Read new_tumbuka_bible Mariko 4 Bible Online

Mariko 4 - new_tumbuka_bible bible

Mariko 4

¹Yesu wakambaso kusambizga mu mphepete mwa Nyanja ya Galileya. Mzinda ukuru wa ŵanthu ukawungana na kumuzingirizga, ndipo wakanjira na kukhara mu ngaraŵa pa nyanja apo ŵanthu ŵakaŵa pa mlima mu mphepete mwa nyanja.

²Wakaŵasambizga vinthu vinandi mu ntharika, ndipo mu usambizgi wakhe wakati,

³“Tegherezgani! Mumiji yunji wakaruta kuya kaseŵa mbuto yakhe.

⁴Ndipo apo wakaseŵanga, mbuto yinyakhe yikawa mu mphepete mwa nthowa, ndipo tuyuni tukiza na kusora.

⁵Mbuto yinyakhe yikawa pa lusokorowe, penepapo pakaŵavye dongo linandi. Mbuto yira yikamera luŵiro chifukwa pakaŵavye dongo linandi.

⁶Kweni dazi likati lakwera, yikaŵawuka na komira pakuti yikaŵavye nkhorozi.

⁷Mbuto yinyakhe yikawa mukati mu minga, iyo yikakura na kuyifyoronganiska, ndipo kuti yikapambika vipambi chara.

⁸Kweni yinyakhe yikawa mu dongo liweme, yikamera na kukura, ndipo yikapambika vipambi vinandi. Yinyakhe yikapambika 30, yinyakhe 60, ndipo yinyakhe 100.”

⁹Ntheura Yesu wakati, “Uyo wali na makutu ghakupulikira, wapulike.”

¹⁰Para Yesu wakaŵa pa yekha, ŵasambiri ŵakhe 12 pamoza na ŵanthu ŵanji ŵakamufumba na urato wa zintharika.

¹¹Wakaŵaphalira wakati, “Kwa imwe kwapika kuti mumanye vya muchindindi vya Ufumu wa Chiuta. Kweni kwa awo ŵali kuwaro, vyose vikuyowoyeka mu ntharika,

¹²mwakuti, ‘Kulaŵiska, ŵalaŵiske nadi, kweni ŵawone kanthu chara, Kupulika ŵapulike nadi, kweni kupulikiska kanthu chara. Mzire ŵang'anamuke mu mtima, ndipo ŵagowokereke!’ ”

¹³Ntheura Yesu wakaŵafumba wakati, “Kasi mukupulikiska chara ntharika iyi? Ipo sono mupulikiskenge uli ntharika yinyakhe yiliyose?

¹⁴Mumiji wakuseŵa mazgu gha Chiuta.

¹⁵Mbuto izo zikawa mu mphepete mwa nthowa, ndi ŵanthu awo ŵakupulika mazgu gha Chiuta ndipo nyengo yeneiyo Satana wakwiza na kukwapura mazgu agho ghaseŵeka mwa iwo.

¹⁶Ntheura pera ŵanthu ŵanyakhe ŵali nga ndi mbuto izo zikaseŵeka pa lusokorowe. Nyengo yeneiyo ŵakughapulika mazgu gha Chiuta na kughapokerera na chimwemwe.

¹⁷Kweni kuti mazgu ghara ghakujintha nkhorozi mwa iwo chara. Ntheura ŵanthu ŵara ŵakuŵa na chipulikano kwa kanyengo kachoko waka. Para kwaŵa visuzgo panji kuzikizgika chifukwa cha mazgu gha Chiuta, nyengo yeneiyo ŵakuwerera nyuma mu chipulikano chawo.

¹⁸Ŵanyakhe ŵali nga ndi mbuto izo zikawa mu minga, ŵeneawo ŵakupulika mazgu gha Chiuta.

¹⁹Kweni vyakwenjezga vya umoyo uno, kutemweska usambazi na makhumbiro gha vinthu vinyakhe vikunjiramo mwa iwo na kufyoronganiska mazgu gha Chiuta. Ndipo mazgu ghara ghakupambika vipambi chara.

²⁰Kweni ŵanyakhe ŵali nga ndi mbuto izo zikaseŵeka pa dongo liweme, awo ŵakupulika mazgu gha Chiuta na kughapokerera. Ntheura ŵakupambika vipambi vinandi, ŵanji 30, ŵanji 60, ndipo ŵanjiso 100.”

²¹Yesu wakaŵafumba wakati, “Kasi ŵanthu ŵakutora nyali na kuyibenekerera na chidunga panji kuyiŵika kusi ku chitara? Asi ŵakuyiŵika pa malo ghakuwonekera?

²²Pakuti chinthu chose chakubisika chizamkuvumbukwira pakweru, ndipo chose icho nchakubenekerereka chiti chibenukenge.

²³Uyo wali na makutu ghakupulikira, wapulike!”

²⁴Yesu wakayowoyaso nawo wakati, “Chenjerani pa ivyo mukupulika! Chipimo icho mukweruzgira ŵanyinu, chenechicho ndicho Chiuta wizamkweruzgira imwe kwakuruska.

²⁵Pakuti uyo wali navyo kuti kupikenge vinandi kwa iyo. Kweni uyo walije, wizamkupokeka nanga nkhachokochoko ako wali nako.”

²⁶Yesu wakaŵaphalira wakati, “Ufumu wa Chiuta ukulingana waka na munthu uyo wakuseŵa mbuto yakhe mu munda.

²⁷Na usiku wakugona ndipo na mulenje wakuwuka. Nyengo yose mbuto yira yikumera na kukura. Kweni mwenecho kuti wakumanya chara umo yikumerera.

²⁸Dongo ilolene ndilo likumezga mbuto na kuyipambikiska vipambi, pakudanga musonga, pamanyuma chisasuni, ndiposo na lumphuzi mu chisasuni.

²⁹Kweni para mbuto yakhoma, wakutora chigeru na kudumula mbuto pakuti nyengo yavuna yakwana.”

³⁰Yesu wakayowoyaso wakati, “Kasi tiwulinganizge na vichi Ufumu wa Chiuta? Panji tingawuyowoyera mu ntharika uli?

³¹Uli nga ndi njere la matubeni ulo para laseŵeka mu dongo, nduchoko chomene kuruska mbuto zose mu charu.

³²Ndipouli para laseŵeka, lukumera na kukura ndipo lukuŵa chivwati chikuru kuruska vivwati vyose vya mu munda. Likuŵa na minthavi yikuru, mwakuti viyuni vya mudera vikwiza na kuzenga vivimbo vyawo mu minthavi yakhe.”

³³Yesu wakasambizganga ŵanthu mazgu gha Chiuta mu ntharika zinandi nga ndi izi, kwakuyana na kapulikiskiro kawo.

³⁴Iyo kuti wakaŵayowoyeranga kanthu chara kwambula ntharika. Kweni ku udesi ndiko wakaŵafwatuliranga vyose ŵasambiri ŵakhe.

³⁵Zuŵa lenelira nyengo ya mise, Yesu wakaŵaphalira ŵasambiri ŵakhe wakati, “Tiyeni tambukire ku sirya linyakhe la nyanja.”

³⁶Ntheura ŵakati ŵasida mzinda wa ŵanthu, ŵasambiri ŵakhe ŵakanjira mu ngaraŵa umo wakaŵa Yesu, ndipo ŵakaruta nayo pamoza. Pakaŵaso ngaraŵa zinyakhe izo zikarongozgana nayo.

³⁷Chimphupuru chikuru chikawuka, majigha ghakamba kutimba ngaraŵa na kunjira mukati, ndipo ngaraŵa yikamba kuzura na maji.

³⁸Kweni Yesu wakagona pa musamiro ku umaliro wa ngaraŵa, ndipo ŵasambiri ŵakamuwuska ŵakati, “Musambizgi, kasi mukulorako chara kuti tikufwa?”

³⁹Yesu wakawuka mu tulo na kuyichenya mphepo na kuti ku majigha, “Chetama! Kuti waka yii.” Mphepo yikareka kuputa ndipo kukaŵa bata likuru.

⁴⁰Yesu wakati ku ŵasambiri ŵakhe, “Chifukwa uli mukopa? Kasi muchalije chipulikano?”

⁴¹Ŵasambiri ŵakazura na wofi ukuru chomene, ndipo ŵakayowoyeskana yumoza na munyakhe ŵakati, “Ndi njani munthu uyu mweneuyo nanga ndi mphepo na nyanja vikumupulikira?”