Read new_tumbuka_bible Mateyu 28 Bible Online

Mateyu 28 - new_tumbuka_bible bible

Mateyu 28

¹Likati lajumpha zuŵa la Sabata kurazga ku matandakucha gha zuŵa lakudanga mu sabata, Mariya wa ku Magadala pamoza na Mariya munyakhe, ŵakaruta kuya kawona dindi.

²Ndipo mwamabuchibuchi kukaŵa chindindindi chikuru, pakuti mungelo wa Fumu wakiza kufuma kuchanya, wakagadabula libwe pa muryango wa dindi na kukharapo.

³Kawonekero kakhe kakaŵala nga ndi leza, vyakuvwara vyakhe navyo vikabuta nga ndi nyathutwe.

⁴Ŵalinda ŵakaŵa na wofi ukuru chomene ndipo ŵakatenthema na kuwa pasi nga mbanthu ŵakufwa.

⁵Mungelo wakati ku ŵanakazi ŵara, “Mungopanga, chifukwa nkhumanya kuti mukupenja Yesu, uyo wakapayikika pa mphinjika.

⁶Kuti wali pano chara. Wawuka ku ŵakufwa nga ndi umo wakayowoyera. Zaninge mughawone malo agho wakagonapo.

⁷Ntheura rutaninge luŵiro mukaŵaphalire ŵasambiri ŵakhe kuti, ‘Wawuka ku ŵakufwa, ndipo iyo wadangira kuruta ku Galileya. Kwenekura ndiko mwamkumuwona.’ Kumbukani ivyo ndamuphalirani.”

⁸Ntheura ŵanakazi ŵara ŵakawukako luŵiro ku dindi na wofi na chimwemwe chikuru, ndipo ŵakachimbira kuya kaŵaphalira ŵasambiri ŵakhe.

⁹Kweni apo ŵakarutanga kuya kaphalira ŵasambiri ŵakhe, Yesu wakakumana nawo, wakati, “Muwonire.” Penepapo ŵakiza kwa iyo, ŵakamukora mu malundi ghakhe na kumulambira.

¹⁰Ntheura Yesu wakaŵaphalira wakati, “Mungopanga, rutaninge mukaŵaphalire ŵasambiri ŵane kuti ŵarute ku Galileya. Kwenekura ndiko ŵamkundiwona.”

¹¹Apo ŵanakazi ŵakarutanga, ŵalinda ŵanji ŵakaruta mu msumba, ŵakaya kaŵaphalira ŵasofi ŵarara vyose ivyo vikachitika.

¹²Para ŵasofi ŵarara ŵakawungana na ŵarara ŵa ŵaYuda ŵakazomerezgana kuŵapa ŵalinda ndarama zinandi.

¹³Ŵakaŵaphalira ŵakati, “Muŵaphalirenge ŵanthu kuti ŵasambiri ŵakhe ŵakiza kamwiba na usiku apo ise tikaŵa mu tulo!

¹⁴Usange mukuru wa chigaŵa ŵaghapulika makani agha, tamkumuyowoyera makora ndipo imwe kuti mwamkunjira mu visuzgo chara.”

¹⁵Ntheura ŵalinda ŵara ŵakapokera ndarama na kuchita nga ndi umo ŵakaŵaphalirira. Ndipo makani agha ghali kutandazgika mukati mu ŵaYuda kufika mpaka sono.

¹⁶Ntheura ŵasambiri ŵara 11 ŵakaruta ku Galileya, ku phiri ilo Yesu wakaŵaphalira kuti ŵakakumane.

¹⁷Para ŵakamuwona ŵakamulambira. Kweni ŵanji ŵakakayika.

¹⁸Ntheura Yesu wakiza kwa iwo na kuyowoya nawo wakati, “Mazaza ghose ghapika kwa ine kuchanya na pasi.

¹⁹Ntheura rutani mukazgore ŵamitundu yose kuŵa ŵasambiri ŵane na kuŵabapatiza mu zina la Ŵadada na la Mwana na la Mzimu Mutuŵa.

²⁰Ndipo mukaŵasambizge kusungilira vyose ivyo ndamulangulirani. Ndipo ine ndili namwe mazuŵa ghose mpaka ku umaliro wa charu.”