Read new_tumbuka_bible Mateyu 6 Bible Online

Mateyu 6 - new_tumbuka_bible bible

Mateyu 6

¹“Chenjerani, mureke kuchita milimo yinu ya urunji panthazi pa ŵanthu mwakuti ŵamuwonani. Usange mukuchita ntheura, mulije njombe kufuma ku Ŵawiskemwe ŵa kuchanya.

²“Ntheura para ukupereka vya lusungu ungajirizgiranga mbata, nga ndi umo ŵakuchitira ŵapusikizgi mu nyumba zakusoperamo na mu misewu ya mu msumba. Ŵakuchita ntheura kuti ŵarumbike na ŵanthu. Nadi nkhumuphalirani kuti ŵali kupokera kale njombe yawo.

³Kweni iwe, para ukupereka vya lusungu, woko lako la mazere lireke kumanya icho woko la maryero likuchita,

⁴mwakuti vya lusungu vyako viŵenge vya ku udesi. Ndipo Ŵawuso awo ŵakuwona mu udesi, ŵati ŵakupe njombe.

⁵“Para mukuromba, mureke kuŵa nga mbapusikizgi, pakuti ŵakutemwa kwimilira na kuromba mu nyumba zakusoperamo na mu zimphatukano za misewu kuti ŵanthu ŵaŵawone. Nadi nkhumuphalirani kuti, ŵali kupokera kale njombe yawo.

⁶Kweni iwe para ukuromba, unjire ku chipinda chako ndipo ujareko ku muryango na kuromba ku Ŵawuso awo ŵali ku udesi. Ndipo Ŵawuso awo ŵakuwona vya ku udesi, ŵati ŵakupe njombe.

⁷“Para mukuromba, mungawerezgangawerezganga mazgu nga ndi umo ŵakuchitira ŵamitundu. Chifukwa ŵakughanaghana kuti ŵati ŵapulikikwe chifukwa cha mazgu ghawo ghanandi.

⁸Ntheura mungaŵanga nga ndiwo chara, chifukwa Ŵawiskemwe ŵakumanya ivyo mukukavuka pambere mundaŵarombe.

⁹Ntheura para mukuromba mutenge: ‘Ŵadada ŵithu imwe muli kuchanya, zina linu lichindikike.

¹⁰Ufumu winu wize, khumbo linu lichitike pano pasi nga nkhuchanya.

¹¹Mutipe lero kurya kwithu kwa lero,

¹²Mutigowokere ise kwananga kwithu, nga ndi umo nase tikuŵagowokerera awo ŵakutinangira.

¹³Mungatitoreranga mu kuyezgeka, kweni mutithaske kwa Muheni yura.’ [Pakuti ufumu, nkhongono, na uchindami nvyinu kwa muyirayira. Ameni.]

¹⁴“Chifukwa usange mukuŵagowokera ŵanthu ivyo ŵakumunangirani, Ŵawiskemwe ŵa kuchanya nawoso ŵati ŵamugowokeraninge.

¹⁵Kweni usange mukureka kuŵagowokera ŵanthu ivyo ŵakumunangirani, Ŵawiskemwe ŵa kuchanya nawoso, kuti ŵati ŵamugowokeraninge chara ivyo mwananga.

¹⁶“Para mukuziŵizga vyakurya, mungarongoranga visko vya chitima nga mbapusikizgi, pakuti ŵakusintha visko vyawo mwakuti ŵawoneke ku ŵanthu kuti ŵakuziŵizga vyakurya. Nadi nkhumuphalirani kuti ŵali kupokera kale njombe yawo.

¹⁷Kweni iwe para ukuziŵizga vyakurya, ugeze ku maso na kuphakazga mutu wako na mafuta,

¹⁸mwakuti ŵanthu ŵareke kumanya kuti ukuziŵizga vyakurya, kweni ku Ŵawuso ŵa ku udesi pera ndiwo. Ndipo Ŵawuso awo ŵakuwona vya mu udesi, ŵati ŵakupe njombe yako.

¹⁹“Mungajiŵikiranga usambazi pano pasi, apo fufuzi na murosko vikuwunanga, ndiposo ŵankhungu nawo ŵakugumura na kwiba.

²⁰Kweni mujiŵikire usambazi kuchanya kweneuko nanga ndi fufuzi panji murosko kuti vikuwunanga chara, ndipo nanga mbankhungu kuti ŵakugumura na kwiba chara.

²¹Chifukwa uko kuli usambazi wako, ndiko kuŵengeso na mtima wako.

²²“Maso ndi nyali ya thupi. Usange maso ghako ngaweme, thupi lako lose liti liŵenge na ungweru ukuru.

²³Kweni usange maso ghako ngaheni, thupi lako lose liti liŵenge na chisi chikuru. Ntheura usange ungweru uwo uli mwa iwe ukuzgoka chisi, nawo mbukuru wa chisi cheneichi!

²⁴“Palije munthu uyo wangateŵetera ŵene-nchito ŵaŵiri. Chifukwa panyakhe wati watinkhenge yumoza na kutemwa munyakhe. Panji wati waskepereranenge na yumoza na kumuyuyura munyakhe. Ntheura mulije kumanya kuteŵetera Chiuta na usambazi.

²⁵“Ntheura nkhumuphalirani kuti, mungenjerwanga na umoyo winu, kuti muryengechi, panji kuti mumwengechi, nesi na za thupi linu kuti muvwarengechi. Asi umoyo ukuruska vyakurya, ndipo thupi nalo likuruska vyakuvwara?

²⁶Wonani viyuni vya mudera, kuti vikumija chara, nanga nkhuvuna nesi kuronga mu nthamba, ndipouli Ŵawiskemwe ŵa kuchanya ŵakuvilera. Asi muli ŵakuzirwa kuruska ivyo?

²⁷Ndipo ndi njani mwa imwe uyo pa chifukwa cha kwenjerwa, wangasazgirako mazuŵa ku umoyo wakhe?

²⁸“Kasi mukwenjerwerachi na vyakuvwara? Ghanaghanani na maluŵa gha mu thengere na umo ghakukulira. Kuti ghakugwira nchito chara panji nesi kuruka.

²⁹Kweni nkhumuphalirani kuti, nanga ndi Karonga Solomoni mu uchindami wakhe wose, kuti wakavwarapo vyakutowa nga ndi umo ghaliri maluŵa agha chara.

³⁰Kweni usange Chiuta wakuvwarika ntheura utheka wa mu thengere, uwo muhanya uno ngwamoyo, ndipo na machero ukuponyeka pa moto, asi chomene kwakuruska wati wamuvwarikaninge imwe, mwe mwa ŵanthu ŵa chipulikano chichoko?

³¹“Ntheura rekani kwenjerwa kuti, ‘Kasi tiryengechi?’ Panji ‘Kasi timwengechi?’ Panji ‘Tivwarengechi?’

³²Pakuti vyose vyeneivi ndivyo ŵamitundu ŵakupenja. Ŵawiskemwe ŵa kuchanya ŵakumanya kuti mukusoŵerwa vyose vyeneivi.

³³Kweni penjani nanga Ufumu wa Chiuta na urunji wakhe ndipo vyose ivi viti viŵengeso vyinu.

³⁴Ntheura rekani kwenjerwa na vya na machero chifukwa zuŵa la machero liti lijenjerwerenge lekha. Zuŵa lirilose liri na suzgo lakhe lakukwanira.