Read new_tumbuka_bible Mariko 10 Bible Online

Mariko 10 - new_tumbuka_bible bible

Mariko 10

¹Sono Yesu wakafumako ku malo ghara ndipo wakaruta ku chigaŵa cha Yudeya na ku sirya linyakhe la mronga wa Yorodani. Mzinda wa ŵanthu ŵanandi ukawunganira kwa iyo, ndipo nga nkhaluso kakhe, wakamba kuŵasambizga.

²ŴaFarisi ŵanji ŵakiza kwa iyo ndipo pakumuyezga ŵakamufumba ŵakati, “Kasi kukulangurika kuti munthu wapate muwoli wakhe?”

³Penepapo Yesu wakaŵazgora wakati, “Kasi icho Mozesi wakamulangulani nchivichi?”

⁴Ŵakazgora ŵakati, “Mozesi wakazomerezga kuti munthu wangapata muwoli wakhe pakumulembera karata wa chipati, ndipo wamupatenge.”

⁵Kweni Yesu wakati kwa iwo, “Mozesi wakamulemberani dango ili chifukwa cha unonono wa mitima yinu.

⁶Kweni kufuma ku mutendeko wakulenga, ‘Chiuta wakaŵalenga mwanarume na mwanakazi.

⁷Ndicho chifukwa mwanarume wati wasidenge ŵawiske na ŵanyina na kubatikana na muwoli wakhe.

⁸Ndipo ŵaŵiri aŵa ŵakuzgoka kuŵa thupi limoza.’ Sono kuti mbaŵiriso chara, kweni thupi limoza.

⁹Ntheura icho Chiuta wagumanya pamoza, paŵavye munthu wakuchipatula.”

¹⁰Wakati wanjiraso mu nyumba, ŵasambiri ŵakafumba Yesu na makani agha.

¹¹Iyo wakaŵazgora wakati, “Yose uyo wakupata muwoli wakhe na kutora munyakhe, wakumuleŵera muwoli wakhe.

¹²Ndipo mwanakazi nayo usange wakupata mufumu wakhe na kutengwa ku munyakhe wakuleŵa.”

¹³Ŵanthu ŵanji ŵakizanga na twana kwa Yesu kuti watukhwaske, kweni ŵasambiri ŵakhe ŵakaŵachenya.

¹⁴Para Yesu wakawona ichi wakakaripa ndipo wakaŵaphalira ŵasambiri ŵakhe wakati, “Rekani twana twizenge kwa ine, mungatukanizganga, chifukwa Ufumu wa Chiuta ngwa twa ntheura.

¹⁵Nadi nkhumuphalirani kuti, yose uyo wakureka kupokerera Ufumu wa Chiuta nga ndi mwana, kuti wamkunjiramo chara.”

¹⁶Yesu wakatupakata twana na kuŵika mawoko ghakhe pa ito ndipo wakatutumbika.

¹⁷Apo Yesu wakawukanga kuruta pa ulendo wakhe, munthu yunji wakamuchimbilira na kujikama panthazi pakhe ndipo wakamufumba wakati, “Musambizgi muweme, kasi ndichitechi kuti ndihare umoyo wa muyirayira?”

¹⁸Yesu wakamuzgora wakati, “Ukundichemerachi kuti ndili muweme? Palije muweme kweni Chiuta pera.

¹⁹Kasi ukughamanya marango agho ghakuti, ‘Ungakomanga, Ungaleŵanga, Ungibanga, Ungaperekanga ukaboni wa utesi, Ungazgereranga, Chindika ŵawuso na ŵanyoko.’ ”

²⁰Munthu yura wakati, “Musambizgi, vyose ivi ndili kuvisunga kufuma ku wanichi wane.”

²¹Yesu wakamulaŵisiska na kumutemwa. Wakamuphalira wakati, “Ukusoŵerwa chinthu chimoza. Rutanga, ukaguliske vyose ivyo uli navyo ndipo ndarama zakhe ukaŵape ŵakavu, ndipo wamkuŵa na usambazi kuchanya. Ntheura wize kandirondezge.”

²²Pa mazgu agha chisko cha munthu yura chikabwanthuka. Ndipo wakaruta wali na chitima chifukwa wakaŵa na musambazi chomene.

²³Yesu wakalaŵiska ŵanthu awo ŵakamuzingirizga ndipo wakati ku ŵasambiri ŵakhe, “Nawo mbunonono kunjira mu Ufumu wa Chiuta ŵanthu awo ŵali na usambazi!”

²⁴Ŵasambiri ŵakhe ŵakazizwa chomene na mazgu agha. Kweni Yesu wakawerezgaso wakati, “Mwa ŵana, nawo mbunonono kunjira mu Ufumu wa Chiuta!

²⁵Nchipusu kuti ngamila yisorote mu jiso la sindano kuruska kuti musambazi wakanjire mu Ufumu wa Chiuta.”

²⁶Penepapo ŵasambiri ŵakazizwa chomene, ŵakamba kufumbana kuti, “Kasi ndi njani uyo wangaponoskeka?”

²⁷Yesu wakaŵalaŵiska wakati, “Kwa munthu, nchambula machitiko, kweni nchamachitiko na Chiuta. Chifukwa vinthu vyose nvyamachitiko na Chiuta.”

²⁸Petrosi wakati, “Wonani ise tili kusida vyose na kumurondezgani.”

²⁹Yesu wakati, “Na unenesko wose nkhumuphalirani kuti, yose uyo wali kusida nyumba, ŵabali, ŵadumbu, ŵanyina, ŵawiske, ŵana, panji minda chifukwa cha ine na Uthenga Uweme,

³⁰wati wapokerenge vya mphapikira 100 mu muwiro uno nga ndi zinyumba, ŵabali, ŵadumbu, ŵanyina, ŵana, minda pamoza na kuzikizgika ndiposo, mu nyengo iyo yikwiza, wamkupokera umoyo wa muyirayira.

³¹Kweni ŵanandi awo mbakudanga ŵamkuŵa ŵakumalira, ndipo awo mbakumalira ŵamkuŵa ŵakudanga.”

³²Yesu na ŵasambiri ŵakhe wakaŵa pa ulendo wakuya ku Yerusalemu. Ndipo Yesu wakaŵadangirira. Ntheura ŵasambiri ŵakhe ŵakazizwa ndipo awo ŵakamurondezganga ŵakaŵa na wofi. Yesu wakaŵatoreraso pa mphepete ŵasambiri 12 na kuŵaphalira na ivyo vyamkuchitika na kumuwira.

³³Yesu wakati, “Tegherezgani, tikukwerera ku Yerusalemu, kwenekuko Mwana wa Munthu wamkuperekeka ku ŵasofi ŵarara na ŵamanyi-marango. Iwo ŵamkumususka kuti wakomeke na kumupereka ku ŵamitundu.

³⁴Aŵa ndiwo ŵamkumugoska, ŵamkumufunyira mata, kumuthyapula na kumukoma. Kweni para ghajumphapo mazuŵa ghatatu wamkuwuka ku ŵakufwa.”

³⁵Penepapo Yakhobe na Yohane, ŵana ŵa Zebediya, ŵakiza kwa Yesu ndipo ŵakati, “Musambizgi, pali kanthu ako tikukhumba kuti imwe mutichitire.”

³⁶Yesu wakaŵafumba wakati, “Kasi mukukhumba kuti ndimuchitirani vichi?”

³⁷Ŵakazgora ŵakati, “Tikukhumba kuti para mwamkukhara mu uchindami winu, mwizakatiŵike ise yumoza ku woko linu la maryero munyakhe ku woko linu la mazere.”

³⁸Kweni Yesu wakati, “Mukumanya chara icho mukuromba. Kasi imwe mungamweramo mu nkhombo ya visuzgo iyo ndizamkumweramo ine, panji kupokera ubapatizo weneuwo ndizamkupokera ine?”

³⁹Iwo ŵakamuzgora kuti, “Inya, tingachita.” Yesu wakati kwa iwo, “Mwizamkumweramo nadi mu nkhombo iyo ndizamkumweramo ine, ndipo mwizamkupokerera nadi ubapatizo uwo ndizamkupokerera ine.

⁴⁰Kweni kukhara ku woko lane la maryero panji la mazere kuti nkhwa ine kupereka chara. Malo agha nga awo Ŵadada ŵali kuŵanozgera.”

⁴¹Para ŵasambiri ŵanyawo khumi ŵakapulika ichi, ŵakaphyira mtima Yakhobe na Yohane.

⁴²Ntheura Yesu wakaŵachemera kwa iyo wose pamoza na kuyowoya nawo kuti, “Mukumanya kuti awo ŵakupimika kuti mbakuwusa mukati mu ŵamitundu, ŵakaŵawusira ŵanthu ŵawo mu mazaza, ndiposo ŵarongozgi ŵawo nawo ŵali na mazaza pakuwusa ŵanthu ŵawo.

⁴³Kweni kuti kuli ntheura chara kwa imwe. Usange yumoza wa imwe wakukhumba kuŵa mukuru, wakwenera kuŵa muteŵeti winu.

⁴⁴Ndipo yose uyo wakukhumba kuŵa murongozgi mukati mwinu, wakwenera kuŵa muzga wa wose.

⁴⁵Pakuti nanga ndi Mwana wa Munthu nayo kuti wakizira kuteŵetereka chara kweni kuteŵetera na kupereka umoyo wakhe kuti uwombole ŵanthu ŵanandi.”

⁴⁶Yesu na ŵasambiri ŵakhe pamoza na mzinda ukuru wa ŵanthu ŵakafika ku Yeriko. Apo ŵakafumanga mu msumba wa Yeriko, ŵakasanga munthu wa chiburumutira zina lakhe Baratimeyu, mwana wa Timeyo uyo wakakhara mu mphepete mwa msewu ndipo wakapemphanga.

⁴⁷Wakati wapulika kuti ndi Yesu wa ku Nazarete, wakamba kuchemerezga wakati, “Imwe Yesu, Mwana wa Davide, mundilengere lusungu!”

⁴⁸Ŵanthu ŵanandi ŵakamuchenya pakumuphalira kuti wakhare chete. Kweni iyo wakachemerezga kwakuruska wakati, “Imwe Mwana wa Davide, mundilengere lusungu!”

⁴⁹Yesu wakimilira ndipo wakati, “Muchemani.” Ntheura ŵakamuchema munthu wa chiburumutira yura, ŵakati, “Khwima mtima! Wuka, wakukuchema.”

⁵⁰Wakataya pasi laya lakhe, wakadukira muchanya ndipo wakiza kwa Yesu.

⁵¹Yesu wakamufumba wakati, “Kasi ukukhumba kuti ndikuchitirechi?” Wachiburumutira wakazgora wakati, “Musambizgi, nkhukhumba kuti ndilaŵiskeso.”

⁵²Yesu wakamuphalira wakati, “Rutanga, chipulikano chako chakuchizga.” Penepapo wakamba kulaŵiska ndipo wakamurondezga Yesu pa ulendo wenewura.