Read new_tumbuka_bible Luka 3 Bible Online

Luka 3 - new_tumbuka_bible bible

Luka 3

¹Mu chirimika cha 15 cha kuwusa kwa Karonga Tiberiyo, apo Pontiyo Pilato wakaŵa mukuru wa mu Yudeya, Herode wakawusanga mu Galileya, ndipo Filipu munung'una wakhe wakawusanga mu Itureya na Tirakoniti, Lusaniya wakawusanga mu Abilene,

²Anasi na Kayafa ŵakaŵa ŵasofi ŵakuru. Pa nyengo iyo Chiuta wakayowoya na Yohane, mwana wa Zakariya, mu mapopa.

³Ntheura Yohane wakenda mu chigaŵa chose cha mronga wa Yorodani, wakapharazganga ubapatizo wa kung'anamuka kwa mu mtima mwakuti kuŵe kugowokereka kwa zakwananga.

⁴Nga ndi umo kuli kulembekera mu Buku la nchimi Yesaya kuti, “Mazgu gha munthu uyo wakuchemerezga mu mapopa kuti, ‘Nozgani msewu wa Fumu, Nyoroskani nthowa zakhe.

⁵Vinkhwawu vyose viwundike, mapiri ghose na tumapiri vidilimukire pasi. Vyakubendera vyose viti vizgokenge vyakunyoroka, nthowa za mabonkhobonkho zizamkuskesketeka,

⁶Ndipo ŵanthu wose ŵizamkuwona chiponosko cha Chiuta.’ ”

⁷Ntheura Yohane wakati ku mizinda ya ŵanthu awo ŵakizanga kuti ŵabapatizike na iyo, “Mwa mphapu za vipiri imwe, kasi ndi njani uyo wamuchenjezgani kuti muchimbire ukari uwo ukwiza?

⁸Pambikani vipambi ivyo vikurongora kuti mwang'anamuka mu mtima. Ndipo mureke kwamba kuyowoya ku mwaŵene kuti, ‘Tili nayo Abrahamu nga ndi dada withu,’ chifukwa nkhumuphalirani kuti, Chiuta wangamanya kuzgora mawe agha kuŵa ŵana ŵa Abrahamu.

⁹Nanga ndi sono mbavi yakudumulira makuni ku misisi yaŵikika kale musi mwakhe ntheura khuni lirilose lambula kupambika vipambi viweme lamkudumurika na kuponyeka mu moto.”

¹⁰Penepapo mizinda ya ŵanthu yikamufumba kuti, “Kasi sono tichitechi?”

¹¹Yohane wakaŵazgora wakati, “Uyo wali na malaya ghaŵiri, wamugaŵireko uyo walije, ndipo uyo wali na vyakurya, nayo wachite ntheura pera.”

¹²Ŵakusonkheska msonkho nawo ŵakiza kuti ŵabapatizike ndipo ŵakati kwa iyo, “Musambizgi, kasi ise tichitechi?”

¹³Wakaŵaphalira wakati, “Mureke kupoka msonkho kuruska umo uli kupimikira.”

¹⁴Ndipo ŵasilikari nawo ŵakamufumba kuti, “Kasi ise tichitechi?” Wakaŵaphalira wakati, “Mureke kuphanga vinthu vya munthu pakumofya, nanga ndi kumutetezgera. Kweni mukhorwenge na malipiro ghinu.”

¹⁵Chigomezgo cha ŵanthu chikamba kukura, ndipo ŵanthu ŵakagomezganga na kughanaghana mu mitima yawo vya Yohane kuti panji ndiyo Mesiya.

¹⁶Yohane wakaŵazgora wose kuti, “Ine nkhumubapatizani na maji, kweni uyo ngwa nkhongono kuruska ine wakwiza kunyuma zane, mweneuyo ine kuti nkhwenerera kusutula nthambo za viryato vyakhe chara. Iyo wizamkumubapatizani na Mzimu Mutuŵa, ndiposo na moto.

¹⁷Chakuwuruskira chili mu mawoko ghakhe, kuti waphyere luwugha lwakhe na kuronga tirigu mu nthamba yakhe, kweni mwerero wizamkuwuwocha mu moto wambula mazimyiko.”

¹⁸Yohane wakaŵachiska ŵanthu pakupharazga Uthenga Uweme kwa iwo mu nthowa zinandi.

¹⁹Kweni Yohane wakachenya Fumu Herode, chifukwa chakutora Herodiya muwoli wa Filipu munung'una wakhe, na chifukwa cha mauheni ghanyakhe ghanandi agho wakachita.

²⁰Herode wakasazgiraposo uheni unyakhe pakumujalira Yohane mu gadi.

²¹Sono ŵanthu wose ŵakati ŵabapatizika, ndipo Yesu nayoso wakati wakabapatizika, apo wakarombanga, kuchanya kukajurika.

²²Mzimu Mutuŵa wakakhilira pa iyo mu mawonekero nga ndi njiŵa. Ndipo mazgu ghakapulikikwa kufuma kuchanya ghakati, “Iwe ndiwe Mwana wane wakutemweka, wa mweneiwe nkhucha nawe.”

²³Apo Yesu wakambiranga kusambizga wakaŵa na virimika pakunji 30. Nga ndi umo ŵanthu ŵakaghanaghaniranga, iyo wakaŵa mwana wa Yosefe, mwana wa Heli,

²⁴mwana wa Matati, mwana wa Levi, mwana wa Meleki, mwana wa Yanayi, mwana wa Yosefe,

²⁵mwana wa Matatiya, mwana wa Amosi, mwana wa Nahumu, mwana wa Eseri, mwana wa Nagayi,

²⁶mwana wa Maati, mwana wa Matatiya, mwana wa Semini, mwana wa Yoseki, mwana wa Yoda,

²⁷mwana wa Yohanani, mwana wa Resa, mwana wa Zerubabele, mwana wa Satiyele, mwana wa Neri,

²⁸mwana wa Meleki, mwana wa Adi, mwana wa Kosamo, mwana wa Elemadamu, mwana wa Eri,

²⁹mwana wa Yoshuwa, mwana wa Eliyezere, mwana wa Yorimu, mwana wa Matati, mwana wa Levi,

³⁰mwana wa Simiyoni, mwana wa Yuda, mwana wa Yosefe, mwana wa Yonamu, mwana wa Eliyakimu,

³¹mwana wa Meleya, mwana wa Mena, mwana wa Matata, mwana wa Natani, mwana wa Davide,

³²mwana wa Yese, mwana wa Obedi, mwana wa Bowazi, mwana wa Salimoni, mwana wa Nashoni,

³³mwana wa Aminadabu, mwana wa Adimini, mwana wa Arini, mwana wa Hezironi, mwana wa Perezi, mwana wa Yuda,

³⁴mwana wa Yakhobe, mwana wa Yisake, mwana wa Abrahamu, mwana wa Tera, mwana wa Nahoro,

³⁵mwana wa Sarugi, mwana wa Rewu, mwana wa Pelegi, mwana wa Ebere, mwana wa Shela,

³⁶mwana wa Kayinani, mwana wa Arifakisadi, mwana wa Shemu, mwana wa Nowa, mwana wa Lameki,

³⁷mwana wa Methusela, mwana wa Enoki, mwana wa Yaredi, mwana wa Mahalalele, mwana wa Kayinani,

³⁸mwana wa Enoshi, mwana wa Seti, mwana wa Adamu, mwana wa Chiuta.