Read new_tumbuka_bible Luka 12 Bible Online

Luka 12 - new_tumbuka_bible bible

Luka 12

¹Pa nyengo yeneyira, vikwi vinandinandi vya ŵanthu vikawungana, mwakuti ŵanthu ŵakakandananga waka. Yesu wakadanga kuyowoya ku ŵasambiri ŵakhe kuti, “Chenjerani na chirungo cha ŵaFarisi cheneicho mbupusikizgi.

²Palije kanthu kakubenekerereka ako karekenge kuvumbukwa, panji kanthu kakubisika ako kamkureka kumanyikwa.

³Ntheura vyose ivyo mwayowoya mu chisi, vizamkupulikikwa na muhanya, ndipo icho mwaphwepwerezgana mu vipinda vya mukati, chizamkupharazgika pachanya pa nyumba.”

⁴“Nkhumuphalirani mwa ŵabwezi ŵane kuti mureke kopa awo ŵakukoma thupi, ndipo pamanyuma pakhe ŵalije kumanya kuchita kanthu kanyakhe.

⁵Kweni ndimurongorani uyo mukwenera kumopa. Mopani uyo para wakoma thupi wali na mazaza kuliponya mu Gehena Inya nadi nkhumuphalirani kuti, mweneuyo ndiyo mukwenera kumopa.

⁶“Asi twadunduru tunkhonde tukugulika na tundarama tuŵiri? Kweni palije na kamoza ka twadunduru utu ako kakuruwika na Chiuta.

⁷Nanga ndi masisi gha mitu yinu ghali kupendeka ghose. Mureke kopa, imwe muli ŵakuzirwa kuruska twadunduru tunandi.”

⁸“Nkhumuphalirani kuti yose uyo wakundizomera panthazi pa ŵanthu, Mwana wa Munthu nayo wamkumuzomera panthazi pa ŵangelo ŵa Chiuta.

⁹Kweni uyo wakundikana panthazi pa ŵanthu, nane ndamkumukana panthazi pa ŵangelo ŵa Chiuta.

¹⁰“Yose uyo wakuyowoya matusi kwa Mwana wa Munthu, wamkugowokereka kweni uyo wakutuka Mzimu Mutuŵa, wamkugowokereka chara.

¹¹“Para ŵamkumutorerani kuya keruzgika mu nyumba zakusoperamo panji panthazi pa ŵakuru ŵa vigaŵa, panyakhe pa ŵakuwusa, mureke kwenjerwa kuti mwamkuzgora uli, kuti mwamkuzgora vichi, ndipo kuti mwamkuyowoya vichi?

¹²Chifukwa Mzimu Mutuŵa ndiyo wamkumusambizgani pa nyengo yeneiyo ivyo mukwenera kuyowoya.”

¹³Munthu yumoza mukati mu mzinda wakayowoya na Yesu wakati, “Musambizgi, muphalirani mukuru wane kuti wandigaŵireko chiharo chane.”

¹⁴Kweni wakati kwa iyo, “Iwe wa munthu, kasi ndi njani wali kundimika ine kuŵa mweruzgi, panji wakugaŵa chiharo chinu?”

¹⁵Yesu wakaŵaphalira wose wakati, “Muŵe maso ndipo chenjerani na udokezi uliwose, pakuti umoyo wa munthu kuti uli mu unandi wa ivyo wali navyo chara.”

¹⁶Yesu wakaŵatayira ntharika wakati, “Munda wa munthu yunji musambazi ukaŵa na vyakurya vinandi.

¹⁷Wakaghanaghana mu mtima wakhe wakati, ‘Ndichite uli pakuti ndilije apo ndingaronga vyakurya vyane?’

¹⁸Ntheura wakati, ‘Nditi ndichite ichi. Nditi ndipankhule nthamba zane na kuzenga zikuruko. Ndipo mwenemumo nditi ndirongemo vyakurya vyane na katundu wane.

¹⁹Ntheura nditi ndiyowoye ku ndamwene kuti, mzimu wane uli na vyuma vinandi ivyo wajiwunjikira kwa virimika vinandi. Sono ufwasenge, uryenge, umwenge na kusekerera.’

²⁰Kweni Chiuta wakati kwa iyo, ‘Wa chindere iwe! Usiku wenewuno umoyo wako ukhumbikenge, ndipo ivyo ukasunganga viti viŵenge vya njani?’

²¹“Ndimo waliri uyo wakujisungira usambazi, kweni kuti ndi musambazi kwa Chiuta chara.”

²²Yesu wakati ku ŵasambiri ŵakhe, Ntheura nkhumuphalirani kuti, mungenjerwanga na umoyo winu, kuti muryengechi, panji thupi linu kuti muvwarengechi.

²³Chifukwa umoyo ukuruska vyakurya, ndipo thupi nalo likuruska vyakuvwara.

²⁴Ghanaghanani na ŵachihoŵe, kuti ŵakumija chara, nesi kuvuna. Iwo ŵalije chipinda chakuŵikamo vyakurya vyawo panji nthamba, kweni Chiuta wakuŵalera. Imwe muli ŵakuzirwa kwakuruska viyuni!

²⁵Ndipo ndi njani mwa imwe uyo chifukwa cha kwenjerwa, wangasazgirako mazuŵa ku umoyo wakhe?

²⁶Ntheura usange mulije kumanya kuchita nanga ndi ako nkhachoko nkhanira, mukwenjerwerachi na vinthu vinyakhe?

²⁷Ghanaghanani na maluŵa na umo ghakukulira, kuti ghakugwira nchito chara nesi kuruka. Kweni nkhumuphalirani kuti, nanga ndi Solomoni mu uchindami wakhe wose, kuti wakavwarapo vyakutowa nga ndi umo ghaliri maluŵa agha chara.

²⁸Kweni usange Chiuta wakuvwarika ntheura utheka wa mu thengere, uwo muhanya uno ngwamoyo ndipo na machero ukuponyeka pa moto, asi chomene kwakuruska wati wamuvwarikaninge imwe mwa ŵa chipulikano chichoko!

²⁹“Mureke kwenjerwa kuti muryengechi, panji mumwengechi, nanga nkhuŵa na mtima wakwenjerwa.

³⁰Pakuti mafuko ghose gha mu charu ghakupenja vinthu ivi. Ŵawiskemwe ŵakumanya kuti mukusoŵerwa vyeneivi.

³¹Kweni imwe penjani danga Ufumu wa Chiuta ndipo vyose vyeneivi viti vipikenge kwa imwe.

³²“Mungopanga, imwe kamskambo kachoko. Pakuti Ŵawiskemwe ŵakukondwa kumupani Ufumu.

³³Guliskani ivyo muli navyo ndipo ndarama zakhe mupereke ku ŵakavu. Jinozgerani vibeta vya ndarama ivyo kuti vikuvukupara chara, ivyo mbusambazi wa kuchanya uwo ngwambula kumara. Munkhungu nayo kuti wakufikako chara ndipo fufuzi nazo zikuwunanga chara.

³⁴Pakuti uko kuli usambazi winu, kwenekuko ndiko kuti kuŵengeso mtima winu.

³⁵“Vwarani zikhore mu maluwunda ghinu, ndipo nyali zinu zigolerenge.

³⁶Muŵe nga mbanthu awo ŵakulindirira sekuru wawo, para wakuwera kufuma ku chiphikiro cha nthengwa, mwakuti para iyo wiza na kukhung'uska, ŵangamanya kumujulira luŵiro.

³⁷Mbakutumbikika ŵateŵeti awo para sekuru wawo wiza, wizamkuŵasanga ŵali maso. Nadi nkhumuphalirani kuti sekuru wawo wizamkunozgeka na kuŵakharika pa kurya ndipo wamkwiza na kuŵateŵetera.

³⁸Mbakutumbikika ŵateŵeti awo sekuru wawo wamkuŵasanga ŵali maso nanga wize pakati pa usiku panji ku matandakucha.

³⁹Kweni manyani ichi kuti, mwene-nyumba nga wamanyenge nyengo iyo munkhungu wakwizira, mphanyi wakumurekerera chara munkhungu kuti wagumure nyumba yakhe.

⁴⁰Ntheura imwe namwe, kharani ŵakunozgeka, pakuti Mwana wa Munthu wamkwiza pa ora ilo imwe mukulighanaghanira chara.”

⁴¹Petrosi wakamufumba Yesu kuti, “Fumu, kasi mukuyowoyera ise ntharika yeneiyi, panji mukuyowoyera ŵanthu wose?”

⁴²Fumu yikazgora yikati, “Kasi ndi muteŵeti nju uyo ngwa kugomezgeka na wa mahara, mweneuyo sekuru wakhe wamkumwimika pachanya pa vya nyumba yakhe, kuŵagaŵira chakurya pa nyengo ya kwenerera?

⁴³Ngwakutumbikika muteŵeti uyo para sekuru wakhe wakwiza wamkusanga wakuchita ntheura.

⁴⁴Nadi nkhumuphalirani kuti, sekuru wakhe wamkumwimika kuŵa mulinda pa vyose ivyo wali navyo.

⁴⁵Kweni usange muteŵeti yura wakughanaghana kuti, ‘Sekuru wane wachedwa kwiza,’ ndipo wakwamba kutimba ŵateŵeti ŵanyakhe ŵanarume na ŵanakazi, na kurya na kumwa na kuloŵera,

⁴⁶penepapo sekuru wa muteŵeti yura, wati wizenge pa zuŵa ilo iyo walije kugomezga, na pa nyengo iyo walije kuyimanya. Ndipo penepapo sekuru wakhe wizamkumulanga na kumuŵika pamoza na ŵambula kupulikana.

⁴⁷“Ndipo muteŵeti uyo wakamanya khumbo la mwene-nchito wakhe, kweni kuti wakanozgapo kanthu chara nesi kuchita kwakuyana na khumbo la mwene-nchito wakhe, wamkuthyapulika chomene.

⁴⁸Kweni muteŵeti uyo wakawura kumanya ivyo mwene-nchito wakhe wakukhumba ndipo wakachita vyakwenerera nthimbo, wamkuthyapulika pachoko waka. Ndipo munthu yose uyo wakupika vinandi wafumbikenge kuti wapereke vinandi. Ndipo munthu uyo ŵakamusungiska vinandi, ŵamkumufumba kuti wapereke vinandi chomene.

⁴⁹“Nkhizira kuponya moto pa charu, ndipo ndakhumbanga kuti mphanyi wagolera kale!

⁵⁰Kweni ndili na ubapatizo weneuwo nkhwenera kubapatizika nawo, ndipo ndafyenyeka chomene kuti mpaka ufiskike.

⁵¹Kasi mukughanaghana kuti ine ndili kwizira kupereka mutende pa charu? Chara, nkhumuphalirani, kweni mphatukano ndiyo.

⁵²Chifukwa kufuma sono, ŵanthu ŵankhonde awo mba mu nyumba yimoza ŵati ŵagaŵikanenge. Ŵatatu ŵati ŵapindanenge na ŵaŵiri, ndipo ŵaŵiri ŵati ŵapindanenge na ŵatatu.

⁵³Nadi ŵati ŵagaŵikanenge. Wiske wati wawukire mwana mwanarume, ndipo mwana mwanarume nayo wati wawukire wiske. Nyina wati wawukire mwana wakhe mwanakazi, nayo mwana mwanakazi wati wawukire nyina. Nyinavyara wati wawukire mukamwana wakhe, nayo mukamwana wati wawukire nyinavyara wakhe.”

⁵⁴Yesu wakatiso ku mzinda wa ŵanthu, Para mukuwona bingu likukwera kufuma ku manjiliro gha dazi, mukuyowoya penepapo kuti, vura yikwiza ndipo yikwiza nadi.

⁵⁵Para mphepo ya ku mwera yikuputa, mukuyowoya kuti kuŵenge chithukivu, ndipo chikuŵako.

⁵⁶Mwa ŵapusikizgi imwe! Mukumanya kutanthaula kawonekero ka charu na mtambo. Kweni kasi mukutondekerachi kuphara ching'anamulo cha nyengo iyi ya sono.

⁵⁷“Kasi mukutondeka uli kujeruzgira mwekha pa icho nchakunyoroka?

⁵⁸Chifukwa para ukurongozgana na wa chimphindikwa wako kuya ku mweruzgi, yezga kuphemana nayo apo muchali mu nthowa mzire wakutorere ku mweruzgi, ndipo mweruzgi nayo wakupereke ku musilikari, ndipo musilikari wakuponye mu gadi.

⁵⁹Nkhukuphalira kuti, uti ufumengemo chara usuke ulipe kandarama ako kangukharako.”