mu vinyo lakusasa, wakayiweska ku thete ndipo wakapereka kwa Yesu kuti wamwe.

⁴⁹Ŵanji ŵakayowoya ŵakati, “Reka danga, tiwone usange Eliya wati wize kwiza kamuponoska.”

⁵⁰Yesu wakati wachemerezgaso na mazgu ghakuru, wakapereka mzimu wakhe.

⁵¹Penepapo chisalu chakuchinga cha mu Nyumba ya Chiuta chikaparuka pakati, kufuma kuchanya kufikira pasi. Charu chikandindima, ndipo majarawe ghakasweka.

⁵²Madindi ghakajurika ndipo ŵanthu ŵarunji awo ŵakafwa kale, ŵakawuka.

⁵³Ŵakafuma mu madindi ndipo Yesu wakati wawuka ku ŵakufwa, ŵakaya kanjira mu msumba wakupatulika mwenemumo ŵanthu ŵanandi ŵakaŵawona.

⁵⁴Kweni murara wa ŵankhondo pamoza na awo ŵakalondanga Yesu, ŵakati ŵawona chindindindi na ivyo vikachitika, ŵakopa chomene. Ndipo ŵakati, “Nadidi, Munthu uyu wakaŵa Mwana wa Chiuta!”

⁵⁵Ndipo ŵakaŵapo ŵanakazi ŵanandi awo ŵakalaŵiriranga patali, ŵeneawo ŵakamurondezganga na kumuteŵetera Yesu kufuma ku Galileya.

⁵⁶Mu ŵanakazi aŵa mukaŵa Mariya wa ku Magadala, Mariya nyina wa Yakhobe na Yosefe, ndiposo na nyina wa ŵana ŵa Zebediya.

⁵⁷Apo kukafipanga waka, kukiza munthu musambazi wakafumira ku Arimatiya, zina lakhe Yosefe. Iyo nayo wakaŵa musambiri wa Yesu.

⁵⁸Munthu uyu wakaruta kwa Pilato kuya karomba thupi la Yesu. Ndipo Pilato wakalangula kuti ŵamupe.

⁵⁹Yosefe wakatora thupi la Yesu na kulivungirizga mu sanda yituŵa ya kutowa.

⁶⁰Wakaŵika thupi mu dindi lakhe liphya ilo wakazonga mu jarawe. Wakakunkhuzgirapo libwe likuru pa muryango wa dindi lira na kuruta.

⁶¹Mariya wa ku Magadala pamoza na Mariya munyakhe ŵakaŵapo, ŵakakhara pasi kuthyana waka na dindi.

⁶²Kweni na machero ghakhe pa zuŵa la Sabata ŵasofi ŵarara na ŵaFarisi, ŵakiza panthazi pa Pilato.

⁶³Ŵakati, “Fumu, tikukumbuka kuti mupusikizgi yura apo wakaŵa wachali wamoyo wakayowoya kuti, ‘Pa mazuŵa ghatatu ndamkuwuka ku ŵakufwa.’

⁶⁴Ntheura mulangure kuti ŵalinda ŵaronde dindi kufikira zuŵa la chitatu, mwakuti ŵasambiri ŵakhe ŵareke kuya kamwiba na kuphalira ŵanthu kuti wali kuwuka ku ŵakufwa. Ntheura utesi wa pamanyuma wamkuŵa uheni kuruska wa pakudanga.”

⁶⁵Pilato wakaŵaphalira wakati, “Asi ŵalinda muli nawo, rutaninge mukalilinde dindi nga umo mukumanyira.”

⁶⁶Ntheura ŵakaruta ŵakaya kalikhozga dindi na kuzighilira libwe la pa muryango wa dindi na kuŵikapo ŵalinda.