Read new_tumbuka_bible Luka 10 Bible Online

Luka 10 - new_tumbuka_bible bible

Luka 10

¹Pamanyuma pa vyeneivi, Fumu yikasankha ŵanthu ŵanji 72[4] yikaŵatuma munthazi mwakhe ŵaŵiriŵaŵiri kuruta mu mizi, na ku malo ghose uko wakaŵa pafupi kurutako.

²Ndipo wakati kwa iwo, “Nadi vuna njinandi chomene, kweni ŵanchito mbachoko. Ntheura rombani ku Fumu ya vuna kuti yitumeko ŵanchito kuti ŵakavunenge mu munda wakhe.

³Rutaninge! Ine nkhumutumani nga ŵana-mberere mukati mu mphumphi.

⁴Mungayeghanga chibeta cha ndarama, panji chikwama, panji skapato, mungendakatauzganga munthu mu nthowa chara.

⁵Mu nyumba yose iyo mwamkunjiramo mukadange kuyowoya kuti, ‘Mutende uŵe mu nyumba iyi.’

⁶Usange mu nyumba umo muli nadi munthu wa mutende, mutende winu wamkuŵa pa iyo. Kweni usange mulije, mutende winu wamkuwerera kwa mwaŵene.

⁷Ndipo khalirirani mu nyumba yeneiyo, mukaryenge na kumwa ivyo ŵamupani, pakuti wanchito wakwenera njombe yakhe. Mukareke kwenda pa nyumba iyi na iyi.

⁸Para mwamkunjira mu muzi uliwose ndipo ŵamupokererani, mukaryenge ivyo ŵamukhalikirani.

⁹Mukachizge ŵarwari awo ŵali mwenemumo, ndipo mukaŵaphalire kuti, ‘Ufumu wa Chiuta wiza pafupi namwe.’

¹⁰Kweni para mwamkunjira mu muzi uliwose ndipo kuti ŵamupokererani chara, mukarute mu misewu ya mu muzi ura na kuyowoya kuti,

¹¹‘Fuvu nalo la mu muzi winu ilo lademerera ku malundi ghithu, tikumukung'unthirani imwe. Kweni manyani kuti, Ufumu wa Chiuta waneng'enera.’

¹²Nkhumuphalirani kuti, pa zuŵa la weruzgi, Chiuta wamkuŵazizipizgira ŵanthu ŵa mu Sodomu kuruska muzi ura.”

¹³“Soka kwa iwe Korazini! Soka kwa iwe Betesaida! Pakuti milimo ya nkhongono iyo yikachitika mwa imwe, nga yichitikenge mu Ture na Sidoni, mphanyi ŵanthu mu misumba yira ŵakang'anamuka kale na kuvwara vigudulu na kujithilira vyoto, kurongora kung'anamuka ku zakwananga zawo.

¹⁴Kweni pa zuŵa la weruzgi, Chiuta wamkuŵazizipizgira ŵanthu ŵa ku Ture na Sidoni kuruska imwe.

¹⁵Na iwe Kaperenaumu, kasi ukukhumba kujikwezga kuya kafika kuchanya! Chara, uti ukhizgikire pasi mpaka ku Gehena.”

¹⁶“Uyo wakumupulikani imwe, wakundipulika ine, uyo wakukana imwe, wakundikana ine. Ndipo uyo wakukana ine, wakumukana uyo wakandituma.”

¹⁷Ŵasambiri ŵara 72 ŵakaya kawera na chimwemwe ndipo ŵakati, “Fumu, nanga ndi viŵanda vikatipulikira mu zina linu.”

¹⁸Ndipo wakati kwa iwo, “Nkhawona Satana wakuwa kufuma kuchanya nga ndi leza.

¹⁹Tegherezgani! Ndamupani mazaza ghakukandira zinjoka na ŵakalizga, ndiposo na ghakutondera nkhongono zose za murwani. Palije kanthu ako kizamkumupwetekani.

²⁰Ndipouli, mureke kusekerera na ichi, pakuwona kuti mizimu yiheni yikumupulikirani. Kweni sekererani chifukwa mazina ghinu ghalembeka kuchanya.”

²¹Pa nyengo yeneyira, Yesu wakakondwa mwa Mzimu Mutuŵa ndipo wakati, Nkhumuwongani imwe Ŵadada, Fumu ya kuchanya na pasi, chifukwa mukabisa vinthu ivi ku ŵamahara na ŵakusambira, ndipo mukaŵavumbulira ŵabonda. Inya Ŵadada, pakuti ntheura ndimo likaŵira khumbo linu.

²²“Ŵadada ŵali kupereka vinthu vyose kwa ine, ndipo palije munthu uyo wakumanya Mwana, kweni Ŵawiske ndiwo. Ndipo palije uyo wakumanya Ŵawiske, kweni Mwana ndiyo, na waliyose uyo Mwana wakusankha kumuvumbulira Ŵawiske.”

²³Ntheura Yesu wakang'anamukira ku ŵasambiri ŵakhe, wakayowoya nawo ku udesi wakati, “Ngakutumbikika maso agho ghakuwona ivyo imwe mukuviwona.

²⁴Chifukwa nkhumuphalirani kuti nchimi zinandi na ŵakaronga ŵanandi ŵakadokanga kuwona ivyo imwe mukuviwona, kweni kuti ŵakaviwona chara. Ndiposo ŵakadokanga kupulika vyeneivyo imwe mukuvipulika, ndipo kuti ŵakavipulika chara.”

²⁵Mumanyi-marango yunji wakawuka na kumuyezga Yesu. Ndipo wakafumba wakati, “Musambizgi, kasi ndichitechi kuti ndihare umoyo wa muyirayira?”

²⁶Yesu wakamuzgora wakati, “Kasi mu marango muli kulembeka vichi? Ndipo ukuŵazga uli?”

²⁷Mumanyi-marango wakazgora wakati, “Utemwenge Fumu Chiuta wako na mtima wako wose, na mzimu wako wose, na nkhongono zako zose, na vinjeru vyako vyose. Ndiposo utemwenge muzengezgani wako nga ndi umo ukujitemwera wamwene.”

²⁸Yesu wakamuzgora wakati, “Wazgora makora. Uchitenge ntheura, ndipo uti uŵenge na umoyo.”

²⁹Kweni munthu yura pakukhumba kujirunjiska wakamufumba Yesu wakati, “Kasi muzengezgani wane ndi njani?”

³⁰Yesu wakamuzgora wakati, “Munthu yunji wakafuma ku Yerusalemu wakakhiranga kuya ku Yeriko. Ndipo pa nthowa, ŵankhungu ŵakamukora, na kumuvura, na kumutimba, ndipo ŵakamusida wakhara pa singo pera ndipo ŵakaruta.

³¹Sono mwa mwaŵi musofi yunji wakakhilira mu nthowa yeneyira, ndipo wakati wamuwona, wakalambalala ku mphepete yinyakhe.

³²Ntheura pera muLevi nayo wakafika penepara, wakamuwona, wakalambalala ku lwegha lunyakhe.

³³Kweni muSamariya yunji uyo wakaŵa pa ulendo wakhe, wakafika apo wakaŵa munthu yura. Wakati wamuwona, wakazura na chiwuravi.

³⁴Wakiza apo munthu yura wakaŵa, wakakakamo mu vilonda vyakhe na kupungulirapo mafuta na vinyo. Ntheura wakaŵika munthu yura pa mbunda yakhe, wakiza nayo ku nyumba ya ŵalendo ndipo wakamupwererera.

³⁵Na machero ghakhe, wakatora ndarama ziŵiri wakamupa msungiliri wa nyumba ya ŵalendo, wakati, ‘Umupwererere munthu uyu. Ndarama zose izo uti utayenge pachanya pa izi, ine ndizamkuwezgerapo para ndaya kawerako.’ ”

³⁶Penepapo Yesu wakamufumba wakati, “Mu maghanoghano ghako, kasi ndi njani mwa aŵa ŵatatu, uyo wakaŵa muzengezgani wa munthu uyo wakatimbika na ŵankhungu?”

³⁷Iyo wakazgora wakati, “Uyo wakamulengera lusungu.” Yesu wakamuphalira wakati, “Rutanga, nawe ukachitenge ntheura pera.”

³⁸Apo Yesu na ŵasambiri ŵakhe ŵakaŵa pa ulendo wawo, wakiza mu chikaya chinji, umo mukaŵa mwanakazi yunji zina lakhe Marita uyo wakamupokerera Yesu mu nyumba yakhe.

³⁹Iyo wakaŵa na munung'una wakhe zina lakhe Mariya, mweneuyo wakakhara musi mu malundi gha Fumu, uku wakupulikizga mazgu ghakhe.

⁴⁰Kweni Marita wakatangwanikanga na milimo yinandi, ndipo wakiza kwa Fumu na kufumba kuti, “Fumu, chifukwa uli mukureka kupwelererako pakuwona kuti munung'una wane wandisidira ndekha milimo? Mumuphalire wize kandovwire!”

⁴¹Fumu yikamuzgora yikati, “Marita! Marita! Nthunandi uto ukwenjerwa na kukweŵeskeka nato.

⁴²Kweni chinthu chimoza pera ndicho chikukhumbikwa. Ndipo Mariya wasora chigaŵa chiweme icho kuti chipokekenge kwa iyo chara.”