Read new_tumbuka_bible Mariko 11 Bible Online

Mariko 11 - new_tumbuka_bible bible

Mariko 11

¹Yesu na ŵasambiri ŵakhe ŵakati ŵaneng'enera ku Yerusalemu, pafupi na mizi ya Betifage na Betaniya, ŵakafika ku Phiri la maOlive. Yesu wakatuma ŵaŵiri mwa ŵasambiri ŵakhe,

²na mazgu ghakuti, “Rutani ku chikaya icho mwadunjikana nacho, ndipo para mwamkunjira waka mwamkusanga mwana wa mbunda wakakika uyo munthu walije kukwerapo na kale. Mukamusutule na kwiza nayo kuno.

³Usange munthu wamkumufumbani kuti, ‘Chifukwa uli mukusutula mwana wa mbunda?’ Mukamuphalire kuti, ‘Fumu yikumukhumba ndipo yamkumuwezgera kuno sonosono.’ ”

⁴Ntheura ŵasambiri ŵakaruta ndipo ŵakaya kamusanga mwana wa mbunda wakakika pa muryango pafupi na msewu, ndipo ŵakamusutula.

⁵Ŵanthu ŵanyakhe awo ŵakimilira penepara ŵakaŵafumba ŵakati, “Mukuchitachi imwe pakusutula mwana wa mbunda?”

⁶Ŵakaŵazgora nga ndi umo Yesu wakaŵaphalirira. Ntheura ŵakaŵareka kuti ŵamusutule mwana wa mbunda.

⁷Para ŵasambiri ŵara ŵakati ŵiza na mwana wa mbunda kwa Yesu, ŵakaŵikapo vyakuvwara vyawo pa muwongo wakhe ndipo Yesu wakakwerapo.

⁸Ŵanthu ŵanandi ŵakatandika vyakuvwara vyawo mu msewu, apo ŵanji ŵakatandika vivwati ivyo ŵakaphajula mu makuni gha mu minda.

⁹Ŵanthu awo ŵakadangira na awo ŵakizanga kumanyuma ŵakachemerezganga ŵakati, “Hosana! Ngwakutumbikika uyo wakwiza mu zina la Fumu!

¹⁰Ngwakutumbikika ufumu wa Dada withu Davide uwo ukwiza, Hosana, uchindami kwa Chiuta kuchanya nkhanira.”

¹¹Yesu wakati wafika mu Yerusalemu, wakaya kanjira mu Nyumba ya Chiuta, na kulaŵiskalaŵiska pa vyose. Kweni pakuti kukaŵa mise kale, wakaruta ku Betaniya pamoza na ŵasambiri ŵakhe 12.

¹²Na machero ghakhe apo ŵakafumanga mu Betaniya, Yesu wakaŵa na njara.

¹³Wakawona chikuyu pataliko icho chikaŵa na mahamba, wakaruta kuya kawona usange wangasangamo vipambi. Wakati wafika penepapo, kuti wakasangamo kanthu chara, kweni mahamba pera pakuti yikaŵa nyengo yakhe ya vipambi chara.

¹⁴Yesu wakati ku chikuyu, “Kuŵavye munthu na yumoza wakuti wize karyemo vipambi mwa iwe.” Ndipo ŵasambiri ŵakhe ŵakaghapulika mazgu agha.

¹⁵Ŵakati ŵafika mu Yerusalemu, Yesu wakanjira mu Nyumba ya Chiuta ndipo wakamba kufumiska awo ŵakaguliskanga vinthu vyawo na awo ŵakagulanga. Wakagadabula matebulu gha awo ŵakasinthanga ndarama na vitengo vya awo ŵakaguliskanga nkhunda.

¹⁶Ndipo kuti wakazomerezga munthu chara kuti waporote mu Nyumba ya Chiuta uku wayegha katundu.

¹⁷Ndipo wakaŵasambizga wakati, “Asi chili kulembeka kuti, ‘Nyumba yane yiti yichemekenge nyumba yakuromberamo mafuko ghose?’ Kweni imwe mwayizgora mphanji ya ŵankhungu!”

¹⁸Ŵasofi ŵarara na ŵamanyi-marango ŵakati ŵapulika ichi, ŵakamba kupenja nthowa iyo ŵangamukomera. Kweni ŵakamopanga Yesu pakuti ŵanthu wose ŵa mu mzinda ŵakazizwanga na kusambizga kwakhe.

¹⁹Kukati kwaŵa mise, Yesu na ŵasambiri ŵakhe ŵakafumamo mu msumba.

²⁰Na mulenjelenje machero ghakhe, apo ŵakendanga mu msewu ŵakawona kuti chikuyu chira chomira na misisi yakhe wuwo.

²¹Petrosi wakakumbuka ndipo wakati kwa Yesu, “Musambizgi, wonani! Chikuyu icho mukachitemba chomira.”

²²Yesu wakazgora wakati, “Muŵenge na chipulikano mwa Chiuta.

²³Nkhumuphalirani unenesko wose kuti, usange munthu wakuyowoya ku phiri ili kuti, ‘Nyamuka, ukajiponye mu nyanja’ ndipo kuti wakukayika chara mu mtima wakhe, kweni wakupulikana kuti icho wakuyowoya chichitikenge, chimuchitikirenge nadi.

²⁴Ntheura nkhumuphalirani kuti, chose icho mukupempha mu kuromba, pulikanani kuti mwachipokera, ndipo chiŵenge chinu nadi.

²⁵Para mukwimilira na kuromba, muŵenge ŵakugowokera usange muli na kafukwa na munthu. Ndipo Ŵawiskemwe ŵa kuchanya nawo ŵati ŵamugowokerani kwananga kwinu.” [

²⁶Kweni usange mukukana kuŵagowokera ŵanthu, ipo namwe ŵawiskemwe ŵa kuchanya kuti ŵati ŵamugowokeraninge masovyo ghinu chara.]

²⁷Yesu na ŵasambiri ŵakhe ŵakizaso ku Yerusalemu. Apo Yesu wakendanga mu Nyumba ya Chiuta, ŵasofi ŵarara, ŵamanyi-marango, na ŵarara ŵakiza kwa iyo.

²⁸Ŵakamufumba ŵakati, “Kasi ndi mazaza uli agho ukuchitira vinthu ivi? Ndipo ndi njani uyo wakakupa mazaza ghakuchitira vinthu ivi?”

²⁹Yesu wakati, “Nane nditi ndimufumbaninge fumbo limoza, para mwandizgora, nditi ndimuphalirani mazaza agho nkhuchitira vinthu ivi.

³⁰Kasi mazaza agho Yohane wakabapatiziranga ghakafuma kwa njani? Kwa Chiuta panji ku ŵanthu? Mundizgore!”

³¹Kweni iwo ŵakamba kususkana ŵekha ŵakati, “Usange tingamuzgora kuti, ‘Ghakafuma kwa Chiuta’ watifumbenge kuti, ‘Chifukwa uli mukareka kupulikana?’

³²Kweni tingayowoya chara kuti, ‘Ghakafuma ku ŵanthu.’ ” (Ŵakayowoya ntheura chifukwa ŵakopanga ŵanthu pakuti ŵanthu wose ŵakamupima kuti Yohane wakaŵa nchimi nadi.)

³³Ntheura ŵakamuzgora Yesu ŵakati, “Tikumanya chara.” Yesu wakaŵazgora wakati, “Nane kuti nditi ndimuphalirani chara uko ghakafuma mazaza agho nkhuchitira vinthu ivi.”