Read new_tumbuka_bible Luka 21 Bible Online

Luka 21 - new_tumbuka_bible bible

Luka 21

¹Yesu wakati winuska maso, wakawona ŵasambazi ŵakuponya vyawanangwa vyawo mu chakuŵikamo vyakupereka.

²Ndipo wakawonaso chokoro chikavu chikuŵikamo tundarama tuŵiri.

³Yesu wakati, “Nadi nkhumuphalirani kuti, chokoro chikavu ichi chaŵikamo ndarama kuruska wose,

⁴Chifukwa wose ŵapereka kufuma mu vyakuzara vyawo, kweni chokoro ichi, mu ukavu wakhe chaŵikamo vyose ivyo chikaŵa navyo ivyo vikenera kuchilera.”

⁵Apo ŵanthu ŵakayowoyanga na umo Nyumba ya Chiuta yikatozgekera na mawe ghaweme na vyawanangwa ivyo vikapatulikira kwa Chiuta, Yesu wakati kwa iwo,

⁶“Vyose ivyo mukuviwona, mazuŵa ghati ghizenge apo kwamkuŵavye pano nanga ndi libwe limoza ilo lamkukhalirira pachanya pa linyakhe ilo lamkureka kuwiskikira pasi.”

⁷Ŵanthu ŵakamufumba Yesu ŵakati, “Musambizgi, kasi vyeneivi vizamkuŵako pauli? Ndipo chimanyikwiro icho chamkurongora kuti vyaneng'enera kuchitika nchivichi?”

⁸Yesu wakati, “Chenjerani, paŵavye munthu wamupuruskani. Chifukwa ŵanandi ŵamkwiza mu zina lane na kuyowoya kuti, ‘Ndine iyo,’ ndipo ‘Nyengo yaneng'enera.’ Mungaŵarondezganga chara.

⁹Para mwamkupulika zinkhondo na vitimbaheti mungakatenthemanga chara. Vya ntheura vikwenera kuchitika danga, kweni mbumaliro chara.”

¹⁰Ntheura Yesu wakati kwa iwo, Mtundu wamkuwukira mtundu unyakhe, ndipo ufumu wamkuwukira ufumu unyakhe.

¹¹Kwamkuŵako vindindindi vyakofya, ndiposo njara na nthenda mu malo ghakupambanapambana. Kwamkuŵako vinthu vyakofya na vimanyikwiro vikuru kufumira ku mlengalenga.

¹²“Kweni pambere vindaŵeko vyose ivi, ŵanthu ŵamkumukorani na kumuzikizgani. Ndipo ŵamkumutorerani ku weruzgi, mu nyumba zakusoperamo, na kumunjizgani mu gadi. Ŵamkumuperekani panthazi pa ŵakaronga na ŵakuwusa chifukwa cha zina lane.

¹³Uwu wamkuŵa mwaŵi winu wakuŵapanikizgira iwo na vya ine.

¹⁴Kweni mureke kughanaghana mu mitima yinu na umo mwamkujithaskira pakuzgora.

¹⁵Chifukwa ine ndamkumupani mazgu na mahara vyeneivyo yose uyo wakupindikana namwe wamkumanya kulimbana navyo chara nesi kuvisuska.

¹⁶Nanga mbapapi ŵinu, ŵana ŵanyinu, ŵabali ŵinu, ŵabwezi ŵinu ŵamkumuperekani ku ŵarwani ŵinu, ndipo ŵanji ŵa imwe ŵamkukomeka.

¹⁷Ŵanthu wose ŵamkumutinkhani chifukwa cha zina lane.

¹⁸Kweni nanga nkhasisi kamoza ka mutu winu kuti kamkutayika chara.

¹⁹Mu kuzizipizga kwinu mwamkuthaska maumoyo ghinu.”

²⁰“Kweni para mukuwona Yerusalemu wazingirizgika na ŵankhondo, manyani kuti kupankhuka kwakhe kwaneng'enera.

²¹Ntheura rekani awo ŵali mu Yudeya ŵachimbilire ku mapiri. Ndipo awo ŵali mu msumba ŵafumemo. Awo ŵali mu minda muwaro ŵareke kunjira mu msumba.

²²Chifukwa nyengo iyo yamkuŵa yakuwezgera nduzga, kuti vyose ivyo vikalembeka vifiskike.

²³Soka ku ŵanakazi awo ŵali na nthumbo na awo ŵakonkheska twana mu mazuŵa agho. Kwamkuŵa suzgo yikuru pa charu, ndiposo ukari wa Chiuta wamkuŵa pa ŵanthu aŵa.

²⁴Ŵanji ŵamkukomeka na lupanga, ndipo ŵanji ŵamkutorekera mu uzga ku mafuko ghose. Ndipo ŵamitundu ŵamkuwuponderezga msumba wa Yerusalemu, yisuke nyengo ya ŵamitundu yifiskike.”

²⁵“Kwamkuŵa vimanyikwiro pa dazi, mwezi na nyenyezi. Mafuko ghose pa charu, yamkuthika lusoko ndipo yamkuzizikika na mphomo ya nyanja na maŵiruŵiru ghakhe.

²⁶Ŵanthu ŵamkufwa chipoyo chifukwa cha wofi, pakughanaghana na ivyo viti vizenge pa charu. Pakuti nkhongono za mlengalenga zamkusunkhunyika.

²⁷Penepapo ŵanthu ŵamkuwona Mwana wa Munthu wakwiza mu maŵingu wali na nkhongono na uchindami ukuru.

²⁸Para vinthu ivi vyamkwamba kuchitika, kalaŵiskeni na kwinuska mitu yinu kuchanya, chifukwa chiponosko chinu chaneng'enera.”

²⁹Yesu wakaŵayowoyera ntharika iyi wakati, “Laŵiskani khuni la chikuyu na makuni ghose.

³⁰Para mukuwona mahamba ghakusunda, mukumanya kuti chifuku chili pafupi.

³¹Ntheura namweso, para mwamkuwona vyose vyeneivi vikuchitika, manyani kuti Ufumu wa Chiuta uli pafupi.

³²“Nadi nkhumuphalirani kuti, vyose ivi vyamkuchitika pambere ŵanthu ŵa muwiro uwu ŵandafwe wose.

³³Mtambo na pasi vimarenge, kweni mazgu ghane kuti ghamkumara chara.

³⁴“Chenjerani, mitima yinu yireke kujitangwaniska na vyakusekereska nga ndi viphikiro, uloŵevu na vyakwenjezga vya umoyo uno, mzire zuŵa lira limubuchizgani waka na kumukorani nga ndi chipingo.

³⁵Pakuti zuŵa lira lamkwizira wose awo ŵakukhara pa charu.

³⁶Kweni muŵe maso nyengo zose, murombenge kuti mukhwimiskike pakuporota mu visuzgo vyose ivyo vyaneng'enera kuchitika na kuya kimilira panthazi pa Mwana wa Munthu.”

³⁷Mazuŵa ghose Yesu wakasambizganga mu Nyumba ya Chiuta. Ndipo na usiku wakafumangamo na kuya kagona ku Phiri la maOlive.

³⁸Ndipo na macherochero ŵanthu wose ŵakachereranga ku Nyumba ya Chiuta kuya kamupulika.