Read new_tumbuka_bible Luka 4 Bible Online

Luka 4 - new_tumbuka_bible bible

Luka 4

¹Yesu wakati wazura na Mzimu Mutuŵa, wakawerako ku Yorodani. Ndipo wakarongozgeka na Mzimu mu mapopa,

²ndipo kwenekura wakayezgeka na Satana mazuŵa 40. Mu mazuŵa ghara, Yesu kuti wakaryanga kanthu chara. Ndipo pa umaliro wa mazuŵa ghara, njara yikamukora.

³Satana wakati kwa iyo, “Usange ndiwe Mwana wa Chiuta, langulira libwe ili kuti lizgoke chingwa.”

⁴Kweni Yesu wakamuzgora wakati, “Kuli kulembeka kuti, ‘Munthu kuti wakharenge wamoyo na chingwa pera chara.’ ”

⁵Penepapo Satana wakamuyeghera Yesu pa malo gha pachanya, wakamurongora maufumu ghose gha pano pasi mu kanyengo kachoko waka.

⁶Ndipo wakati kwa iyo, “Nditi ndikupenge mazaza ghose agha na uchindami wakhe pakuti vili kupika kwa ine. Ndipo nkhupereka kwa waliyose uyo nkhukhumba kumupa.

⁷Ntheura usange uti undilambirenge ine, vyose viti viŵenge vyako.”

⁸Yesu wakazgora wakati, “Kuli kulembeka kuti, ‘Ulambirenge Fumu Chiuta wako ndipo iyo pera ndiyo umuteŵeterenge.’ ”

⁹Satana wakamutorera Yesu ku Yerusalemu, na kumuŵika pa msonjo wa Nyumba ya Chiuta. Ndipo wakati kwa iyo, “Usange ndiwe Mwana wa Chiuta, ujiponye pasi kufuma pano.

¹⁰Pakuti kuli kulembeka kuti, ‘Chiuta wati walangure ŵangelo ŵakhe kuti ŵakusungilire makora.’

¹¹Ndiposo, ‘Iwo ŵati ŵakwankhe na mawoko ghawo mzire ujibwaske lundi lako pa libwe.’ ”

¹²Yesu wakamuzgora wakati, “Kuli kulembeka kuti, ‘Ungayezganga Fumu Chiuta wako.’ ”

¹³Para Satana wakamarizga kumuyezga Yesu na chiyezgo chilichose, wakafumako kwa iyo kufikira nyengo yinyakhe apo wakasangira mupata.

¹⁴Mu nkhongono ya Mzimu, Yesu wakawerera ku Galileya. Lumbiri lwakhe lukatandazgika mu charu chose zingirizge.

¹⁵Wakasambizganga mu nyumba zawo zakusoperamo, ndipo ŵanthu wose ŵakamuchindikanga.

¹⁶Yesu wakiza ku Nazarete, uko wakakulira. Ndipo pa zuŵa la Sabata wakaya kanjira mu nyumba ya kusoperamo nga nkhaluso kakhe. Ndipo wakimilira kuti waŵazge Mazgu gha Chiuta.

¹⁷Ndipo ŵakamupa Buku la nchimi Yesaya. Wakajula buku, na kusanga apo pali kulembeka kuti,

¹⁸“Mzimu wa Fumu wali pa ine, pakuti yandiphakazga kuti ndipharazge Uthenga Uweme ku ŵakavu. Yandituma kupharazga kusutulika, kwa awo ŵali mu gadi. Na ŵachiburumutira kuti ŵawoneso, Kuŵapa wanangwa awo mbakutindiŵizgika,

¹⁹na kupharazga kuti nyengo yafika apo Fumu yiti yiponoske ŵanthu wakhe.”

²⁰Ndipo wakati wajara buku, wakaliwezgera kwa muteŵeti wa nyumba ya kusoperamo na kukhara pasi. Ŵanthu wose awo ŵakaŵa mu nyumba ya kusoperamo ŵakamudodoliska.

²¹Ndipo wakamba kuŵayowoyera wakati, “Muhanya uno malembo agha, ghafiskika nga ndi umo mwapulikira.”

²²Ŵanthu wose ŵakakhorwa nayo, ndipo ŵakazizwa na mazgu gha uchizi agho wakayowoya. Ndipo ŵakati, “Asi mweneuyu ndi mwana wa Yosefe?”

²³Yesu wakati kwa iwo, “Kwambula kukayika mwamkuyowoya ntharika iyi kwa ine, ‘Ng'anga, ujichizge wekha!’ Mwamkuyowoyaso kuti, ‘Tikapulika ivyo ukachitanga ku Kaperenaumu, uchiteso na muno wuwo mu charu cha kwinu.’ ”

²⁴Ndipo Yesu wakati, “Nadi nkhumuphalirani kuti, palije nchimi iyo yingamanya kupokerereka mu charu cha kwakhe.”

²⁵“Kweni mu unenesko nkhumuphalirani kuti, mu mazuŵa gha Eliya mukaŵa vyokoro vinandi mu Israele, apo vura yikareka kurokwa virimika vitatu na myezi yinkhonde na umoza. Ndipo njara yakofya yikawa mu charu chose.

²⁶Eliya kuti wakatumika kwa yumoza wa iwo chara, kweni ku Zarefati mu charu cha Sidoni kwa mwanakazi uyo wakaŵa chokoro.

²⁷Pa nyengo ya nchimi Elisha, kukaŵa ŵanthu ŵavyoni ŵanandi mu charu cha Israele. Ndipo kukaŵavye na yumoza wa iwo uyo wakatozgeka, kweni Naamani wa ku Siriya pera.”

²⁸Ŵanthu wose awo ŵakaŵa mu nyumba ya kusoperamo ŵakati ŵapulika mazgu agha, ŵakakwiya chomene.

²⁹Ŵakawuka, na kumufumyira kuwaro kwa msumba, ŵakamurongozgera pachanya pa phiri apo ŵakazengapo msumba wawo, mwakuti ŵamukanchizgire pa usendemuko kuti wakawe pasi kapingizgori.

³⁰Kweni pakusorota mukati mwawo, wakaruta.

³¹Ntheura Yesu wakakhilira ku Kaperenaumu, msumba wa Galileya, ndipo pa zuŵa la Sabata wakamba kusambizga ŵanthu.

³²Ŵanthu ŵakazizwa na kasambizgiro kakhe, pakuti mazgu ghakhe ghakarongora mazaza.

³³Mu nyumba ya kusoperamo, mukaŵa munthu uyo wakaŵa na mzimu uheni, uyo wakachemerezga na mazgu ghakuru wakati,

³⁴“Aha! Kasi mukukhumba kuchitachi nase imwe Yesu wa ku Nazarete? Kasi mwiza kwiza katimara? Nkhumumanyani, ndimwe Mutuŵa Yura wa Chiuta!”

³⁵Yesu wakawuchenya mzimu uheni ura wakati, “Chetama! Fumamo mu munthu uyo.” Ndipo chiŵanda chikati chamuwiskira pasi mukati mu ŵanthu, chikafumamo mwa iyo kwambula kumupweteka.

³⁶Ŵanthu wose ŵakazukuma ndipo ŵakayowoyeskana ŵakati, “Kasi ndi mazgu uli agha? Pakuti na mazaza na nkhongono wakulangula mizimu yiheni ndipo yikufuma.”

³⁷Ndipo lumbiri lwa Yesu lukapulikikwa kosekose mu chigaŵa chira zingirizge.

³⁸Yesu wakawuka, wakafumamo mu nyumba ya kusoperamo, ndipo wakaya kanjira mu nyumba ya Simoni. Sono nyinavyara wa Simoni wakarwara chomene na kuthukira mu thupi. Ŵanthu ŵakamuŵeya Yesu kuti wamovwire.

³⁹Ntheura Yesu wakaya kimilira pafupi na iyo, ndipo wakachenya kuthukira kwa mu thupi. Penepapo kuthukira kwa mu thupi kukamara ndipo wakawuka na kuŵateŵetera.

⁴⁰Para dazi likanjiranga wose awo ŵakaŵa na ŵarwari ŵa nthenda za mitundumitundu ŵakiza nawo kwa Yesu. Ndipo Yesu wakaŵika mawoko ghakhe pa yumozayumoza wa ŵarwari ŵara na kuŵachizga.

⁴¹Ndipo viŵanda navyo vikafumamo mu ŵanthu ŵanandi na kuchemerezga kuti, “Ndimwe Mwana wa Chiuta.” Ndipo wakavichenya, kuti wakavizomerezga kuyowoya chara chifukwa vikamumanya kuti ndi Mesiya.

⁴²Kukati kwacha, Yesu wakafumamo mu msumba na kuya ku mapopa. Ŵanthu ŵakamba kumupenja, ndipo ŵakati ŵamusanga, ŵakayezga chomene kumukanizga kuti wareke kufumako kwa iwo.

⁴³Kweni wakati kwa iwo, “Nkhwenera kupharazga Uthenga Uweme wa Ufumu wa Chiuta na mu misumba yinyakheso, pakuti cheneichi ndicho Chiuta wakanditumira.”

⁴⁴Ntheura wakapharazga mu nyumba zakusoperamo za mu Yudeya.[2]