Read new_tumbuka_bible Luka 6 Bible Online

Luka 6 - new_tumbuka_bible bible

Luka 6

¹Pa zuŵa la Sabata apo Yesu wakasorotanga mu minda ya tirigu, ŵasambiri ŵakhe ŵakapururanga mphonje za tirigu, na kupikisa mu mawoko ghawo na kurya.

²ŴaFarisi ŵanji ŵakati, “Chifukwa uli mukuchita icho nchambula kulangurika pa zuŵa la Sabata?”

³Yesu wakaŵazgora wakati, “Kasi mundaŵazgepo icho wakachita Davide para wakaŵa na njara iyo na awo ŵakaŵa nayo?

⁴Iyo wakanjira mu Nyumba ya Chiuta, ndipo wakatora Chingwa cha Uŵapo wa Chiuta icho kuti ncha dango chara kuti waliyose warye, kweni ŵasofi pera. Ndiposo cheneichi wakaŵapako awo ŵakaŵa nayo kuti ŵarye.”

⁵Ntheura Yesu wakati kwa iwo, “Mwana wa Munthu ndi Fumu ya Sabata.”

⁶Pa zuŵa linyakhe la Sabata, Yesu wakanjira mu nyumba ya kusoperamo, na kusambizga. Mwenemura mukaŵa munthu uyo woko lakhe la ku maryero likaŵa la kuphapa.

⁷Ndipo ŵamanyi-marango na ŵaFarisi ŵakapenjanga chifukwa chakumupacha nacho Yesu. Ntheura ŵakamukhazganga kuti ŵawone usange wangamuchizga pa zuŵa la Sabata.

⁸Kweni Yesu wakamanya maghanoghano ghawo ndipo wakati ku munthu wa woko la kuphapa, “Wuka, zanga wimilire pano pakatikati.” Ntheura munthu yura wakawuka na kuya kimilira penepara.

⁹Yesu wakati kwa iwo, “Ndimufumbani, kasi nchakulangurika pa zuŵa la Sabata kuchita uweme panji kuchita uheni? Kuponoska umoyo panji kukoma?”

¹⁰Wakati walaŵiska pa wose uku na uku, wakamuphalira munthu yura wa woko la kuphapa wakati, “Nyoroska woko lako.” Wakanyoroska woko lakhe, ndipo likawereramo.

¹¹Kweni iwo ŵakazura na ukari ndipo ŵakafumbana icho ŵangachita nayo Yesu.

¹²Mu mazuŵa ghara, Yesu wakakwerera ku phiri kuya karomba. Ndipo wakacherezga usiku wose mu kuromba kwa Chiuta.

¹³Kukati kwacha, wakachema ŵasambiri ŵakhe, ndipo wakasorapo 12 awo wakaŵathya, “Ŵakutumika.”

¹⁴Ŵakaŵa aŵa: Simoni (mweneuyo wakamuthya Petrosi) na Andreya munung'una wakhe, Yakhobe na Yohane, Filipu, Baratolomeyu.

¹⁵Mateyu, Tomasi, Yakhobe mwana wa Alifeyu, Simoni wa chipani cha Zeloti.

¹⁶Yudasi mwana wa Yakhobe, na Yudasi Isikariyoti uyo wakendera mphiska Yesu.

¹⁷Yesu wakakhira mu phiri pamoza na ŵasambiri ŵakhe, ndipo wakaya kimilira pa malo ghakuthenga. Penepapo pakaŵa ŵasambiri ŵanandi chomene, na mzinda ukuru wa ŵanthu awo ŵakafuma kosekose mu chigaŵa cha Yudeya na mu Yerusalemu, na awo ŵakafuma mu mphepete mwa nyanja ya Ture na Sidoni.

¹⁸Aŵa ŵakiza kuti ŵapulike mazgu ghakhe na kuti iyo waŵachizge ku maurwari ghawo. Ndipo awo ŵakasuzgikanga na mizimu yiheni, nawo wakaŵachizga.

¹⁹Ŵanthu wose ŵakakhumbanga kumukhwaska, pakuti nkhongono zikafumanga mwa iyo na kuŵachizga wose.

²⁰Yesu wakalaŵiska ku ŵasambiri ŵakhe wakati, “Ŵakutumbikika ndimwe ŵakavu, pakuti Ufumu wa Chiuta ngwinu!”

²¹“Ŵakutumbikika ndimwe, imwe muli na njara sono, chifukwa mwamkukhuta!” “Ŵakutumbikika ndimwe, imwe mukulira sono, chifukwa musekererenge!”

²²“Ŵakutumbikika ndimwe, para ŵanthu ŵakumutinkhani, ŵakumukanani, ŵakumutombozgani, para ŵanthu ŵakumunenani pa chifukwa cha Mwana wa Munthu.”

²³Kondwani mu zuŵa ilo na kudukaduka na chimwemwe, chifukwa njombe yinu njikuru kuchanya. Pakuti ntheura ndimo ŵawiskewokuru ŵakachitira ku nchimi.

²⁴“Kweni soka kwa imwe, imwe muli ŵasambazi pakuti muli kupokera kale chisangurusko chinu!”

²⁵“Soka kwa imwe, imwe mukukhuta sono! Pakuti mwamkuŵa na njara. Soka kwa imwe, imwe mukuseka sono, pakuti mwamkutengera na kulira!”

²⁶“Soka kwa imwe, usange ŵanthu wose ŵakumurumbani, pakuti ntheura ndimo ŵawiskewokuru ŵakachitira ku nchimi zitesi.”

²⁷“Kweni imwe mukundipulika nkhumuphalirani kuti, temwani ŵarwani ŵinu, muŵachitire uweme awo ŵakumutinkhani.

²⁸Tumbikani awo ŵakumutembani, romberani awo ŵakumuyuzgani.

²⁹Uyo wakupamantha ku thama la lwande lumoza, umuzgorere linyakhe. Ndipo uyo wakupoka bachi lako, umupeso na laya wuwo.

³⁰Yose uyo wakukuromba kanthu, umupe. Ndipo para munthu watora vinthu vyako, ureke kufumba kuti wakuwezgere.

³¹Nga ndi umo mukukhumbira kuti ŵanthu ŵamuchitiraninge, ndimo namwe muŵachitirenge.”

³²“Usange mukutemwa awo ŵakumutemwani pera, kasi mukugomezga kuti mupokenge chandulo uli? Pakuti ŵakwananga nawo ŵakutemwa awo ŵakuŵatemwa.

³³Usange mukuŵachitira uweme awo ŵakumuchitirani uweme pera, kasi mukugomezga kuti mupokenge chandulo uli? Pakuti ŵakwananga nawo ndimo ŵakuchitira.

³⁴Usange mukubwerekeska awo mukuŵagomezga kuti ŵangawezgerapo, kasi pali chandulo uli? Chifukwa ŵakwananga nawo ŵakukongoreska ŵakwananga ŵanyawo mwakuti ŵapokeso umo zikaŵira.

³⁵Kweni temwani ŵarwani ŵinu, ŵachitirani uweme, ndipo ŵabwerekeskani kwambula kugomezga kuti ŵawezgerengepo. Njombe yinu yiti yiŵenge yikuru, ndipo imwe muti muŵenge ŵana ŵa Chiuta Chikurukuru. Pakuti iyo ngwa lusungu ku ŵambula kuwonga na ŵaheni.

³⁶Muŵenge na lusungu nga ndi umo Ŵawiskemwe ŵaliri na lusungu.”

³⁷“Mungeruzganga chara, mwakuti Chiuta wareke kumweruzgani. Mungasuskanga ŵanyinu chara, mwakuti Chiuta wareke kumususkani. Gowokerani, mwakuti Chiuta wamugowokerani.

³⁸Perekani, ndipo muti mupokerenge. Nadi muti mupokerenge vya kusindirika, vyakusunkhunyika na vyakufuruka. Chifukwa mweso uwo mukuperekerapo, ndiwo mweso uwo muti mupimikirengemo.”

³⁹Yesu wakaŵatayiraso ntharika wakati, “Kasi wachiburumutira wangarongozga wa chiburumutira munyakhe? Asi wose ŵaŵiri wuwo ŵawenge mu buwu?

⁴⁰Musambiri kuti wali pachanya pa musambizgi wakhe chara. Kweni para munthu yose wasambizgika mwakufikapo, wati waŵe nga ndi musambizgi wakhe.”

⁴¹“Chifukwa uli ukulaŵiska chiswaswa icho chili mu jiso la mubali wako, kweni khuni ilo liri mu jiso lako kuti ukulighanaghanako chara?

⁴²Kasi ungaphalira uli mubali wako kuti, ‘Mubali wane, reka ndifumyemo chiswaswa icho chili mu jiso lako,’ para iwe wamwene kuti ukuwona chara khuni ilo liri mu jiso lako? Wamupusikizgi iwe, udange wafumyamo khuni ilo liri mu jiso lako sono ndipo uti uwonenge makora pakufumya chiswaswa icho chili mu jiso la mubali wako.”

⁴³“Chifukwa palije khuni liweme ilo likupambika vipambi viheni, panji nesi khuni liheni ilo likupambika vipambi viweme.

⁴⁴Pakuti khuni lose likumanyikwa na vipambi vyakhe. Pakuti ŵanthu kuti ŵakuponthora vikuyu mu minga chara, panji nesi kuponthora mpheska mu nthura.

⁴⁵Munthu muweme wakufumya uweme kufuma mu viweme ivyo wali kusunga mu mtima wakhe. Ndipo munthu muheni nayo wakufumya uheni uwo ukufuma mu viheni ivyo wali kusunga mu mtima wakhe, pakuti kufuma ku vinandi ivyo vili mu mtima wa munthu, ndivyo mlomo wakhe ukuyowoya.”

⁴⁶“Chifukwa uli mukundichema, ‘Fumu, Fumu,’ kweni kuti mukuchita ivyo nkhuyowoya chara?

⁴⁷Yose uyo wakwiza kwa ine, na kupulika mazgu ghane, na kughachita, nditi ndimurongorani uyo wakulingana nayo.

⁴⁸Iyo wakulingana na munthu uyo wakazenga nyumba yakhe, ndipo wakajima chomene na kuzenga lufura lwa nyumba yira pa jarawe. Para mronga ukatura na kufutukira muwaro ndipo maji ghakhe ghakatimba nyumba yira, kweni kuti ghakasunkhunya chara, chifukwa yikazengeka makora.

⁴⁹Kweni uyo wakughapulika waka mazgu ghane ndipo kuti wakughachita chara, wakulingana na munthu uyo wakazenga nyumba pachanya waka kwambula lufura. Mronga ukatura na kufutukira muwaro, ndipo maji ghakhe ghakatimba nyumba yira, ntheura yikawa nyengo yeneiyo. Ndipo kubwanganduka kwakhe kukaŵa kukuru.”