Read new_tumbuka_bible Mariko 15 Bible Online

Mariko 15 - new_tumbuka_bible bible

Mariko 15

¹Kukati kwacha waka, ŵasofi ŵarara pamoza na ŵarara ŵa ŵaYuda na ŵamanyi-marango, ndiposo na ŵanyakheso ŵa mphara yose ya ŵaYuda ŵakaŵa na ungano. Ŵakati ŵamukaka Yesu, ŵakaruta nayo na kumupereka kwa Pilato.

²Pilato wakamufumba Yesu wakati, “Kasi ndiwe Karonga wa ŵaYuda?” Yesu wakamuzgora wakati, “Ndimwe mwayowoya.”

³Ŵasofi ŵarara ŵakamupacha Yesu mu vinthu vinandi.

⁴Ntheura Pilato wakamufumbaso Yesu wakati, “Kasi ukuzgora kanthu chara? Wona vinandi ivyo ŵakukupacha navyo!”

⁵Kweni Yesu kuti wakazgora kanthu chara, mwakuti Pilato wakazizwa.

⁶Pa nyengo ya chiphikiro cha Paska, Pilato wakazgoŵera kuŵasutulira mukayidi yumoza mweneuyo ŵanthu ŵakaromba kwa iyo.

⁷Wakaŵamo munthu mu gadi zina lakhe Baraba uyo ŵakakakika pamoza na vigeŵenga ivyo vikathiska ndopa mu chigaruka chawo.

⁸Mzinda wa ŵanthu ukakwerera kwa Pilato ndipo ŵakamuromba kuti waŵachitire icho wakazgoŵera kuŵachitira mazuŵa ghose.

⁹Pilato wakafumba wakati, “Kasi mukukhumba kuti ndimusutulirani Karonga wa ŵaYuda?”

¹⁰Pakuti wakamanya kuti ŵasofi ŵarara ŵakamupereka Yesu chifukwa cha bina.

¹¹Ŵasofi ŵarara ŵakakhuŵirizga mzinda wa ŵanthu kuti Pilato waŵasutulire Baraba.

¹²Pilato wakafumba wakati, “Kasi nditi nayo uli munthu uyo mukuti ndi Karonga wa ŵaYuda?”

¹³Pakuzgora ŵanthu ŵara ŵakachemerezga ŵakati, “Mupayika pa mphinjika!”

¹⁴Penepapo Pilato wakaŵafumba wakati, “Chifukwa? Wanangachi?” Ndipo ŵakachemerezga kwakuruska ŵakati, “Mupayika pa mphinjika!”

¹⁵Ntheura Pilato, pakukhumba kukondweska mzinda wa ŵanthu wakaŵasutulira Baraba, ndipo wakati wamuthyapula Yesu, wakamupereka kwa iwo kuti ŵamupayike pa mphinjika.

¹⁶Ndipo ŵasilikari ŵakaruta nayo Yesu mukati mu nyumba ya mukuru wa chigaŵa, yeneiyo ndi nyumba ya weruzgi, ndipo ŵakawunganya pamoza chiwuru chose cha ŵa nkhondo.

¹⁷Ŵakamuvwarika munjilira uswesi na kuruka mphumphu ya minga, iyo ŵakamuvwarika pa mutu.

¹⁸Ndipo ŵakamba kumutauzga ŵakati, “Muwonire Karonga wa ŵaYuda!”

¹⁹Ŵakamutimba pa mutu na thete na kumufunyira mata, ŵakajikama na kumulambira.

²⁰Ŵakati ŵamugoska ŵakamuvura munjilira uswesi ura na kumuvwarikaso vyakuvwara vyakhe. Ndipo ŵakamutora na kuruta nayo kuya kamupayika pa mphinjika.

²¹Munthu wa ku Kurene zina lakhe Simoni wiske wa Alekizandara na Rufu, wakajumphanga mu nthowa kufuma ku munda. Ŵasilikari ŵakamuchichizga kuyegha mphinjika ya Yesu.

²²Sono ŵasilikari ŵakiza nayo Yesu pa malo agho ghakuchemeka Gologota gheneagho ghakung'anamula kuti, “Malo gha Bwaza.”

²³Ŵakamupa vinyo lakusazgikana na mure, kweni wakakana kumwa.

²⁴Ndipo ŵakamupayika na kugaŵana vyakuvwara vyakhe pakuchita mphenduzgo mwakuti ŵasange icho waliyose wangatora.

²⁵Yikaŵa nyengo ya 9 koloko apo ŵakamupayikiranga pa mphinjika.

²⁶Ndipo malembo gha mrandu uwo ŵakamupacha nawo ghakaŵazgikanga ntheura, “Karonga wa ŵaYuda.”

²⁷Pamoza nayo ŵakapayika pa mphinjika vigeŵenga viŵiri, yumoza ku maryero yumoza ku mazere. [

²⁸Ntheura Malembo ghakafiskika agho ghakuti, “Wakapendekera pamoza na vigeŵenga.”]

²⁹Ŵanthu awo ŵakajumphangapo ŵakamutuka, ŵakapukunya mitu yawo na kuyowoya kuti, “Eya! Iwe ukatenge ukumanya kudilimura Nyumba ya Chiuta na kuyizengaso mu mazuŵa ghatatu.

³⁰Ujiponoske wekha, khira sono pa mphinjika!”

³¹Ntheura pera ŵasofi ŵarara na ŵamanyi-marango ŵakamugoska na kuyowoyeskana ŵakati, “Wakaponoskanga ŵanyakhe, kweni walije kumanya kujiponoska yekha!

³²Rekani Mesiya uyu, Karonga wa Israele, wikhe sono pa mphinjika kuti tiwone na kupulikana.” Awo ŵakapayikika nayo pamoza nawo ŵakamutombozganga.

³³Ndipo pa nyengo ya 12 koloko, chisi chikaŵa mu charu chose kufikira pa nyengo ya 3 koloko.

³⁴Pa nyengo ya 3 koloko, Yesu ŵakachemerezga na mazgu ghakuru wakati, “Eloi, Eloi, lamasabakatani?” Ilo likung'anamula kuti, Chiuta wane, “Chiuta wane, kasi mwandisidirachi?”

³⁵Ŵanji awo ŵakimilira pafupi ŵakati ŵapulika mazgu agha, ŵakati, “Tegherezgani, wakuchema Eliya.”

³⁶Yumoza ŵakachimbira, wakaya katora sipanje na kubizga mu vinyo la kusasa, wakaŵika ku thete, wakamupa Yesu kuti wamwe, na kuti, “Rekani danga! Tiwone usange Eliya wati wize, kwiza kamukhizga pa mphinjika!”

³⁷Sono wakati wachemerezga na mazgu ghakuru, wakafwa.

³⁸Ndipo chisalu chakuchinga mu Nyumba ya Chiuta chikaparuka pakati kufuma pachanya mpaka pasi.

³⁹Para murara wa ŵankhondo uyo wakimilira panthazi pa Yesu, wakati wawona umo Yesu wakafwira wakati, “Nadidi munthu uyu wakaŵa Mwana wa Chiuta!”

⁴⁰Ŵanakazi ŵanji ŵakaŵapo, awo ŵakalaŵiriranga kufuma patali. Mukati mwawo mukaŵa Mariya wa ku chigaŵa cha Magadala, Mariya nyina wa Yakhobe muchoko, Mariya nyina wa Yose, ndiposo na Salome.

⁴¹Ŵanakazi aŵa ŵakendanga nayo Yesu apo wakaŵa ku Galileya, ndipo ŵakamuteŵeteranga. Pakaŵaso ŵanakazi ŵanyakheso ŵanandi ŵeneawo ŵakiza nayo pamoza ku Yerusalemu.

⁴²Ndipo para mise yikati yafika, pakuti likaŵa zuŵa la kunozgekera, ilo ndi zuŵa pambere Sabata lindafike,

⁴³Yosefe wa ku Arimatiya, munthu wakuzirwa wa mphara yikuru ya ŵaYuda, nayoso wakapenjanga Ufumu wa Chiuta Iyo wakaŵa na chikanga ndipo wakaruta kwa Pilato, na kupempha thupi la Yesu.

⁴⁴Pilato wakazizwa pakupulika kuti Yesu wafwa kale. Ndipo wakati wachema murara wa ŵankhondo wakamufumba usange chikaŵa cha unenesko kuti Yesu wafwa kale.

⁴⁵Pilato wakati waphalirika na murara wa ŵankhondo kuti Yesu wafwa nadi, wakapereka thupi la Yesu kwa Yosefe.

⁴⁶Penepapo Yosefe wakagula salu ya bafuta, wakati wakhizga thupi la Yesu, wakalivungirizga mu salu ya bafuta. Ndipo wakaliŵika mu dindi ilo likazongeka mu jarawe ndipo ŵakakunkhuzgirapo libwe pa muryango wa dindi.

⁴⁷Mariya wa ku Magadala, na Mariya nyina wa Yose, ŵakaghawona malo agho Yesu wakasungikapo.