Read new_tumbuka_bible Mariko 1 Bible Online

Mariko 1 - new_tumbuka_bible bible

Mariko 1

¹Uku ndi kwamba kwa Uthenga Uweme wa Yesu Khristu, Mwana wa Chiuta.

²Nga ndi umo nchimi Yesaya wakalembera kuti, “Chiuta wakuti, ‘Wonani, nditi nditume thenga lane panthazi pako leneilo lamkunozgera iwe nthowa yako.’

³Mazgu gha munthu wakuchemerezga mu mapopa kuti, ‘Nozgani msewu wa Fumu, nyoroskani nthowa zakhe!’ ”

⁴Ntheura Yohane Mubapatizi wakawoneka mu mapopa, wakupharazga ubapatizo wakung'anamuka mu mtima kuti zakwananga zigowokereke.

⁵Ŵanthu ŵanandi ŵa chigaŵa chose cha Yudeya na wose ŵa mu Yerusalemu ŵakakhutukira kwa iyo. Ŵakati ŵazomera zakwananga zawo, ŵakabapatizika na iyo mu mronga wa Yorodani.

⁶Yohane wakavwaranga chakuvwara cha weya wa ngamila na lamba wa chikumba mu chiuno chakhe. Chakurya chakhe chikaŵa zombe na uchi wa mu thengere.

⁷Upharazgi wakhe ukaŵa wakuti, “Kunyuma zane kukwiza wankhongono wakuruska ine, mweneuyo ine nkhwenerera kuti ndisindame na kusutula nthambo za viryato vyakhe chara.

⁸Ine nkhumubapatizani na maji, kweni iyo wizamkumubapatizani na Mzimu Mutuŵa.”

⁹Mu mazuŵa gheneghara Yesu wakiza kufuma ku msumba wa Nazarete mu chigaŵa cha Galileya, ndipo Yohane wakamubapatiza mu mronga wa Yorodani.

¹⁰Apo wakazuwukanga waka mu maji, penepapo wakawona kuchanya kukujurika, ndipo Mzimu wakukhilira pa iyo nga ndi njiŵa.

¹¹Ndipo mazgu ghakapulikikwa kufuma kuchanya ghakati, “Iwe ndiwe Mwana wane wakutemweka, wa mweneiwe nkhucha nawe.”

¹²Penepapo Mzimu ukamurongozgera Yesu ku mapopa.

¹³Ndipo wakaŵa mu mapopa mazuŵa 40, kuyezgeka na Satana. Kwenekura wakakharanga pamoza na nyama za mu thengere ndipo ŵangelo ŵakamuteŵetera.

¹⁴Yohane Mubapatizi wakati wakoreka na kuŵikika mu gadi, Yesu wakiza ku Galileya na kwamba kupharazga Uthenga Uweme wakufuma kwa Chiuta.

¹⁵Yesu wakati, “Nyengo yakwana, ndipo Ufumu wa Chiuta waneng'enera. Ng'anamukani mu mtima na kupulikana na Uthenga Uweme.”

¹⁶Apo Yesu wakendanga mu mphepete mwa Nyanja ya Galileya, wakawona Simoni na munung'una wakhe Andreya ŵakuponya mukwawu mu nyanja pakuti ŵakaŵa ŵarovi.

¹⁷Yesu wakati kwa iwo, “Rondezgani ine, ndipo nditi ndimuzgoraninge ŵarovi ŵa ŵanthu.”

¹⁸Ndipo penepapo ŵakasida mikwawu yawo na kumurondezga Yesu.

¹⁹Ndipo wakati wendapo pachoko waka, wakawona Yakhobe, mwana wa Zebediya pamoza na Yohane, munung'una wakhe. Iwo ŵakaŵa mu ngaraŵa yawo, ŵakatandanga[1] mikwawu.

²⁰Penepapo Yesu wakaŵachema. Ndipo iwo ŵakamusida wiskewo Zebediya mu ngaraŵa pamoza na ŵanchito ŵakhe, na kumurondezga Yesu.

²¹Yesu na ŵasambiri ŵakhe ŵakiza mu msumba wa Kaperenaumu. Pa zuŵa la Sabata Yesu wakaya kanjira mu nyumba ya kusoperamo, ndipo wakamba kusambizga ŵanthu.

²²Ŵanthu ŵakati ŵamupulika, ŵakazizwa na kusambizga kwakhe, pakuti iyo wakasambizganga na mazaza kupambana na ŵamanyi-marango.

²³Mu nyumba mura mukanjira munthu wa mzimu uheni, ndipo wakachemerezga wakati,

²⁴“Kasi mukukhumba kuchitachi nase ise, imwe Yesu wa ku Nazarete? Kasi mwiza kwiza katimara? Nkhumumanyani, ndimwe Mutuŵa Yura wa Chiuta!”

²⁵Yesu wakawuchenya mzimu uheni ura wakati, “Chetama, fumamo mwa iyo!”

²⁶Mzimu uheni ura wukati wamziririska, ukabangura na mazgu ghakuru na kufumamo mwa iyo.

²⁷Ŵanthu wose ŵakazizwa chomene na kufumbana yumoza na munyakhe ŵakati, “Nchichi ichi? Uku nkhusambizga kuphya! Na mazaza, wakulangula na mizimu yiheni ndipo yikumupulika!”

²⁸Penepapo lumbiri lwakhe lukatandazgika luŵiro kosekose mu chigaŵa chose cha Galileya.

²⁹Yesu wakati wafuma mu nyumba ya kusoperamo pamoza na Yakhobe na Yohane, ŵakaya kanjira mu nyumba ya Simoni na Andreya.

³⁰Nyinavyara wa Simoni wakagona pasi chifukwa wakathukira mu thupi. Ntheura ŵakamuphalira Yesu na za urwari wakhe.

³¹Yesu wakiza na kumukora pa woko na kumuwuskira muchanya. Penepapo kuthukira kwa mu thupi kukamara ndipo wakamba kuŵateŵetera.

³²Mise yeneyira pakunjira kwa zuŵa, ŵanthu ŵakamutorera Yesu wose awo ŵakaŵa ŵarwari na awo ŵakakoreka na viŵanda.

³³Ŵanthu wose ŵa mu msumba ŵakawungana pa muryango wa nyumba yira.

³⁴Ndipo Yesu wakachizga ŵanandi awo ŵakaŵa na nthenda za mtundumtundu. Wakafumiskaso viŵanda vinandi, kweni kuti wakavizomerezga chara kuyowoya chifukwa vikamumanya.

³⁵Na macherochero kuchali kundache, Yesu wakawuka na kufuma mu nyumba, wakaruta ku malo ghambula ŵanthu kwenekuko ndiko wakarombanga.

³⁶Simoni na ŵanyakhe ŵakaruta kuya kamupenja.

³⁷Ndipo ŵakati ŵamusanga, ŵakamuphalira ŵakati, “Ŵanthu wose ŵakumupenjani.”

³⁸Yesu wakaŵaphalira wakati, “Tiyeni tirutenge ku mizi yinyakhe ya pafupi mwenemuno mwakuti nako nkhapharazgeko. Ichi ndicho chifukwa nkhizira.”

³⁹Ntheura wakenda mu chigaŵa chose cha Galileya na kupharazga mu nyumba zakusoperamo na kufumya viŵanda.

⁴⁰Munthu wa vyoni wakiza kwa Yesu kuti wamuŵeye, ndipo wakajikama na kuti kwa iyo, “Usange mukukhumba, munganditozga.”

⁴¹Yesu pakuŵa wa chiwuravi wakanyoroska woko lakhe, wakamukhwaska wakati, “Inya, nkhukhumba, tozgeka!”

⁴²Penepapo vyoni vikamara ndipo wakatozgeka.

⁴³Yesu wakamuchinyinthizga chomene munthu yura ndipo penepapo wakamuwezga

⁴⁴na kuti, “Chenjera, ureke kuphalirapo munthu nanga njumoza. Kweni rutanga, ukajirongore kwa musofi, ndipo ukapereke chawanangwa chakutozgeka kwako icho Mozesi wakalangula kuŵa chipanikizgo ku ŵanthu.”

⁴⁵Kweni munthu yura wakaruta na kwamba kupharazga makani agha kosekose. Pa chifukwa ichi, Yesu kuti wakanjira mu muzi pakweru chara. Kweni wakakhara ku malo ghambula ŵanthu, ndipo ŵanthu ŵakizanga kwa iyo kufuma kosekose.