Read new_tumbuka_bible Mateyu 4 Bible Online

Mateyu 4 - new_tumbuka_bible bible

Mateyu 4

¹Penepapo Mzimu wakamurongozgera Yesu ku mapopa kuti wakayezgeke na Satana

²Ndipo pamanyuma pakuziŵizga vyakurya mazuŵa 40 na mausiku 40, njara yikamukora.

³Ndipo penepapo Satana wakiza ndipo wakati kwa iyo, “Usange ndiwe Mwana wa Chiuta, langula mawe agha kuti ghazgoke vingwa.”

⁴Kweni Yesu wakamuzgora wakati, “Kuli kulembeka kuti, ‘Munthu kuti wakharenge wamoyo na chingwa pera chara, kweni na mazgu ghose agho Chiuta wakuyowoya.’ ”

⁵Ndipo Satana nga wakumutorera ku msumba wakupatulika na kumwimika pa msonjo wa Nyumba ya Chiuta,

⁶ndipo wakati kwa iyo, “Usange ndiwe Mwana wa Chiuta ujiponye pasi, pakuti kuli kulembeka kuti, ‘Chiuta wati walangure ŵangelo ŵakhe kukusungilira iwe. Iwo ŵati ŵakwankhe mu mawoko ghawo, mzire utimbiske lundi lako pa libwe.’ ”

⁷Yesu wakati kwa iyo, “Kuli kulembekaso kuti, ‘Ungayezganga Fumu Chiuta wako!’ ”

⁸Sono Satana wakamutoreraso Yesu pa phiri litali chomene na kumurongora maufumu ghose gha pano pasi na uchindami wawo,

⁹ndipo wakati kwa iyo, “Vyose ivi nditi ndikupenge usange uti undilambire na kundisopa.”

¹⁰Yesu wakati kwa iyo, “Wukapo iwe Satana, pakuti kuli kulembeka kuti, ‘Ulambirenge Fumu Chiuta wako, ndipo iyo pera ndiyo umuteŵeterenge!’ ”

¹¹Penepapo Satana wakamusida Yesu ndipo ŵangelo ŵakiza na kumuteŵetera.

¹²Para Yesu wakapulika kuti Yohane wakoreka, wakawukapo na kuruta ku Galileya.

¹³Ndipo wakawukamo mu Nazarete, wakaya kakhara mu Kaperenaumu, mu mphepete mwa nyanja mu chigaŵa cha Zebuloni na Nafutali,

¹⁴mwakuti ghafiskike mazgu agho yikayowoya nchimi Yesaya kuti,

¹⁵“Iwe charu cha Zebuloni na cha Nafutali, mu mphepete mwa nthowa yakuya ku nyanja, ku sirya la Yorodani, Galileya, charu cha ŵamitundu!

¹⁶Ŵanthu awo ŵakakharanga mu mdima, ŵawona ungweru ukuru. Awo ŵakakharanga mu charu cha mufwiri wa nyifwa, ungweru waŵaŵalira.”

¹⁷Kufuma nyengo yeneyira Yesu wakamba kupharazga wakati, “Ng'anamukani mu mtima pakuti Ufumu wa kuchanya waneng'enera.”

¹⁸Apo wakendanga mu mphepete mwa Nyanja ya Galileya, Yesu wakawona ŵana ŵaŵiri pa wiskewo, awo ŵakaŵa ŵarovi, Simoni uyo wakuthyika Petrosi na Andreya munung'una wakhe, iwo ŵakaponyanga mukwawu mu nyanja, pakuti ŵakaŵa ŵarovi.

¹⁹Yesu wakati kwa iwo, “Rondezgani ine, ndipo nditi ndimuzgoraninge ŵarovi ŵa ŵanthu.”

²⁰Penepapo ŵakasida mikwawu yawo, ndipo ŵakamurondezga Yesu.

²¹Pakurutilirapo kufuma para, wakawona ŵanyakhe ŵaŵiri, Yakhobe na munung'una wakhe Yohane, ŵana ŵa Zebediya. Iwo ŵakaŵa mu ngaraŵa pamoza na wiskewo, ŵakatandanga mikwawu yawo, ndipo Yesu wakaŵachema.

²²Penepapo ŵakasida ngaraŵa na wiskewo, ndipo ŵakamurondezga.

²³Yesu wakenda mu Galileya zingirizge, ndipo wakasambizganga mu nyumba zawo zakusoperamo na kupharazga uthenga uweme wa Ufumu wa Chiuta Ndipo wakachizgangaso ŵanthu ŵa nthenda za mitundumitundu na vyakuŵinya vyawo.

²⁴Lumbiri lwakhe lukatandazgika mu charu chose cha Siriya, ndipo ŵanthu ŵakayeghera kwa iyo ŵarwari wose awo ŵakaŵa na matenda gha mitundumitundu na vyakuŵinya, ndiposo na awo ŵakakoreka na mizimu yiheni, ŵa vizirisi ndiposo na ŵakufwa viŵaro, ndipo Yesu wakaŵachizga.

²⁵Mizinda yikuru yikamrondezganga kufuma ku Galileya, ku Misumba Khumi,[3] ku Yerusalemu, ku Yudeya ndiposo na ku sirya linyakhe la mronga wa Yorodani.