Read new_tumbuka_bible Luka 7 Bible Online

Luka 7 - new_tumbuka_bible bible

Luka 7

¹Yesu wakati wamara kuphalira ŵanthu mazgu ghakhe ghose wakaruta ku Kaperenaumu.

²Sono murara wa ŵankhondo wakaŵa na muteŵeti wakhe uyo wakaŵa wa pa mtima kwa iyo. Muteŵeti uyu wakarwara chomene pafupi kufwa.

³Murara wa nkhondo wakati wapulika na za Yesu, wakatuma ŵarara ŵanji ŵa ŵaYuda kwa iyo kuya kamupempha kuti wize na kuchizga muteŵeti wakhe.

⁴Para ŵakafika kwa Yesu, ŵakamuŵeya chomene ŵakati, “Munthu uyu wakwenera kuti mumovwire,

⁵chifukwa wakutemwa fuko lithu, ndipo ndiyo wakatizengera nyumba yithu yakusoperamo.”

⁶Penepapo Yesu wakaruta nawo. Apo ŵakaŵa kufupi na nyumba, murara wa ŵankhondo wakatuma ŵabwezi ŵakhe kuya kamuphalira Yesu kuti, “Fumu, mureke kujisuzga chifukwa ndilije kwenera kuti mwize kanjire mu nyumba yane.

⁷Ntheura ndangujipima wambula kwenerera kuti ine ndamwene ndize kwa imwe. Kweni muyowoye mazgu pera ndipo muteŵeti wane wachirenge.

⁸Chifukwa ine nane nanga ndili munthu uyo wali pasi pa ŵamazaza, ndili na ŵasilikari pasi pane, ndipo nkhumuphalira yumoza kuti, ‘Ruta,’ ndipo wakuruta, ndipo nkhumuphalira munyakhe kuti, ‘Zanga,’ ndipo wakwiza. Ku muteŵeti wane nkhumuphalira kuti, ‘Chita ichi,’ ndipo wakuchita.”

⁹Para Yesu wakapulika mazgu agha, wakazizwa nayo, ndipo wakang'anamukira ku mzinda wa ŵanthu awo ŵakamurondezganga wakati, “Nkhumuphalirani kuti, ndilije kusangamo chipulikano cha ntheura nanga ndi mu ŵaIsraele.”

¹⁰Ndipo para ŵanthu awo ŵakatumika, ŵakawerera ku nyumba, wakasanga kuti muteŵeti wachira.

¹¹Chikati chajumpha ichi, mwaluŵiro Yesu wakaruta ku msumba wa Nayini. Ndipo ŵasambiri ŵakhe pamoza na mzinda ukuru wa ŵanthu, ŵakaruta nayo.

¹²Apo Yesu wakafika pafupi na chipata cha msumba, wakakumana na mzinda ukuru wa ŵanthu awo ŵakayegha munthu wakufwa. Munthu wakufwa uyu wakaŵa mwana mwanarume yumoza yekha na yekha wa ŵanyina awo ŵakaŵa chokoro. Mzinda ukuru wa ŵanthu uwo ukafuma mu msumba ukaŵa nacho.

¹³Para Fumu yikamuwona mwanakazi yura, yikaŵa nayo na chiwuravi, ndipo yikamuphalira kuti, “Reka kulira.”

¹⁴Yesu wakasenderera pafupi, wakakhwaska mtembo, ndipo awo ŵakayegha mtembo ŵakimilira. Yesu wakati, “Wa munyamata iwe, nkhukuphalira kuti, ‘wuka!’ ”

¹⁵Penepapo wakufwa yura wakawuka na kukhara sinkhinthe na kwamba kuyowoya. Ndipo Yesu wakamupereka kwa ŵanyina.

¹⁶Wofi ukaŵawira ŵanthu wose, ŵakachindika Chiuta ŵakati, “Nchimi yikuru yawuka mukati mwithu! Ndipo Chiuta wiza kachezgera ŵanthu ŵakhe.”

¹⁷Lumbiri ulu lwa Yesu lukatandazgika kosekose mu Yudeya, na mu charu chose zingirizge.

¹⁸Ŵasambiri ŵa Yohane ŵakamuphalira vinthu vyose vyeneivi.

¹⁹Ntheura Yohane wakachema ŵasambiri ŵakhe ŵaŵiri na kuŵatuma kwa Fumu kuti ŵakafumbe kuti, “Kasi ndimwe mweneuyo ŵakatenge wakwiza panji tilindilirenge munyakhe?”

²⁰Ŵanthu aŵa ŵakati ŵafika kwa Yesu, ŵakamuphalira ŵakati, “Yohane Mubapatizi watituma kwa imwe, wakuti, ‘Kasi ndimwe uyo ŵakatenge wakwiza panji tilindilirenge munyakhe?’ ”

²¹Pa nyengo yeneyira, Yesu wakachizganga ŵanthu ŵanandi awo ŵakaŵa na nthenda za mitundumitundu. Wakafumiskanga mizimu yiheni, na kujula maso gha ŵa chiburumutira.

²²Ntheura wakaŵazgora wakati, “Wererani kunyuma mukamuphalire Yohane ivyo mwawona na kupulika kuti, ŵachiburumutira ŵakuwona, viti vikwenda, ŵavyoni ŵakutozgeka, ŵakumangwa makutu ŵakupulika, ŵakufwa ŵakuwuka, ndipo Uthenga Uweme ukupharazgika ku ŵakavu.

²³Ngwakutumbikika munthu uyo wakuwura kusangamo kanthu kakumukhuŵazga mwa ine.”

²⁴Zikati zaruta nthumi za Yohane, Yesu wakamba kuyowoya na mzinda wa ŵanthu na vya Yohane wakati, “Kasi mukaruta kuya kawona vichi mu mapopa? Kasi mukaya kawona thete lakusunkhunyika na mphepo?

²⁵Kasi nchichi icho mukaruta kuya kawona? Kasi mukaya kawona munthu wakuvwara vyakulipwitika? Awo ŵakuvwara malaya ghakugabuka na kutandara mu kukoroka, ndi awo ŵakukhara mu nyumba za ufumu.

²⁶Kweni kasi nchichi icho mukaya kawona? Kasi mukaya kawona nchimi? Nadi nkhumuphalirani kuti mukaya kawona mukuru kuruska na nchimi wuwo.

²⁷Uyu ndi mweneuyo kuli kulembeka na vya iyo kuti, ‘Chiuta wakuti, “Wonani, nditi nditumenge thenga lane panthazi pako, leneilo lamkunozgera iwe nthowa yako.” ’

²⁸Nkhumuphalirani kuti, ‘Mu ŵanthu wose awo ŵali kubabika mu ŵanakazi, mulije na yumoza uyo ndi mukuru kuruska Yohane. Kweni uyo ndi muchoko chomene mu Ufumu wa Chiuta ndi mukuru kuruska iyo.’ ”

²⁹Ŵanthu wose na ŵakusonkheska msonkho wuwo, ŵakati ŵapulika mazgu agha, ŵakazomera kuti Chiuta ndi murunji pakuti iwo ŵakabapatizika na Yohane.

³⁰Kweni ŵaFarisi na ŵamanyi-marango ŵakakana ŵekha dazgo la Chiuta pakureka kubapatizika na Yohane.

³¹Ntheura Yesu wakati, “Kasi ndiŵalinganizge na vichi ŵanthu ŵa muwiro uwu? Ndipo kasi ŵakulingana na vichi?

³²Ŵakulingana waka na ŵana awo ŵakhara mu msika na kuchemerezga ku yumoza na munyakhe kuti, ‘Tikamulizgirani fyoliro, kweni kuti mukavina chara. Tikatengera, kweni kuti mukalira nase chara.’

³³Yohane Mubapatizi wakati wiza, wakarya chingwa chara nesi nkhumwa vinyo. Kweni imwe mukuti, ‘Wali na chiŵanda.’

³⁴Mwana wa Munthu wiza, ndipo wakurya na kumwa, imwe mukuti, ‘Wonani, muryezi uyu na mloŵevu, mubwezi wa ŵakusonkheska msonkho na ŵakwananga.’

³⁵Ndipouli, mahara ghakuwoneka mu ŵana ŵakhe wose kuti nga urunji.”

³⁶Yumoza wa ŵaFarisi wakamuchema Yesu kuti wakarye nayo chakurya cha mise. Ntheura wakaruta ku nyumba ya muFarisi na kukhara pa kurya.

³⁷Mwanakazi uyo wakaŵa wakwananga mu msumba, wakati wapulika kuti Yesu wakhara pa kurya mu nyumba ya muFarisi, wakiza na supa ya mafuta ghakununkhira.

³⁸Apo wakimilira kumanyuma kwa malundi gha Yesu, na kulira, wakamba kunyevya malundi gha Yesu na masozi. Ndipo wakafyuranga masozi na sisi lakhe, na kughafyofyontha malundi, na kughaphakazga mafuta.

³⁹Para muFarisi uyo wakamuchema Yesu wakawona ichi, wakayowoya mu mtima wakati, “Munthu uyu waŵenge nchimi, mphanyi wamumanya kuti ndi njani ndipo ngwa mtundu uli mwanakazi uyo wakumukhwaska pakuti ngwakwananga.”

⁴⁰Yesu wakamuzgora wakati, “Simoni, ndili na kanthu kakukuphalira.” Iyo wakati, “Kasi nkhanthu uli Musambizgi? Ndiphalirani.”

⁴¹Pakumuzgora wakati, “Ŵanthu ŵaŵiri ŵakakongora ndarama kwa munthu wakubwerekeska ndarama. Munyakhe wakakongora ndarama 500, ndipo munyakhe 50.

⁴²Para wose ŵaŵiri wuwo ŵakatondeka kusanga ndarama za kuwezgerapo, mwenecho wa ndarama wakaŵagowokera wose ŵaŵiri wuwo. Kasi ndi nju wa iwo wangamutemwa kwakuruska?”

⁴³Simoni wakazgora wakati, “Ine nkhughanaghana kuti ndi munthu uyo wakamugowokera vinandi.” Yesu wakati, “Wazgora makora.”

⁴⁴Yesu wakati wang'anamukira ku mwanakazi, wakamuphalira Simoni wakati, “Ukumuwona mwanakazi uyu? Ine ndangunjira muno mu nyumba yako, kweni ulije kundipa maji ghakugeza mu malundi ghane. Kweni mwanakazi uyu wanyevya malundi ghane na masozi ghakhe na kughafyura na sisi lakhe.

⁴⁵Iwe undandifyofyonthe, kweni mwanakazi uyu kufuma umo ndangunjirira muno, walije kureka kufyofyontha malundi ghane.

⁴⁶Iwe undawuphakazge mutu wane na mafuta, kweni mwanakazi uyu waphakazga malundi ghane na vyakununkhira.

⁴⁷Ntheura nkhukuphalira kuti, zakwananga zakhe izo nzinandi chomene zagowokereka, pakuti warongora kutemwa kukuru. Kweni wakugowokereka pa vichoko waka, ndi uyo wakutemwa pachoko waka.”

⁴⁸Penepapo Yesu wakamuphalira mwanakazi yura wakati, “Zakwananga zako zagowokereka.”

⁴⁹Awo ŵakaryanga nayo ŵakamba kughanaghana mu mitima yawo kuti, “Ndi njani mweneuyu wakugowokera na zakwananga wuwo?”

⁵⁰Yesu wakamuphalira mwanakazi yura wakati, “Chipulikano chako chakuponoska. Rutanga mu mutende.”