Read new_tumbuka_bible Mariko 6 Bible Online

Mariko 6 - new_tumbuka_bible bible

Mariko 6

¹Yesu wakafumako ku malo ghara, wakiza ku muzi wa kwawo, ndipo ŵasambiri ŵakhe ŵakarongozgana nayo.

²Pa zuŵa la Sabata iyo wakamba kusambizga mu nyumba ya kusoperamo. Ŵanthu ŵanandi awo ŵakamupulika ŵakazizwa ndipo ŵakafumba ŵakati, “Kasi munthu uyu wali kuvisanga nkhu vyose ivi? Kasi ndi vinjeru uli ivyo wali kupika kuti wachite milimo ya minthondwe nga ndi iyi?

³Asi uyu ndiyo muŵaji wa mathabwa, mwana wa Mariya, mukuru wa Yakhobe, Yose, Yudasi na Simoni? Ndipo asi ŵadumbu ŵakhe ŵali na ise pano?” Ntheura ŵakakhuŵazgika mwa iyo.

⁴Ndipo Yesu wakati kwa iwo, “Nchimi njakuchindikika kosekose, kweni mu charu cha kwakhe na mukati mu ŵabali ŵakhe na mu mbumba yakhe, ndimo yikuchindikika chara.”

⁵Ndipo wakatondeka kuchitako mlimo wankhongono, kweni wakaŵika mawoko ghakhe pa ŵarwari ŵachoko waka na kuŵachizga.

⁶Iyo wakazizwa chomene chifukwa ŵanthu ŵakaŵavye chipulikano. Yesu wakenda mu vikaya zingirizge uku wakusambizga ŵanthu.

⁷Wakachema ŵasambiri ŵakhe 12, ndipo wakamba kuŵatuma ŵaŵiriŵaŵiri. Wakaŵapa mazaza ghakufumiskira mizimu yiheni.

⁸Wakaŵalangula kuti, “Mungayeghanga kanthu kalikose chara pa ulendo winu kweni ndodo pera. Murekeso kuyegha chingwa panji thumba nesi ndarama mu vibeta vyinu.

⁹Vwarani viryato kweni mungavwaranga malaya ghaŵiri chara.”

¹⁰Yesu wakaŵaphaliraso wakati, “Kose uko mwamkufika na kupokerereka, kharani mu nyumba mwenemumo musuke mufumemo mu msumba ura.

¹¹Usange mu mizi yinyakhe ŵakumupokererani chara, nanga nkhumupulikani, fumanimo. Ndipo para mukufumamo kung'unthani fuvu la ku malundi ghinu kuti chiŵenge chipanikizgo kwa iwo.”

¹²Ntheura ŵasambiri ŵakaruta ndipo ŵakapharazga kuti ŵanthu ŵang'anamuke mu mtima.

¹³Ŵakafumya viŵanda vinandi, ndipo ŵakaŵaphakazga mafuta ŵarwari ŵanandi na kuŵachizga.

¹⁴Karonga Herode wakapulika makani agha, pakuti lumbiri lwa Yesu lukatandazgika kosekose. Ŵanthu ŵanji ŵakayowoya kuti, “Yohane Mubapatizi wawuka ku ŵakufwa, ndicho chifukwa nkhongono izi zikuchita nchito mwa iyo.”

¹⁵Kweni ŵanji ŵakati, “Ndi Eliya.” Ŵanyakheso ŵakati, “Ndi nchimi yimoza ya nchimi za kale.”

¹⁶Para Herode wakati wapulika ichi, wakati, “Yohane uyo nkhamudumula mutu yura ndiyo wali kuwuskika ku ŵakufwa!”

¹⁷Chifukwa Herode wakalangula kale kuti Yohane wakoreke na kukakika na kumuŵika mu gadi. Wakachita ichi chifukwa cha Herodiya muwoli wa Filipu munung'una wakhe, uyo iyo wakamutora kuŵa muwoli wakhe.

¹⁸Pakuti Yohane wakamuphalira Herode kuti, “Nchambula kulangurika kuti iwe utore muwoli wa munung'una wako.”

¹⁹Ntheura Herodiya wakamutinkha Yohane, ndipo wakakhumbanga kumukoma, kweni wakatondekanga.

²⁰Pakuti Herode wakopanga Yohane ndipo wakamuvikiriranga pakumanya kuti wakaŵa munthu murunji na mutuŵa. Ntheura wakamusunganga makora. Nyengo zinandi wakatemwa kumutegherezga Yohane nangauli wakazizikikanga chomene para wakamupulikanga.

²¹Pa umaliro Herodiya wakasanga mwaŵi. Pakaŵa pa zuŵa lakukumbukira kubabika kwa Herode apo Herode wakanozgera chiphikiro ndipo wakachema nduna zakhe, ŵarongozgi ŵa nkhondo ndiposo ŵararaŵarara ŵa mu chigaŵa cha Galileya.

²²Mwana msungwana wa Herodiya wakanjira mu chiphikiro na kuvina, ndipo wakamukondweska Herode pamoza na awo ŵakaŵa nayo pa chiphikiro chira. Ntheura Karonga Herode wakamuphalira msungwana yura wakati, “Romba chose icho ukukhumba ndipo nditi ndikupenge.”

²³Ndipo wakapangana nayo wakati, “Nditi ndikupenge chose icho ukukhumba nanga ndi kukugaŵirako pakati ufumu wane.”

²⁴Ntheura msungwana yura wakafuma na kuya kafumba ŵanyina kuti, “Kasi nkharombe vichi?” Ŵanyina ŵakazgora ŵakati, “Ukarombe mutu wa Yohane Mubapatizi.”

²⁵Msungwana yura wakawerera luŵiro kwa karonga na kuti, “Nkhukhumba kuti mundipe sono pano mutu wa Yohane Mubapatizi pa mbale apa.”

²⁶Ndipo karonga wakaŵa na chitima chikuru chomene, chifukwa cha chirapo chakhe icho wakachita pa maso pa awo ŵakachemeka pa chiphikiro. Ntheura wakatondeka kusintha.

²⁷Sono karonga wakatuma yumoza wa ŵasilikari nyengo yeneiyo na kumulangula kuti wakize na mutu wa Yohane. Musilikari wakaruta ku gadi na kudumula mutu wa Yohane.

²⁸Ndipo wakiza nawo mutu pa mbale. Karonga wakapereka ku msungwana, ndipo nayo wakapereka ku ŵanyina.

²⁹Ŵasambiri ŵa Yohane ŵakati ŵapulika ichi, ŵakiza na kutora thupi kuti ŵakaliŵike mu dindi.

³⁰Ŵakutumika ŵara ŵakawerera kwa Yesu na kumuphalira vyose ivyo ŵakachita na kusambizga.

³¹Yesu wakaŵaphalira wakati, “Tiyeni imwe mwekha tirutenge ku malo ghambula ŵanthu kuti mukapumulepo pachoko waka.” Pakuti ŵanthu ŵanandi chomene ŵakizanga na kuruta, Yesu na ŵasambiri ŵakhe kuti ŵakaŵa na nyengo ya kuryera chara.

³²Ntheura ŵakanjira mu ngaraŵa na kuruta kwa ŵekha ku malo ghambula ŵanthu.

³³Kweni ŵanthu ŵanandi ŵakaŵawona ŵakuruta ndipo ŵakaŵamanya. Ntheura ŵakenda luŵiro pa mlima kufuma ku mizi yose na kumudangirira Yesu na ŵasambiri ŵakhe na kuya kafika pa malo ghara.

³⁴Para Yesu wakati wafuma mu ngaraŵa, wakawona mzinda ukuru wa ŵanthu ndipo wakaŵa na chiwuravi na iwo pakuti ŵakaŵa nga ndi mberere zambula muliska. Ntheura wakamba kuŵasambizga vinthu vinandi.

³⁵Apo dazi likaŵa pafupi kunjira, ŵasambiri ŵakhe ŵakiza kwa iyo ŵakamuphalira ŵakati, “Kuno ndi malo ghambula ŵanthu, ndiposo ndi mise kale.

³⁶Muŵawezge ŵanthu kuti ŵarute ku vikaya vya pafupi ivi mwakuti ŵakajigulire ako ŵangarya.”

³⁷Yesu wakaŵazgora wakati, “Ŵapani chakurya ndimwe kuti ŵarye.” Ŵakamufumba ŵakati, “Kasi tirute tikagule vyakurya vya mtengo wa ndarama za madenari 200 kuti ndivyo tiŵape ŵarye?”

³⁸Yesu wakaŵafumba wakati, “Kasi muli na vingwa vilinga? Rutani mukawoneko.” Ŵakaya kasanga kuti, “Kuli vingwa vinkhonde na somba ziŵiri.”

³⁹Yesu wakaŵalangula ŵasambiri ŵakhe kukharika ŵanthu pasi mu viwuruviwuru pa utheka wakubiriŵira.

⁴⁰Ŵanthu ŵakakhara pasi mu mizere ya ŵanthu 100 na ŵanthu 50.

⁴¹Ndipo wakati watora vingwa vinkhonde vira na somba ziŵiri, wakalaŵiska kuchanya, wakawonga Chiuta ndipo wakati wamenya wakavipereka ku ŵasambiri kuti ŵakharikire ŵanthu. Ndipo wakaŵagaŵiraso wose somba ziŵiri zira.

⁴²Ndipo wose ŵakarya na kukhuta.

⁴³Pa umaliro ŵasambiri ŵakasora vimenyu vya vingwa na somba ivyo vikakharapo ndipo vikazura vidunga 12.

⁴⁴Ndipo unandi wa ŵanthu awo ŵakarya ukaŵa ŵanarume pera vikwi vinkhonde.

⁴⁵Mwaluŵiro Yesu wakaŵaphalira ŵasambiri ŵakhe kuti ŵanjire mu ngaraŵa na kudangirako ku sirya linyakhe ku Betesaida, apo iyo wakawezganga mzinda wa ŵanthu.

⁴⁶Yesu wakati walayirana nawo, wakakwerera ku phiri kuya karomba.

⁴⁷Ndipo kukati kwaŵa mise ngaraŵa yikaŵa pakatikati pa nyanja, apo Yesu wakaŵa yekha ku mlima.

⁴⁸Yesu wakaŵawona ŵasambiri ŵakhe ŵakusuzgika kuvuŵa ngaraŵa, chifukwa mphepo yikaŵajandizganga. Ku matandakucha pa ora la chinayi iyo wakiza kwa iwo uku wakwenda pa nyanja, wakatenge waŵajumphe,

⁴⁹kweni ŵakati ŵamuwona wakwenda pa nyanja, ŵakaghanaghana kuti ndi muzguka. Penepapo ŵakachemerezga na wofi ukuru.

⁵⁰Wose ŵakamuwona ndipo ŵakatenthema. Penepapo wakayowoya nawo wakati, “Khwimani mtima! Ndine, mungopanga.”

⁵¹Mbwenu wakanjira mu ngaraŵa pamoza nawo ndipo mphepo yikareka. Ndipo ŵasambiri ŵakazizwa chomene,

⁵²chifukwa chakuwura kupulikiska ivyo vikachitika pa vingwa, mitima yawo yikaŵa yinonono.

⁵³Ndipo para Yesu na ŵasambiri ŵakhe ŵakati ŵambuka nyanja, ŵakafika ku charu cha Mutezarete ndipo ŵakimika ngaraŵa.

⁵⁴Ŵakati ŵafuma mu ngaraŵa, luŵiro ŵanthu ŵakamupanikizga Yesu.

⁵⁵Ŵanthu ŵa mu chigaŵa chose chira ŵakachimbira na kwiza na ŵarwari kwa Yesu. Ŵakaŵayeghanga pa kasarasara kwiza nawo kose uko ŵakapulika kuti Yesu wali.

⁵⁶Ntheura na kose uko Yesu wakaruta, mu vikaya, mu misumba, ŵanthu ŵakagoneka ŵarwari ŵawo mu maluwugha. Ŵakamuŵeya Yesu kuti ŵakhwaske nanga ndi mphonje za laya lakhe, ndipo wose awo ŵakazikhwaska ŵakachira.