Read new_tumbuka_bible Luka 5 Bible Online

Luka 5 - new_tumbuka_bible bible

Luka 5

¹Zuŵa limoza Yesu wakaŵa mu mphepete mwa nyanja ya Genezarete,[3] ndipo mzinda wa ŵanthu ŵanandi ukamufinyirizganga kuti upulike mazgu gha Chiuta.

²Iyo wakawona ngaraŵa ziŵiri mu mphepete mwa nyanja, kweni ŵarovi ŵakaŵa ŵafumamo kuti ŵakachape mikwawu yawo.

³Yesu wakanjira mu ngaraŵa yimoza iyo yikaŵa ya Simoni, ndipo wakamuromba kuti wayikanchizgeko pachoko waka kufuma ku mlima. Wakakhara pasi mu ngaraŵa yira na kusambizga ŵanthu.

⁴Para Yesu wakamara kuyowoya, wakamuphalira Simoni wakati, “Kanchizgira ngaraŵa iyi ku luji ndipo muponye mikwawu yinu kuti mukore somba.”

⁵Simoni wakazgora wakati, “Musambizgi, tatokatoka usiku wose. Tilije kukorapo somba nanga njimoza. Kweni chifukwa cha mazgu ghinu, nditi ndiponye mikwawu.”

⁶Ŵakati ŵaponya mikwawu, ŵakakora somba zinandi chomene, mpaka mikwawu yawo yikamba na kuparuka wuwo.

⁷Ŵakachewuzga ŵanyawo awo ŵakaŵa mu ngaraŵa yinyakhe kuti ŵize kawovwire. Para ŵanyawo ŵakiza, ŵakazuzga somba mu ngaraŵa zose ziŵiri, mwa ntheura nazo zikamba kubira.

⁸Para Simoni Petrosi wakawona ichi, wakajikama pa malundi gha Yesu wakayowoya wakati, “Mwe Fumu, fumaniko kwa ine pakuti ndili munthu wakwananga.”

⁹Wakayowoya ichi chifukwa iyo pamoza na awo ŵakaŵa nayo ŵakazukuma na unandi wa somba izo ŵakaroŵa.

¹⁰Yakhobe na Yohane, ŵana ŵa Zebediya, ŵeneawo ŵakateŵetanga pamoza na Simoni, nawo ŵakazukuma. Ndipo Yesu wakati kwa Simoni, “Ungopanga, kufuma sono uti uŵenge murovi wa ŵanthu.”

¹¹Ŵakati ŵakwezga ngaraŵa zawo pa mlima, ŵakasida vyose na kurondezga Yesu.

¹²Apo Yesu wakaŵa mu msumba unji, munthu uyo wakaŵa na vyoni thupi lose wakiza kwa iyo. Wakati wawona Yesu, wakawa kavunama ndipo wakamuŵeya wakati, “Fumu, usange mukukhumba, munganditozga.”

¹³Yesu wakanyoroska woko lakhe, wakamukhwaska wakati, “Inya, nkhukhumba, tozgeka!” Penepapo vyoni vikamara.

¹⁴Yesu wakamuchinyinthizga wakati, “Chenjera, ureke kuphalirapo munthu nanga njumoza. Kweni rutanga, ukajirongore kwa musofi, ndipo ukapereke chawanangwa chakutozgeka kwako icho Mozesi wakalangula kuŵa chipanikizgo ku ŵanthu.”

¹⁵Kweni ndipouli lumbiri lwa Yesu lukatandazgika kwakuruska kosekose. Ndipo mizinda yikuru ya ŵanthu yikiza kwiza kamupulika na kuchizgika ku matenda ghawo.

¹⁶Kweni Yesu wakawukapo na kuya kakhara ku mapopa na kuromba.

¹⁷Zuŵa limoza apo Yesu wakasambizganga, ŵaFarisi na ŵamanyi-marango, ŵakaŵapo. Aŵa ŵakafuma mu vikaya vyose vya mu Galileya na Yudeya, na mu Yerusalemu. Ndipo nkhongono za Fumu zikaŵa mwa iyo pakuchizga ŵarwari.

¹⁸Ŵanthu ŵanji ŵakiza uku ŵayegha munthu wakufwa viŵaro pa kasarasara. Ntheura ŵakapenjanga apo ŵanganjirira nayo kuya kamuŵika panthazi pa Yesu.

¹⁹Para ŵakatondeka kusanga apo ŵanganjirira nayo chifukwa cha mzinda wa ŵanthu, ŵakakwera pa mtenje wa nyumba. Ŵakati ŵeghurapo pa mtenje, ŵakamukhizgira pa kasarasara wakhe mukati mu ŵanthu panthazi pa Yesu.

²⁰Para Yesu wakawona chipulikano chawo, wakati, “Iwe dada zakwananga zako zagowokereka.”

²¹Ndipo ŵamanyi-marango na ŵaFarisi ŵakamba kujifumba ŵakati, “Kasi ndi njani mweneuyo wakuyowoya matusi? Ndi njani wangamanya kugowokera zakwananga, asi ndi Chiuta pera?”

²²Kweni Yesu wakati wamanya ivyo ŵakaghanaghananga, wakaŵazgora wakati, “Chifukwa uli mukughanaghana vya ntheura mu mitima yinu?

²³Kasi chipusu ndi nchi, kuyowoya kuti, ‘Zakwananga zako zagowokereka,’ panji kuyowoya kuti, ‘Wuka, wendenge?’

²⁴Kweni mwakuti mumanye kuti Mwana wa Munthu wali na mazaza pa charu kugowokera zakwananga,” wakati kwa munthu wakufwa viŵaro, “Nkhukuphalira kuti, wuka, nyamura kasarasara wako ndipo rutanga ku kwako.”

²⁵Maluŵiro wakawuka uku wose ŵakuwona, wakanyamura icho wakagonangapo, ndipo wakaruta ku kwakhe uku wakuchindika Chiuta.

²⁶Ŵanthu wose ŵakazukuma na kuchindika Chiuta, ndipo ŵakazura na wofi na kuyowoya kuti, “Muhanya uno, tawona vyakuzukumiska.”

²⁷Pamanyuma pa vyeneivi, Yesu wakafumira kuwaro ndipo wakawona wakusonkheska msonkho zina lakhe Levi wakhara mu nyumba yakusonkheramo msonkho. Yesu wakati kwa iyo, “Ndirondezga.”

²⁸Ndipo wakareka vyose, wakawuka na kumurondezga.

²⁹Ntheura Levi wakanozgera Yesu chiphikiro chikuru mu nyumba yakhe. Pakaŵa mzinda ukuru wa ŵakusonkheska msonkho pamoza na ŵanthu ŵanji awo ŵakakhara nawo pa chakurya.

³⁰ŴaFarisi na ŵamanyi-marango ŵawo, ŵakamba kudinginyikira ŵasambiri ŵakhe ŵakati, “Chifukwa uli mukurya na kumwa pamoza na ŵakusonkheska msonkho na ŵakwananga ŵanji?”

³¹Ndipo Yesu wakaŵazgora kuti, “Awo mba msuma kuti ŵakupenja ng'anga chara, kweni ŵarwari ndiwo.

³²Ine kuti nkhizira kuchema ŵarunji chara, kweni ŵakwananga kuti ŵang'anamuke mu mtima.”

³³Ŵanthu ŵakati kwa Yesu, “Ŵasambiri ŵa Yohane ŵakuziŵizga kurya rutaruta na kuromba malurombo ndiposo na ŵasambiri ŵa ŵaFarisi, kweni ŵinu ŵakujiryera waka na kumwa.”

³⁴Yesu wakaŵazgora kuti, “Kasi mungamanya kuŵaziŵiziska chakurya ŵanthu awo ŵakuchemekera pa nthengwa, uku mwene-nthengwa wali nawo?

³⁵Kweni nyengo yitizenge apo mwene-nthengwa wati wawuskikeko kwa iwo. Penepapo ndipo ŵizamkuziŵizga kurya mu mazuŵa gheneagho.”

³⁶Yesu wakaŵaphaliraso ntharika wakati, “Palije munthu uyo wakuchekera chigamba ku laya liphya na kugambika pa laya likoroŵere. Usange wangachita ntheura, ndiko kuti wati waparure laya liphya. Ndipo chigamba cha laya liphya chiti chiyane na laya likoroŵere chara.

³⁷Ndiposo palije munthu uyo wakupungulira vinyo liphya mu mathumba gha vikumba vidala. Usange wangachita ntheura, vinyo liphya lira lingaphumula mathumba gha vikumba vidala vira, ndipo vinyo lingathikira pasi. Ntheura mathumba gha vikumba nagho ghakunangika.

³⁸Kweni vinyo liphya likwenera kuŵikika mu mathumba gha vikumba viphya.

³⁹Ndipo palije munthu uyo wakukhumba vinyo liphya para wamwa likoroŵere, chifukwa wakuti, ‘Lidala ndilo ndiweme.’ ”