Read new_tumbuka_bible Mariko 3 Bible Online

Mariko 3 - new_tumbuka_bible bible

Mariko 3

¹Yesu wakaya kanjiraso mu nyumba ya kusoperamo, mwenemumo mukaŵa munthu wakufwa woko.

²ŴaFarisi ŵanji awo ŵakaŵapo ŵakamulaŵisiskanga Yesu, kuwona kuti panji wangamuchizga munthu yura pa zuŵa la Sabata mwakuti ŵamupe mrandu.

³Yesu wakamuphalira munthu mweneuyo wakaŵa na woko la kuphapa kuti, “Zakuno kunthazi.”

⁴Yesu wakaŵafumba wakati, “Kasi nchichi icho chikulangurika pa zuŵa la Sabata? Kuchita uweme panji kuchita uheni? Kuponoska umoyo panji kukoma?” Kweni ŵakati waka chete.

⁵Mu ukari, Yesu wakalaŵiska uku na uku pa awo ŵakaŵa mwenemumo, ndipo wakakwenyerera chifukwa cha unonono wa mitima yawo. Penepapo wakamuphalira munthu yura wakati, “Nyoroska woko lako.” Wakanyoroska woko lakhe, ndipo likawereramo.

⁶ŴaFarisi ŵakafumira kuwaro, ndipo maluŵiro ŵakapangana na wupu wa ŵaHerode umo ŵangamukomera Yesu.

⁷Yesu wakafumapo pamoza na ŵasambiri ŵakhe na kuya ku nyanja ndipo mzinda ukuru wa ŵanthu ukamurondezga kufumira mu Galileya. Kufumaso ku Yudeya,

⁸Yerusalemu na Idumeya, ku sirya linyakhe la mronga wa Yorodani, ndiposo na kuzingirizga vigaŵa vya Ture na Sidoni, ŵanthu ŵanandi ŵakiza kwa iyo ŵakati ŵakapulika vyose ivyo wakachitanga.

⁹Pakuti mzinda wa ŵanthu ukaŵa ukuru, Yesu wakaŵaphalira ŵasambiri ŵakhe kuti ŵamunozgere ngaraŵa pafupi na iyo, mwakuti ŵanthu ŵareke kumufinyirizga.

¹⁰Pakuti Yesu wakachizga ŵanthu ŵanandi, ntheura ŵarwari wose ŵakamufinyirizganga kuti ŵamukhwaske.

¹¹Para ŵanthu ŵa mizimu yiheni ŵakamuwona, ŵakawa pasi ndipo ŵakachemerezga ŵakati, “Imwe ndimwe Mwana wa Chiuta!”

¹²Kweni wakaŵachinyinthizga chomene kuti ŵareke kumupharazga.

¹³Yesu wakakwerera ku phiri ndipo wakajichemera awo wakaŵakhumbanga, ndipo ŵakiza kwa iyo.

¹⁴Wakimika 12 na kuŵathya, “Ŵakutumika.” Wakaŵaphalira wakati, “Ndamusorani kuti mukharenge nane na kuti ndimutumaninge kuya kapharazga,

¹⁵na kutiso muŵenge na mazaza gha kufumyira viŵanda.”

¹⁶Mazina ghawo ndi agha: Simoni (mweneuyo Yesu wakamuthya zina lakuti Petrosi)

¹⁷Yakhobe na Yohane munung'una wakhe, ŵana ŵa Zebediya, (ŵeneawo Yesu wakaŵathya zina lakuti Bowanerege leneilo likung'anamula kuti, “Ŵana ŵa chidudumira cha Leza.”)

¹⁸Pakaŵaso Andreya, Filipu, Baratolomeyu, Mateyu, Tomasi, Yakhobe mwana wa Alifeyu, Tadeyu, Simoni wa chipani cha Zeloti.

¹⁹Ndiposo na Yudasi Isikariyoti, mweneuyo wakamwendera mphiska Yesu.

²⁰Ntheura Yesu wakiza ku kwawo, ndipo ŵanthu ŵanandi ŵakawunganaso mwakuti iyo na ŵasambiri ŵakhe kuti ŵakaŵa na nyengo ya kuryera chara.

²¹Para ŵa mbumba yakhe ŵakapulika ichi, ŵakaruta kuya kamutora pakuti ŵakati, “Wafuntha.”

²²Ŵamanyi-marango awo ŵakafuma ku Yerusalemu ŵakati, “Munthu uyu wali na Belezebule! Wakufumya viŵanda na nkhongono za mukuru wa viŵanda.”

²³Ntheura Yesu wakaŵachema ŵanthu kuti ŵize kufupi na iyo na kuyowoya nawo mu ntharika wakati, Kasi Satana wangafumya uli Satana?

²⁴Usange ŵanthu ŵa ufumu umoza ŵagaŵikana, ufumu uwu kuti ungakhora chara.

²⁵Usange ŵanthu ŵa nyumba yimoza ŵagaŵikana, nyumba iyo kuti yingakhora chara.

²⁶Usange Satana wakujisuska yekha na kugaŵikana, wangakhora chara. Umaliro wakhe ngweneuwu.

²⁷“Kulije munthu uyo wanganjira mu nyumba ya chinkhara na kuphanga chuma chakhe kwambula kuti wadange wakake chinkhara chira. Penepapo ndipo waphange chuma chira.

²⁸“Nadi nkhumuphalirani kuti, kwananga kose na matusi agho ŵanthu ŵakuyowoya kwa Chiuta viti vigowokereke.

²⁹Kweni uyo wakutuka Mzimu Mutuŵa wati wagowokereke chara. Wali na mrandu wa kwananga kwa muyirayira.”

³⁰(Yesu wakayowoya ivi chifukwa ŵanthu ŵara ŵakatenge, “Wali na mzimu uheni.”)

³¹Ŵanyina ŵa Yesu na ŵanung'una ŵakhe ŵakafika. Ŵakimilira kuwaro kwa nyumba, ndipo ŵakatuma munthu yunji kuya kamuchema.

³²Kweni mzinda wa ŵanthu ukakhara na kumuzingirizga, ndipo ŵakamuphalira ŵakati, “Ŵanyinamwe na ŵanung'una ŵinu ŵali kuwaro ŵakumukhumbani.”

³³Yesu wakaŵazgora wakati, “Amama na ŵanung'una ŵane mbanjani?”

³⁴Pakulaŵiska ŵanthu awo ŵakamuzingirizga wakayowoya wakati, “Aŵa ndiwo amama na ŵanung'una ŵane!

³⁵Uyo wakuchita khumbo la Chiuta ndiyo munung'una wane, mudumbu wane, na amama.”