Read new_tumbuka_bible Mateyu 7 Bible Online

Mateyu 7 - new_tumbuka_bible bible

Mateyu 7

¹“Mungeruzganga, mwakuti namwe Chiuta wareke kumweruzgani

²Pakuti nga ndi umo mukweruzgira ŵanyinu, ndimo namwe Chiuta wamkumweruzgirani. Ndipo mweso uwo mukupimira ŵanyinu pakweruzga, Chiuta nayo wizamkupimira imwe.

³Chifukwa uli ukulaŵiska chiswaswa icho chili mu jiso la mubali wako, kweni khuni ilo liri mu jiso lako kuti ukulighanaghanako chara?

⁴Kasi ungaphalira uli mubali wako kuti, ‘Reka ndifumyemo chiswaswa icho chili mu jiso lako’ apo khuni liri mu jiso lako?

⁵Wamupusikizgi iwe, udange wafumyamo khuni ilo liri mu jiso lako, sono ndipo uti uwonenge makora chiswaswa icho chili mu jiso la mubali wako.

⁶“Mungazipanga ncheŵe icho nchakupatulika, nesi kuziponyera nkhumba mikanda yakuzirwa, mzire zikandepo na malundi ghawo na kung'anamuka ndipo zimupwetekani.

⁷“Rombani, ndipo ŵati ŵamupaninge. Penjani ndipo muti musangenge. Khung'uskani, ndipo ŵati ŵamujuliraninge.

⁸Pakuti yose uyo wakuromba, wakupokera, uyo wakupenja wakusanga, ndipo uyo wakukhung'uska, kuti kumujulikirenge.

⁹Kasi ndi njani mwa imwe, usange mwana wakhe wakuromba chingwa, wakumupa libwe?

¹⁰Panji para wakuromba somba, wakumupa njoka?

¹¹Usange imwe mwa ŵaheni, mukumanya kuŵapa ŵana ŵinu vyawanangwa viweme, asi chomene kwakuruska Ŵawiskemwe awo ŵali kuchanya ŵati ŵaŵapenge vyawanangwa viweme awo ŵakuŵaromba?

¹²“Ntheura ivyo mukukhumba kuti ŵanthu ŵamuchitiraninge, ndivyo namwe muŵachitirenge. Chifukwa ichi ndicho ching'anamulo cha Dango la Mozesi na visambizgo vya nchimi.

¹³“Njiraninge pa chipata chifinyi. Pakuti chipata chakuya ku Gehena nchisani, ndipo nthowa yakhe nayo njipusu, rekani mbanandi awo ŵakwenda mwenemumo.

¹⁴Kweni chipata chakuya ku umoyo nchifinyi, nthowa yakhe nayo njinonono, rekani mbachoko awo ŵakuyisanga.

¹⁵“Chenjerani na nchimi zitesi, izo zikwiza kwa imwe mu kawonekero nga ndi mberere, kweni mukati ndi mphumphi zakukwapura.

¹⁶Muti muŵamanyenge na ivyo ŵakuchita. Kasi ŵanthu ŵakuponthora mpheska mu minga, panji vikuyu mu nthura?

¹⁷Ntheura khuni lose liweme likupambika vipambi viweme, kweni khuni liheni likupambika vipambi viheni.

¹⁸Khuni liweme kuti likupambika vipambi viheni chara, nanga ndi khuni liheni kuti likupambika vipambi viweme chara.

¹⁹Khuni lambula kupambika vipambi viweme likutemeka na kuponyeka mu moto.

²⁰Ntheura nchimi zitesi, muti muzimanyirenge na ivyo zikuchita.

²¹“Kuti ndi yose uyo wakuti, ‘Fumu, Fumu’ mweneuyo wati wanjirenge mu Ufumu wa kuchanya chara, kweni uyo wakuchita khumbo la Ŵadada ŵa kuchanya ndiyo.

²²Pa zuŵa lira lakweruzga ŵanandi ŵamkuyowoya kwa ine kuti, ‘Fumu, Fumu, asi tikapharazganga mu zina linu, ndipo mu zina linu tikafumyanga viŵanda na kuchita milimo ya nkhongono yinandi mu zina linu?’

²³Penepapo ndamkuŵaphalira pakweru kuti, ‘Nkhamumanyaninge chara. Fumaniko kwa ine, imwe mukuchita uheni.’

²⁴“Ntheura yose uyo wakupulika mazgu ghane gheneagha na kughachita, wali nga ndi munthu wa mahara uyo wakazenga nyumba yakhe pa jarawe.

²⁵Vura yikarokwa, mironga yikazura, ndipo mphepo yikaputa na kutimba nyumba yira. Kweni kuti yikawa chara, chifukwa yikazengeka pa jarawe.

²⁶“Kweni yose uyo wakupulika mazgu ghane gheneagha na kureka kughachita, wali nga ndi munthu uyo nchindere uyo wakazenga nyumba yakhe pa muchenga.

²⁷Vura yikarokwa, mironga yikazura, mphepo yikaputa na kutimba nyumba yira, ndipo yikawa. Kuwa kwakhe kukaŵa kukuru chomene.”

²⁸Para Yesu wakamara kuyowoya vinthu ivi, mizinda ya ŵanthu yikazizwa na usambizgi wakhe.

²⁹Pakuti ŵakaŵasambizga nga ndi yumoza uyo wakaŵa na mazaza, nga ndi umo ŵakasambizgiranga ŵamanyi-marango chara.