Read new_tumbuka_bible Luka 13 Bible Online

Luka 13 - new_tumbuka_bible bible

Luka 13

¹Pa nyengo yeneyira ŵakaŵako ŵanthu ŵanji awo ŵakamuphalira Yesu na vya ŵaGalileya awo apo ŵakaperekanga sembe zawo, Pilato wakaŵakomera mwenemumo mwakuti ndopa zawo zikasazgikana na sembe zawo.

²Yesu wakaŵazgora wakati, “Kasi imwe mukughanaghana kuti ŵaGalileya aŵa ndiwo ŵakaŵa ŵakwananga kuruska ŵaGalileya ŵanyakhe wose, pakuti ŵakakomwa mwa ntheura?

³Nkhumuphalirani kuti chara! Kweni kwambula kuti imwe namwe mung'anamuke ku zakwananga zinu, mose muti mufwenge ntheura pera.

⁴Panji ŵanthu 18, ŵeneawo chikaŵawira chigongwe mu Silowamu, na kuŵakoma, kasi imwe mukuti ndiwo ŵakaŵa ŵakwananga kuruska awo ŵakakharanga mu Yerusalemu?

⁵Nkhumuphalirani kuti chara! Kweni kwambula kuti imwe mung'anamuke ku zakwananga zinu, mose muti mufwenge ntheura pera.”

⁶Yesu wakaŵayowoyera ntharika iyi wakati, “Munthu yunji wakaŵa na khuni la chikuyu ilo wakalipanda mu munda wakhe wa mpheska, ndipo wakiza kuti wapenjemo vikuyu, kweni wakasanga mulije.

⁷Wakayowoya na muteŵeti wa munda wa mpheska wakhe kuti, ‘Pa virimika vitatu ndiza ine kwiza kapenjamo vipambi mu chikuyu ichi, kweni kuti nkhuvisangamo chara. Ntheura uchidumure kuti chireke kurutilira kwananga dongo la mu munda.’

⁸Ndipo muteŵeti wa munda wakamuzgora wakati, ‘Sekuru, muchireke danga chirimika ichi, kuti ndijimemo musi mwakhe zingirizge na kuthiramo vundira.

⁹Usange chipambikenge vipambi chirimika chikwiza, nchiweme, kweni usange chatondeka mwizakachidumure.’ ”

¹⁰Pa zuŵa linyakhe la Sabata Yesu wakasambizganga mu nyumba yinyakhe yakusoperamo.

¹¹Mwenemura, mukaŵa mwanakazi uyo wakaŵa na mzimu uheni uwo ukamurwariska virimika 18. Wakakokonyara msana ndipo wakatondekanga na kwinuka.

¹²Para Yesu wakamuwona wakamuchema ndipo wakati kwa iyo, “Wa mwanakazi iwe sono wasutuka ku urwari wako.”

¹³Yesu wakaŵika mawoko ghakhe pa mwanakazi yura, ndipo wakanyoroka pa nyengo yeneyira, na kwamba kumuchindika Chiuta.

¹⁴Kweni murara wa nyumba ya kusoperamo wakakaripa pakuwona kuti Yesu wakamuchizga mwanakazi pa zuŵa la Sabata. Ndipo wakati ku ŵanthu, “Ghalipo mazuŵa ghankhonde na limoza gheneagho nchito yikwenera kuchitikiramo. Zani mu mazuŵa gheneghara ndipo mwizakachizgike, kweni pa zuŵa la Sabata chara.”

¹⁵Fumu yikamuzgora yikati, “Mwa ŵapusikizgi imwe! Asi namwe waliyose wakusutula nkhaŵi yakhe panji mbunda yakhe kufuma mu uryero pa zuŵa la Sabata, na kuyirongozgera ku maji?

¹⁶Sono mwanakazi uyu, uyo ndi mwana wa Abrahamu, ndipo Satana wakamukaka virimika 18, asi wangwenera kusutulika pa zuŵa la Sabata ku icho chikamukaka?”

¹⁷Wakati wayowoya ichi, ŵarwani ŵakhe wose soni zikaŵakora, ndipo ŵanthu wose ŵakasekerera na vya kuzizwiska vyose ivyo Yesu wakachitanga.

¹⁸Ntheura Yesu wakati, “Kasi Ufumu wa Chiuta ukulingana na vichi? Ndipo kasi tingawulinganizga na vichi?

¹⁹Uli nga ndi njere la matubeni ulo munthu wakatora na kupanda mu munda wakhe. Ndipo lukakura na kuŵa khuni. Ntheura viyuni vya mudera vikazenga vivimbo mu minthavi yakhe.”

²⁰Wakayowoyaso kuti, “Kasi Ufumu wa Chiuta ndingawulinganizga na vichi?

²¹Ukulingana na chirungo, icho mwanakazi wakatora na kusazga na ufu wa vidunga vitatu mpaka ufu wose ukarungika.”

²²Para Yesu wakarutanga ku Yerusalemu, wakasorota mu misumba na mu vikaya uku wakusambizga ŵanthu.

²³Munthu yunji wakamufumba wakati, “Fumu, kasi awo ŵamkuponoskeka mbachoko waka?” Yesu wakati kwa iwo,

²⁴“Limbalimbani kunjira pa muryango ufinyi. Pakuti nkhumuphalirani kuti ŵanandi ŵamkukhumba kunjiramo, kweni ŵamkutondeka.

²⁵Para mwenecho wa nyumba wamkuwuka na kujarako ku muryango, imwe muzamuyamba kuyimilira kuwaro na kwamba kukhung'uska pa chijaro na kuyowoya kuti, ‘Fumu, tijuliraniko.’ Kweni wamkuzgora kuti, ‘Ndilije kumumanyani uko mwafuma.’

²⁶Ntheura mwamkwamba kuyowoya kuti, ‘Ise tikaryanga na kumwa namwe pamoza, ndipo imwe mukasambizganga mu misewu ya misumba yithu.’

²⁷Kweni wizamkuti, ‘Nkhumuphalirani kuti ndilije kumumanyani uko mwafuma. Fumaniko kwa ine, imwe mukuchita uheni.’

²⁸Penepapo mwamkulira na kuswa mino, para mwamkuwona Abrahamu, Yisake, na Yakhobe, na nchimi zose mu Ufumu wa Chiuta, apo imwe mwamkutayika kuwaro.

²⁹Ŵanthu ŵakufuma ku mafumiro gha dazi na ku manjiliro ghakhe, ku mpoto na ku mwera ŵamkukhara pa kurya mu Ufumu wa Chiuta.

³⁰Ndipo ŵanji awo sono mbakumalira, ŵeneawo ŵamkuŵa ŵakudanga, ndipo ŵanji awo mbakudanga ŵamkuŵa ŵakumalira.”

³¹Pa nyengo yeneyira kukiza ŵaFarisi ŵanji ndipo ŵakati kwa Yesu, “Fumapo pano, chifukwa Herode wakukhumba kukukoma.”

³²Yesu wakazgora wakati, “Rutani mukamuphalire kambwe[5] yura kuti, ‘Nkhufumya viŵanda na kuchizga ŵanthu muhanya uno na na machero wuwo, ndipo ndimarizgenge mlimo wane pa zuŵa la chitatu.’

³³Ndipouli nkhwenera kurutilira ulendo wane muhanya uno na na machero, ndiposo na na machero ghara. Chifukwa nchambula machitiko, kuti nchimi yifwire kuwaro kwa Yerusalemu.

³⁴“We Yerusalemu, Yerusalemu! Ukukoma nchimi na kuŵadina na mawe awo ŵakutumika kwa iwe! Kasi nkhalinga apo ine ndawunganya ŵana ŵako pamoza nga ndi umo nyatazi wakuwunganyira twana twakhe kusi ku mapapindo ghakhe, kweni iwe ukakana!

³⁵Nadi, nyumba yako yamkukhara mapopa! Nadi nkhukuphalira kuti, uti undiwonengeso chara mpaka uyowoye kuti, ‘Ngwakutumbikika uyo wakwiza mu zina la Fumu.’ ”