Read new_tumbuka_bible Mateyu 5 Bible Online

Mateyu 5 - new_tumbuka_bible bible

Mateyu 5

¹Yesu wakati wawona mizinda ya ŵanthu, wakakwerera mu phiri. Wakati wakhara pasi, ŵasambiri ŵakhe ŵakiza kwa iyo,

²ndipo wakamba kuŵasambizga kuti,

³“Mbakutumbikika awo mbakavu mu mzimu, pakuti Ufumu wa kuchanya ngwawo!

⁴Mbakutumbikika awo ŵakutengera, pakuti ŵati ŵasanguruskikenge!

⁵Mbakutumbikika ŵakuzika, pakuti ŵati ŵaharenge charu.

⁶Mbakutumbikika awo ŵakupulika njara na nyota chifukwa chakukhumba kuchita urunji. Pakuti ŵati ŵakhutiskiskenge!

⁷Mbakutumbikika ŵa lusungu, pakuti Chiuta wati waŵachitirenge lusungu!

⁸Mbakutumbikika ŵakutowa mu mtima, pakuti ŵati ŵawonenge Chiuta!

⁹Mbakutumbikika awo ŵakuŵika mutende, pakuti ŵati waŵachemenge ŵana ŵa Chiuta

¹⁰Mbakutumbikika awo ŵakuzikizgika chifukwa chakuchita ivyo Chiuta wakukhumba, pakuti Ufumu wa kuchanya ngwawo!

¹¹“Ŵakutumbikika ndimwe para ŵanthu ŵakumutombozgani, ŵakumuzikizgani, na kumuteterani uheni wose chifukwa cha ine.

¹²Kondwani, sekererani chomene, pakuti njombe yinu njikuru kuchanya. Ntheura ndimo ŵanthu ŵakazikizgira nchimi izo zikaŵako pambere imwe mundaŵeko.

¹³“Imwe ndimwe muchere wa charu. Kweni usange muchere wasukuruka, kasi nkhongono yakhe yingawezgekeramo uli? Kuti uliso na nchito chara kweni ukutayika waka kuwaro na kukandika na ŵanthu.

¹⁴“Imwe ndimwe ungweru wa charu. Msumba wakuzengeka pa phiri kuti ukubisika chara.

¹⁵Ŵanthu kuti ŵakukozga nyali na kuyiŵika kusi ku chidunga chara, kweni ŵakuyiŵika pa malo ghakuwonekera ndipo yikuŵaŵalira wose ŵa mu nyumba.

¹⁶Ntheura ndimo ungweru winu uŵalirenge panthazi pa ŵanthu, mwakuti para ŵakuwona milimo yinu yiweme, ŵachindikenge Ŵawiskemwe ŵa kuchanya.”

¹⁷“Rekani kughanaghana kuti ndili kwiza kumarizga Dango la Mozesi panji visambizgo vya nchimi chara. Kuti nkhizira kughamazga chara kweni kughafiska.

¹⁸Nadi nkhumuphalirani kuti, mpaka charu cha kuchanya na charu cha pasi vimare, kwamkuŵavye nanga nkhalembo kamoza panji kadontho kamoza ako kamuwukamo mu Dango, visuke vifiskike vyose.

¹⁹Ntheura yose uyo wangapepura limoza lichoko chomene la marango agha kusambizga ŵanyakhe kuchita ntheura, wamkuchemeka muchoko wa wose mu Ufumu wa kuchanya. Kweni yose uyo wakughachita na kusambizga ŵanyakhe, ndiyo wamkuchemeka mukuru mu Ufumu wa kuchanya.

²⁰Pakuti nkhumuphalirani, kwambula kuti urunji winu uruske urunji wa ŵamanyi-marango na ŵaFarisi, kuti mwamkunjiramo chara mu Ufumu wa kuchanya.”

²¹“Mulikupulika kuti kukayowoyeka ku ŵamwaka kuti, ‘Ungakomanga, yose uyo wakukoma wamkweruzgika.’

²²Kweni ine nkhumuphalirani kuti, yose uyo wakukaripira mubali wakhe[4] ngwakwenera kweruzgika. Ndipo yose uyo wakusunjizga mubali wakhe kuti, ‘Kapunjunju iwe’ ngwakwenera kweruzgika ku mphara yikuru. Ndipo yose uyo wakuti, ‘Chindere iwe!’ ngwakwenerera kuponyeka mu Gehena la moto.

²³Ntheura usange ukupereka chawanangwa chako pa jochero ndipo penepapo ukukumbuka kuti mubali wako wali nawe na kafukwa,

²⁴uchireke chawanangwa chako panthazi pa jochero, ndipo urute ukaphemane nanga na mubali wako, sono ndipo wizenge na kupereka chawanangwa chako kwa Chiuta.

²⁵“Uphemane luŵiro na uyo wali na chimphindikwa na iwe apo muchali mu nthowa, mzire pakunji uyo wali na chimphindikwa na iwe, wakupereke ku mweruzgi, ndipo mweruzgi wakupereke ku musilikari. Musilikari nayo wakuponye mu gadi.

²⁶Nkhukuphalira unenesko wose kuti, uti ufumengemo chara usuke ulipe kandarama ako kangukharako.”

²⁷“Mulikupulika kuti kukayowoyeka ku ŵamwaka kuti, ‘Ungaleŵanga.’

²⁸Kweni ine nkhumuphalirani kuti, yose uyo wakulaŵiska mwanakazi na kumukhumbira waleŵana nayo kale mu mtima wakhe.

²⁹Ndipo usange jiso lako la maryero likukwanangiska, ulikozombore na kulitaya. Pakuti nchiweme kwa iwe kuti chimoza cha viŵaro vyako chiwukeko, kuruska kuti thupi lako lose liponyeke mu Gehena.

³⁰Ndipo usange woko lako la maryero likukwanangiska, ulidumureko na kulitaya. Pakuti nchiweme kwa iwe kuti chimoza cha viŵaro vyako chiwukeko kuruska kuti thupi lako lose liponyeke mu Gehena.

³¹“Kukayowoyekaso kuti, ‘Yose uyo wakupata muwoli wakhe, wakwenera kumupa karata wa chipati.’

³²Kweni ine nkhumuphalirani kuti, yose uyo wakupata muwoli wakhe kwambula chifukwa cha uleŵe, wakumuzgora kuŵa muleŵe. Ndipo yose uyo wakutora mwanakazi uyo wapatika, wakuleŵa.

³³“Mulikupulikaso kuti kukayowoyeka ku ŵamwaka kuti, ‘Mureke kurapira mwa utesi, kweni fiskani virapo vyinu kwa Fumu.’

³⁴Kweni ine nkhumuphalirani kuti, mungarapanga na pachoko pose, nanga nkhurapira kuchanya pakuti ndicho chizumbe cha Chiuta.

³⁵Panji kurapira na charu cha pasi, pakuti nchitambaliro cha malundi ghakhe, panji kurapira na mu Yerusalemu, pakuti ndi msumba wa Karonga Mukuru.

³⁶Nanga nkhurapira ku mutu wako, pakuti ulije kumanya kuzgora nanga nkhasisi kamoza kuŵa katuŵa, panji kafipa.

³⁷Rekani icho muyowoyenge chiŵe waka ‘Inya’ panji ‘Yayi’, chilichose icho muti muyowoyenge kujumpha apa nchakufumira ku uheni.

³⁸“Muli kupulika kuti kukayowoyeka kuti, ‘Jiso lifwirane na jiso, jino na jino.’

³⁹Kweni ine nkhumuphalirani kuti, ‘Mungalimbananga nayo munthu muheni.’ Kweni usange munthu wakukutimba pa thama lako la maryero umuzgorereso na linyakhe.

⁴⁰Ndipo usange munthu wakukhumba kukutorera ku mphara ya mirandu na kutora laya lako, umurekere na chirundu chako wuwo.

⁴¹Ndipo usange munthu wakukuchichizga kuruta nayo mtunda wa kilomita yimoza, iwe wende nayo mitunda ya makilomita ghaŵiri.

⁴²Uyo wakukuromba kanthu, umupe. Ndipo uyo wakubwereka kanthu kwa iwe, ureke kumunora.

⁴³“Mulikupulika kuti kukayowoyeka kuti, ‘Utemwenge muzengezgani wako, ndipo utinkhenge murwani wako.’

⁴⁴Kweni ine nkhumuphalirani kuti, temwani ŵarwani ŵinu, ndipo muŵaromberenge awo ŵakumuzikizgani,

⁴⁵mwakuti muŵenge ŵana ŵa Wiskemwe wa kuchanya. Pakuti iyo wakufumiskira dazi lakhe pa ŵaheni na ŵaweme, ndipo wakurokweska vura pa ŵarunji na ŵaheni.

⁴⁶Chifukwa usange mukutemwa awo ŵakumutemwani pera, kasi pali njombe uli? Asi ŵakusonkheska msonkho nawo ŵakuchita ntheura?

⁴⁷Ndipo usange mukutauzga ŵabali ŵinu pera, nchichi icho mukuŵaruskirapo ŵanthu ŵanji? Asi ŵamitundu nawo ŵakuchita ntheura?

⁴⁸Ntheura imwe muŵenge ŵakufikapo, nga ndi umo Ŵawiskemwe ŵa kuchanya ŵaliri ŵakufikapo.