Read new_tumbuka_bible Luka 19 Bible Online

Luka 19 - new_tumbuka_bible bible

Luka 19

¹Yesu wakanjira na kuporota mu msumba wa Yeriko.

²Ndipo wakaŵapo munthu yunji zina lakhe Zakeyu, uyo wakaŵa murara wa kusonkheska msonkho, ndipo wakaŵa musambazi.

³Zakeyu wakakhumbanga kuwona Yesu kuti wamumanye, ndipo wakatondekanga kumuwona chifukwa cha mzinda wa ŵanthu, pakuti wakaŵa mufupi.

⁴Wakachimbilira panthazi, wakaya kakwera mu khuni la chikuyu mwakuti wamuwone, pakuti Yesu wakizanga mu nthowa yeneyira.

⁵Yesu wakati wafika pa malo ghara wakalaŵiska kuchanya, wakamuphalira Zakeyu wakati, “Zakeyu, khira luŵiro chifukwa muhanya uno nkhwenera kukhara mu nyumba yako.”

⁶Zakeyu wakikha luŵiro, ndipo wakamupokerera na chimwemwe chikuru.

⁷Pakuwona ichi ŵanthu wose ŵakamba kunyunyuta ndipo ŵakayowoya ŵakati, “Waruta kuya kaŵa mulendo wa munthu wakwananga.”

⁸Zakeyu wakimilira ndipo wakati kwa Fumu, “Fumu, tegherezgani, vyuma vyane nkhugaŵa pakati na kuŵapa ŵakavu, ndipo usange yumoza ndamuzgerera kanthu, nkhumuwezgerapo kanayi.”

⁹Yesu wakati kwa iyo, “Muhanya uno chiponosko chiza mu nyumba iyi, chifukwa munthu uyu nayoso ndi mwana wa Abrahamu.

¹⁰Pakuti Mwana wa Munthu wakiza kupenja na kuponoska icho chikazgeŵa.”

¹¹Apo ŵanthu ŵakapulikizganga ku vyeneivi, Yesu wakarutilira kuyowoya ndipo wakaŵatayira ntharika iyi, pakuti wakaŵa pafupi na Yerusalemu. Ŵanthu ŵakaghanaghananga kuti Ufumu wa Chiuta wamkuwoneka maluŵiro.

¹²Ntheura Yesu wakati, “Munthu yunji wakuzirwa, wakaruta ku charu cha kutali kuya kavwarikika ufumu na kuwereraso ku kwawo.

¹³Ntheura pambere wandarute wakachema ŵateŵeti ŵakhe khumi na kuŵapa ndarama khumi. Wakaŵaphalira wakati, ‘Muchite nazo malonda ndarama izi ndisuke ndize.’

¹⁴Kweni ŵanthu ŵakhe ŵakamutinkha ndipo ŵakatuma ŵimiliri pamanyuma pakhe ŵakati, ‘Tikukhumba chara kuti munthu uyu waŵe karonga withu!’

¹⁵“Ndipouli, munthu yura wakaya kavwarikika ufumu na kuwerera ku kwawo. Ntheura wakachema ŵateŵeti ŵara wakaŵapa ndarama mwakuti wamanye na chandulo icho ŵakasanga pakuchita malonda.

¹⁶Wakudanga wakiza panthazi pakhe wakayowoya wakati, ‘Fumu, pa ndarama yinu ndasangirapo chandulo cha ndarama zinyakhe khumi.’

¹⁷Fumu yikati kwa iyo, ‘Wachita makora iwe muteŵeti muweme, pakuti ukagomezgeka pa tunthu tuchoko, sono nditi ndikupenge mazaza pa misumba khumi.’

¹⁸Wa chiŵiri wakiza wakati, ‘Fumu pa ndarama yinu ndasangirapo chandulo cha ndarama zinyakhe zinkhonde.’

¹⁹Fumu yikamuzgora yikati, ‘Nawe uti uŵe na mazaza pa misumba yinkhonde.’

²⁰“Ntheura munyakhe nayo wakiza wakati, ‘Fumu, iyi ndarama yinu yeneiyo nkhasungilira na kuyikaka pa kasalu.

²¹Pakuti nkhaŵa na wofi na imwe, pakuti muli ŵanonono. Mukutora ivyo mukawura kuŵikapo, ndiposo mukuvuna apo mukawura kumijapo.’

²²Fumu yikazgora yikati, ‘Nditi ndikweruzge na mazgu agho wayowoya wekha, wa muteŵeti muheni iwe! Ukumanya kuti nkhaŵa munthu munonono, nkhutora ivyo nkhawura kuŵikapo, ndiposo nkhuvuna ivyo nkhawura kumijapo.

²³Chifukwa uli ukareka kuŵika ndarama yane ku banki ya ndarama, kuti ndipoke pamoza na chandulo?’

²⁴“Fumu yikati kwa awo ŵakimilira pafupi, ‘Mupokani ndarama iyo wali nayo, mumupe uyo wali na ndarama khumi.’

²⁵Ŵakamuzgora ŵakati, ‘Fumu, wali nazo kale ndarama khumi.’

²⁶Wakazgora wakati, ‘Nkhumuphalirani kuti, yose uyo wali navyo ŵati ŵamupenge vinandi. Kweni uyo walije, ŵamupokenge nanga ndi ako wali nako.

²⁷Kweni ŵarwani ŵane ŵara, awo kuti ŵakandikhumbanga chara kuti ndiŵe karonga wawo, mwize nawo kuno ndipo muŵakome panthazi pane.’ ”

²⁸Yesu wakati wayowoya mazgu agha, wakaŵadangirira ŵasambiri ŵakhe pakuruta ku Yerusalemu.

²⁹Apo wakati waneng'enera ku mizi ya Betifage na Betaniya pa Phiri la maOlive, wakatuma ŵasambiri ŵaŵiri.

³⁰Wakati, “Rutani ku chikaya icho mwadunjikana nacho. Para mwamkunjira, mwamkusanga mwana wa mbunda wakukakika, mweneuyo munthu wandakwerepo na kale. Mukamusutule na kwiza nayo kuno.

³¹Usange munthu wamkumufumbani kuti, ‘Mukumusutulirachi mwana wa mbunda?’ Mukazgore kuti, ‘Fumu yikumukhumba.’ ”

³²Awo ŵakatumika ŵakaruta, ŵakaya kasanga nga ndi umo Yesu wakaŵaphalirira.

³³Ŵachali kumusutula mwana wa mbunda, ŵenecho ŵakaŵafumba ŵakati, “Mukumusutulirachi mwana wa mbunda?”

³⁴Iwo ŵakati, “Fumu yikumukhumba.”

³⁵Ndipo ŵakiza na mwana wa mbunda kwa Yesu, ŵakaŵikapo vyakuvwara vyawo pa msana wa mwana wa mbunda yura, ŵakamukwezgapo Yesu.

³⁶Apo Yesu wakarutanga, ŵakatandikanga vyakuvwara vyawo mu msewu.

³⁷Para wakati waneng'enera ku Yerusalemu pa wikho wa Phiri la maOlive, mzinda wose wa ŵasambiri ŵakhe ukamba kusekerera na kumuchindika Chiuta na mazgu ghakuru, chifukwa cha milimo yose ya nkhongono iyo ŵakayiwona, ŵakati,

³⁸“Ngwakutumbikika Karonga uyo wakwiza mu zina la Fumu! Mutende uŵe kuchanya, na uchindami kwa Chiuta kuchanya nkhanira.”

³⁹Ŵanji ŵa ŵaFarisi awo ŵakaŵa mu mzinda ŵakayowoya na Yesu ŵakati, “Musambizgi, muŵachenye ŵasambiri ŵinu.”

⁴⁰Iyo wakati, “Nkhumuphalirani kuti, usange aŵa ŵachetama, mawe ndigho ghati ghachemerezgenge.”

⁴¹Yesu wakati waneng'enera ku Yerusalemu na kuwona msumba, wakawulirira wakati,

⁴²“Okwe! Usange umanyenge muhanya uno ivyo vingakutorera mutende! Kweni sono vili kubisika ku maso ghako.

⁴³Pakuti nyengo yikwiza pa iwe apo ŵarwani ŵako ŵamkukujalira kosekose, ndipo ŵamkukuzingirizga posepose.

⁴⁴Ŵizamkukuwiskira pasi iwe pamoza na ŵana ŵako mu malinga ghako. Kuti ŵamkusida libwe pachanya pa libwe linyakhe chara, chifukwa ukamanya chara nyengo yakwizira Chiuta kuti wakuponoske.”

⁴⁵Ntheura Yesu wakanjira mu Nyumba ya Chiuta, ndipo wakamba kufumiska awo ŵakagulanga na kuguliska.

⁴⁶Ndipo wakati, “Kuli kulembeka kuti, ‘Nyumba yane yiti yichemekenge nyumba ya kusoperamo,’ kweni imwe mwayizgora mphanji ya ŵankhungu.”

⁴⁷Zuŵa na zuŵa Yesu wakasambizganga mu Nyumba ya Chiuta, kweni ŵasofi ŵarara, ŵamanyi-marango, na ŵarongozgi ŵa ŵaYuda ŵakakhumbanga kumukoma.

⁴⁸Kweni kuti ŵakasanga chara nthowa yakumukomera, chifukwa ŵanthu wose ŵakapulikizganga mazgu ghakhe.