Read new_tumbuka_bible Luka 23 Bible Online

Luka 23 - new_tumbuka_bible bible

Luka 23

¹Ntheura wumba wose wa ŵanthu ukawuka na kuruta nayo Yesu kwa Pilato.

²Iwo ŵakamba kutundura Yesu kuti, “Munthu uyu tikamusanga wakupuruska fuko lithu. Wakukanizga ŵanthu kusonkha msonkho kwa karonga wa ku Romu, ndipo wakuti ndiyo Mesiya, na kuti ndi karonga.”

³Pilato wakamufumba Yesu wakati, “Kasi ndiwe karonga wa ŵaYuda?” Yesu wakazgora wakati, “Ndimwe mwayowoya.”

⁴Ntheura Pilato wakati ku ŵasofi ŵarara na mizinda ya ŵanthu, “Ine kuti nkhusangamo kafukwa kalikose mu munthu uyu chara.”

⁵Kweni iwo mwa befu ŵakakoserezga chomene ŵakati, “Wakuwuska chivulupi mu ŵanthu wose ŵa mu Yudeya na kusambizga kwakhe. Wakamba mu chigaŵa cha Galileya sono wiza kafika na kuno wuwo.”

⁶Para Pilato wakapulika makani agha, wakafumba usange munthu uyu wakaŵa muGalileya?

⁷Para wakamanya kuti wakaŵa wa mu chigaŵa icho Herode wakawusanga, wakamutuma kwa Herode uyo wakaŵa mu Yerusalemu pa nyengo yira.

⁸Para Herode wakawona Yesu, wakakondwa chomene chifukwa wakapulikanga na vya iyo, ndipo pa nyengo yitali wakakhumbanga kumuwona. Wakagomezganga kuti wati wawonenge Yesu wakuchita minthondwe.

⁹Ntheura wakamufumba mafumbo ghanandi, kweni Yesu wakamuzgora chara.

¹⁰Ŵasofi ŵarara na ŵamanyi-marango ŵakimilira penepara ŵakamufyekezganga pakumutundura na vinandi.

¹¹Ntheura Herode na ŵasilikari ŵakhe, ŵakati ŵamuyuyura na kumugoska, ŵakamuvwarika munjilira wa nchindi na kumuwezgera kwa Pilato.

¹²Zuŵa lenelira Herode na Pilato ŵakaphemana, chifukwa kale pakaŵa vimphindikwa pakati pawo.

¹³Sono Pilato wakaŵachema pamoza ŵasofi ŵarara, na ŵarara ŵa ŵaYuda, ndiposo na ŵanthu wose.

¹⁴Wakaŵaphalira wakati, “Munthu uyu mwangwiza nayo kwa ine, na kuyowoya kuti wakupuruska ŵanthu, sono pakumufumbisiska pa maso pinu, kuti ndangusangamo kafukwa chara mu munthu uyu pa vyeneivi mukumutundura navyo.

¹⁵Nanga ndi Herode nayo watondeka, pa chifukwa ichi wamuwezgera kwa ise. Munthu uyu walije kuchita kanthu ako kangamunjizga mu nyifwa.

¹⁶Ntheura nditi ndimuthyapule na kumusutula.” [

¹⁷Pilato wakazgoŵera kuŵasutulira mukayidi yumoza pa nyengo ya chiphikiro cha Paska.]

¹⁸Kweni ŵanthu wose ŵakachemerezga pamoza ŵakati, “Muwuskaniko munthu uyu ndipo utisutulire Baraba.”

¹⁹Baraba wakaŵikika mu gadi chifukwa cha chigaruka icho chikambika mu msumba, ndiposo na chifukwa cha uchigeŵenga.

²⁰Pilato wakayowoyaso na ŵanthu pakukhumba kumusutula Yesu,

²¹kweni ŵanthu ŵakachemerezga ŵakati, “Mupayika, Mupayika!”

²²Pilato wakayowoya kachitatu wakati, “Chifukwa? Kasi wanangachi? Ndilije kusangamo kafukwa mwa iyo ako kangamunjizga mu nyifwa. Ntheura nditi ndimuthyapule waka na kumusutula.”

²³Kweni pakuti ŵakakorekanga chara na kuchemerezga chomene kuti Yesu wapayikike, mazgu ghawo ghakaruska.

²⁴Ntheura Pilato wakadumula kuti icho ŵakaromba chichitike.

²⁵Ndipo wakamusutula munthu uyo ŵakakhumbanga mweneuyo wakanjira mu gadi chifukwa cha chigaruka na uchigeŵenga wakhe. Kweni wakamupereka Yesu kuti ŵachite nayo icho ŵakakhumbanga.

²⁶Apo ŵasilikari ŵakarutanga nayo Yesu, ŵakamukora Simoni wa ku Kurene, uyo wakanjiranga mu msumba kufuma ku mizi, ndipo ŵakamuyegheska mphinjika ya Yesu kuti warondezgenge nayo pamanyuma pakhe.

²⁷Mzinda ukuru wa ŵanthu ukamurondezganga ndipo pakati pawo pakaŵa ŵanakazi awo ŵakajitimbanga pa vifuŵa vyawo uku ŵakulira na kutengera.

²⁸Yesu wakang'anamukira ku ŵanakazi ŵara ndipo wakati, “Imwe mwa ŵanakazi ŵa mu Yerusalemu, mureke kundilirira ine, kweni jilirirani mwaŵene na ŵana ŵinu.

²⁹Pakuti mazuŵa ghakwiza para ŵanthu ŵamkuti, ‘Mbakutumbikika awo ndi vyumba, awo ŵandababepo, ndiposo na maŵere agho ghalije konkheskapo!’

³⁰Ntheura ŵanthu ŵamkuti ku mapiri, ‘Wirani pa ise,’ ndipo ku tumapiri, ‘Tibenekererani.’

³¹Usange ŵanthu ŵakuchita vinthu ivi ku khuni liŵisi, kasi kwamkuŵa uli ku khuni lakomira?”

³²Ŵakaŵaposo ŵanthu ŵaŵiri awo ŵakaŵa vigeŵenga vyeneivyo vikarongozgekera pamoza na Yesu kuya kakomeka.

³³Ŵakati ŵafika pa malo agho ghakuchemeka “Bwaza”, penepapo ndipo ŵakamupayika Yesu, pamoza na vigeŵenga vira chimoza ku maryero, chinyakhe ku mazere.

³⁴Yesu wakati, “Ŵadada, muŵagowokere ŵanthu aŵa chifukwa ŵakuchimanya chara icho ŵakuchita.” Ndipo ŵakagaŵana malaya ghakhe pakuchita mphenduzgo.

³⁵Ŵanthu ŵakimilira penepara, ŵakalaŵiriranga, kweni ŵarara ŵa ŵaYuda ŵakamugoska ŵakati, “Wakaponoskanga ŵanyakhe, rekani wajiponoske yekha, usange nadi ndiyo Mesiya, wakusoreka wa Chiuta.”

³⁶Ŵasilikari nawo ŵakiza na kumugoska, ndipo ŵakasenderera kwa Yesu na kumupa vinyo lakusasa.

³⁷Ndipo ŵakati, “Usange ndiwe Karonga wa ŵaYuda, ujiponoske wamwene.”

³⁸Pachanya pa mphinjika yakhe pakalembeka mazgu mu chiGriki, mu chiLatini na mu chiHebere, agho ghakuti, “Uyu Ndiyo Karonga wa ŵaYuda.”

³⁹Chimoza cha vigeŵenga ivyo vikapayikika nayo, chikayowoya matusi kwa Yesu chikati, “Asi iwe ndiwe Mesiya? Ujiponoske wamwene na ise wuwo!”

⁴⁰Kweni chinyakhe chikamuzgora na kumuchenya chikati, “Kasi iwe kuti ukopa Chiuta chara? Chifukwa chakuti ise na iyo tapokera chilango chimoza?

⁴¹Ndipouli ise chatiyana nadi, chifukwa tikupokera kwakuyana na ivyo tikachitanga. Kweni munthu uyu walije kuchitapo kanthu kaheni.”

⁴²Ndipo chikati kwa Yesu, “Mundikumbuke para mukwiza mu Ufumu winu.”

⁴³Yesu wakazgora wakati, “Nadi nkhukuphalira unenesko kuti, muhanya uno wamkuŵa na ine mu Paradiso.”

⁴⁴Pakaŵa pafupi pa 12 koloko, apo dazi likareka kuŵala, ndipo pakaŵa chisi pa charu chose cha pasi, kufikira 3 koloko ku mise,

⁴⁵pakuti dazi likareka kuŵala. Ndipo chisalu chakuchinga cha mu Nyumba ya Chiuta, chikaparuka pakati.

⁴⁶Yesu wakachemerezga na mazgu ghakuru wakati, “Ŵadada, nkhupereka mzimu wane mu mawoko ghinu.” Para wakati wayowoya ntheura wakafwa.

⁴⁷Murara wa ŵankhondo wakati wawona icho chikachitika wakamuchindika Chiuta, wakati, “Nadidi, munthu uyu wakaŵa murunji!”

⁴⁸Ndipo mawumba gha ŵanthu awo ŵakawungana kukawonerera cheneichi, ŵakati ŵawona ivyo vikachitika ŵakawerera ku mizi yawo ŵakutimba pa vifuŵa vyawo kurongora chitima.

⁴⁹Kweni wose awo ŵakamumanya Yesu, ndiposo na ŵanakazi awo ŵakamurondezga kufuma ku Galileya, ŵakimilira patali ŵakalaŵiriranga vyeneivi.

⁵⁰Pakaŵa munthu zina lakhe Yosefe, uyo wakafuma ku muzi wa ŵaYuda wakuchemeka Arimatiya. Munthu uyu wakaŵa yumoza wa mphara yikuru ya ŵaYuda ndipo wakaŵa munthu muweme na murunji.

⁵¹Iyo kuti wakazomerezgana na udumuliro wawo chara, ndiposo na ivyo ŵakachitanga. Iyo wakalindizganga kwiza kwa Ufumu wa Chiuta

⁵²Munthu uyu wakaruta kwa Pilato, ndipo wakaromba thupi la Yesu.

⁵³Ntheura wakalikhizgira pasi na kulivungirizga mu salu ya bafuta, ndipo wakaya kaliŵika mu dindi ilo likazongeka mu jarawe, mwenemumo kuti ŵakasungamo munthu na kale chara.

⁵⁴Likaŵa zuŵa la kunozgekera, ndipo zuŵa la Sabata likaŵa pafupi kwamba.

⁵⁵Ŵanakazi awo ŵakiza na Yesu kufuma ku Galileya, ŵakarondezganga mumanyuma ndipo ŵakaya kawona dindi na umo thupi la Yesu likaŵikikira.

⁵⁶Ŵanakazi ŵara ŵakati ŵawera ŵakaya kanozga vyakununkhiskira ndiposo na mafuta gha sungu liweme ghakuphakazga Yesu. Ndipo ŵakapumula pa zuŵa la Sabata kwakuyana na dango.