Read new_tumbuka_bible Mariko 12 Bible Online

Mariko 12 - new_tumbuka_bible bible

Mariko 12

¹Yesu wakamba kuyowoya nawo mu zintharika wakati, “Munthu munyakhe wakapanda mpheska mu munda wakhe. Wakawuŵighilira luŵigho zingirizge. Wakajima nkhando ya kukamiramo mpheska, na kuzenga chigongwe cha ŵalinda. Wakawukorezga munda ura ku ŵalimi ŵakhe, ndipo wakaruta ku charu chinyakhe.

²Pa nyengo ya kuponthora vipambi, mwene-munda yura wakatuma muteŵeti wakhe ku ŵalimi ŵara, kuti ŵakamupeko vipambi vya mu munda wa mpheska.

³Kweni ŵalimi ŵakamukora muteŵeti yura, ŵakamutimba na kumuwezga wambula kanthu.

⁴Mwene-munda wakatumaso muteŵeti munyakhe, kweni ŵalimi ŵara ŵakamutimba munthu yura pa mutu na kumutombozga.

⁵Wakatuma munyakhe, uyu ndiyo ŵakakoma. Wakatumaso ŵanyakhe ŵanandi, ndipo ŵakachita nawo ntheura pera, ŵanji ŵakaŵatimba, ŵanyakhe ŵakaŵakoma.

⁶Sono mwene-munda wakakharako na mwana wakhe yumoza pera wakutemweka kuti wamutume. Wakamutuma pa umaliro wa wose na kughanaghana kuti, ‘Ŵamkumuchindika mwana wane.’

⁷Kweni ŵalimi ŵakayowoyeskana ŵakati, ‘Uyu ndi muhaliri. Tiyeni timukome, ndipo chiharo chiti chiŵenge chithu.’

⁸Ntheura ŵakamukora na kumukoma, na kumutaya kuwaro kwa munda.”

⁹Yesu wakafumba wakati, “Kasi mwene-munda wa mpheska yura wizamkuchitachi? Nadi wizenge na kuŵakoma ŵalimi ŵara na kuwukorezga munda wa mpheska ura ku ŵalimi ŵanyakhe.

¹⁰Kasi mundaŵazge malembo agho ghakuti, ‘Libwe ilo ŵazengi ŵakalikana, ndilo lazgoka nkhorezgero ya chingodya.

¹¹Fumu Chiuta ndiyo wakachita ichi ndipo nchakutizukumiska chomene.’ ”

¹²Para ŵarongozgi ŵa ŵaYuda ŵakamanya kuti mu ntharika yira wakanenanga iwo, ŵakapenja nthowa yakumukorera Yesu. Kweni ŵakopanga mzinda wa ŵanthu, ntheura ŵakamureka ndipo ŵakaruta.

¹³Pamanyuma ŵanthu ŵanji ŵa mu wupu wa ŵaFarisi na wa ŵaHerode ŵakatumika kwa Yesu kuti ŵakamukore mu kayowoyero.

¹⁴Ntheura ŵakiza na kuti kwa iyo, “Musambizgi, tikumanya kuti muli ŵakuneneska, ndipo kuti mukulorako munthu chara, chifukwa kuti mukulaŵiska chisko cha munthu chara, kweni mukusambizga mu unenesko nthowa ya Chiuta. Kasi kukulangurika kupereka msonkho kwa karonga wa ku Romu panji chara?”

¹⁵Kasi tisonkhenge panji chara? Kweni Yesu pakumanya upusikizgi wawo, wakati kwa iwo, “Kasi chifukwa uli mukundiyezga? Zani nayo ndarama ndipo rekani ndiyiwone.”

¹⁶Ŵakiza nayo ndarama, ndipo Yesu wakati kwa iwo, “Kasi chikozgo ichi na zina ili nvya njani?” Ŵakamuzgora ŵakati, “Nvya karonga wa ku Romu.”

¹⁷Yesu wakati kwa iwo, “Perekani kwa karonga wa ku Romu ivyo nvya karonga wa ku Romu, ndipo kwa Chiuta ivyo nvya Chiuta.” Ndipo ŵakazizwa nayo.

¹⁸Sono ŵaSaduki, awo ŵakuti kulije chiwuka cha ŵakufwa, ŵakiza kwa Yesu ndipo ŵakamufumba ŵakati,

¹⁹“Musambizgi, Mozesi wakatilembera kuti, ‘Usange mubali wa munthu wafwa, ndipo wasida muwoli kwambula kusidapo mwana, mubali wakhe watore muwoli uyu na kuwuskira mphapu mubali wakhe.’

²⁰Kukaŵako ŵana ŵankhonde na ŵaŵiri pa wiskewo. Wakudanga wakatora mwanakazi, ndipo wakafwa kwambula kurekapo mwana.

²¹Ndipo wa chiŵiri wakahara chokoro chira, ndipo nayoso wakafwa kwambula kurekapo mwana. Wa chitatu nayo ntheura pera.

²²Ndipo ŵankhonde na ŵaŵiri ŵara ŵakarekapo mwana chara. Pa umaliro wa wose, mwanakazi nayo wakafwa.

²³Kasi pa chiwuka cha ŵakufwa, mwanakazi yura wamkuŵa muwoli wa njani, pakuti wose ŵankhonde na ŵaŵiri ŵakamutorapo?”

²⁴Yesu wakati kwa iwo, “Asi ichi ndicho chifukwa mukwanangira, pakuti mulije kumanya Malembo nanga ndi nkhongono za Chiuta?

²⁵Pakuti para ŵakufwa ŵamkuwuka ku ŵakufwa, kuti ŵakutora chara, nanga nkhutengwa, kweni ŵali nga mbangelo kuchanya.

²⁶Kweni sono za ŵakufwa kuti ŵakuwuskika, kasi mundaŵazge mu Buku la Mozesi pa makani gha chivwati chira, na umo Chiuta wakamuyowoyera Mozesi kuti, ‘Ine ndine Chiuta wa Abrahamu, na Chiuta wa Yisake, na Chiuta wa Yakhobe?

²⁷Iyo kuti ndi Chiuta wa ŵakufwa chara, kweni wa ŵamoyo. Imwe mukwananga chomene.’ ”

²⁸Yumoza wa ŵamanyi-marango wakiza na kupulika ivyo ŵakasuskananga na kuwona kuti Yesu wazgora makora. Ntheura ŵakafumba ŵakati, “Mu marango ghose kasi dango lakuzirwa ndi ndi?”

²⁹Yesu wakazgora wakati, “Dango lakudanga ndi ili, ‘Pulikani imwe ŵaIsraele, Fumu Chiuta withu, njumoza pera.

³⁰Ndipo utemwenge Fumu Chiuta wako na mtima wako wose, na mzimu wako wose, na vinjeru vyako vyose, na nkhongono zako zose.’

³¹Dango la chiŵiri ndi ili, ‘Utemwenge muzengezgani wako nga ndi umo ukujitemwera wamwene!’ Palije dango linyakhe lakuruska agha.”

³²Mumanyi-marango yura wakamuphalira Yesu wakati, “Wayowoya makora Musambizgi, ndipo wayowoya unenesko pakuyowoya kuti Chiuta njumoza pera ndipo palije Chiuta munyakhe kweni iyo pera.

³³Ndipo ukwenera kumutemwa iyo na mtima wose, na vinjeru vyose, na nkhongono zose, ndiposo na kutemwa muzengezgani wako nga ndi umo ukujitemwera iwe wamwene. Kuchita ntheura, ndiko nkhwakuruska kupereka sembe zose zakocha na zinyakhe zose.”

³⁴Para Yesu wakawona kuti wakazgora mwamahara, wakati kwa iyo, “Kuti uli kutali chara na Ufumu wa Chiuta.” Kufuma pa nyengo iyi, pakaŵavye munthu uyo wakaŵa na chikanga kumufumbaso kanthu.

³⁵Apo Yesu wakasambizganga ŵanthu mu Nyumba ya Chiuta wakafumba wakati, “Chifukwa uli ŵamanyi-marango ŵakuyowoya kuti Mesiya ndi mwana wa Davide?

³⁶Davide mwenecho pakukhuŵirizgika na Mzimu Mutuŵa wakati, ‘Fumu Chiuta wakati kwa Fumu yane, Khara ku woko lane la maryero, ndisuke ndiŵazgore ŵarwani ŵako, kuti ŵaŵe chitambaliro cha malundi ghako.’

³⁷Davide iyomwene wakamuchema iyo kuti, ‘Fumu,’ sono kasi wangaŵa uli mwana wakhe?” Ŵanthu ŵanandi chomene ŵakategherezga ku mazgu ghakhe na kukondwa chomene.

³⁸Apo Yesu wakasambizganga, wakati, “Chenjerani na ŵamanyi-marango. Ŵakutemwa kuvwara minjilira yitali na kwendendeka uku na uku kuti ŵanthu ŵa ŵatauzgenge na nchindi mu misika.

³⁹Ŵakutemwa kukhara mu vitengo vyakuzirwa mu nyumba zakusoperamo na malo gha nchindi mu viphikiro.

⁴⁰Ŵanthu aŵa ŵakuzgerera vyokoro, ndipo mukupusikizga kwawo ŵakuromba malurombo ghatali. Nadi ŵanthu aŵa ŵamkupokera chilango chikuru kwakuruska.”

⁴¹Yesu wakakhara pasi kuthyana na chakupokeramo vyakupereka vya mu Nyumba ya Chiuta. Ndipo wakawonanga ŵanthu umo ŵakaperekeranga ndarama zawo mu chakupokeramo vyakupereka.

⁴²Ŵanthu ŵanandi ŵasambazi ŵakaŵikangamo ndarama zinandi, kweni chokoro chikavu chikiza na kuŵikamo tundarama tuchoko tuŵiri.

⁴³Ndipo Yesu wakaŵachema ŵasambiri ŵakhe wakati, “Nadi nkhumuphalirani kuti, chokoro chikavu ichi chaŵikamo ndarama kuruska wose awo ŵaŵikamo mu chakupokeramo vyakupereka.

⁴⁴Pakuti ŵanandi ŵaŵikamo kufuma pa ndarama za uzari wa usambazi wawo. Kweni chokoro ichi mu ukavu wakhe chaŵikamo vyose ivyo chikaŵa navyo ivyo vikenera kumulera.”