Read new_tumbuka_bible Luka 18 Bible Online

Luka 18 - new_tumbuka_bible bible

Luka 18

¹Ntheura Yesu wakaphalira ŵasambiri ŵakhe ntharika pakuŵasambizga kuti ŵakwenera kuromba nyengo zose, kwambula kuwa nkhumbi.

²Wakaŵayowoyera wakati, “Mu msumba unji mukaŵa mweruzgi yunji uyo kuti wakamopanga Chiuta chara, nanga nkhulorako na munthu.

³Ndipo mukaŵa chokoro mu msumba wenewura icho chikizanga kaŵirikaŵiri kwa iyo ndipo chikamupemphanga kuti, ‘Munderuzgire mrandu na wakupindikana wane!’

⁴Kwa kanyengo mweruzgi wakakana, kweni pamanyuma wakati mu mtima wakhe, ‘Nanga kuti nkhopa Chiuta chara, nesi kulorako na munthu,

⁵kweni pakuti chokoro ichi chikundisuzga nditi ndicheruzgire mrandu wakhe, mzire chindivuske waka pakwiza kaŵirikaŵiri.’ ”

⁶Fumu yikati, “Pulikani icho wakuyowoya mweruzgi wakubendera uyu.

⁷Asi Chiuta wati waŵeruzgire makora ŵakusoreka ŵakhe awo ŵakumulirira muhanya na usiku? Kasi wangaziurika pakuwovwira?

⁸Nkhumuphalirani kuti wati waŵeruzgire mirandu yawo mwa luŵiro. Para Mwana wa Munthu wakwiza kasi wizamkusanga chipulikano mu charu?”

⁹Yesu wakatayiraso ntharika iyi ku ŵanthu ŵanji awo ŵakajipima kuti mbarunji, ndipo ŵakayuyuranga ŵanyakhe wose.

¹⁰“Ŵanthu ŵaŵiri ŵakakwerera ku Nyumba ya Chiuta kuya karomba. Yumoza wakaŵa muFarisi, munyakhe wakaŵa wakusonkheska msonkho.

¹¹MuFarisi wakimilira na kuromba ntheura kwa iyomwene, ‘Chiuta nkhumuwongani, chifukwa kuti nkhulingana na ŵanthu ŵanyakhe chara: ŵakwiba, ŵakubendera na ŵaleŵe, nesi kuŵa nga ndi wakusonkheska msonkho uyu.

¹²Nkhuziŵizga kurya kaŵiri mu sabata, nkhupereka vyakhumi pa vyose ivyo nkhupokera.’

¹³“Kweni wakusonkheska msonkho wakimilira kutali. Ndipo kuti wakakhumba chara nanga nkhwinuskira maso ghakhe kuchanya. Kweni wakajitimba pa chifuŵa wakati, ‘Chiuta mundilengere lusungu, nda wakwananga ine.’ ”

¹⁴Nkhumuphalirani kuti “Munthu uyu wakaruta ku nyumba yakhe wakurunjiskika pa maso gha Chiuta, kweni muFarisi yura chara. Pakuti yose uyo wakujikwezga wati wayuyukenge, kweni uyo wakujiyuyura wati wakwezgekenge.”

¹⁵Ŵanthu ŵanji ŵakizanga na twana wuwo kwa Yesu, kuti watukhwaske. Para ŵasambiri ŵakhe ŵakawona ichi ŵakaŵachenya.

¹⁶Kweni Yesu wakatuchemera kwa iwo wakati, “Tuzomerezgani twana twizenge kwa ine, mungatukanizganga. Pakuti Ufumu wa Chiuta ngwa twa ntheura.

¹⁷Nadi nkhumuphalirani kuti, yose uyo wakureka kupokerera Ufumu wa Chiuta nga mwana, kuti wamkunjiramo chara.”

¹⁸Murara wa ŵaYuda wakamufumba Yesu wakati, “Musambizgi muweme, kasi ndichitechi kuti ndipokere umoyo wa muyirayira?”

¹⁹Yesu wakamufumba wakati, “Ukundichemerachi muweme? Palije muweme, kweni Chiuta pera.

²⁰Ukughamanya marango agho ghakuti, ‘Ungaleŵanga, Ungakomanga, Ungibanga, Ungaperekanga ukaboni wa utesi, Chindika ŵawuso na ŵanyoko.’ ”

²¹Munthu yura wakazgora wakati, “Marango ghose agha ndili kughasunga kufuma ku uwukirano wane.”

²²Para Yesu wakapulika ichi wakati, “Ukusoŵerwa chinthu chimoza. Uguliske vyose ivyo uli navyo, ndipo ndarama zakhe gaŵira ŵakavu, ndipo uti uŵenge na usambazi kuchanya. Ntheura wize na kundirondezga.”

²³Para wakapulika mazgu agha, wakaŵa na chitima chikuru chifukwa wakaŵa musambazi chomene.

²⁴Yesu wakati wamuwona kuti wakhuŵara wakati, “Nawo mbunonono kunjira mu Ufumu wa Chiuta ŵanthu awo ŵali na usambazi.

²⁵Pakuti nchipusu kuti ngamila yisorote mu jiso la sindano, kuruska kuti musambazi wanjire mu Ufumu wa Chiuta.”

²⁶Awo ŵakaghapulika mazgu agha ŵakati, “Ipo ndi njani uyo wangaponoskeka?”

²⁷Yesu wakazgora wakati, “Vyose ivyo nvyambula machitiko ku ŵanthu, nvyamachitiko kwa Chiuta.”

²⁸Petrosi wakati kwa Yesu, “Wonani ise tili kusida vyose na kumurondezgani.”

²⁹Yesu wakaŵaphalira wakati, “Nadi nkhumuphalirani kuti, yose uyo wali kusida nyumba, panji muwoli, panji ŵabali, panji ŵapapi, panji ŵana, chifukwa cha Ufumu wa Chiuta,

³⁰wati wapokerenge vinandi chomene mu nyengo yino ya sono, ndiposo na umoyo wa muyirayira mu nyengo yikwiza.”

³¹Yesu wakaŵatorera pa mphepete ŵasambiri ŵakhe 12 ndipo wakayowoya nawo wakati, “Tikuruta ku Yerusalemu, ndipo vyose ivyo vili kulembeka na za Mwana wa Munthu na nchimi vyamkufiskika.

³²Chifukwa iyo wamkuperekeka ku ŵamitundu, awo ŵamkumugoska, ŵamkumulengeska, na kumufunyira mata.

³³Ŵamkumuthyapula na kumukoma, ndipo pa zuŵa la chitatu wamkuwuka ku ŵakufwa.”

³⁴Ŵasambiri ŵakhe kuti ŵakapulikiska na chimoza cha ivi chara. Pakuti ching'anamulo chakhe chikabisika kwa iwo. Ŵakamanyiska chara icho Yesu wakayowoyanga.

³⁵Apo Yesu wakaneng'enera ku Yeriko, munthu wachiburumutira wakakhara pa mphepete pa msewu ndipo wakapemphanga.

³⁶Para wakapulika mzinda wa ŵanthu ukujumpha, wakafumba wakati, “Nchichi icho chikuchitika?”

³⁷Ŵakamuphalira ŵakati, “Ndi Yesu wa ku Nazarete uyo wakujumpha.”

³⁸Wakachemerezga wakati, “Yesu, Mwana wa Davide, mundilengere lusungu!”

³⁹Ŵanthu awo ŵakadangira ŵakamuchenya pakumuphalira kuti wakhare chete. Kweni iyo wakachemerezga kwakuruska wakati, “Imwe Mwana wa Davide, mundilengere lusungu!”

⁴⁰Yesu wakimilira na kuŵalangula kuti ŵize nayo kwa iyo. Para ŵakiza pafupi, Yesu wakamufumba wakati,

⁴¹“Kasi ukukhumba kuti ndikuchitirechi?” Iyo wakati, “Fumu, nkhukhumba kuti ndilaŵiskeso.”

⁴²Yesu wakamuphalira wakati, “Laŵiska! Chipulikano chako chakuchizga.”

⁴³Penepapo wakamba kulaŵiska ndipo wakamurondezga Yesu na kumuchindika Chiuta. Para ŵanthu wose ŵakawona ichi, ŵakarumba Chiuta.