Read new_tumbuka_bible Luka 17 Bible Online

Luka 17 - new_tumbuka_bible bible

Luka 17

¹Yesu wakati ku ŵasambiri ŵakhe, Viyezgo vyakutorera munthu ku kwananga viŵengeko mazuŵa ghose, kweni soka kwa munthu mweneuyo vikwiziramo!

²Mphanyi nkhuweme kwa iyo kuti lwara lukuru lukakiririke mu singo yakhe, na kuponyeka mu nyanja, kwakuruska kuti wanangiske kamoza ka twana utu tuchoko.

³Ntheura chenjerani! “Usange mubali wako wananga, umuchenye. Ndipo usange wazomera zakwananga zakhe, umugowokere.

⁴Usange wakwanangira kankhonde na kaŵiri mu zuŵa limoza, ndipo kankhonde na kaŵiri wakwiza wakuti, ‘Phepani nkhuzomera kwananga kwane,’ umugowokere.”

⁵Ŵakutumika ŵakayowoya na Fumu ŵakati, “Kuzgani chipulikano chithu.”

⁶Fumu yikazgora yikati, “Usange mungaŵa na chipulikano nanga chingaŵa chichoko nga nkha njere ka matubeni, mungayowoya ku khuni la chikuyu ili kuti, ‘Zgurika ndipo ukapandike mu nyanja!’, ndipo limupulikiraninge.”

⁷“Usange yumoza wa imwe, wali na muteŵeti uyo wakulima mu munda, panji wakuliska mberere, kasi wangamuphalira muteŵeti uyu para wakuwera ku munda kuti, ‘Zanga kuno luŵiro, urye chakurya?’

⁸Chara nadi, asi wati wamuphalire kuti, ‘Ndinozgera chakurya cha na mise ndipo ujiphinye mukhuzi na kunditeŵetera ndisuke ndirye na kumwa. Sono pamanyuma ndipo iwe wize karye na kumwa.’

⁹Kasi wakumuwonga muteŵeti yura chifukwa wakachita ivyo wakalangulika kuchita?

¹⁰Ntheura ndimo kuliri na imwe wuwo, para mwachita vyose ivyo mukalangurika, muyowoyenge kuti, ‘Ise tili ŵateŵeti waka. Tachita ivyo vyanguŵa nchito yithu.’ ”

¹¹Apo Yesu wakaŵa pa ulendo wakhe kuya ku Yerusalemu, wakasorota pakati pa Samariya na Galileya.

¹²Para wakanjira mu chikaya chinji, wakakumana na ŵanthu khumi awo ŵakaŵa na nthenda ya vyoni, ŵeneawo ŵakimilira kutali, na

¹³kuchemerezga kuti, “Yesu! Musambizgi! Mutilengere lusungu.”

¹⁴Para Yesu wakaŵawona wakati, “Rutani mukajirongore ku ŵasofi.” Apo ŵakarutanga, ŵakatozgeka.

¹⁵Yumoza wa iwo wakati wawona kuti wachizgika, wakawerera nyuma ndipo wakachemerezga uku wakuchindika Chiuta.

¹⁶Wakaya kawa kavunama pa malundi gha Yesu na kumuwonga. Ndipo wakaŵa mu Samariya.

¹⁷Yesu wakafumba wakati, “Asi ŵangutozgeka ŵanthu khumi? Kasi ŵankhonde na ŵanayi ŵali nkhu?

¹⁸Kasi kulije kusangika na yumoza wakwiza kamuchindika Chiuta, kweni mulendo uyo pera?”

¹⁹Ntheura wakati kwa iyo, “Wuka, urutenge, chipulikano chako chakuchizga.”

²⁰ŴaFarisi ŵanji ŵakamufumba Yesu na nyengo iyo Ufumu wa Chiuta wizirenge, ndipo wakazgora wakati, “Ufumu wa Chiuta kuti ukwiza na vimanyikwiro vyakuti viwoneke na maso chara.

²¹Panji ŵanthu ŵayowoyenge kuti, ‘Wonani, uli pano, panji wonani, uli para,’ pakuti Ufumu wa Chiuta uli mukati mwinu.”

²²Ntheura Yesu wakati ku ŵasambiri ŵakhe, “Mazuŵa ghakwiza apo mwamkukhumbisiska kuti mphanyi mwanguwona zuŵa limoza mu mazuŵa gha Mwana wa Munthu, kweni kuti mwamkuliwona chara.

²³Ŵanthu ŵamkumuphalirani kuti, ‘Wonani, wali kuno, panji wonani, wali kura!’, mungayangako chara, panji kuŵarondezga.

²⁴Pakuti nga ndi umo leza wakumwetukira na kupereka ungweru kufuma ku chigaŵa chimoza cha kuchanya kuya ku chinyakhe, ndimo Mwana wa Munthu wizamkuchitira pa zuŵa la kwiza kwakhe.

²⁵Kweni wakwenera danga kukomwa mu vinandi na kukanika na ŵanthu ŵa muwiro uwu.

²⁶Nga ndi umo kukaŵira mu mazuŵa gha Nowa, ntheuraso ndimo kwamkuŵira mu mazuŵa gha Mwana wa Munthu.

²⁷Ŵanthu ŵakaryanga, ŵakamwanga, ŵanarume ŵakatoranga, ndipo ŵanakazi ŵakatengwanga, kufikira zuŵa ilo Nowa wakanjirira mu ngaraŵa. Penepapo chigumura chikiza na kuŵamara wose.

²⁸Ndimo kukaŵiraso mu mazuŵa gha Loti. Ŵanthu ŵakaryanga na kumwa, ŵakagulanga na kuguliska ndipo ŵakapandanga na kuzenga zinyumba.

²⁹Kweni pa zuŵa ilo Loti wakafumiramo mu Sodomu, moto na mawe gha sulufure vikarokwa nga ndi vura kufuma kuchanya, ndipo vikaŵamara wose.

³⁰Ndimo kwamkuŵira na pa zuŵa ilo Mwana wa Munthu wamkwizira.

³¹“Pa zuŵa leneilo uyo wati waŵe pa nyumba pachanya, na katundu wakhe mu nyumba wareke kukhira kuya kawuskamo katundu yura. Ndiposo na uyo wali ku munda nayo wareke kuwerera ku kaya.

³²Kumbukani muwoli wa Loti!

³³Yose uyo wakukhumba kuponoska umoyo wakhe, wati wawutayenge. Kweni yose uyo wakuwutaya umoyo wakhe, wati wawusungilirenge.

³⁴Nkhumuphalirani kuti, mu usiku wenewura ŵanthu ŵaŵiri ŵamkugona pa chitara chimoza, yumoza wamkutorekapo, ndipo munyakhe wamkusidika.

³⁵Ŵanakazi ŵaŵiri ŵamkupulanga pamoza, yumoza wamkutorekapo, ndipo munyakhe wamkusidika.” [

³⁶Ŵanthu ŵaŵiri ŵamkuŵa mu munda umoza, yumoza wamkutorekapo ndipo munyakhe wamkusidika.]

³⁷Ŵasambiri ŵakamufumba ŵakati, “Ndi nkhu, Fumu?” Yesu wakaŵaphalira wakati, “Apo pali chitanda, ndipo makuŵi ghakuwungana pamoza.”