Read new_tumbuka_bible Mariko 5 Bible Online

Mariko 5 - new_tumbuka_bible bible

Mariko 5

¹Yesu na ŵasambiri ŵakhe ŵakafika ku sirya linyakhe la Nyanja ya Galileya, ku charu cha Geraseni.

²Apo Yesu wakafumanga mu ngaraŵa, munthu wa mizimu yiheni uyo wakufumanga ku mararo wakakumana nayo.

³Munthu uyu wakakharanga ku mararo, ndipo pakaŵavye munthu wakuti wamukake na vingwe panji na unyoro.

⁴Nyengo zinandi wakakakikanga mawoko na malundi na unyoro, kweni wakadumulanga unyoro na kubanthura magwede gha mu malundi. Pakaŵavye munthu wa nkhongono kumutonda.

⁵Muhanya na usiku wakakharanga ku mararo na mu mapiri ndipo wakachemerezganga na kujicheka na mawe.

⁶Munthu yura wakati wamuwona Yesu patali, wakamuchimbilira na kujikama mu malundi ghakhe.

⁷Wakachemerezga chomene wakati, “Kasi mukukhumba kuchitachi nane, imwe Yesu Mwana wa Chiuta Chikurukuru? Nkhumurombani mu zina la Chiuta kuti mungandisuzganga.”

⁸(Munthu yura wakayowoya ichi chifukwa Yesu wakati kwa iyo, “Mzimu uheni iwe, fumamo mu munthu uyu!”)

⁹Yesu wakamufumba wakati, “Zina lako ndiwe njani?” Iyo wakazgora wakati, “Zina lane ndine ‘Chimuzinda’[2] chifukwa tili ŵanandi.”

¹⁰Munthu yura wakamuŵeya Yesu kuti wareke kuyituma mizimu yira kuwaro kwa charu chira.

¹¹Pafupi waka, pakaŵa mskambo wa nkhumba izo zikaryanga mu mphepete mwa phiri.

¹²Mizimu yiheni yikamuŵeya Yesu yikati, “Mutitume mu nkhumba zira ndimo tikanjire.”

¹³Yesu wakayizomerezga. Ndipo mizimu yiheni yikafumamo mu munthu yura, yikaya kanjira mu nkhumba. Mskambo wa nkhumba ukaŵa pafupi vikwi viŵiri, ndipo ukachimbilira kusika na kugodobokera kwa kusendemuka na kuya kanjira mu nyanja, ndipo ukamirwa wose.

¹⁴Awo ŵakaliskanga nkhumba zira ŵakachimbira na kuya kaphara ku msumba na ku mizi, ndipo ŵanthu ŵakiza kawona icho chikachitika.

¹⁵Ndipo wakiza kwa Yesu, ŵakawona munthu uyo wakaŵa na mizimu yiheni wakhara pasi, wavwarikika makora ghene, ndipo vifusi vyamara. Ŵanthu ŵara ŵakaŵa na wofi ukuru.

¹⁶Awo ŵakawona ichi, ŵakakonkhoska icho chikachitika ku munthu uyo wakaŵa na viŵanda ndiposo na ku nkhumba zira.

¹⁷Ndipo ŵanthu ŵakamba kumuŵeya Yesu kuti wafumemo mu chigaŵa chawo.

¹⁸Apo Yesu wakanjiranga mu ngaraŵa, munthu mweneuyo wakaŵa na viŵanda wakamuromba kuti warutenge nayo.

¹⁹Yesu kuti wakamuzomerezga chara, kweni wakati, “Rutanga ku kwinu, ku ŵabali ŵako, ukaŵaphalire ivyo Fumu yakuchitira iwe pakukulengera lusungu.”

²⁰Ntheura munthu yura wakaruta na kwamba kuthuwuska mu Misumba Khumi[3] vyose ivyo Yesu wakamuchitira, ndipo ŵanthu wose awo ŵakapulika ichi ŵakazizwa.

²¹Para Yesu wakambukiraso ku sirya linyakhe la nyanja mu ngaraŵa, mzinda ukuru ukamuwunganira mu mphepete mwa nyanja apo wakaŵa iyo.

²²Ndipo murara yumoza wa nyumba ya kusoperamo zina lakhe Yayiro wakiza kwa Yesu. Wakati wamuwona Yesu, wakawa mu malundi ghakhe,

²³na kumuŵeya chomene wakati, “Mwana wane msungwana wali pafupi kufwa. Nkhumuŵeyani, tiyeni mukaŵike mawoko ghinu pa iyo, mwakuti wachire na kuŵa wamoyo.”

²⁴Ntheura Yesu wakaruta nayo. Ŵanthu ŵanandi ŵakenda nayo pamoza mwa kumufinyirizga.

²⁵Wakaŵapo mwanakazi yunji uyo wakaŵa na nthenda yakusurura ndopa kwa virimika 12.

²⁶Mwanakazi uyu wakasuzgika chomene na kwenda mu zing'anga izo zikayezganga kumuchizga. Wakataya vyuma vyakhe vyose kweni kuti wakachizgika chara. Mu malo mwakhe matenda ghakarutiliranga kunthazi.

²⁷Para wakati wapulika vya Yesu, wakanjira na kuphapatizga mu mzinda wa ŵanthu mphaka wakafika kunyuma kwa Yesu na kukhwaska laya lakhe.

²⁸Pakuti wakati, “Usange ndingakhwaska nanga ndi malaya ghakhe, nditi ndichirenge.”

²⁹Nadidi wakakhwaska laya lakhe, ndipo penepapo kusurura kwa ndopa zakhe kukamara nyengo yeneyira ndipo wakajipulika mu thupi mwakhe kuti wachizgika ku nthenda yakhe.

³⁰Pa nyengo yeneiyo Yesu wakamanya kuti nkhongono zinyakhe zafumamo mwa iyo. Ntheura wakang'anamukira ku mzinda wa ŵanthu wakafumba wakati, “Ndi njani wakhwaska malaya ghane?”

³¹Ŵasambiri ŵakhe ŵakazgora ŵakati, “Namwe mukuwona waka kuti ŵanthu ŵakumufinyirizgani, kweni mukufumba kuti, ‘Ndi njani wandikhwaska?’ ”

³²Pa nyengo iyi Yesu wakalaŵiska uku na uku kuti wawone uyo wakachita ichi.

³³Ntheura mwanakazi yura pakumanya icho chikamuchitikira, wakiza panthazi za Yesu na kuwa mu malundi ghakhe. Wakazura na wofi ukuru na kutenthema, ndipo wakamuphalira unenesko wose.

³⁴Yesu wakati ku mwanakazi yura, “Mwana wane, chipulikano chako chakuchizga. Rutanga mu mutende, ndipo chira ku matenda ghako.”

³⁵Apo Yesu wakaŵa wachali kuyowoya, kukiza ŵanthu kufuma ku nyumba ya murara wa nyumba ya kusoperamo ndipo ŵakati, “Mwana wako wafwa. Kasi ukumusuzgirachiso Musambizgi?”

³⁶Kweni Yesu pakureka kupwererako icho ŵanthu ŵara ŵakayowoya, wakamuphalira murara wa nyumba ya kusoperamo wakati, “Ungopanga, kweni upulikane ndipera.”

³⁷Yesu kuti wakazomerezga munthu kurongozgana nayo chara, kweni kupatulako Petrosi Yakhobe na munung'una wakhe Yohane.

³⁸Para ŵakati ŵafika ku nyumba ya murara wa nyumba ya kusoperamo, Yesu wakasanga chiwawa chikuru na ŵanthu ŵakulira na kutengera chomene.

³⁹Wakati wanjira mu nyumba wakafumba wakati, “Kasi mukuchitirachi chiwawa na kulira? Mwana uyu kuti wafwa chara kweni wagona tulo.”

⁴⁰Kweni ŵanthu ŵakamuseka chomene. Ndipo wakati waŵafumyamo wose mu nyumba, wakatora wiske na nyina wa mwana na ŵasambiri awo ŵakaŵa nayo na kunjira nawo ku chipinda uko kukaŵa mwana.

⁴¹Wakamukora pa woko ndipo wakati, “Talita, Kumi,” ndiko kuti, “Wa msungwana iwe, nkhukuphalira kuti wuka.”

⁴²Penepapo msungwana wakawuka na kwamba kwenda, pakuti wakaŵa na virimika 12. Ntheura ŵanthu wose ŵakazukuma chomene.

⁴³Yesu wakaŵachinyinthizga kuti ŵareke kuphalirapo munthu nanga njumoza na icho chikachitika. Ndipo wakaŵaphalira kuti ŵamupe chakurya msungwana yura.