Read new_tumbuka_bible Mateyu 8 Bible Online

Mateyu 8 - new_tumbuka_bible bible

Mateyu 8

¹Yesu wakati wikha kufuma ku phiri, mizinda yikuru yikamurondezga.

²Munthu wa vyoni wakiza kwa iyo wakajikama panthazi pakhe wakati, “Fumu, usange mukukhumba, munganditozga.”

³Yesu wakanyoroska woko lakhe, wakamukhwaska wakati, “Inya, nkhukhumba, tozgeka!” Penepapo wakatozgeka ku vyoni vyakhe.

⁴Ntheura Yesu wakati kwa iyo, “Chenjera, ureke kuphalirapo munthu nanga njumoza. Kweni rutanga, ukajirongore kwa musofi, ndipo ukapereke chawanangwa icho Mozesi wakalangula kuŵa chipanikizgo ku ŵanthu.”

⁵Apo Yesu wakanjiranga waka mu Kaperenaumu, murara wa ŵankhondo wakiza kwa iyo na kumuŵeya,

⁶wakati, “Fumu, muteŵeti wane wagona pasi mu nyumba, wakutondeka kwenda, ndipo wakusuzgika chomene.”

⁷Yesu wakati kwa iyo, “Nkhwiza ndipo ndizamkuchizga.”

⁸Murara wa ŵankhondo wakazgora wakati, “Fumu, ndilije kwenera kuti mwize na kunjira mu nyumba yane. Kweni muyowoye mazgu pera, ndipo muteŵeti wane wachirenge.

⁹Pakuti ine nane ndili munthu pasi pa ŵamazaza, kweniso ndili na ŵasilikari pasi pane. Ndipo nkhuti ku yumoza, ‘Ruta!’ Ndipo wakuruta. Ndiposo ku munyakhe kuti, ‘Zanga’ ndipo wakwiza, nakutiso ku muzga wane, ‘Chita ichi’ ndipera wakuchita.”

¹⁰Para Yesu wakati wapulika ichi, wakazizwa chomene, ndipo wakati ku awo ŵakamurondezga, “Nadi nkhumuphalirani kuti, ndilije kusangamo chipulikano cha ntheura nanga ndi mu ŵaIsraele.

¹¹Ntheura nkhumuphalirani kuti, ŵanandi ŵamkwiza kufuma ku mafumiro gha dazi na ku manjiliro ghakhe, ndipo ŵamkukhara pa kurya pamoza na Abrahamu, Yisake na Yakhobe mu Ufumu wa kuchanya.

¹²Kweni awo ŵakwenera kuŵa mu Ufumu, ŵamkuponyeka kuwaro ku mdima kwenekuko ŵamkulira na kuska mino.”

¹³Ndipo Yesu wakayowoya na murara wa ŵankhondo yura wakati, “Ruta, chikakuchitikire kwakuyana na chipulikano chako.” Ndipo muteŵeti wakhe wakachira pa nyengo yeneyira.

¹⁴Yesu wakati wanjira mu nyumba ya Petrosi wakawona nyinavyara wa Petrosi wagona pasi, warwara na kuthukira kwa mu thupi.

¹⁵Wakamukhwaska pa woko lakhe ndipo kuthukira kwa mu thupi kukumara. Penepapo wakawuka na kwamba kuŵateŵetera.

¹⁶Mise yeneyira, ŵanthu ŵanandi ŵakiza kwa Yesu na awo ŵakakoreka na viŵanda. Yesu wakayifumya mizimu yiheni na mazgu pera na kuŵachizga wose awo ŵakaŵa ŵarwari.

¹⁷Ichi chikachitika mwakuti ghafiskike mazgu agho nchimi Yesaya wakachima kuti, “Iyo wakatora vyakuŵinya vyithu, ndipo wakayegha matenda ghithu.”

¹⁸Para Yesu wakati wawona mizinda yikuru ya ŵanthu iyo yikamuzingirizga, wakalangula kuti ŵambukire ku sirya linyakhe.

¹⁹Ndipo mumanyi-marango yumoza wakiza wakayowoya nayo wakati, “Musambizgi, ndimurondezganinge kose uko mukuruta.”

²⁰Yesu wakati kwa iyo, “Ŵakambwe ŵali na michembo, ndipo viyuni vya mudera vili na vivimbo vyawo, kweni Mwana wa Munthu walije malo apo wangagoneka mutu wakhe.”

²¹Yumoza wa ŵasambiri wakati, “Fumu, rekani nkhasunge danga ŵadada.”

²²Kweni Yesu wakati, “Ndirondezga, uŵareke ŵakufwa ŵasunge ŵakufwa ŵanyawo.”

²³Yesu wakanjira mu ngaraŵa, ndipo ŵasambiri ŵakhe ŵakumurondezga.

²⁴Mwamabuchibuchi, chimphupuru chikuru chikawuka pa nyanja, mwakuti ngaraŵa yikabiranga na majigha. Kweni Yesu wakagona.

²⁵Penepapo ŵasambiri ŵakhe ŵakiza kwa iyo ŵakamuwuska ŵakati, “Tiponoskani, Fumu, tikufwa!”

²⁶Yesu wakati kwa iwo, “Mwa ŵa chipulikano chichoko imwe, chifukwa uli mukopa?” Penepapo Yesu wakawuka na kuchenya chimphepo na nyanja. Ndipo kukaŵa bata likuru.

²⁷Ŵasambiri ŵakhe ŵakazizwa ŵakati, “Ndi munthu uli mweneuyu pakuti nanga ndi mphepo na nyanja vikumupulikira?”

²⁸Ndipo para Yesu wakafika ku sirya linyakhe la nyanja ku charu cha Gadara, ŵanthu ŵaŵiri awo ŵakakoreka na viŵanda ŵakakumana nayo, ŵakufumira ku mararo. Ŵanthu aŵa ŵakaŵa ŵakari chomene, ntheura kukaŵavye na munthu na yumoza wakujumphako ku nthowa yira.

²⁹Ndipo ŵakachemerezga ŵakati, “Kasi mukukhumba kuchitachi nase imwe Mwana wa Chiuta? Kasi mwiza kuno kwiza katiyuzga pambere nyengo yindafike?”

³⁰Kweni pafupiko na iwo, pakaŵa mskambo wa nkhumba zinandi izo zikaryanga.

³¹Mizimu yiheni yira yikamuŵeya Yesu kuti, “Usange mukutifumyamo, mutitume mu nkhumba izo.”

³²Yesu wakayizgora wakati, “Rutaninge!” Ndipo yikati yafuma yikaya kanjira mu nkhumba zira. Penepapo mskambo wose wa nkhumba ukagodobokera mu nyanja pa usendemuko na kumirwa, ndipo mskambo wose ukafwira mu maji.

³³Ŵaliska ŵakachimbilira ku msumba na kuya kaphara vyose ivi na icho chikachitika ku ŵanthu awo ŵakakoreka na mizimu yiheni.

³⁴Penepapo ŵanthu wose ŵa mu msumba ŵakaruta kuya kakumana na Yesu. Ndipo ŵakati ŵamuwona, ŵakamuŵeya Yesu kuti wafumemo mu chigaŵa chawo.