Read new_tumbuka_bible Mariko 14 Bible Online

Mariko 14 - new_tumbuka_bible bible

Mariko 14

¹Kukakhara mazuŵa ghaŵiri pera kufika pa nyengo ya chiphikiro cha Paska na cha chingwa chambula chirungo, apo ŵasofi ŵarara na ŵamanyi-marango ŵakapenjanga nthowa yakuti ŵamukorere mu uchenjezi na kumukoma Yesu.

²Ŵakaghanaghana kuti ŵareke kumukora pa nyengo ya chiphikiro, mzire ŵawuske chivulupi mukati mu ŵanthu.

³Yesu wakaŵa mu Betaniya ku nyumba ya Simoni uyo wakaŵa wa vyoni. Ndipo apo Yesu wakaryanga, mwanakazi yunji wakanjira na supa ya sangalawe yakuzura na mafuta ghakununkhira gha narido gha mtengo wa patali. Mwanakazi uyu wakaswa supa na kupungulira mafuta ghose pa mutu wa Yesu.

⁴Ŵanthu ŵanji awo ŵakaŵapo ŵakaphya mtima, ndipo ŵakayowoyeskana ŵakati, “Wasakazirachi ntheura mafuta agha?

⁵Mphanyi ghanguguliskika na ndarama zinandi za kujumpha madenari 300 na kuŵapa ŵakavu.” Penepapo ŵakamukwiyira mwanakazi yura.

⁶Kweni Yesu wakati, “Murekani mwanakazi uyu, kasi mukumusuzgirachi? Wandichitira chinthu chiweme.

⁷Ŵanthu ŵakavu muli nawo mazuŵa ghose, ndipo mungamanya kuwovwira umo mukukhumbira. Kweni ine muŵenge nane mazuŵa ghose chara.

⁸Mwanakazi wachita icho wangumanya kuchita. Waphakazgirathu thupi lane na mafuta, kunozgekera umo lizamuŵikikira mu dindi.

⁹Nadi nkhumuphalirani kuti, kose uko Uthenga Uweme wamkupharazgika mu charu chose cha pasi, ichi wachita mwanakazi uyu nacho chamkuyowoyeka kuti ŵanthu ŵamukumbukirenge chakhe.”

¹⁰Yudasi Isikariyoti, yumoza wa 12 ŵara, wakaruta ku ŵasofi ŵarara kuti wakamwendere mphiska Yesu kwa iwo.

¹¹Para ŵakapulika ichi, ŵakakondwa ndipo ŵakapangana kumupa ndarama. Ntheura iyo wakamba kupenja nyengo yiweme yakumuperekera.

¹²Pa zuŵa lakudanga la chiphikiro cha Chingwa chambula chirungo, pa nyengo iyo mwana-mberere wakakomekanga kuŵa sembe ya Paska, ŵasambiri ŵakhe ŵakiza kwa iyo. Ŵakamufumba ŵakati, “Kasi ndi nkhu uko mukukhumba kuti tikamunozgerani imwe chakurya cha Paska?”

¹³Ntheura wakatuma ŵaŵiri mwa ŵasambiri ŵakhe na kuŵaphalira kuti, “Rutani mu msumba, ndipo mwanarume uyo wayegha chiŵiya cha maji wamkumana namwe, ndipo mukamurondezge.

¹⁴Kose uko wamkunjira, mukafumbe mwene-nyumba kuti, ‘Musambizgi wakuti, kasi chipinda chane cha ŵalendo chili nkhu, cheneicho ndiryerengemo chakurya cha Paska pamoza na ŵasambiri ŵane?’

¹⁵Iyo wamkumurongorani chipinda chikuru cha pachanya, icho chili kunozgeka kale. Mwenemura ndimo mukatinozgere chakurya cha Paska.”

¹⁶Ŵasambiri ŵara ŵakawuka na kuruta mu msumba, ndipo ŵakasanga vinthu vyose nga ndi umo Yesu wakaŵaphalirira. Ntheura ŵakanozga chakurya cha Paska.

¹⁷Para kukaŵa mise, Yesu wakiza na ŵasambiri ŵakhe 12.

¹⁸Apo ŵakakhara pa kurya, Yesu wakati kwa iwo, “Nkhumuphalirani unenesko, yumoza wa imwe wandenderenge mphiska, mweneuyo wakurya nane pamoza.”

¹⁹Ŵasambiri ŵakapwetekeka chomene mu mtima, ndipo yumozayumoza ŵakamufumba ŵakati, “Kasi ndine?”

²⁰Yesu wakaŵazgora wakati, “Njumoza wa imwe 12, mweneuyo wakukovya nane mu bakule yumoza.

²¹Mwana wa Munthu nadi wakuya kaperekeka nga ndi umo kukalembekera na vya iyo, kweni soka kwa munthu uyo wakumwendera mphiska Mwana wa Munthu. Mphanyi kukaŵa kuweme kuti munthu uyo wareke na kubabika wuwo.”

²²Apo ŵakaŵa pa kurya, Yesu wakatora chingwa, wakawonga Chiuta, ndipo wakachimenya na kuŵapa ŵasambiri ŵakhe wakati, “Torani, ili ndi thupi lane.”

²³Ndipo wakatora nkhombo, wakawonga Chiuta na kuŵapa ŵasambiri wakhe, ntheura wose ŵakamwapo.

²⁴Ndipo wakaŵaphalira wakati, “Izi ndi ndopa zane za phangano izo zathikira ŵanthu ŵanandi.

²⁵Nadi nkhumuphalirani kuti, ndizamkumwaso vinyo chara mpaka pa zuŵa ilo ndamkumwa vinyo liphya mu Ufumu wa Chiuta.”

²⁶Ŵakati ŵimba sumu, ŵakaruta ku Phiri la maOlive.

²⁷Yesu wakaŵaphalira wakati, “Mose muti mukhuŵazgikenge na kundireka ndekha, nga ndi umo kuli kulembekera kuti, ‘Nditi nditimbe muliska, ndipo mberere zamkumbininika.’

²⁸Kweni para ndawuka ku ŵakufwa, ndamkumundangirirani kuruta ku Galileya.”

²⁹Petrosi wakamuphalira wakati, “Nangauli wose ŵakhuŵazgike na kumurekani, kweni ine pera chara.”

³⁰Yesu wakamuzgora wakati, “Nadi nkhukuphalira kuti, usiku weneuwu uwu, tambala wandalire kaŵiri, iwe wamkundikana katatu.”

³¹Kweni Petrosi wakakhomekezgapo wakati, “Nanga kungaŵa kuti ndifwe namwe pamoza, kuti ndamkumukanani chara.” Ndipo ŵasambiri wose ŵakayowoya ntheura pera.

³²Ndipo ŵakaruta ku malo ghakuchemeka Getsemane. Ndipo wakati ku ŵasambiri ŵakhe, “Imwe kharani pano, apo ine nkhuromba.”

³³Wakatorapo Petrosi, Yakhobe na Yohane pamoza nayo, ndipo wakamba kuŵa na chitima na kukweŵezuka chomene mu mtima.

³⁴Sono wakati kwa iwo, “Mtima wane uli na chitima chikuru chomene icho chikunditorera na ku nyifwa. Imwe kharani pano, kweni muŵe maso.”

³⁵Apo wakati waruta pataliko, wakawa pasi ndipo wakaromba kuti, “Usange nchamachitiko, ora ili lindijumphirire.”

³⁶Ndipo wakati, “Abba Ŵadada, vinthu vyose nvyamachitiko kwa imwe. Muwuskeko nkhombo iyi ya visuzgo kwa ine. Ndipouli, kuti muchite icho ine nkhukhumba chara, kweni icho imwe mukukhumba.”

³⁷Yesu wakawerera ku ŵasambiri ŵakhe, ndipo wakaŵasanga ŵali mu tulo. Ndipo wakafumba Petrosi wakati, “Simoni, kasi wagona? Kasi ungatondeka kuŵa maso na pa ora limoza pera?

³⁸Muŵe maso murombenge, mwakuti mureke kunjira mu kuyezgeka. Nadi mzimu ukukhumba kweni thupi ndakutomboroka.”

³⁹Sono wakarutaso ndipo wakaya karomba mazgu gheneghara pera.

⁴⁰Ndipo wakawereraso ku ŵasambiri na kuŵasanga ŵagona, chifukwa maso ghawo ghakazotopa na tulo. Ŵakamanya chara icho ŵangamuzgora.

⁴¹Wakawereraso kachitatu, wakati kwa iwo, “Kasi muchali kugona na kupumula? Mbwenu! Nyengo yakwana. Wonani, Mwana wa Munthu wakuperekeka mu mawoko gha ŵanthu ŵakwananga.

⁴²Wukani. Tirutenge! Wonani uyo wakundendera mphiska wafika.”

⁴³Apo Yesu wakawa ŵachali kuyowoya, nyengo yeneiyo Yudasi, yumoza wa 12, wakafika na mzinda ukuru wa ŵanthu, awo ŵakatumika na ŵasofi ŵarara, ŵamanyi-marango na ŵarara ŵa ŵaYuda uku ŵayegha malupanga na nthonga.

⁴⁴Sono wakumwendera mphiska yura wakaŵaphalira chimanyikwiro kuti, “Uyo ndamkumufyofyontha ndi mweneuyo, mukamukore na kuruta nayo kwambula kumutaya.”

⁴⁵Yudasi wakati wafika, mwaluŵiro wakasenderera kwa Yesu wakati, “Musambizgi!” Ntheura wakamufyofyontha.

⁴⁶Penepapo ŵanthu ŵara ŵakasenderera kwa Yesu na kumukora.

⁴⁷Kweni yumoza wa awo ŵakaŵapo, wakasorora lupanga lwakhe wakaheta na kuwunguzura khutu la muteŵeti wa Musofi Mukuru.

⁴⁸Yesu wakaŵafumba wakati, “Kasi mwiza kandikora na malupanga na zinthonga nga ndi para ndili munkhungu?

⁴⁹Zuŵa na zuŵa nkhaŵa namwe mu Nyumba ya Chiuta kusambizga, ndipo mukandikora chara? Kweni ichi chikuchitika mwakuti malembo ghafiskike.”

⁵⁰Penepapo ŵasambiri wose ŵakamureka Yesu na kuchimbira.

⁵¹Munyamata yunji, uyo wakavwara salu pera ya bafuta, wakarondezganga Yesu. Ŵanthu ŵara ŵakati ŵamukore, kweni iyo wakafwanthamuka,

⁵²na kureka salu yakhe ya bafuta na kuchimbira nkhule.

⁵³Ŵanthu ŵara ŵakaruta nayo Yesu kwa Musofi Mukuru. Ndipo ŵasofi ŵarara wose, ŵarara ŵa ŵaYuda pamoza na ŵamanyi-marango ŵakawungana.

⁵⁴Petrosi wakarondezganga Yesu pataliko, mpaka wakaya kanjira na mu chipanga cha Musofi Mukuru. Wakakhara pamoza na ŵalinda ŵa Nyumba ya Chiuta na kotha nawo moto.

⁵⁵Ntheura ŵasofi ŵarara na wose ŵa mphara yikuru ya ŵaYuda ŵakapenjanga ukaboni wa utesi mwakuti ŵamukome Yesu, kweni kuti ŵakawusanga chara.

⁵⁶Ŵanthu ŵanandi wakapereka ukaboni wa utesi, kweni ukaboni wawo kuti ukayananga chara.

⁵⁷Ŵanji ŵakawuka na kupereka ukaboni wa utesi ŵakati,

⁵⁸“Ise tikamupulika munthu uyu wakuti, ‘Ine nditi ndidilimulire pasi Nyumba iyi ya Chiuta iyo yikazengeka na mawoko gha ŵanthu, ndipo mu mazuŵa ghatatu nditi ndizenge yinyakhe yambula kuzengeka na mawoko.’ ”

⁵⁹Kweni nanga ndi ntheura ukaboni wawo kuti ukayananga chara.

⁶⁰Ntheura Musofi Mukuru wakimilira mukati mwawo ndipo wakamufumba Yesu wakati, “Kasi ukuzgora kanthu chara? Nchichi ichi ŵanthu aŵa ŵakukupanikizgira nacho?”

⁶¹Kweni Yesu wakakhara chete kwambula kuzgora kanthu. Ndipo Musofi Mukuru wakamufumbaso wakati, “Kasi ndiwe nadi Mesiya, Mwana wa Chiuta wakuchindikika?”

⁶²Yesu wakati, “Ndine nadi, ndipo muti muwonenge Mwana wa Munthu wakhara ku woko la maryero la Chiuta Mwenenkhongono zose. Ndipo mwamkumuwonaso wakwiza mu maŵingu gha kuchanya.”

⁶³Penepapo Musofi Mukuru wakaparura malaya ghakhe wakati, “Kasi tikupenjerachi ŵakaboni ŵanyakhe?

⁶⁴Mwapulika matusi ghakhe. Mukuti uli imwe?” Wose ŵakamususka ndipo ŵakati wakwenera kukomeka.

⁶⁵Ntheura ŵanji ŵakamba kumufunyira mata, ŵakamujara ku maso, na kumubwankhurabwankhura na kuyowoya kuti, “Loska ndi njani wakubwankhura!” Penepapo ŵalinda nawo ŵakamutora na kumutimba na malupi.

⁶⁶Apo Petrosi wakaŵa wachali pasi mu chipanga, msungwana wanchito wa Musofi Mukuru wakiza.

⁶⁷Pakuwona Petrosi wakotha moto, wakamulaŵisiska ndipo wakati, “Naweso wanguŵa pamoza na munthu yura Yesu wa ku Nazarete.”

⁶⁸Kweni wakakana wakati, “Nkhumanya chara nanga nkhupulikiska icho ukuyowoya.” Petrosi wakafumamo mu chipanga na kuya ku chipata ndipo penepapo tambala wakalira.

⁶⁹Ntheura msungwana wanchito yura wakamuwona Petrosi, wakatiso kwa awo ŵakimilira pafupi nayo, “Munthu uyu njumoza wa iwo.”

⁷⁰Kweni Petrosi wakakanaso. Pakati pajumphapo ka nyengo kachoko waka, awo ŵakimilira pafupi nayo ŵakati kwa Petrosi, “Nadi ndiwe yumoza wa iwo, pakuti ndiwe muGalileya.”

⁷¹Kweni Petrosi wakamba kujitemba na kurapa chomene wakati, “Nadi ndilije na kumumanya munthu uyo mukuyowoya.”

⁷²Penepapo tambala wakalira kachiŵiri, ndipo Petrosi wakakumbuka mazgu agho Yesu wakamuyowoyera kuti, “Pambere tambala wandalire kaŵiri, iwe wamkundikana katatu.” Chitima chikakwera ndipo wakalira.