Read new_tumbuka_bible Mariko 13 Bible Online

Mariko 13 - new_tumbuka_bible bible

Mariko 13

¹Apo Yesu wakafumanga mu Nyumba ya Chiuta, yumoza wa ŵasambiri ŵakhe wakati, “Musambizgi, wonani ukuru wa mawe agha na nyumba izi.”

²Yesu wakazgora wakati, “Mukuwona nyumba zikuruzikuru izi? Palije nanga ndi libwe limoza ilo lamkurekeka pachanya pa libwe linyakhe kwambula kuwiskikira pasi.”

³Apo Yesu wakakhara pasi pa Phiri la maOlive kuthyana waka na Nyumba ya Chiuta, Petrosi, Yakhobe, Yohane na Andreya ŵakamufumba pa yekha ŵakati,

⁴“Mutiphalire, kasi vinthu ivi vizamkuŵako pauli? Ndipo kuŵenge chimanyikwiro uli kurongora kuti vyose ivi vili pafupi kufiskika?”

⁵Yesu wakati kwa iwo, “Chenjerani ndipo paŵavye munthu wamupuruskani.

⁶Chifukwa ŵanandi ŵamkwiza mu zina lane na kuyowoya kuti, ‘Khristu ndine’ ndipo ŵamkupuruska ŵanthu ŵanandi.

⁷Para mwamkupulika chiwawa cha zinkhondo za pafupi na mbiri ya zinkhondo zakuchitika kutali, mungakenjerwanga. Pakuti vya ntheura ivi vikwenera kuŵako nadi, kweni kuti ndiwo umaliro chara.

⁸Pakuti mtundu wamkuwukira mtundu unyakhe, ndipo ufumu nawo wamkuwukirana na ufumu unyakhe. Kwamkuŵako vindindindi mu malo ghakupambanapambana ndipo kwamkuŵakoso njara. Uku ndiko kwamba kwa nyengo ya visuzgo.”

⁹Kweni Yesu wakati, Imwe muchenjere, ŵanthu ŵamkumuperekani ku zimphara na kumweruzgani ndipo ŵamkumutimbirani mu nyumba zawo zakusoperamo. Mwamkwimilira panthazi pa nduna na ŵakaronga chifukwa cha zina lane kuti mukaŵe ŵakaboni ŵane panthazi pawo.

¹⁰Kweni Uthenga Uweme ukwenera kupharazgika danga ku mafuko ghose.

¹¹Para mwakoreka na kutorekera ku mphara, mungakenjerwanga na icho mwamkuyowoya. Kweni mwamkuyowoya icho Chiuta wamkumupani pa nyengo yira, chifukwa ndimwe mwamkuyowoya chara kweni Mzimu Mutuŵa.

¹²Mubali wamkwendera mphiska mubali wakhe kuti wakomeke, wiske wamkumwendera mphiska mwana wakhe kuti wakomeke. Ŵana nawo ŵamkwendera mphiska ŵapapi ŵawo kuti ŵakomeke.

¹³Ŵanthu wose ŵamkumutinkhani chifukwa cha zina lane. Kweni uyo wamkuzizipizga mpaka ku umaliro, ndiyo wamkuponoskeka.

¹⁴“Para mukuwona chanthontho chakuparanya chikwimilira pa malo ghambula kwenerera kuŵapo (uyo wakuŵazga wapulikiske), penepapo awo ŵali mu Yudeya ŵachimbilire ku mapiri.

¹⁵Uyo wali pachanya pa nyumba yakhe wareke kwikha kuti wakatore kanthu mu nyumba mwakhe.

¹⁶Uyo wali ku munda wareke kuwerera ku nyumba kuya katora chakuvwara chakhe.

¹⁷Soka ku ŵanakazi awo ŵizamkuŵa na nthumbo pa nyengo yira na awo ŵizamkonkheska twana!

¹⁸Rombani kuti ivi vireke kwiza kachitika pa nyengo ya chiwuvi.

¹⁹Pakuti mu mazuŵa agho kwizamkuŵa suzgo iyo yindaŵeko na kale chara, kufuma ku mutendeko apo Chiuta wakalengera charu, mpaka sono, ndipo yizamkuŵakoso ya ntheura chara.

²⁰Ntheura Fumu yirekenge kudumurizga mazuŵa agho, mphanyi palije munthu wakuponapo. Kweni chifukwa cha ŵakusoreka ŵakhe yikaghadumurizgako.

²¹“Ndipo usange munthu wakuyowoya kwa imwe kuti, ‘Wonani, Mesiya wali pano!’ Panji, ‘Wonani, yura para!’ Mungakamupulikanga chara.

²²Pakuti ŵamesiya ŵa utesi na nchimi za utesi zamkuwuka ndipo zamkurongora vimanyikwiro vikuru na minthondwe mwakuti usange nchamachitiko ŵapusiske ŵakusoreka ŵa Chiuta.

²³Kweni imwe muchenjere. Ndamuphalirani nkhanira vinthu ivi vindachitike.”

²⁴“Kweni mu mazuŵa agho pamanyuma pa visuzgo vira, dazi lizamkufipiskika, na mwezi nawo kuti wamkuŵala chara.

²⁵Ndipo nyenyezi zamkumbotoka kufuma kuchanya, nkhongono za mlengalenga zamkusunkhunyika!

²⁶Penepapo ŵanthu ŵamkuwona Mwana wa Munthu wakwiza mu maŵingu na nkhongono zikuru na uchindami.

²⁷Ndipo wamkutuma ŵangelo ŵakhe kuti ŵakawunganye ŵakusoreka ŵakhe kufuma ku mphepo zinayi, na kufuma ku mphererekezgo za charu na mtambo.”

²⁸“Sambiraniko chisambizgo ichi kufuma ku khuni la chikuyu. Para mukuwona kuti minthavi yakhe yayamba kusunda na kuŵa na mahamba, mukumanya kuti chifuku chili pafupi.

²⁹Ntheura pera, para mukuwona vinthu ivi vikuchitika, manyani kuti wali pafupi ndipo wali pa muryango.

³⁰Nadi nkhumuphalirani kuti, ŵanthu ŵa muwiro uwu kuti ŵamarenge chara, visuke vinthu vyose ivi vichitike.

³¹Kuchanya na pasi vimarenge, kweni mazgu ghane kuti ghati ghamarenge chara.”

³²“Palije munthu na yumoza uyo wakumanya vya zuŵa ilo panji ora nanga mbangelo ŵa kuchanya, nesi Mwana kweni Ŵadada pera.

³³Chenjerani, muŵe maso, chifukwa mukumanya apo nyengo yikwanirenge chara.

³⁴Kuli nga ndi mwene-nyumba mweneuyo wakuruta pa ulendo, ndipo wakupereka nyumba yakhe mu mazaza gha ŵateŵeti ŵakhe, yose chigaŵa chakhe, ndipo wakuphalira mulinda wa pa muryango kuti waŵe maso.

³⁵Ntheura muŵe maso, chifukwa mukumanya chara apo mwene-nyumba wizirenge, panji na mise, panji na usiku pakati panji ku matandakucha para ŵatambala ŵakulira, panji na mulenje,

³⁶mzire para wakwiza mu mabuchibuchi, wizakamusangani muli mu tulo.

³⁷Icho nkhumuyowoyerani imwe, nkhuyowoyera wose, ‘Muŵe maso.’ ”