Read new_tumbuka_bible Mariko 2 Bible Online

Mariko 2 - new_tumbuka_bible bible

Mariko 2

¹Pamanyuma pa mazuŵa ghachoko waka, Yesu wakawerera ku Kaperenaumu, ndipo ŵanthu ŵakapulika kuti wali mu nyumba.

²Ŵanthu ŵanandi ŵakawungana, ntheura kukaŵavye malo nanga mpha muryango wuwo. Apo wakaŵapharazgiranga mazgu gha Chiuta,

³ŵanthu ŵanji ŵakiza kwa Yesu na munthu wakufwa viŵaro, mweneuyo wakayegheka na ŵanthu ŵanayi.

⁴Ŵakati ŵatondeka kwiza nayo pafupi na Yesu chifukwa cha unandi wa ŵanthu, ŵakeghurapo pa mtenje wa nyumba, kudunjikana na apo wakaŵa Yesu. Ntheura ŵakamukhizgira pasi munthu yura pa kasarasara uyo wakagonapo.

⁵Yesu wakati wawona chipulikano chawo, wakati kwa munthu wakufwa viŵaro, “Wa mwana wane, zakwananga zako zagowokereka.”

⁶Sono ŵamanyi-marango ŵanji ŵakakhara penepapo, ndipo ŵakaghanaghananga mu mitima yawo kuti,

⁷“Chifukwa uli munthu uyu wakuyowoya ntheura? Wakutuka Chiuta! Ndi njani wangamanya kugowokera zakwananga, asi ndi Chiuta pera?”

⁸Penepapo Yesu wakati wamanya ivyo ŵakaghanaghananga mu mitima yawo, wakati kwa iwo, “Chifukwa uli mukughanaghana vya ntheura mu mitima yinu?

⁹Kasi chipusu ndi nchi, kuyowoya kwa wakufwa viŵaro uyu kuti, ‘Zakwananga zako zagowokereka,’ panji kuyowoya kuti, ‘Wuka, nyamura kasarasara wako wendenge?’

¹⁰Kweni mwakuti mumanye kuti Mwana wa Munthu wali na mazaza pa charu kugowokera zakwananga,” wakati kwa munthu wakufwa viŵaro,

¹¹“Nkhukuphalira kuti, wuka, nyamura kasarasara wako ndipo rutanga ku kwako.”

¹²Ndipo wakawuka, mwaluŵiro wakanyamura kasarasara wakhe na kuruta, uku wose ŵakuwona. Ntheura wose ŵakazukuma, ndipo ŵakamuchindika Chiuta ŵakati, “Tindachiwonepo na kale chinthu nga ndi ichi.”

¹³Yesu wakarutaso mu mphepete mwa Nyanja ya Galileya. Ŵanthu ŵanandi ŵakiza kwa iyo, ndipo wakamba kuŵasambizga.

¹⁴Apo wakajumphanga wakawona Levi mwana wa Alifeyu, wakhara mu nyumba yakusonkheramo msonkho, ndipo wakamuphalira wakati, “Ndirondezga.” Levi wakawuka na kumurondezga.

¹⁵Apo Yesu wakaryanga chakurya mu nyumba ya Levi, ŵakusonkheska msonkho ŵanandi na ŵakwananga ŵakakhara pamoza na Yesu na ŵasambiri ŵakhe. Pakaŵa ŵanthu ŵanandi awo ŵakamurondezga.

¹⁶Para ŵamanyi-marango ŵanji awo ŵakaŵa ŵa ŵaFarisi ŵakawona Yesu wakurya pamoza na ŵakwananga na ŵakusonkheska msonkho, ŵakati ku ŵasambiri ŵakhe, “Chifukwa uli wakurya pamoza na ŵanthu ŵa ntheura?”

¹⁷Yesu wakati wapulika ichi, wakati kwa iwo, “Awo mba msuma kuti ŵakupenja ng'anga chara, kweni ŵarwari ndiwo. Ine kuti nkhizira kuchema ŵarunji chara, kweni ŵakwananga.”

¹⁸Nyengo yinyakhe ŵasambiri ŵa Yohane Mubapatizi na ŵasambiri ŵa ŵaFarisi ŵakaziŵizganga kurya. Ŵanthu ŵanji ŵakiza kwa Yesu na kumufumba kuti, “Chifukwa uli ŵasambiri ŵa Yohane Mubapatizi na ŵasambiri ŵa ŵaFarisi ŵakuziŵizga kurya, kweni ŵinu ŵakuziŵizga chara?”

¹⁹Yesu wakazgora wakati, “Kasi awo ŵachemekera pa nthengwa ŵangamanya kuziŵizga kurya uku mwene-nthengwa wali nawo? Nyengo yose iyo iwo ŵali nayo mwene-nthengwa, kuti ŵakumanya kuziŵizga kurya chara.

²⁰Kweni nyengo yitizenge apo mwene-nthengwa wati wawuskikeko kwa iwo. Penepapo ndipo ŵizamkuziŵizga kurya zuŵa lenelira.”

²¹“Palije munthu uyo wakugambikapo chigamba cha salu yiphya pa laya likoroŵere. Usange wangachita ntheura, chigamba chiphya chikukhwinyata na kuguza laya likoroŵere lira. Ntheura laya likoroŵere lira likuparuka ndipo kuparuka kwakhe kukuŵa kukuru chomene.

²²Ndiposo palije munthu uyo wakupungulira vinyo liphya mu mathumba gha vikumba vidala. Usange wangachita ntheura, vinyo liphya lira lingaphumula mathumba ghavikumba vidala, ndiposo vinyo lira lingasakazika na mathumba gha vikumba wuwo. Kweni vinyo liphya wakupungulira mu mathumba gha vikumba viphya.”

²³Nyengo yimoza pa zuŵa la Sabata Yesu wakasorotanga mu minda ya tirigu. Apo ŵakendanga, ŵasambiri ŵakhe ŵakamba kupurura mphonje za tirigu.

²⁴Ntheura ŵaFarisi ŵakati kwa Yesu, “Chifukwa uli ŵasambiri ŵako ŵakuchita icho nchambula kulangurika kuchita pa zuŵa la Sabata?”

²⁵Yesu wakati kwa iwo, “Kasi mundaŵazgepo icho wakachita Davide para wakasokwa ndipo njara yikamukora iyo na awo wakaŵa nawo?

²⁶Iyo wakanjira mu Nyumba ya Chiuta apo Abiyatara wakaŵa Musofi Mukuru, ndipo wakarya Chingwa cha Uŵapo wa Chiuta icho chikaŵa cha dango chara kuti waliyose warye, kweni ŵasofi pera. Ndiposo cheneichi, wakaŵapako awo ŵakaŵa nayo?”

²⁷Yesu wakati kwa ŵaFarisi, “Zuŵa la Sabata, likimikikira munthu, kuti munthu wali kuŵirako chifukwa cha zuŵa la Sabata chara.

²⁸Ntheura Mwana wa Munthu ndi Fumu ya Sabata.”