Read new_tumbuka_bible Luka 24 Bible Online

Luka 24 - new_tumbuka_bible bible

Luka 24

¹Pa zuŵa lakudanga la sabata na mulenje chomene, ŵanakazi ŵara ŵakaruta ku dindi na vyakununkhiskira ivyo ŵakanozga.

²Ŵakasanga kuti libwe lagadabulikapo pa dindi.

³Ntheura ŵakanjira kweni kuti ŵakasangamo thupi la Fumu Yesu chara.

⁴Ndipo ŵachali kuzukuma na ichi, ŵanarume ŵaŵiri ŵakimilira pafupi na iwo, ŵavwara malaya ghakugabuka.

⁵Pakuti wakachiruskika, ŵanakazi ŵara ŵakasindama. Kweni ŵanthu ŵara ŵakati kwa iwo, “Chifukwa uli mukupenja uyo ngwamoyo mukati mu ŵakufwa?

⁶Kuti wali pano chara kweni wawuka! Kumbukani ivyo wakamuphalirani apo wakaŵa wachali namwe mu Galileya kuti,

⁷‘Mwana wa Munthu wakwenera kuperekeka mu mawoko gha ŵanthu ŵakwananga, kupayikika pa mphinjika, na kuwuka ku ŵakufwa pa zuŵa la chitatu.’ ”

⁸Ŵanakazi ŵakakumbuka mazgu gha Yesu.

⁹Ndipo ŵakati ŵawerako ku dindi, ŵakaya kaŵaphalira vyose ivi ŵasambiri 11 na ŵanyakhe wose.

¹⁰Sono iwo ŵakaŵa Mariya wa ku Magadala, Yohana, Mariya ŵanyina wa Yakhobe. Aŵa pamoza na ŵanakazi ŵanyakhe ŵakaya kaŵaphalira ŵakutumika ŵara makani agha.

¹¹Kweni kwa iwo, mazgu agha ghakaŵa nga nga uchindere. Ndipo ŵakaŵagomezga ŵanakazi ŵara chara.

¹²Kweni Petrosi wakawuka na kuchimbilira ku dindi. Wakati wakotama na kulingizgamo, wakawona sanda pera, ndipo wakawerera ku nyumba uku wakuzukuma na icho chikachitika.

¹³Zuŵa lenelira ŵasambiri ŵanyawo ŵaŵiri ŵakayanga ku chikaya zina lakhe Emawusi, icho pakunji chikaŵa pa mtunda wa makilomita ghankhonde na ghaŵiri kufuma ku Yerusalemu.

¹⁴Iwo ŵakadumbiskananga pa vyose ivyo vikachitika.

¹⁵Ŵachali kudumbiskana na kufumbana, Yesu mwenecho wakasenderera kufupi ndipo wakarongozgana nawo.

¹⁶Ŵakamuwona, kweni kuti ŵakamumanya chara.

¹⁷Yesu wakaŵafumba wakati, “Ndi makani uli agho mukudumbiskana uku mukwenda?” Iwo ŵakimilira na kurongora visko vya chitima.

¹⁸Penepapo yumoza zina lakhe Kleopa, wakamuzgora wakati, “Kasi iwe ndiwe wekha mulendo mu Yerusalemu uyo wakureka kumanya ivyo vyachitika mwenemura mu mazuŵa agha?”

¹⁹Yesu wakafumba wakati, “Vinthu uli?” Ŵakati kwa iyo, “Vya Yesu wa ku Nazarete, mweneuyo wakaŵa nchimi ya nkhongono mu milimo na mu mazgu panthazi pa Chiuta na pa ŵanthu wose, ndipo

²⁰na umo ŵasofi ŵithu ŵarara pamoza na awo ŵakutiwusa ŵakamupereka ku weruzgi kuti wakomeke, ndipo ŵakamupayika pa mphinjika.

²¹Kweni ise tikagomezganga kuti ndiyo waŵawombolenge ŵaIsraele. Pa dera pa vyose ivi, muhanya uno ndi zuŵa la chitatu kufuma apo ichi chikachitikira.

²²Kweniso ŵanakazi ŵanji ŵa mu mpingo withu ŵangutizukumiska. Ŵangucherera ku dindi mulenje uno,

²³kweni kuti ŵangulisanga thupi lakhe chara. Ŵangwiza katiphalira kuti ŵawona mboniwoni ya ŵangelo, awo ŵanguti ngwamoyo.

²⁴Ntheura ŵanyithu ŵanji ŵanguruta ku dindi, ndipo ŵanguya kasanga nga ndi umo ŵanakazi ŵara ŵanguyowoyera, kweni iyo Yesu kuti ŵangumuwona chara.”

²⁵Yesu wakati kwa iwo, “Okwe! Mwa ŵakupusa imwe, na ŵachizita mu mtima pakupulikana na vyose ivyo nchimi zikayowoya.

²⁶Asi kukenera kuti Mesiya wakomwe mu vyose vyeneivi, ndipo wanjirenge mu uchindami wakhe?”

²⁷Ntheura Yesu wakamba kuŵarongosorera vyose ivyo malembo ghakuyowoya kuphara na vya iyo, kwamba dango la Mozesi ndiposo na malembo gha nchimi.

²⁸Apo ŵakaneng'enera ku chikaya uko ŵakarutanga, Yesu wakachita nga ndi para wakukhumba kurutilira.

²⁹Kweni ŵakamukoserezga ŵakati, “Mupanjwe nase, pakuti ndi mise sono, zuŵa nalo laruta.” Ntheura wakanjira kuti wapanjwe nawo.

³⁰Para Yesu wakakhara nawo pa chakurya, wakatora chingwa, wakawonga Chiuta na kuchimenya ndipo wakaŵapa.

³¹Penepapo maso ghawo ghakajurika ndipo ŵakamumanya, kweni iyo wakazgeŵerekera waka mu maso ghawo.

³²Ŵakafumbana ŵakati, “Asi mitima yithu yaphyanga chara apo iyo wayowoyanga nase mu nthowa na apo warongosoranga vya malembo?”

³³Ŵakawuka pa ora leneilo ŵakawerera ku Yerusalemu, ŵakaya kasanga 11 ŵawungana pamoza na awo ŵakaŵa nawo,

³⁴ndipo ŵakati kwa iwo, “Fumu yawuka nadi! Ndipo yamuwonekera Simoni.”

³⁵Ndipo ŵaŵiri ŵara ŵakakonkhoska ivyo vikaŵawira mu nthowa, na umo wakamanyikwira pakumenya kwa chingwa.

³⁶Apo ŵakaŵa ŵachali kuyowoya vyeneivi, Yesu mwenecho wakimilira mukati mwawo wakati, “Mutende uŵe namwe.”

³⁷Ŵakopa na kuchiruka, ŵakaghanaghananga kuti ŵawona muzguka.

³⁸Yesu wakaŵafumba wakati, “Chifukwa nchichi mukukweŵeka na kukayika mu mitima yinu?

³⁹Laŵiskani mu mawoko ghane na malundi ghane. Ndine nadi! Ndipapaskani na kuwona, pakuti muzguka ulije munofu na viwangwa nga ndi umo mukundiwonera ine.”

⁴⁰Wakati wayowoya mazgu gheneagha, wakaŵarongora mawoko ghakhe na malundi ghakhe.

⁴¹Ŵasambiri ŵakaŵa ŵachali ŵandagomezge, pakuti ŵakazura na chimwemwe na kuzizwa, wakati kwa iwo, “Kasi chakurya muli nacho pano?”

⁴²Ŵakamupa chipitika cha somba yakuphika,

⁴³yeneiyo wakapoka na kurya uku wose ŵakuwona.

⁴⁴Yesu wakati kwa iwo, “Agha ndiwo mazgu agho nkhamuyowoyerani apo nkhaŵa ndichali namwe, kuti vyose ivyo vili kulembekera ine mu Dango la Mozesi na mu malembo gha nchimi na MaSalimo vikwenera kufiskika.”

⁴⁵Penepapo wakajula maghanoghano ghawo kuti ŵaghapulikiske malembo.

⁴⁶Wakaŵaphalira wakati, “Ivi ndivyo vili kulembeka kuti, Mesiya wakwenera kukomwa na kuwuka ku ŵakufwa pa zuŵa la chitatu,

⁴⁷mwakuti mu zina lakhe, kung'anamuka kwa mtima na kugowokereka kwa zakwananga kupharazgike ku mafuko ghose kwamba mu Yerusalemu.

⁴⁸Imwe muli ŵakaboni ŵa vyeneivi.

⁴⁹Ine ndaya kumutumirani icho Ŵadada ŵakapangana kutuma. Ntheura mukwenera kukhara mu msumba, musuke mupokere nkhongono kufumira kuchanya.”

⁵⁰Penepapo Yesu wakaŵarongozgera kuwaro kwa msumba, pafupi na muzi wa Betaniya. Wakawuska mawoko ghakhe na kuŵatumbika.

⁵¹Apo wakaŵatumbikanga, wakapatukana nawo, ndipo wakayeghekera kuchanya.

⁵²Ntheura ŵakamulambira na kuwerera ku Yerusalemu na chimwemwe chikuru.

⁵³Nyengo yose ŵakakharanga mu Nyumba ya Chiuta, kuchindika Chiuta.