Read new_tumbuka_bible Luka 22 Bible Online

Luka 22 - new_tumbuka_bible bible

Luka 22

¹Sono chiphikiro cha Chingwa chambula chirungo icho chikachemekanga kuti Paska chikaneng'enera.

²Ŵasofi ŵarara na ŵamanyi-marango ŵakapenjanga nthowa umo ŵangakomera Yesu, chifukwa ŵakopanga ŵanthu.

³Ntheura Satana wakanjira mwa Yudasi uyo wakachemeka Isikariyoti yumoza wa ŵasambiri 12.

⁴Ndipo wakawukapo na kuya kadumbirana na ŵasofi ŵarara na ŵarongozgi ŵa Nyumba ya Chiuta, ndipo wakapangana nawo umo wangamuperekera Yesu kwa iwo.

⁵Iwo ŵakasekerera, ndipo ŵakapangana kumupa ndarama.

⁶Yudasi wakazomera ndipo wakamba kupenja nyengo yiweme kuti wamupereke Yesu kwa iwo kwambula kuti ŵanthu ŵamanye.

⁷Zuŵa la chiphikiro cha Chingwa chambula chirungo likiza, leneilo mwana-mberere wakuchitira Paska wakakomekanga kuŵa sembe.

⁸Ntheura Yesu wakatuma Petrosi na Yohane wakati, “Rutani mukatinozgere chakurya cha Paska mwakuti tizakarye.”

⁹Kweni iwo ŵakamufumba ŵakati, “Kasi mukukhumba kuti tikanozgere nkhu, Paska?”

¹⁰Yesu wakazgora wakati, “Para mwaya kanjira waka mu msumba, mwamkukumana na munthu uyo wayegha chiŵiya cha maji. Mukamurondezge kuya kafika mu nyumba iyo wamkunjiramo.

¹¹Mukamuphalire mwene-nyumba mukati, ‘Musambizgi wakuti, kasi chipinda cha ŵalendo chili nkhu, mwenemumo ndingaryera Paska na ŵasambiri ŵane?’

¹²Iyo wamkumurongorani chipinda chikuru cha pachanya chakunozgeka makora. Mwenemura ndimo mukatinozgere chakurya cha Paska.”

¹³Ŵasambiri ŵara ŵakaruta, ŵakaya kavisanga vyose nga ndi umo wakaŵaphalirira, ndipo ŵakanozga chakurya cha Paska.

¹⁴Para ora likati liza, Yesu wakakhara pa kurya pamoza na ŵakutumika.

¹⁵Wakati kwa iwo, “Ndakhumbisiska chomene kuti ndirye chakurya ichi cha Paska pamoza na imwe pambere ndindasuzgike.

¹⁶Pakuti nkhumuphalirani kuti, ndamkuryaso Paska chara, mpaka pa nyengo iyo chamkufiskira mu Ufumu wa Chiuta.”

¹⁷Ndipo Yesu wakatora nkhombo, wakati wawonga, wakati, “Torani, ndipo mugaŵane.

¹⁸Chifukwa nkhumuphalirani kuti, kufuma sono na kunthazi kuti ndimwengeso vinyo lakufuma mu mpheska chara, kufikira pa nyengo iyo Ufumu wa Chiuta wamkwizira.”

¹⁹Ndipo Yesu wakatora chingwa, wakawonga Chiuta, wakamenya ndipo wakaŵapa wakati, “Ili ndi thupi lane, ilo likuperekekera imwe. Chitani ichi kuti mundikumbuke.”

²⁰Ntheura pera ŵakati ŵarya chakurya cha mise, Yesu wakatora nkhombo wakati, “Nkhombo iyi ndi phangano liphya mu ndopa zane izo zikuthikira imwe.

²¹“Kweni uyo wakundendera mphiska wakurya nane pamoza.

²²Pakuti nadi Mwana wa Munthu wakuruta nga ndi umo kuli kunozgekera, kweni soka kwa munthu uyo wakumwendera mphiska.”

²³Ndipo ŵakamba kufumbana kuti, “Kasi ndi nju wa iwo uyo wangachita chinthu cha ntheura.”

²⁴Mphindano yikawukaso mukati mu ŵasambiri ŵakhe yakuti ndi nju wa iwo uyo wakupimika kuŵa mukuru.

²⁵Yesu wakati kwa iwo, Ŵakaronga ŵa ŵamitundu ŵakurongora mazaza gha ufumu pa ŵanthu ŵawo, ndipo awo ŵakuwusa ŵakuchemeka wovwiri ŵawo.

²⁶Kweni imwe mukwenera kuŵa ntheura chara. Mu malo mwakhe uyo ndi mukuru kwakuruska mukati mwinu, ndiyo waŵenge nga ndi muchoko wa wose, ndipo uyo ndi murongozgi waŵenge nga ndi uyo wakuteŵeta.

²⁷Kasi mukuru ndi nju, uyo wakurya panji uyo wakuteŵeta? Asi ndi uyo wakurya? Kweni ine ndili mukati mwinu nga ndi uyo wakuteŵetera.

²⁸“Imwe ndimwe mwaŵa na ine mu viyezgo vyane vyose.

²⁹Ntheura nkhumupani Ufumu nga ndi umo Ŵadada ŵakandipira ine.

³⁰Mwakuti murye na kumwa pamoza nane mu Ufumu wane, na kukhara pa vizumbe vyakweruzga mafuko gha Israele 12.”

³¹Ndipo Fumu yikati, “Simoni, Simoni, tegherezga! Satana wali kupoka chizomerezgo kuti wamusefani mose nga ndi tirigu.

³²Kweni ndakurombera iwe Simoni kuti chipulikano chako chireke kutondeka. Ndipo para wang'anamukaso, wiza kaŵachinthiskanga ŵanyako.”

³³Kweni wakazgora wakati, “Fumu, ndili muchanya kale kuruta namwe nanga nkhu gadi, na ku nyifwa wuwo.”

³⁴Yesu wakati, “Nkhukuphalira Petrosi kuti pambere tambala wandalire usiku uno uti undikane katatu kuti ukundimanya chara.”

³⁵Ntheura Yesu wakafumba wakati, “Para nkhamutumani kwambula chibeta, thumba la pa ulendo, panji skapato, kasi mukasoŵerwa kanthu?” Ŵakazgora ŵakati, “Chara.”

³⁶Wakati kwa iwo, “Kweni sono uyo wali na chibeta cha ndarama wayeghe, nanga ndi thumba la pa ulendo. Ndipo uyo walije lupanga waguliske chakuvwara chakhe, na kugula lupanga.

³⁷Chifukwa nkhumuphalirani kuti malembo agha ghakwenera kufiskikira mwa ine, ghakuti, ‘Wakapendekera pamoza na ŵakwananga.’ Pakuti icho chili kulembeka na za ine, chikwenera kufiskika.”

³⁸Ŵasambiri ŵakazgora ŵakati, “Wonani Fumu, tili nagho malupanga ghaŵiri pano.” Yesu wakati, “Mbwenu.”

³⁹Yesu wakafuma mu msumba na kuruta ku Phiri la maOlive nga ndi umo kakaŵira kaluso kakhe. Ndipo ŵasambiri ŵakamurondezga.

⁴⁰Wakati wafika pa malo ghara, wakaŵaphalira ŵasambiri wakati, “Rombaninge kuti mureke kunjira mu kuyezgeka.”

⁴¹Ndipo iyomwene wakapatukako kwa ŵasambiri ŵakhe kwakuyana na kamtunda ako libwe lingenda para waponya. Ntheura wakajikama pasi na kuromba.

⁴²Wakati, “Ŵadada, usange mukukhumba, muwuskeko nkhombo iyi ya visuzgo kwa ine. Ndipouli, kuti muchite nga ndi umo ine nkhukhumbira chara, kweni khumbo linu ndilo lifiskike.” [

⁴³Penepapo mungelo wakufuma kuchanya wakamuwonekera, na kumukhwimiska.

⁴⁴Yesu pakuŵa mu urwirwi ukuru, wakafwirirapo mu kuromba ndipo mavuchi ghakhe ghakaŵa nga manthonyezi gha ndopa agho ghakanthonyanga pasi.]

⁴⁵Para wakati wawuka apo wakarombanga, wakiza ku ŵasambiri ŵakhe, wakasanga ŵagona chifukwa cha chitima.

⁴⁶Wakaŵafumba wakati, “Chifukwa uli mukugona? Wukani murombenge, mwakuti mureke kunjira mu kuyezgeka.”

⁴⁷Apo wakaŵa wachali kuyowoya, mzinda wa ŵanthu ukiza uwo ukarongozgeka na yumoza wa ŵa 12, zina lakhe Yudasi. Iyo wakasenderera kufupi na Yesu kuti wamufyofyonthe.

⁴⁸Kweni Yesu wakamufumba wakati, “Yudasi, kasi ukumupereka Mwana wa Munthu na mufyofyontho?”

⁴⁹Para ŵasambiri awo ŵakaŵa nayo pafupi ŵakawona icho chiŵengeko ŵakati, “Fumu, kasi tiŵahete na lupanga?”

⁵⁰Ndipo yumoza wa iwo wakaheta muteŵeti wa Musofi Mukuru mpaka wakawunguzura khutu la maryero.

⁵¹Kweni Yesu wakazgora wakati, “Ichi chingachitikangaso chara!” Ndipo wakakhwaska khutu la muteŵeti na kumuchizga.

⁵²Penepapo Yesu wakaŵaphalira ŵasofi ŵarara, ŵarongozgi ŵa Nyumba ya Chiuta, ndiposo na ŵarara awo ŵakiza kwiza kamukora wakati, “Kasi mwiza na malupanga na zinthonga nga nkhwa munkhungu?

⁵³Zuŵa na zuŵa nkhaŵa namwe mu Nyumba ya Chiuta kuti mukiza na kundikora chara. Kweni iyi ndi nyengo yinu, ndipo na kuwusa kwa nkhongono za mu mdima.”

⁵⁴Ŵanthu ŵara ŵakati ŵamukora Yesu, ŵakaruta nayo ku nyumba ya Musofi Mukuru. Ndipo Petrosi wakaŵarondezganga pataliko.

⁵⁵Iwo ŵakapemba moto mukati mu chipanga ndipo Petrosi nayo wakiza kakhara pasi pamoza na ŵanthu awo ŵakawothanga moto.

⁵⁶Msungwana yunji wa nchito, wakati wakamuwona Petrosi apo wakakhara mu ungweru wa moto, wamudodoliska ndipo wakati, “Munthu uyu nayo wanguŵa pamoza na Yesu.”

⁵⁷Petrosi wakakana wakati, “Iwe wa mwanakazi ine kuti nkhumumanya chara.”

⁵⁸Pakati pajumphapo kanyengo kachoko waka, munthu munyakhe wakamuwona ndipo wakati, “Iwe nawe uli yumoza wa iwo.” Kweni Petrosi wakakana wakati, “Iwe dada, ine kuti ndine chara.”

⁵⁹Pakati pajumphapo panji ora limoza, munthu munyakhe wakakoserezga chomene wakayowoya wakati, “Nadi uyu nayoso wakaŵa pamoza na Yesu, chifukwa ndi mu Galileya.”

⁶⁰Kweni Petrosi wakakana wakati, “Iwe dada, ine kuti nkhuchimanya chara icho ukuyowoya.” Apo iyo wakaŵa wachali kuyowoya, tambala wakalira.

⁶¹Fumu yikang'anamuka na kulaŵiska Petrosi. Ndipo Petrosi wakakumbuka mazgu agho Fumu yikayowoya kwa iyo kuti, “Pambere tambala wandalire, muhanya uno wamkundikana katatu.”

⁶²Petrosi wakafumira kuwaro ndipo wakalira chomene.

⁶³Ŵanthu awo ŵakasungiliranga Yesu ŵakamugoska na kumutimba.

⁶⁴Ŵakamukaka ku maso kuti wareke kuwona na kumufumba kuti, “Loska! Ndi njani uyo wakutimba?”

⁶⁵Ndipo ŵakamuyowoyera vinandi vyakumulengeska.

⁶⁶Kukati kwacha, mphara ya ŵarara ŵa ŵaYuda yikawungana pamoza na ŵasofi ŵarara na ŵamanyi-marango. Ndipo ŵakamutorera Yesu ku mphara yawo.

⁶⁷Ŵakamufumba ŵakati, “Utiphalire, kasi ndiwe Mesiya?” Yesu wakaŵazgora wakati, “Nanga ndingamuphalirani, imwe kuti mungapulikana chara,

⁶⁸ndiposo usange ndingamufumbani fumbo, napo muti mundizgorenge chara.

⁶⁹Kweni kufuma sono na kunthazi, Mwana wa Munthu wamkukhara ku woko la maryero la Chiuta, Mwenenkhongono zose.”

⁷⁰Ndipo wose ŵakati, “Kasi ndiko kuti ndiwe Mwana wa Chiuta?” Yesu wakaŵazgora wakati, “Ndimwe mwayowoya kuti ndine ine.”

⁷¹Ntheura ŵakati, “Chifukwa uli tikupenja ukaboni unyakhe? Tajipulikira tekha ivyo wayowoya kufuma mu mlomo wakhe.”