Read new_tumbuka_bible Luka 15 Bible Online

Luka 15 - new_tumbuka_bible bible

Luka 15

¹Sono ŵakusonkheska msonkho na ŵakwananga ŵanji, wose pamoza ŵakasenderera kwa Yesu kuti ŵamupulike.

²Kweni ŵaFarisi na ŵamanyi-marango ŵakasinginika na kumususka Yesu ŵakati, “Munthu uyu wakupokerera ŵakwananga, na kurya nawo pamoza.”

³Ntheura Yesu wakaŵatayira ntharika iyi:

⁴“Usange yumoza wa imwe wali nazo mberere 100, ndipo yimoza yazgeŵa, asi wakuzisida mberere 99 mu mapopa, na kuyipenja iyo yazgeŵa, wasuke wayisange?

⁵Ndipo para wayisanga, wakuyiŵika pa viŵegha vyakhe na kusekerera.

⁶Pakufika ku kaya wakuchema ŵabwezi ŵakhe na ŵazengezgani ŵakhe pamoza wakuti, ‘Musekerere nane pamoza, pakuti ndayisanga mberere yane iyo yanguzgeŵa.’

⁷Nkhumuphalirani kuti, ntheura ndimo kwamkuŵira chimwemwe chikuru kuchanya na wakwananga yumoza uyo wakung'anamuka ku zakwananga zakhe, kwakuruska ŵarunji 99, ŵeneawo nchakukhumbikwaso chara kuti ŵang'anamuke ku zakwananga zawo.

⁸“Panji ndi mwanakazi nju uyo wangaŵa na ndarama zakhe khumi ndipo yimoza yazgeŵa, asi wakukozga nyali na kuphyera nyumba yakhe, na kupenjapenja na phamphu wasuke wayisange?

⁹Ndipo para wayisanga, asi wakuchema ŵabwezi na ŵazengezgani ŵakhe na kuŵaphalira kuti, ‘Musekerere nane pamoza, pakuti ndayisanga ndarama iyo yanguzgeŵa.’

¹⁰Nkhumuphalirani kuti, ntheura ndimo kuliri chimwemwe panthazi pa ŵangelo ŵa Chiuta na wakwananga yumoza uyo wang'anamuka ku zakwananga zakhe.”

¹¹Yesu wakati, “Munthu munyakhe wakaŵa na ŵana ŵanarume ŵaŵiri, mukuru na munung'una.

¹²Munung'una wakayowoya na ŵawiske wakati, ‘Ŵadada, mundipeko chigaŵa cha chuma chinu icho chikwenera kuŵa chane.’ Penepapo wiske wakaŵagaŵira ŵana ŵakhe chuma chakhe.

¹³Ghakati gharutapo mazuŵa ghachoko waka, munung'una wakawunjika vyuma vyakhe vyose, wakaruta pa ulendo na kuya ku charu cha kutali. Kwenekura ndiko wakaya kasakazira chuma chakhe mwa wuchindere.

¹⁴Wakati wamara chuma chakhe chose, mu charu chira mukaŵa njara yikuru. Ndipo iyo wakamba kukavuka.

¹⁵Ntheura wakaya kanjira nchito ku mwene-kaya yumoza wa mu charu chira. Iyo wakamutuma ku minda yakhe kuya karyeska nkhumba.

¹⁶Munyamata yura wakadokanga kujikhutiska na vyakurya ivyo nkhumba zikaryanga, ndipo pakaŵavye munthu wakumupako kalikose kakurya.

¹⁷Kweni wakati wajinyumwa wakati, ‘Ŵateŵeti wose awo ŵali kulembeka nchito na ŵadada, ŵali na chakurya chinandi chomene ndipo ŵakurya na kusidapo, kweni ine nkhufwa na njara pano!

¹⁸Nditi ndiwuke na kuruta ku ŵadada ndipo ndamkuŵaphalira kuti, “Ŵadada, ndanangira Chiuta kuchanya, na imwe wuwo.

¹⁹Ndilije kweneraso kuchemeka mwana winu, kweni mundizgore kuŵa yumoza wa ŵanchito ŵinu.” ’

²⁰Ndipo wakawuka na kwiza ku ŵawiske. “Kweni apo wakaŵa wachali kutali, ŵawiske ŵakamuwona, ŵakaŵa nayo na chiwuravi, ndipo ŵakachimbira, ŵakaya kamuvumbatira, na kumufyofyontha.

²¹Penepapo mwana wakayowoya na ŵawiske wakati, ‘Ŵadada ndanangira Chiuta kuchanya, na imwe wuwo. Ntheura ndilije kweneraso kuchemeka mwana winu.’

²²Kweni ŵawiske ŵakaŵaphalira ŵateŵeti ŵawo ŵakati, ‘Zani nawo luŵiro munjilira uweme chomene, mumuvwarike. Ndipo muvwarike munwe wakhe na mphete, ndipo na ku malundi ghakhe na skapato.

²³Ndipo zani nayo ngwata yakututuŵa yira, mukome tirye na kusekerera.

²⁴Pakuti mwana wane uyu wakafwa, kweni sono ngwamoyo. Wakazgeŵa, ndipo sono wasangika!’ Penepapo kusekerera kukambika.

²⁵“Pa nyengo yira, mwana wakhe murara wakaŵa ku munda. Para wakizanga kufupi na nyumba, wakapulika ŵanthu ŵakwimba na kuvina.

²⁶Ndipo wakati wachema muteŵeti yumoza wakamufumba wakati, ‘Nchichi chikuchitika uko?’

²⁷Wa nchito wakazgora wakati, ‘Munung'una winu wiza, ndipo ŵawiskemwe ŵakoma ngwata yakututuŵa yira chifukwa ŵamupokerera wamoyo na wa msuma.’

²⁸“Kweni mukuru wakhe wakakaripa ndipo wakakana na kunjiramo mu nyumba wuwo. Ntheura ŵawiske ŵakafumira kuwaro na kumuŵeyerera.

²⁹Kweni iyo wakaŵazgora ŵawiske wakati, ‘Wonani virimika vinandi ivi ndamuteŵeterani imwe ndipo ndilije kwanangapo nanga ndimoza la marango ghinu. Kweni mulije kundipako nanga nkhana ka mbuzi, mwakuti ndisekerere pamoza na ŵabwezi ŵane.

³⁰Kweni wati wiza mwana winu uyu, uyo wasakazira chuma chinu mu mahule, ndiyo mwamukomera ngwata yakututuŵa.’

³¹Wiske wakamuphalira wakati, ‘Wa mwana wane, iwe uli nane mazuŵa ghose, ndipo vyose ivyo ndili navyo nvyako.

³²Kweni changuŵa chiweme nadi kuti tisekerere na kukondwa, pakuti munung'una wako uyu wakafwa, ndipo sono ngwamoyo. Wakazgeŵa, ndipo sono wasangika.’ ”