Read new_tumbuka_bible Luka 2 Bible Online

Luka 2 - new_tumbuka_bible bible

Luka 2

¹Mu mazuŵa ghara, Karonga Augusto wakafumiska languro lakuti ŵanthu wose ŵa mu charu chose ŵapendeke na kulembeka.

²Uku ndiko kukaŵa kulembeka kwa kudanga, para Kwiriniya wakaŵa mukuru wa chigaŵa cha Siriya.

³Ŵanthu wose ŵakaruta kuya kalembeka, waliyose ku msumba wakhe na wakhe.

⁴Yosefe nayo wakafuma mu Galileya, mu msumba wa Nazarete, wakaruta ku Yudeya, ku msumba wa Davide uwo ukuchemeka Betelehemu, chifukwa iyo wakaŵa wa fuko la Davide.

⁵Wakaruta kuya kalembeka pamoza na Mariya, uyo wakamujalira kuŵa muwoli wakhe, uku nthumbo yakura.

⁶Apo wakaŵa wachali kwenekura, nyengo yakuti Mariya wababire yikakwana.

⁷Ndipo wakababa mwana wakhe wa uŵere mwanarume. Wakamuvungirizga mu salu na kumugoneka mu uryero wa vyakuŵeta, pakuti mukaŵavye malo ghakuti ŵagonemo mu nyumba ya ŵalendo.

⁸Ŵakaŵamo ŵaliska mu charu chira, awo na usiku ŵakalindanga mberere zawo mu dambo.

⁹Mungelo wa Fumu wakaŵawonekera, ndipo uchindami wa Fumu ukaŵaŵalira zingirizge. Ntheura ŵaliska ŵara ŵakopa chomene.

¹⁰Mungelo wakati kwa iwo, “Mungopanga, chifukwa ndamuyegherani Uthenga Uweme wa chimwemwe chikuru icho chiti chiŵenge ku ŵanthu wose.

¹¹Muhanya uno mu msumba wa Davide, wamubabiwirani Muponoski mweneuyo ndi Khristu Fumu.

¹²Ndipo chimanyikwiro chakhe kwa imwe ndi ichi: mwayamkusanga bonda wakuvungirizgika na salu ndipo ŵamugoneka mu uryero wa vyakuŵeta.”

¹³Mwamabuchibuchi mzinda ukuru wa ŵangelo ŵa kuchanya ukawoneka pamoza na mungelo yura. Ukarumbanga Chiuta na mazgu ghakuti,

¹⁴“Uchindami kwa Chiuta kuchanya nkhanira, ndipo pa charu cha pasi paŵe mutende pakati pa ŵanthu awo iyo wakucha nawo.”

¹⁵Ŵangelo ŵakati ŵaŵasida na kuwerera kuchanya, ŵaliska ŵakayowoyeskana ŵakati, “Tiyeni tirutenge ku Betelehemu, tikawone chinthu ichi chawako, cheneicho Fumu yativumbulira.”

¹⁶Ŵakenda mwaluŵiro ndipo ŵakaya kasanga Mariya, Yosefe, na bonda wagona mu uryero wa vyakuŵeta.

¹⁷Para ŵaliska ŵakati ŵamuwona bonda, ŵakaŵandulira ŵapapi mazgu agho mungelo wakaŵaphalira pa vya mwana uyu.

¹⁸Wose awo ŵakapulika ichi, ŵakazizwa na mazgu agho ŵaliska ŵakaŵaphalira.

¹⁹Kweni Mariya wakaghasungilira mazgu ghose gheneagha na kulanguruka nagho mu mtima wakhe.

²⁰Ndipo ŵaliska ŵakawerera, ŵakamuchindika na kumurumba Chiuta, chifukwa cha vyose ivyo ŵakavipulika na kuviwona. Vyose vikaŵa nga ndi umo mungelo wakayowoyera kwa iwo.

²¹Ghakati gharutapo mazuŵa ghankhonde na ghatatu, pa nyengo ya kumukotorera mwana, ŵakamuthya zina lakhe Yesu. Ili ndilo zina ilo likapika na mungelo apo Mariya wakaŵa wachali wandaŵe na nthumbo.

²²Para mazuŵa ghakutozgeka kwawo ghakamara, kwakuyana na Dango la Mozesi, Yosefe na Mariya ŵakaruta nayo mwana Yesu ku Yerusalemu kuti ŵakamupereke kwa Fumu.

²³Nga ndi umo kuli kulembekera mu marango gha Fumu kuti, “Mwana yose mwanarume wa uŵere, wati wachemeke wakupatulika kwa Fumu.”

²⁴Ntheura ŵakaya kaperekaso sembe kwakuyana na icho chikuyowoyeka mu dango la Fumu ilo likuti, “Nkhunda ziŵiri panji viwunda viŵiri.”

²⁵Mu Yerusalemu mukaŵa munthu zina lakhe Simiyoni. Munthu uyu wakaŵa murunji na wakutemwa kusopa Chiuta. Wakalindiriranga chisangurusko cha Israele ndipo Mzimu Mutuŵa wakaŵa pa iyo.

²⁶Ndipo ichi chikamuvumbulikira na Mzimu Mutuŵa kuti iyo wati wafwenge chara, wasuke wawone Mesiya wa Fumu.

²⁷Simiyoni pakurongozgeka na Mzimu, wakiza mu Nyumba ya Chiuta. Para ŵapapi ŵakanjira nayo mwana Yesu mu Nyumba ya Chiuta, mwakuti ŵamuchitire ako kakaŵa kaluso kawo kwakuyana na dango,

²⁸Simiyoni wakamupokerera mu mawoko ghakhe ndipo wakamuchindika Chiuta wakati,

²⁹“Fumu, sono mundizomerezge nda muteŵeti winu kuruta mu mutende kwakuyana na mazgu ghinu.

³⁰Pakuti maso ghane ghawona chiponosko chinu,

³¹icho mwachinozga pa maso pa ŵanthu wose.

³²Ungweru wakuvumbulira khumbo linu ku ŵamitundu, na uchindami ku ŵanthu ŵinu ŵaIsraele.”

³³Ŵawiske na ŵanyina ŵakazizwa na ivyo Simiyoni wakayowoya na za mwana yura.

³⁴Simiyoni wakaŵatumbika, ndipo wakamuphalira Mariya ŵanyina ŵakhe kuti, “Mwana uyu wimikika kuti ŵaIsraele ŵanandi ŵawiskikiremo ndiposo ŵanandi ŵawuskikiremo na kuŵa chimanyikwiro icho ŵanandi ŵati ŵasuskane nacho,

³⁵ndipo iwe nawe chitima chizamkulasa mtima wako nga lupanga mwakuti maghanoghano gha ŵanthu ŵanandi ghavumbukwe pakweru.”

³⁶Yikaŵakoso nchimi yanakazi zina lakhe Ana, mwana wa Fanuele, wa fuko la Ashere. Iyo wakachekura chomene. Wakakhara pa nthengwa virimika vinkhonde na viŵiri pera.

³⁷Pamanyuma pakhe wakaŵa chokoro virimika 84. Mwanakazi uyu kuti wakafumangamo mu Nyumba ya Chiuta chara. Iyo wakasopanga pamoza na kuziŵizga kurya na kuromba muhanya na usiku.

³⁸Pa ora leneilo Ana wakiza ndipo wakawonga Chiuta, wakayowoya vya mwana uyu ku wose awo ŵakalindiriranga nyengo iyo Chiuta wizamkuwombolera Yerusalemu.

³⁹Yosefe na Mariya ŵakati ŵafiska vyose kwakuyana na dango la Fumu, ŵakawerera ku Galileya, ku msumba wawo wa Nazarete.

⁴⁰Mwana wakakura, wakaŵa wankhongono na wakuzuzgika na mahara ndipo vitumbiko vya Chiuta vikaŵa pa iyo.

⁴¹Chirimika chilichose ŵapapi ŵa Yesu ŵakarutanga ku Yerusalemu pa nyengo ya chiphikiro cha Paska.

⁴²Apo Yesu wakaŵa na virimika 12, ŵakakwerera ku Yerusalemu ku chiphikiro cha Paska kwakuyana na kaluso.

⁴³Chiphikiro chikati chamara, apo ŵapapi ŵakhe ŵakawereranga ku kwawo, msepuka Yesu wakakhalira mu Yerusalemu. Ŵapapi ŵakhe kuti ŵakamanya ichi chara.

⁴⁴Iwo ŵakaghanaghananga kuti wali mukati mu chiwuru cha ŵanthu. Ntheura ŵakenda lwendo lwa zuŵa limoza. Ndipo ŵakamba kumupenja mu ŵabali na ŵabwezi ŵawo.

⁴⁵Para ŵakati ŵatondeka kumusanga, ŵakawerera ku Yerusalemu kuya kamupenjerera.

⁴⁶Ndipo ghakati ghajumphapo mazuŵa ghatatu, ŵakamusanga mu Nyumba ya Chiuta, wakhara mukati mu ŵasambizgi, kuŵapulikizga na kuŵafumba mafumbo.

⁴⁷Wose awo ŵakamupulikanga ŵakazukumanga na vinjeru vyakhe na kazgolero kakhe.

⁴⁸Para ŵapapi ŵakhe ŵakamuwona ŵakazizwa, ndipo ŵanyina ŵakayowoya nayo ŵakati, “Wa Mwana, wachitirachi nase ntheura? Ŵawuso na ine takupenjanga na kwenjerwa kukuru.”

⁴⁹Kweni Yesu wakaŵazgora wakati, “Kasi mwandipenjerangachi? Kasi mwamanyanga chara kuti ine nkhwenera kuŵa mu Nyumba ya Ŵadada?”

⁵⁰Kweni ŵakamanyiska chara icho wakang'anamulanga.

⁵¹Ntheura Yesu wakakhira nawo, ŵakaya kafika ku Nazarete. Ndipo iyo wakaŵapulikira ŵapapi wakhe. Ŵanyina ŵakasungilira vinthu vyose ivi mu mtima wawo.

⁵²Yesu wakakuranga mu mahara na mu musinkhu, ndipo wakaŵa wakutemweka kwa Chiuta na ku ŵanthu.