Read new_tumbuka_bible Mariko 8 Bible Online

Mariko 8 - new_tumbuka_bible bible

Mariko 8

¹Pa nyengo yira, mzinda ukuru wa ŵanthu ukawunganaso. Apo Yesu wakawona kuti ŵanthu ŵalije chakurya, wakachema ŵasambiri ŵakhe na kuŵaphalira kuti,

²“Ndili nawo na chiwuravi ŵanthu wose aŵa, chifukwa ŵakhara nane mazuŵa ghatatu ndipo sono ŵalije chakurya.

³Usange nkhuŵawezga ku mizi yawo ŵali na njara ntheura, ŵendamkufwa lunkhuŵa mu nthowa, chifukwa ŵanji ŵafuma kutali.”

⁴Ŵasambiri ŵakhe ŵakamufumba ŵakati, “Kasi munthu wangaya katora nkhu chakurya chakukwanira kuti waŵakhutiske ŵanthu wose aŵa muno mu chiparamba?”

⁵Yesu wakaŵafumba wakati, “Muli na vingwa vilinga?” Ŵakazgora ŵakati, “Tili navyo vinkhonde na viŵiri.”

⁶Yesu wakaŵaphalira ŵanthu kuti ŵakhare pasi. Penepapo wakatora vingwa vinkhonde na viŵiri vira wakawonga Chiuta, ndipo wakavimenya na kupereka ku ŵasambiri ŵakhe kuti ndiwo ŵaŵakharikire ŵanthu. Ndipo ŵasambiri ŵakhe ŵakaŵakharikira ŵanthu.

⁷Ndipo ŵakaŵaso na tusomba tuchoko waka. Wakati watutumbika wakaŵalangula kuti ŵaŵagaŵire ŵanthu.

⁸Ŵanthu ŵakarya na kukhuta, ndipo vimenyu ivyo vikakhara ŵakasora na kuzuzga vidunga vinkhonde na viŵiri.

⁹Ŵanthu awo ŵakarya ŵakaŵa pakunji vikwi vinayi.

¹⁰Penepapo Yesu wakaŵawezga ŵanthu, ndipo nyengo yeneiyo wakanjira mu ngaraŵa pamoza na ŵasambiri ŵakhe, ŵakaruta ku chigaŵa cha Dalamanuta.

¹¹ŴaFarisi ŵanji ŵakiza kwa Yesu ndipo ŵakamba kupindana nayo. Ŵakakhumba kumuyezga ndipo ŵakamuromba kuti waŵarongore chimanyikwiro chakufumira kuchanya.

¹²Yesu wakakhizga mtima na kukweŵeka wakati, “Chifukwa nchichi muwiro uwu ukupenja chimanyikwiro? Nkhumuphalirani unenesko kuti, chimanyikwiro chiti chipikenge chara ku muwiro uwu!”

¹³Ntheura wakaŵareka na kunjira mu ngaraŵa ndipo wakambukira ku sirya linyakhe la nyanja.

¹⁴Sono ŵasambiri ŵa Yesu ŵakaruwa kuyegha vingwa vya kukwanira, kweni mu ngaraŵa mukaŵa chingwa chimoza pera.

¹⁵Ndipo Yesu wakaŵachenjezga wakati, “Chenjerani na chirungo cha ŵaFarisi na cha Herode.”

¹⁶Ndipo ŵasambiri ŵakadumbiskana yumoza na munyakhe pa ichi kuti, “Wakuyowoya ntheura pakuti panji tilije vingwa?”

¹⁷Yesu wakamanya ivyo ŵakadumbiskananga, ndipo wakaŵafumba kuti, “Chifukwa uli mukudumbiskana kuti mulije vingwa? Kasi mpaka sono mundapanikizge nesi kupulikiska? Kasi mitima yinu njinonono?

¹⁸Maso muli nagho, kasi mungalaŵiska chara? Makutu muli nagho, kasi mungapulika chara? Kasi mukukumbuka chara?

¹⁹Para nkhamenya vingwa vinkhonde na kugaŵira ŵanthu vikwi vinkhonde, kasi ndi vidunga vilinga vya vimenyu ivyo mukasora?” Ŵakazgora ŵakati, “12.”

²⁰Wakaŵafumbaso wakati, “Apo nkhamenyanga vingwa vinkhonde na viŵiri na kugaŵira ŵanthu vikwi vinayi, kasi vimenyu ivyo mukasora vikazura vidunga vilinga?” Ŵakazgora ŵakati, “Vinkhonde na viŵiri.”

²¹Ntheura Yesu wakati kwa iwo, “Kasi na sono mukupulikiska chara?”

²²Yesu na ŵasambiri ŵakhe ŵakiza ku Betesaida, ndipo ŵanthu ŵanji ŵakamutorera munthu wa chiburumutira na kumuŵeya Yesu kuti wamukhwaske.

²³Yesu wakamukora pa woko wa chiburumutira yura na kumurongozgera kuwaro kwa chikaya. Ndipo wakati wamufunyira mata mu maso mwakhe na kuŵika mawoko ghakhe pa iyo, wakamufumba wakati, “Kasi ukuwona kalikose?”

²⁴Iyo wakinuska maso wakati, “Nkhuwona ŵanthu, kweni ŵakuwoneka nga ndi makuni ghakwenda.”

²⁵Sono Yesu wakaŵikaposo mawoko ghakhe pa maso gha wachiburumutira. Pa nyengo iyi wachiburumutira yura wakathwanula maso ndipo maso ghakhe ghakawereramo na kuwona makora ghene.

²⁶Yesu wakamutuma ku kwakhe, wakati na kumuphalira kuti, “Unganjirangamo mu chikaya chara.”

²⁷Yesu na ŵasambiri ŵakhe ŵakaruta ku mizi yakuzingirizga Kesareya-Filipi. Pa nthowa wakaŵafumba ŵasambiri ŵakhe wakati, “Kasi ŵanthu ŵakuti ndine njani?”

²⁸Ŵakamuzgora ŵakati, “Ŵanthu ŵanji ŵakuti, ndimwe Yohane Mubapatizi, ŵanji ŵakuti ndimwe Eliya, kweni ŵanyakheso ŵakuti, ndimwe yumoza wa nchimi.”

²⁹Wakaŵafumbaso wakati, “Kweni imwe mukuti ndine njani?” Petrosi wakazgora wakati, “Imwe ndimwe Mesiya.”

³⁰Yesu wakaŵachinyinthizga kuti ŵareke kuphalirapo munthu na vya iyo.

³¹Yesu wakamba kuŵasambizga ŵasambiri ŵakhe kuti, “Mwana wa Munthu wakwenera kukomwa pa vinandi na kukanika na ŵarara, ŵasofi ŵarara, na ŵamanyi-marango na kukomeka ndipo pa zuŵa la chitatu wamkuwuka.”

³²Wakayowoyanga mazgu agha pakweru. Penepapo Petrosi wakamutorera pa mphepete na kwamba kumuchenya.

³³Kweni Yesu wakazgoka na kulaŵiska ku ŵasambiri ŵanyakhe ŵara ndipo wakachenya Petrosi wakati, “Tiye uko Satana! Chifukwa maghanoghano agha kuti nga Chiuta chara, kweni ndi maghanoghano gha ŵanthu.”

³⁴Yesu wakachema mzinda wa ŵanthu pamoza na ŵasambiri ŵakhe kuti ŵize pafupi nayo, ndipo wakaŵaphalira kuti, “Usange munthu wakukhumba kundirondezga, wakwenera kujipata, ndipo wanyamule mphinjika yakhe na kundirondezga.

³⁵Chifukwa yose uyo wakukhumba kuponoska umoyo wakhe wati wawutayenge, kweni yose uyo wati watayenge umoyo wakhe chifukwa cha ine na chifukwa cha Uthenga Uweme wati wawuponoskenge.

³⁶Kasi kungamwandulirachi munthu kuti waphindule charu chose cha pasi na kutaya umoyo wakhe?

³⁷Kasi munthu wangaperekachi kuti wawombole umoyo wakhe?

³⁸Munthu uyo wali na soni na ine na mazgu ghane mu muwiro uwu wa uleŵe na wakwananga, Mwana wa Munthu nayo wamkuŵa nayo na soni para wakwiza mu uchindami wa Ŵawiske pamoza na ŵangelo ŵatuŵa.”