Read new_tumbuka_bible Luka 14 Bible Online

Luka 14 - new_tumbuka_bible bible

Luka 14

¹Pa zuŵa linyakhe la Sabata Yesu wakaruta ku nyumba ya murara yumoza wa ŵaFarisi, kuya karya, ndipo ŵaFarisi ŵanji ŵakamuwoneseskanga chomene.

²Ndipo panthazi pakhe pakaŵa munthu uyo wakaŵa na nthenda ya mburu.

³Yesu wakaŵafumba ŵamanyi-marango na ŵaFarisi kuti, “Kasi kukulangurika kuchizga munthu pa zuŵa la Sabata panji chara?”

⁴Kweni ŵakakhara waka chete. Ntheura Yesu wakamutora munthu yura, wakamuchizga ndipo wakamutuma kuti warutenge.

⁵Yesu wakaŵafumba wakati, “Usange yumoza wa imwe wali na mwana panji nkhaŵi yakhe iyo yawa mu chisimi, kasi wangareka kuyifumyamo pa zuŵa la Sabata?”

⁶Kweni kuti ŵakamanya kuzgorapo kanthu chara pa vyeneivi.

⁷Para Yesu wakawona umo ŵanthu ŵanji awo ŵakachemeka ŵakasankhiranga malo ghakuzirwa, wakaŵayowoyera ntharika iyi wakati,

⁸“Para munthu wakuchemera ku chiphikiro cha pa nthengwa, ungakharanga pa malo ghakuzirwa chara. Pakunji pangaŵapo munthu wakuzirwa kuruska iwe uyo wali kuchemeka.

⁹Ndipo uyo wamuchemani mose mwa ŵaŵiri, wizenge na kukuphalira kuti, ‘Malo agha reka wakharepo ndi munthu uyu.’ Ntheura iwe uti ukhozgeke soni pakukhara pa malo gha pasi.

¹⁰Kweni para wachemeka, ukakhare pa malo gha pasi, mwakuti uyo wakuchema ndiyo wakwenera kukuphalira kuti, ‘M'bwezi wane iwe, kwerera kuno ku malo ghakuzirwa.’ Apo ndipo uti uŵenge wakuchindikika pa maso gha wose awo ŵakukhara nawe pa chakurya.

¹¹Pakuti yose uyo wakujikwezga, wati wakhizgikenge ndipo yose uyo wakujiyuyura, wati wakwezgekenge.”

¹²Ntheura Yesu wakamuphaliraso uyo wakamuchema ku chakurya wakati, “Para wanozga chakurya cha muhanya panji cha mise, ureke kuchema awo mbabwezi ŵako, panji ŵana ŵakwinu, panji ŵabali ŵako, panji ŵazengezgani ŵako awo mbasambazi, mzire nawo v na kukuwezgerapo ivyo ukaŵapa.

¹³Kweni para ukunozga chiphikiro, uchemenge ŵakavu, ŵakupunduka, viti na ŵachiburumutira.

¹⁴Ndipo iwe uti uŵenge wakutumbikika, pakuti iwo ŵalije kanthu kakukuwezgerapo. Chiuta ndiyo wamkukuwezgerapo pa chiwuka cha ŵarunji.”

¹⁵Yumoza wa awo ŵakakhara nayo pa chakurya wakati wapulika vyeneivi, wakati kwa Yesu, “Mbakutumbikika awo ŵamkurya mu Ufumu wa Chiuta.”

¹⁶Yesu wakazgora wakati, “Munthu yunji wakanozga chiphikiro chikuru na kuchema ŵanthu ŵanandi.

¹⁷Pa nyengo ya chiphikiro, wakatuma muteŵeti wakhe kuya kaŵaphalira awo ŵakachemeka, wakati, ‘Zaninge, pakuti vinthu vyose vyanozgeka.’

¹⁸Kweni wose na mtima umoza ŵakamba kukana. Wakudanga wakayowoya wakati, ‘Ndagula munda ndipo nkhwenera kuya kawuwona. Nkhukuŵeya, ukaŵaphalire ŵandigowokere.’

¹⁹Munyakhe wakati, ‘Ndagula nkhaŵi za magoliwoli ghankhonde, ndipo nkhuruta ku kaziyezga, nkhukuŵeya ukaŵaphalire ŵandigowokere.’

²⁰Munyakheso wakati, ‘Ndatora mwanakazi, ndipo chifukwa cha ichi ndingizako chara.’

²¹“Muteŵeti wakati wawera, wakamwandulira mwene-nchito wakhe vyeneivi. Penepapo mwenecho wa nyumba mu ukari wakati ku muteŵeti wakhe, ‘Ruta maluŵiro mu misewu ya mu msumba na mu zinthowa ukaŵatorere kuno ŵakavu na ŵakupendera, ŵachiburumutira ndiposo na viti.’

²²Ndipo muteŵeti yura wakiza kwa mwene-nchito wakhe na kuti, ‘Sekuru, vyose ivyo mukalangula ndafiska, kweni malo ghachali waka.’

²³Mwene-nchito wakati ku muteŵeti, ‘Ruta mu misewu yikuru na mu zinthowa za mu mizi ukaŵachichizge kuti ŵizenge, mwakuti nyumba yane yizure.

²⁴Chifukwa nkhumuphalirani kuti palije yumoza wa ŵanthu ŵara ŵakachemeka ŵati ŵachetenge chiphikiro chane.’ ”

²⁵Sono mizinda yikuru ya ŵanthu yikarondezganga uko wakendanga Yesu, ndipo wakang'anamuka na kuti kwa iwo,

²⁶“Usange munthu yose wakwiza kwa ine, ndipo wakureka kutinkha ŵawiske, ŵanyina, muwoli wakhe, ŵana ŵakhe, ŵabali ŵakhe, ŵadumbu ŵakhe, inya na umoyo wakhe wuwo kuti wangaŵa musambiri wane chara.

²⁷Yose uyo wakureka kuyegha mphinjika yakhe na kundirondezga ine, walije kumanya kuŵa musambiri wane.

²⁸“Pakuti ndi njani wa imwe uyo wakukhumba kuzenga chigongwe, wakureka kukhara danga pasi na kupima umo ndarama zingaŵira, usange wali nazo zakufiskira mlimo ura?

²⁹Mzire pakunji para ŵazenga lufura, ŵatondeke kuyimarizga ndipo ŵanthu wose awo ŵakuwona ŵati ŵamuseke na kuyowoya kuti,

³⁰‘Munthu uyu wakamba kuzenga ndipo watondeka kuyimarizga.’

³¹“Panji kasi ndi karonga nju, uyo wakuruta kuya karwa nkhondo na karonga munyakhe, wakureka kukhara danga pasi na kudumbiskana na ŵankhondo ŵakhe, usange na ŵankhondo 10,000 wangamanya kurwa nkhondo na munyakhe yura wakwiza kwa iyo na ŵankhondo 2,000?

³²Usange yilije kumanya kurwa nayo, yikwenera kutuma nkharamba za kuya kazomerezgana na karonga yura vya mutende apo wachali wandafike.

³³Ntheuraso yose wa imwe usange wakureka kutaya vyose ivyo wali navyo, kuti wakumanya kuŵa musambiri wane chara.

³⁴“Muchere nguweme. Kweni usange wasukuruka, kasi nkhongono yakhe yingawezgekeramo uli?

³⁵Ulije nchito nanga nkhu dongo panji ku chizara. Ntheura ŵanthu ŵakuwutaya waka kuwaro. Uyo wali na makutu ghakupulikira, wapulike.”