Read new_tumbuka_bible Mariko 16 Bible Online

Mariko 16 - new_tumbuka_bible bible

Mariko 16

¹Para zuŵa la Sabata likati lajumpha, Mariya wa ku Magadala, Mariya nyina wa Yakhobe na Salome ŵakagula vyakununkhiskira kuti ŵakaphakazge thupi la Yesu.

²Na mulenjelenje pa zuŵa lakudanga mu Sabata, apo dazi likati lafuma waka, ŵakaruta ku dindi,

³ndipo ŵakayowoyeskananga kuti, “Kasi ndi njani wamkutiwuskirapo libwe pa muryango wa dindi?”

⁴Para ŵakati ŵinuska maso ŵakawona kuti libwe lawuskikapo kale pa dindi. Likaŵa libwe likuru chomene.

⁵Ŵakati ŵanjira mu dindi, ŵakawona munyamata mweneuyo wakavwara munjilira utuŵa, wakhara ku dera la maryero ndipo iwo ŵakazukuma.

⁶Munyamata wakaŵaphalira kuti, “Rekani kuzukuma. Mukupenja Yesu wa ku Nazarete uyo ŵakamupayika pa mphinjika. Wawuka ku ŵakufwa! Wali pano chara. Wonani malo agha ŵakamugonekapo.

⁷Kweni rutani mukaŵaphalire ŵasambiri ŵakhe na Petrosi kuti, ‘Wamudangirirani ku Galileya ndiko mwamkumuwona nga ndi umo wakamuphalirirani.’ ”

⁸Penepapo ŵakafumamo mu dindi na kuchimbira, ŵakatenthema na kuzizwa pa ivyo ŵakawona. Ŵakayowoya kanthu ku waliyose chara, chifukwa ŵakaŵa na wofi. [

⁹Yesu wakati wawuka ku ŵakufwa na mulenjelenje pa zuŵa lakudanga la Sabata, wakawonekera danga kwa Mariya wa ku Magadala, mweneuyo wakamufumyamo viŵanda vinkhonde na viŵiri.

¹⁰Mariya wakaruta kuya kaŵaphalira awo ŵakakharanga na Yesu apo ŵakatengeranga na kulira.

¹¹Para ŵakati ŵapulika kuti Yesu ngwamoyo, na kuti Mariya wa ku Magadala wamuwona, kuti ŵakapulikana chara.

¹²Pamanyuma pa ichi, Yesu wakawoneka mu kaŵiro kanyakhe ku ŵasambiri ŵaŵiri ŵa iwo apo ŵakarutanga kwawo.

¹³Penepapo ŵasambiri aŵa ŵakawerera na kuya kaŵaphalira ŵanyawo, kweni kuti ŵakapulikana nawo chara.

¹⁴Pa umaliro, Yesu wakajirongora ku ŵakhe 11[4] apo ŵakaryanga. Wakaŵachenya chifukwa chakuwura kupulikana kwawo, ndiposo na unonono wa mitima yawo. Pakuti ŵakawura kugomezga awo ŵakamuwona wakati wawuka ku ŵakufwa.

¹⁵Ndipo wakati kwa iwo, “Rutani mu charu chose, mukapharazge Uthenga Uweme ku vilengiwa vyose.

¹⁶Yose uyo wakupulikana na kubapatizika wamkuponoskeka, kweni uyo wamkuwura kupulikana wamkususkika.

¹⁷Awo ŵamkupulikana ŵamkuchita vimanyikwiro ivi: Mu zina lane ŵamkufumiska viŵanda ndipo ŵamkuyowoya mu viyowoyero vya chilendo.

¹⁸Ŵamkukora njoka ndipo usange ŵamkumwa kanthu kakukoma kuti ŵamkupwetekeka chara. Ŵamkuŵika mawoko ghawo pa ŵarwari ndipo ŵamkuchira.”

¹⁹Fumu Yesu wakati wayowoya nawo, wakatorekera kuchanya ndipo wakakhara ku woko la maryero la Chiuta.

²⁰Ntheura ŵasambiri ŵakaruta ndipo ŵakaya kapharazga kosekose, apo Fumu yikateŵeta nawo pamoza, na kukhozga upharazgi wawo na vimanyikwiro. Ameni.] [Kamarizgiro kanyakhe ka kale 16.9-10 Ŵanakazi ŵakaruta kwa Petrosi na ŵanyakhe ndipo ŵakaŵakonkhoskera vyose ivyo ŵakaphalirika. Pamanyuma pa ivi, Yesu mwenecho, kwizira mu ŵasambiri ŵakhe kufuma ku vuma mpaka ku zambwe, wakatuma uthenga wa chiponosko cha muyirayira uwo ngwa kupatulika na wamoyo.]