Read new_tumbuka_bible Luka 20 Bible Online

Luka 20 - new_tumbuka_bible bible

Luka 20

¹Zuŵa limoza apo Yesu wakasambizganga ŵanthu mu Nyumba ya Chiuta, na kupharazga Uthenga Uweme, ŵasofi ŵarara na ŵamanyi-marango, pamoza na ŵarara ŵa ŵaYuda ŵakiza kwa iyo.

²Ŵakamufumba ŵakati, “Utiphalire, kasi ndi mazaza uli agho ukuchitira vinthu ivi? Ndipo ndi njani uyo wakakupa mazaza gha ntheura?”

³Yesu wakaŵazgora wakati, “Nane nditi ndimufumbaninge fumbo limoza. Mundiphalire,

⁴Kasi mazaza agho Yohane wakabapatiziranga ghakafuma kwa njani? Kwa Chiuta panji ku ŵanthu?”

⁵Kweni iwo ŵakamba kuyowoyeskana ŵekha ŵakati, “Usange tingamuzgora kuti, ‘Ghakafuma kwa Chiuta,’ iyo watifumbenge kuti, ‘Chifukwa uli mukareka kupulikana nayo?’

⁶Kweni usange tikuti, ‘Ghakafuma ku ŵanthu,’ nadi ŵanthu wose ŵatidinenge na mawe, pakuti wose mbakukhorwa kuti Yohane wakaŵa nchimi nadi.”

⁷Ntheura ŵakamuzgora kuti, “Tikumanya chara uko ghakafuma mazaza ghakhe.”

⁸Yesu wakaŵazgora wakati, “Nane nditi ndimuphaliraninge chara uko ghakafuma mazaza agha nkhuchitira vinthu ivi.”

⁹Penepapo Yesu wakamba kuŵayowoyera ŵanthu ntharika iyi wakati, “Munthu wakalima munda wa mpheska, ndipo wakawukorezga ku ŵalimi ŵanyakhe na kuruta ku charu chinyakhe uko wakakharako nyengo yitali.

¹⁰Pa nyengo ya vuna, wakatuma muteŵeti wakhe ku ŵalimi ŵara kuti ŵakamupeko vipambi vya mu munda wa mpheska. Kweni ŵalimi ŵara ŵakamutimba na kumuwezga kwambula kumupa kanthu.

¹¹Wakatumaso muteŵeti munyakhe, nayo ŵakamutimba, na kumusuzgasuzga, ŵakamuwezga kwambula kanthu.

¹²Wakatumaso wa chitatu, ŵakamupweteka na kumutaya kuwaro.

¹³Ntheura mwene-munda wa mpheska wakati, ‘Kasi ndichitechi? Nditi nditume mwana wane wakutemweka, panji ndiyo ŵangaya kamuchindika.’

¹⁴Kweni ŵalimi ŵara ŵakati ŵamuwona ŵakayowoyeskana ŵakati, ‘Uyu ndiyo muhaliri, tiyeni timukome ndipo chiharo chiŵenge chithu.’

¹⁵Ntheura ŵakamutaya kuwaro kwa munda wa mpheska na kumukoma. “Kasi mwene-munda wa mpheska yura, wizamkuchitachi nawo ŵalimi ŵara?”

¹⁶“Wati wizenge na kuŵakoma ŵalimi ŵara na kuwukorezga munda wa mpheska ku ŵalimi ŵanyakhe.” Para ŵanthu ŵakapulika ŵakati, “Kuti kungaŵa ntheura chara.”

¹⁷Yesu wakaŵalaŵiska ndipo wakati, “Ipo malembo agha ghakung'anamulachi, ‘Libwe ilo ŵazengi ŵakalikana, ndilo lazgoka nkhorezgero ya chingodya?’

¹⁸Yose uyo wakuwa pa libwe lira, wati waphyoke tuvipitikapitika, kweni uyo limuwirenge liti limusile mpaka wazgoke fuvu.”

¹⁹Ŵamanyi-marango na ŵasofi ŵarara ŵakayezga kumukora pa ora lenelira, kweni ŵakopa ŵanthu pakuti ŵakamanya kuti wakanenanga iwo mu ntharika iyi.

²⁰Pakumuŵendaŵenda nyengo yiweme, ŵakatuma mphachi izo zikajirongora kuti nga nzirunji, mwakuti ŵamukore Yesu mu mazgu agho wakayowoya. Iyi yikaŵa nthowa yakuti wamuperekere ku ŵamazaza ndiposo na ku weruzgi wa mukuru wa chigaŵa.

²¹Iwo ŵakamufumba ŵakati, “Musambizgi, tikumanya kuti mukuyowoya na kusambizga mwakunyoroka ndipo mukutemwera chara, kweni mukusambizga mu unenesko nthowa ya Chiuta.

²²Kasi kukulangurika kupereka msonkho kwa karonga wa ku Romu panji chara?”

²³Yesu wakamanya uryarya wawo ndipo wakati kwa iwo,

²⁴“Ndirongorani ndarama. Kasi chikozgo icho chili pa ndarama na zina nvya njani?” Ŵakazgora ŵakati, “Nvya karonga wa ku Romu.”

²⁵Yesu wakati kwa iwo, “Ipo perekani kwa karonga wa ku Romu ivyo nvya karonga wa ku Romu, ndipo kwa Chiuta ivyo nvya Chiuta.”

²⁶Ndipo ŵakatondeka kuti ŵamukore panthazi pa ŵanthu pa icho wakayowoyanga, kweni pakuzukuma na zgoro lakhe ŵakakhara waka chete.

²⁷Ŵasaduki, ŵanji, awo ŵakuti kuwuka ku ŵakufwa kulije ŵakiza kwa Yesu ndipo ŵakamufumba ŵakati,

²⁸“Musambizgi, Mozesi wakatilembera kuti, ‘Usange mukuru wa munthu wafwa, na kusida muwoli wambula mwana, mubali wakhe watore muwoli uyu na kuwuskira mphapu mukuru wakhe.’

²⁹Sono kukaŵako ŵana ŵankhonde na ŵaŵiri pa wiskewo. Wakudanga wakatora mwanakazi ndipo wakafwa kwambula mwana.

³⁰Ndipo wa chiŵiri wakahara mwanakazi yura ndipo nayo wakafwa kwambula kurekapo mwana.

³¹Wa chitatu nayo wakahara chokoro chira ndipo ntheura pera ŵankhonde na ŵaŵiri wose ŵakafwa waka kwambula kurekapo mwana.

³²Pa umaliro, mwanakazi nayo wakafwa.

³³Kasi pa chiwuka cha ŵakufwa, mwanakazi uyu wamkuŵa muwoli wa njani, pakuti wose ŵankhonde na ŵaŵiri ŵakamutorapo?”

³⁴Ndipo Yesu wakati kwa iwo, “Ŵanthu ŵa mu charu chino ndiwo ŵakutora na kutengwa.

³⁵Kweni awo ŵakupimika kuti mbakwenerera kufikira ku nyengo yeneyira na ku chiwuka cha ŵakufwa kuti ŵakutora chara nanga nkhutengwa.

³⁶Chifukwa ŵangafwaso chara, pakuti ŵakuyana waka na ŵangelo ndipo mbana ŵa Chiuta, chifukwa ŵali kuwuka ku ŵakufwa.

³⁷Kweni kuti ŵakufwa ŵakuwuskika, Mozesi nayo wakarongora pa makani gha chivwati chira, apo wakuti, ‘Fumu ndi Chiuta wa Abrahamu, na Chiuta wa Yisake na Chiuta wa Yakhobe.

³⁸Ntheura kuti ndi Chiuta wa ŵakufwa chara, kweni wa ŵamoyo, pakuti kwa iyo wose mbamoyo.’ ”

³⁹Ŵanji ŵa ŵamanyi-marango ŵakati, “Musambizgi, wayowoya makora.”

⁴⁰Ndipo pakaŵavye na yumoza wakakangarizga kumufumba fumbo linyakhe.

⁴¹Ntheura Yesu wakati kwa iwo, “Chifukwa uli ŵanthu ŵakuyowoya kuti Mesiya ndi mwana wa Davide?

⁴²Pakuti Davide iyomwene mu Buku la MaSalimo wakuti, ‘Fumu yikati kwa Fumu yane, Khara ku woko lane la maryero,

⁴³ndisuke ndiŵazgore ŵarwani ŵako kuŵa chitambaliro cha malundi ghako.’

⁴⁴Ntheura Davide wakumuchema Fumu, ndipo kasi wangaŵa uli mwana wakhe?”

⁴⁵Yesu wakayowoya na ŵasambiri ŵakhe uku ŵanthu wose ŵakupulika wakati,

⁴⁶“Chenjerani na ŵamanyi-marango. Iwo ŵakutemwa kwendendeka uku ŵavwara minjilira yitali, ndipo mu msika ŵakutemwa kuti ŵanthu ŵaŵatauzgenge na nchindi. Ŵanthu aŵa ŵakujisankhira vitengo vyakuzirwa mu nyumba zakusoperamo na malo gha nchindi pa viphikiro.

⁴⁷Ŵanthu aŵa ŵakuzgerera vyokoro, ndipo mu kupusikizga kwawo ŵakuromba malurombo ghatali. Ŵanthu ŵa ntheura, ŵamkupokera chilango chikuru kwakuruska!”