Read new_tumbuka_bible Luka 11 Bible Online

Luka 11 - new_tumbuka_bible bible

Luka 11

¹Zuŵa limoza Yesu wakarombanga mu malo ghanji. Para wakati wamara, yumoza wa ŵasambiri ŵakhe wakamufumba wakati, “Fumu, mutisambizge kuromba nga ndi umo Yohane wakasambizgira ŵasambiri ŵakhe.”

²Iyo wakazgora wakati, “Para mukuromba mutenge, ‘Ŵadada, Zina linu lichindikike, Ufumu winu wize.

³Mutipe chakurya icho tikukhumba zuŵa na zuŵa.

⁴Mutigowokere zakwananga zithu, chifukwa ise nase tikugowokera waliyose uyo wakutinangira. Ndipo mungatitoreranga mu kuyezgeka.’ ”

⁵Ntheura Yesu wakati ku ŵasambiri ŵakhe, “Kasi ndi njani wa imwe uyo wali na mubwezi wakhe, ndipo wakuruta kwa iyo na usiku pakati na kuyowoya nayo kuti, ‘Wa mubwezi wane, undibwerekeko vingwa vitatu,

⁶chifukwa mubwezi wane wandizira pa ulendo, ndipo ndilije kanthu kakuti ndimupe warye.’

⁷Ndipo mubwezi wakhe uyo wali mu nyumba wazgore kuti, ‘Ungandisuzganga. Ku muryango ndajarako kale ndipo ŵana ŵane pamoza na ine tagona. Kuti ndingawuka na kukupa kalikose chara.’

⁸Nkhumuphalirani kuti, nanga wangareka kukhumba kuwuka kwiza kamupa icho wakukhumba mubwezi wakhe, kweni chifukwa cha chikosa chakhe, wati wawuke na kumupa vyose ivyo wakukhumba.

⁹“Ntheura nkhuti kwa imwe: Rombani ndipo chiti chipikenge kwa imwe. Penjani ndipo muti musangenge. Khung'uskani ndipo chiti chimujurikiraninge.

¹⁰Pakuti yose uyo wakuromba wakupokera, ndipo uyo wakupenja wakusanga, uyo wakukhung'uska chikumujurikira.

¹¹Kasi ndi dada nju mwa imwe uyo para mwana wakhe wakuromba somba wakumupa njoka?

¹²Panji usange wakuromba sumbi, kasi wati wamupe kalizga?

¹³Usange imwe mwa ŵaheni, mukumanya kuŵapa ŵana ŵinu vyawanangwa viweme, asi chomene kwakuruska Ŵawiskemwe ŵa kuchanya ŵati ŵaŵapenge Mzimu Mutuŵa awo ŵakuŵaromba?”

¹⁴Yesu wakafumyanga chiŵanda cha munthu wa mbuwu. Para chiŵanda chikafumamo, munthu uyo wakaŵa wa mbuwu wakamba kuyowoya, ndipo mzinda wa ŵanthu wukazizwa.

¹⁵Kweni ŵanji ŵa iwo ŵakati, “Wakufumya viŵanda na nkhongono za Belezebule uyo ndi mukuru wa viŵanda.”

¹⁶Ŵanji ŵakamuyezga na kupenja kwa iyo chimanyikwiro kufuma kuchanya.

¹⁷Yesu wakamanya maghanoghano ghawo ndipo wakati, Ufumu uliwose uwo ukugaŵikana, ukubwanganduka, ndipo nyumba yakugaŵikana nayo, yikubwanganduka.

¹⁸Usange Satana nayoso wagaŵikana yekha, ufumu wakhe ungima uli? Pakuti imwe mukuti nkhufumya viŵanda na nkhongono za Belezebule.

¹⁹Usange ine nkhufumya viŵanda na nkhongono za Belezebule, kasi ŵasambiri ŵinu ŵakuvifumya na nkhongono za njani? Ntheura ndiwo ŵati ŵaŵenge ŵeruzgi ŵinu.

²⁰Kweni usange nkhufumya viŵanda na nkhongono ya Chiuta, ipo Ufumu wa Chiuta uli kwiza kwa imwe.

²¹“Para chinkhara chakorera mahomwa ghakhe, chikumanya kuvikirira nyumba yakhe, ndipo katundu wakhe nayo wakusungika makora.

²²Kweni para wankhongono kuruska chinkhara chira wiza na kuchitonda, wakupoka mahomwa ghakhe ghose agho chikagomezganga ndipo wakugaŵana na ŵanyakhe ivyo wapoka.

²³“Munthu uyo wali pamoza na ine chara, wakwimikana nane. Ndipo uyo wakureka kuwunjika pamoza nane wakuparanya.

²⁴“Para mzimu uheni wafumamo mu munthu, ukwendendeka mu charu cha chinkhamwa, kupenja malo ghakupumulapo, kweni para ukughasanga chara, ukuti, ‘Nditi ndiwerere ku nyumba yane uko nkhafuma.’

²⁵Para wiza ukuyisanga mulije na kanthu ndipo njakuphyereka na kutozgeka.

²⁶Ntheura ukuruta kuya katora mizimu yinyakhe yinkhonde na yiŵiri, yeneiyo njiheni kuruska iwo wenecho. Ndipo pamoza na iwo wenecho yikunjira na kukhara mwenemumo. Ntheura kaŵiro ka munthu yura ka pamanyuma, kakuŵa kaheni chomene kuruska ka pakudanga.”

²⁷Apo Yesu wachali kuyowoya vyeneivi, mwanakazi yunji mu mzinda wakachemerezga wakati, “Ngwakutumbikika mwanakazi uyo wakakubaba iwe na kukonkheska!”

²⁸Kweni Yesu wakati, “Inya, kweni kwakuruska mbakutumbikika awo ŵakupulika mazgu gha Chiuta na kughasunga.”

²⁹Apo ŵanthu ŵanandi ŵakawungananga, Yesu wakati, “Muwiro uwu ndi muwiro uheni, pakuti ukupenja chimanyikwiro. Kweni chimanyikwiro chiti chipikenge kwa iwo chara, kweni chimanyikwiro cha nchimi Yona pera.

³⁰Pakuti nga ndi umo Yona wakaŵira chimanyikwiro ku ŵanthu ŵa mu Nineve, ntheura ndimo Mwana wa Munthu nayo waŵirenge chimanyikwiro ku muwiro uwu.

³¹Fumukazi ya ku mwera yizamkuwuka pa zuŵa la weruzgi pamoza na ŵanthu ŵa muwiro uwu na kuŵasuska. Pakuti yikafuma ku mphererekezgo za charu, kwiza kapulika mahara gha Solomoni. Kweni mukuru wakuruska Solomoni wali pano.

³²Pa zuŵa la weruzgi, ŵanthu ŵa mu msumba wa Nineve ŵamkuwuka na kuŵasuska ŵanthu ŵa muwiro weneuwu, pakuti iwo ŵakang'anamuka para Yona wakaŵapharazgira. Kweni mukuru wakuruska Yona wali pano.”

³³“Kweni palije uyo wakukozga nyali, na kuyiŵika kwakubisika panji kusi ku chidunga, kweni wakuŵika pa chikolerero, mwakuti awo ŵakunjira ŵawone ungweru.

³⁴Jiso ndilo nyali ya thupi, usange jiso lako ndiweme, thupi lako lose nalo ndakungweruka. Kweni para jiso lako ndiheni, thupi nalo liri mu chisi pera.

³⁵Ntheura uchenjere mzire ungweru uwo uli mwa iwe uzgoke chisi.

³⁶Usange thupi lako lose liri na ungweru, lambula na kachigaŵa ka chisi chara, liti liŵalenge nga ndi umo nyali na marazi ghakhe yikukupira ungweru.”

³⁷Apo wakaŵa wachali kuyowoya, muFarisi yunji wakamuchema kuti wakarye nayo. Yesu wakaruta ndipo wakaya kanjira mu nyumba na kukhara pa kurya.

³⁸Kweni muFarisi wakazizwa pakuwona kuti Yesu wakurya kwambula kugeza mawoko.

³⁹Kweni Fumu yikati kwa iyo, Imwe ŵaFarisi, mukusuka kuwaro kwa nkhombo na mbale, kweni imwe mwaŵene mukati mwinu mwazura kukwapura na uheni.

⁴⁰Mwavindere imwe! Asi Chiuta uyo wakalenga kuwaro ndiyo wakalenga na mukati mwakhe wuwo?

⁴¹Kweni perekani vya lusungu ku ŵakavu ivyo muli navyo, ndipo vyose viti vimutoweraninge.

⁴²“Soka kwa imwe ŵaFarisi! Chifukwa mukupereka chakhumi cha tumbuto twakununkhira, cha mbuto zakunoweska chakurya, ndiposo cha dende la mtundu uliwose. Kweni mukuzerezga urunji na kutemwa kwa Chiuta. Ivi ndivyo mukenera kuvichita kwambula kuvireka vinyakhe.

⁴³“Soka kwa imwe ŵaFarisi! Chifukwa mukutemwa vitengo vyakuzirwa mu nyumba zakusoperamo na kutiso ŵanthu ŵamutauzganinge mu misika.

⁴⁴Soka kwa imwe! Chifukwa muli nga ndi mararo agho kuti ghakuwoneka chara, ndipo ŵanthu ŵakwenda pachanya kwambula kughamanya.”

⁴⁵Yumoza wa ŵamanyi-marango wakati kwa iyo, “Musambizgi, para mukuyowoya ichi, mukutichombola na ise wuwo.”

⁴⁶Ndipo wakati, “Soka kwa imwe namwe ŵamanyi-marango! Mukunyekezga ŵanthu na katundu uyo ndi munonono pakuyegha, apo mwaŵene kuti mukumukhwaska chara, nanga na kamunwe pera.

⁴⁷Soka kwa imwe! Chifukwa mukuzenga mararo gha nchimi, izo ŵawiskemwekuru ŵakazikoma.

⁴⁸Ntheura imwe mwaŵene muli ŵakaboni ndipo mukukhozgera ivyo ŵawiskemwekuru ŵakachita. Pakuti iwo ŵakaŵakoma, ndipo imwe mukuzenga mararo ghawo.

⁴⁹Chifukwa cha ichi, Chiuta mu mahara ghakhe wakati, ‘Nditi ndiŵatumizgire nchimi na ŵakutumika ndipo ŵanji ŵamkuŵakoma na kuŵazikizga.’

⁵⁰Mwakuti ndopa za nchimi zose izo zikathika kufuma ku mutendeko, zifumbike ku muwiro uwu,

⁵¹kuyambira ndopa za Abelu kufikira ku ndopa za Zakariya, mweneuyo wakafwira pakati pa jochero la sembe na Malo Ghakupatulika mu Nyumba ya Chiuta. Nadi nkhumuphalirani, muwiro uwu uti ufumbike kupataura.

⁵²“Soka kwa imwe mwa ŵamanyi-marango! Chifukwa muli kupoka chijuriro cha umanyi, kweni imwe mwaŵene kuti muli kunjirako chara, ndipo awo ŵakukhumba kunjirako nawo mukuŵakanizga.”

⁵³Ndipo apo wakawukangapo, ŵamanyi-marango na ŵaFarisi ŵakamba kwimikana nayo na kumufinyirizga chomene, ndiposo na kumwavya kuti wayowoye tunthu tunandi.

⁵⁴Ŵakachita ntheura, apo ŵamuthya kuti ŵamukorere pa kanthu ako wangayowoya.