Read new_tumbuka_bible Mariko 9 Bible Online

Mariko 9 - new_tumbuka_bible bible

Mariko 9

¹Yesu wakaŵaphaliraso kuti, “Nadi nkhumuphalirani kuti ŵalipo ŵanji awo ŵakwimilira pano awo kuti ŵati ŵafwenge chara, ŵasuke ŵawone Ufumu wa Chiuta ukwiza na nkhongono.”

²Ghakati ghajumphapo mazuŵa ghankhonde na limoza, Yesu wakatora Petrosi Yakhobe, na Yohane, ndipo wakaŵarongozgera pa phiri litali uko ŵakaŵa ŵekha. Kwenekuko mawonekero ghakhe ghakasinthika pa maso pawo.

³Malaya ghakhe ghakazgoka ghakugadima, ghakubuta chomene mbee kuruska umo wakuchapa yose pa charu wangachapira vinthu kuti vituŵe ntheura.

⁴Ndipo ŵasambiri ŵara ŵakawona Eliya na Mozesi awo ŵakadumbiskananga na Yesu.

⁵Petrosi wakati kwa Yesu, “Musambizgi, nchiweme kwa ise kukhara pano. Tiyeni tizenge misasa yitatu, umoza wa imwe, unyakhe wa Mozesi, unyakheso wa Eliya.”

⁶Wakamanya chara icho wakayowoyanga pakuti iyo na ŵanyakhe ŵakofiwa chomene.

⁷Penepapo kukiza bingu ilo likaŵabenekerera ndipo mazgu ghakafuma mu bingu ghakati, “Uyu ndi Mwana wane wakutemweka. Mupulikani iyo.”

⁸Kwa mabuchibuchi ŵasambiri ŵakati ŵalaŵiska uku na uku kuti ŵakawona munthu chara, kweni Yesu pera pamoza nawo.

⁹Apo ŵakakhiranga kufuma pa phiri, Yesu wakaŵachinyinthizga kuti ŵareke kuphalirapo munthu ivyo ŵakawona pa phiri kufikira pa nyengo iyo Mwana wa Munthu wizamuwukira ku ŵakufwa.

¹⁰Iwo ŵakaghasunga mazgu agha, nangauli ŵakadumbiskananga ching'anamulo cha kuwuka ku ŵakufwa.

¹¹Ndipo ŵakamufumba ŵakati, “Chifukwa uli ŵamanyi-marango ŵakuti, Eliya wakwenera kwiza danga?”

¹²Yesu wakazgora wakati, “Inya nadi, Eliya wakwenera kwiza danga kuti wize kanozgeso vinthu vyose. Chifukwa uli kuli kulembeka kuti Mwana wa Munthu wakwenera kukomwa mu vinandi chomene na kukanika?

¹³Kweni nkhumuphalirani kuti Eliya wali kwiza kale, ndipo ŵali kumuchitira vinthu vyose ivyo ŵakakhumbanga nga ndi umo kuli kulembekera na za iyo.”

¹⁴Apo ŵakati ŵafika ku ŵasambiri, ŵakawona mzinda ukuru wa ŵanthu uwo ukaŵazingirizga. Ŵamanyi-marango ŵanji ŵakasuskananga nawo.

¹⁵Apo ŵanthu wose ŵakawona Yesu ŵakazizwa chomene, ndipo ŵakamuchimbilira na kumutauzga.

¹⁶Yesu wakaŵafumba ŵasambiri ŵakhe wakati, “Kasi mukususkana nawo vichi?”

¹⁷Yumoza wa ŵanthu ŵa mu mzinda wakazgora wakati, “Musambizgi, ine ndangwiza na mwana wane msepuka kuti ndimupereke kwa imwe chifukwa wali na mzimu uheni wa mbuwu.

¹⁸Para wamukora ukumuponya pasi ndipo wakumokora mphovu ku mlomo na kuska mino, ndipo thupi likomira gwa. Ntheura ndanguromba ŵasambiri ŵinu kuti ŵawufumyemo, kweni ŵangutondeka.”

¹⁹Yesu wakazgora wakati, “Okwe! Ŵanthu ŵa muwiro wambula chipulikano imwe, kasi nditi ndiwe namwe mpaka pauli? Kasi nditi ndimuzizipizgirani kufika nyengo nji? Zani nayo msepuka uyo kwa ine.”

²⁰Ntheura ŵakiza nayo msepuka yura kwa Yesu. Mzimu uheni ukati wawona Yesu, penepapo ukamuziririska msepuka ndipo wakawa pasi na kuvivira uku wakumokora mphovu ku mlomo.

²¹Yesu wakafumba wiske wa mwana wakati, “Kasi wasuzgika nawo mzimu uwu kwamba pauli?” Wiske wa mwana wakazgora wakati, “Kwamba ku wanichi wakhe.

²²Nyengo zinandi wayezga kumukoma pakumuponya pa moto, panji mu maji. Kweni usange imwe mungachitapo kanthu, muŵe na chiwuravi na kutovwira.”

²³Yesu wakati, “Chifukwa uli mukuti, ‘Usange mungachitapo kanthu?’ Vinthu vyose nvya machitiko kwa uyo wakupulikana.”

²⁴Penepapo wiske wa mwana wakachemerezga wakati, “Nkhupulikana, kweni pachoko. Ndovwirani kuti ndipulikane chomene.”

²⁵Apo Yesu wakawona kuti mzinda wa ŵanthu ukuchimbilira uko wakaŵa iyo, wakachenya mzimu uheni wakati, “Iwe mzimu wa mbuwu na wakumangwa makutu, nkhukulangula kuti, fumamo mwa iyo, ndipo ureke kuwereramoso.”

²⁶Penepapo mzimu ura ukachemerezga na kumuziririska uheniuheni ndipo ukafumamo. Mwana yura wakawoneka nga ngwa kufwa, na kuti ŵanandi ŵakatenge, “Wafwa!”

²⁷Kweni Yesu wakamukora pa woko na kumuwuskira muchanya ndipo wakimilira.

²⁸Yesu wakati wanjira mu nyumba, ŵasambiri ŵakhe ŵakamufumba ku udesi ŵakati, “Chifukwa uli ise tikatondeka kuwufumya mzimu uheni ura?”

²⁹Yesu wakaŵazgora wakati, “Mzimu wa mtundu uwu kuti ukufuma waka chara, kweni na kuromba na kuziŵizga.”

³⁰Sono Yesu na ŵasambiri ŵakhe ŵakafumapo pa malo ghara, ndipo ŵakasorota mu chigaŵa cha Galileya. Iyo wakakhumba chara kuti ŵanthu ŵamanye uko wakaŵa,

³¹pakuti wakasambizganga ŵasambiri ŵakhe, ndipo wakati kwa iwo, “Mwana wa Munthu wamkuperekeka mu mawoko gha ŵanthu ndipo ŵamkumukoma. Kweni para ŵakomeka, iyo wamkuwuka ku ŵakufwa.”

³²Kweni kuti ŵakapulikiska mazgu agha chara, ndipo ŵakopanga na kumufumba wuwo.

³³Ndipo ŵakafika ku Kaperenaumu. Ŵakati ŵanjira mu nyumba, Yesu wakaŵafumba wakati, “Kasi mu nthowa mwapindanangachi?”

³⁴Kweni ŵakakhara chete chifukwa mu nthowa ŵakapindananga na uyo ndi mukuru pa wose.

³⁵Ndipo Yesu wakakhara pasi na kuchema ŵasambiri 12 na kuŵaphalira kuti, “Usange munthu wakukhumba kuŵa wakudanga, wakwenera kujizgora wa umaliro ndiposo na muteŵeti wa wose.”

³⁶Wakatora mwana na kumwimika pakati pawo. Ndipo wakamutora na kumupakata wakati,

³⁷“Yose uyo wakupokerera mwana muchoko nga ndi uyu mu zina lane, wakupokerera ine. Ndipo yose uyo wakupokerera ine kuti wakupokerera ine chara, kweni uyo wakandituma.”

³⁸Yohane wakamuphalira Yesu wakati, “Musambizgi, ise tikawona munthu yumoza wakufumya viŵanda mu zina linu, ndipo tikamukanizga chifukwa wakaŵa yumoza wa ise chara.”

³⁹Kweni Yesu wakati, Mungamukanizganga, pakuti palije munthu uyo wangachita mlimo wankhongono mu zina lane, ndipo pamanyuma wakwamba kundiyowoyera uheni.

⁴⁰Uyo wakwimikana nase chara wali pamoza nase.

⁴¹Na unenesko wose nkhumuphalirani kuti, yose uyo wakumupani maji ghakumwa chifukwa chakuti muli ŵa Khristu, nadi, kuti wati watayenge njombe yakhe chara.

⁴²“Yose uyo wakupuruskira yumoza wa ŵana ŵachoko aŵa ku kwananga, ŵeneawo ŵakupulikana mwa ine nkhuweme kwa iyo kuti lwara lukuru lukakiririke mu singo yakhe na kumubizga mu ndimba ya nyanja.

⁴³Ndipo usange woko lako la maryero likukwanangiska, ulidumureko. Nkhuweme kuti ukanjire mu umoyo wa muyirayira uli wakudumuka woko, kuruska kuti ukanjire na mawoko ghose ghaŵiri ku Gehena uko moto ukuzimwa chara. [

⁴⁴Kwenekuko mphorozi nazo kuti zikufwa chara, ndipo moto nawo kuti ukuzimwa chara.]

⁴⁵Ndipo usange lundi lako likukwanangiska, ulidumureko. Nkhuweme kuti ukanjire ku umoyo wa muyirayira uli wakudumuka lundi, kuruska kuti ukaponyeke ku Gehena uli na malundi ghaŵiri. [

⁴⁶Kwenekuko mphorozi nazo kuti zikufwa chara, ndipo moto nawo ukuzimwa chara.]

⁴⁷Usange jiso lako likukwanangiska ulikozombore. Nkhuweme kuti ukanjire mu Ufumu wa Chiuta na jiso limoza kuruska kuti ukaponyeke ku Gehena uli na maso ghose ghaŵiri.

⁴⁸Uko ‘Mphorozi zawo zikufwa chara, ndipo moto kuti ukuzimwa chara.’

⁴⁹“Pakuti munthu yose wamkutozgeka na moto nga ndi umo sembe yiliyose yikutozgeka na muchere.

⁵⁰“Muchere nguweme, kweni para wasukuruka kasi mungawuwezgeramo uli? “Ŵani na muchere mukati mwinu ndipo muŵe na mutende yumoza na munyakhe.”