Read new_tumbuka_bible Luka 8 Bible Online

Luka 8 - new_tumbuka_bible bible

Luka 8

¹Pamanyuma pa ichi, Yesu wakenda mu misumba na mu vikaya vyose kupharazga Uthenga Uweme na kuŵaphalira ŵanthu vya Ufumu wa Chiuta Ndipo ŵasambiri 12 ŵakaŵa nayo.

²Pakaŵaso ŵanakazi ŵanji awo Yesu wakaŵachizga ku mizimu yiheni na ku maurwari ghawo. Mariya wa ku Magadala mwa mweneuyo Yesu wakafumyamo viŵanda vinkhonde na viŵiri,

³Yohana, uyo mufumu wakhe wakaŵa Chuza muteŵeti murara wa Herode, na Susana, ndiposo na ŵanyakheso ŵanandi, awo ŵakamuteŵeteranga Yesu na ŵasambiri ŵakhe na chuma chawo.

⁴Para ŵanthu ŵanandi ŵakizanga kwa Yesu na kuwunjikana kufuma ku muzi uwu na uwu, ndipo ŵakati ŵawungana wakaŵatayira ntharika wakati,

⁵“Mumiji wakaruta kuya kaseŵa mbuto yakhe. Ndipo apo wakaseŵanga, mbuto yinyakhe yikawa mu mphepete mwa nthowa. Ŵanthu ŵakayikanda, ndipo viyuni vya mudera vikiza na kuyisora.

⁶Yinyakhe yikawa pa lusokorowe, ndipo yikati yamera, yikomira chifukwa dongo likaŵavye mtika.

⁷Yinyakhe yikawa mukati mu minga, ndipo minga yikakura pamoza na mbuto na kuyifyoronganiska.

⁸Ndipo yinyakhe yikawa mu dongo liweme, yikamera na kupambika vipambi 100.” Yesu wakati wayowoya vyeneivi, wakachemerezga wakati, “Uyo wali na makutu ghakupulikira, wapulike.”

⁹Ŵasambiri ŵa Yesu ŵakamufumba ching'anamulo cha ntharika yira.

¹⁰Yesu wakazgora wakati, Kwa imwe kuli kupika mwaŵi wakumanyira vya muchindindi vya Ufumu wa Chiuta. Kweni ŵanji ŵakwenera kumanyira mu ntharika, pakuti kulaŵiska ŵangalaŵiska nadi, kweni ŵareke kuwona kanthu, kupulika ŵangapulika nadi, kweni kuti wapulikiske kanthu chara.

¹¹“Ching'anamulo cha ntharika iyi ndi ichi: Mbuto ndi mazgu gha Chiuta.

¹²Mbuto iyo yikawa mu mphepete mwa nthowa, ndi ŵanthu awo ŵakupulika mazgu, penepapo Satana wakwiza na kukwapura mazgu mu mitima yawo, mwakuti ŵareke kupulikana na kuponoskeka.

¹³Mbuto iyo yikawa pa lusokorowe, ndi ŵanthu awo ŵakupulika mazgu gha Chiuta na kughapokerera na chimwemwe. Mazgu kuti ghakujintha nkhorozi mwa iwo chara. Ŵakupulikana pa kanyengo kachoko waka, ndipo pa nyengo ya viyezgo, ŵakuwerera nyuma.

¹⁴Mbuto iyo yikawa mu minga, ndi ŵanthu awo ŵakupulika mazgu gha Chiuta, kweni vyakwenjezga, kutemweska usambazi na vyakukondweska vya mu charu, vikuŵafyenya na kuŵafyoronganiska, ndipo kuti ŵakupambika vipambi vya kukhoma chara.

¹⁵Kweni mbuto iyo yikawa pa dongo liweme, ndi ŵanthu awo ŵakupulika mazgu gha Chiuta na kughasunga mu mtima uweme na wa unenesko, ndipo ŵakulimbalimba mpaka ŵapambike vipambi.

¹⁶“Palije munthu uyo wakukozga nyali na kuyibenekerera na chidunga, panji kuyibisa kusi ku chitara. Kweni wakuyiŵika pa malo ghakuwonekera, mwakuti ŵanthu awo ŵakunjira mu nyumba ŵawone ungweru wakhe.

¹⁷“Chifukwa palije kanthu kakubisika ako kamkureka kuvumbukwa pakweru, panji ako kali mu ubende ako kamkureka kumanyikwa na kuvumbukwa.

¹⁸“Ntheura chenjerani umo mukupulikira mazgu. Chifukwa yose uyo wali na kanthu, ndiyo wamkupika vinandi. Kweni uyo yose walije kanthu, nanga ndi ako wakupima kuti wali nako kizamkupokeka.”

¹⁹Sono ŵanyina ŵa Yesu na ŵanung'una ŵakhe ŵakiza kwa iyo, kweni ŵakatondeka kufika apo wakaŵa iyo chifukwa cha mzinda wa ŵanthu.

²⁰Munthu yunji wakamuphalira Yesu wakati, “Ŵanyinamwe na ŵanung'una ŵinu ŵimilira kuwaro ŵakukhumba kumuwonani.”

²¹Kweni Yesu wakazgora wakati, “Amama na ŵanung'una ŵane ndi awo ŵakupulika mazgu gha Chiuta na kughachita.”

²²Zuŵa limoza, Yesu wakanjira mu ngaraŵa na ŵasambiri ŵakhe ndipo wakati kwa iwo, “Tiyeni tambukire ku sirya linyakhe la nyanja.” Ntheura ŵakaruta.

²³Ndipo apo ŵakambukanga, Yesu wakagona. Chimphupuru cha mphepo chikikhira pa nyanja, ndipo ngaraŵa yikamba kuzura na maji. Ntheura ŵakaŵa mu urwani ukuru.

²⁴Ŵasambiri ŵakhe ŵakaruta na kumuwuska ŵakati, “Musambizgi, Musambizgi, tikufwa!” Yesu wakawuka na kuchenya chimphepo na majigha ghakofya. Vikareka ndipo kukaŵa bata likuru.

²⁵Yesu wakati kwa iwo, “Kasi chipulikano chinu chili nkhu?” Ŵasambiri ŵakopa na kuzizwa ndipo ŵakayowoyeskana ŵakati, “Kasi sono ndi njani munthu uyu? Wakulangula kuti chimphepo na maji vireke, ndipo vikumupulikira.”

²⁶Yesu na ŵasambiri ŵakhe ŵakafika ku charu cha ŵa Geraseni, icho chikathyana na Galileya.

²⁷Yesu wakati wafuma mu ngaraŵa wakiza ku mlima, wakakumana na munthu yunji uyo wakafuma mu msumba, uyo wakaŵa na viŵanda. Kwa nyengo yitali wakavwaranga vyakuvwara chara, nanga nkhukhara mu nyumba, kweni mu mararo.

²⁸Iyo wakati wawona Yesu, wakachemerezga, ndipo wakawa pasi, na kuti, “Kasi mukukhumba kuchitachi nane imwe, Yesu Mwana wa Chiuta Chikurukuru? Nkhumuŵeyani, mungandisuzganga chara.”

²⁹Wakayowoya ntheura chifukwa Yesu wakalangula mzimu uheni ura kuti ufumemo mu munthu yura. Nyengo zinandi mizimu yiheni yikamukoranga, ndipo ŵanthu ŵakamukakanga mawoko na malundi na maunyoro na magwede ndipo ŵakamulindiriranga. Kweni iyo wakadumulanga maunyoro na magwede ghara ndipo mizimu yiheni yira yikamuchimbizgiranga ku chiparamba.

³⁰Yesu wakamufumba wakati, “Zina lako ndiwe njani?” Iyo wakati, “Ndine Chimuzinda.” Chifukwa mwa iyo mukanjira viŵanda vinandi.

³¹Viŵanda vira vikamuŵeya Yesu kuti wareke kuvituma ku chizongwe.

³²Pafupi waka pakaŵa mskambo ukuru wa nkhumba izo zikaryanga mu mphepete mwa phiri. Viŵanda vira vikamuŵeya Yesu kuti wavizomerezge kuya kanjira mu nkhumba zira ndipo iyo wakavizomerezga.

³³Viŵanda vikafumamo mu munthu yura vikaya kanjira mu nkhumba. Ndipo mskambo ukachimbilira kusika na kugodobokera pa usendemuko na kuya mu nyanja ndipo ukamirwa.

³⁴Awo ŵakaliskanga nkhumba zira ŵakati ŵawona icho chikachitika, ŵakachimbira na kuya kaphara ku msumba na mu mizi.

³⁵Ntheura ŵanthu ŵakaruta kuya kawona icho chikachitika. Ŵakati ŵafika apo wakaŵa Yesu, ŵakamusanga munthu uyo viŵanda vikafumamo, wakakhara pasi ku malundi gha Yesu, wavwara makora ghene ndipo vinjeru vyakhe vyawereramo. Ntheura wofi ukaŵakora wose.

³⁶Ndipo awo ŵakawona icho chikachitika, ŵakakonkhoskera ŵanthu umo munthu wa viŵanda yura wakachizgikira.

³⁷Ndipo ŵanthu wose kuzingirizga charu chose cha ŵa Geraseni ŵakaŵa na chitenthe chikuru ndipo ŵakamuŵeya Yesu kuti wafumeko kwa iwo. Penepapo Yesu wakanjira mu ngaraŵa, wakafumako.

³⁸Kweni munthu uyo vikafumamo viŵanda, wakamuromba Yesu, “Ndirute namwe.” Kweni wakamuwezga wakati,

³⁹“Rutanga ku kwinu, ukaŵaphalire ŵanthu ivyo Chiuta wakuchitira.” Ntheura munthu yura wakaruta na kuya kapharazga mu msumba wose ivyo Yesu wakamuchitira.

⁴⁰Para Yesu wakati wawera kufuma ku sirya la nyanja, ŵanthu ŵanandi ŵakamupokerera na chimwemwe, chifukwa wose ŵakamulindiriranga.

⁴¹Munthu yunji zina lakhe Yayiro uyo wakaŵa murara wa nyumba ya kusoperamo, wakiza. Iyo wakajikama pa malundi gha Yesu, wakamuŵeya kuti warute ku nyumba yakhe.

⁴²Pakuti wakaŵa na mwana msungwana yumoza pera, wa virimika 12. Msungwana uyu wakaŵa pafupi kufwa. Apo Yesu wakarutanga, ŵanthu ŵanandi ŵakamufinyirizganga.

⁴³Pakaŵa mwanakazi uyo wakaŵa na nthenda yakusurura ndopa kwa virimika 12, uyo wakamara chuma chakhe chose kulipira ng'anga, kweni pakaŵavye nanga njimoza iyo yikamanya kumuchizga.

⁴⁴Mwanakazi yura wakiza kunyuma za Yesu, ndipo wakakhwaska mphonje za laya lakhe. Penepapo nthenda yakhe yakusurura ndopa yikamara.

⁴⁵Yesu wakafumba wakati, “Kasi ndi njani uyo wandikhwaska?” Para wose ŵakakana, Petrosi wakati, “Musambizgi, ŵanthu ŵanandi ŵakumufinyirizgani na kuphapatizga.”

⁴⁶Kweni Yesu wakati, “Yumoza wandikhwaska nadi chifukwa ndamanya kuti nkhongono zafumamo mwa ine.”

⁴⁷Mwanakazi pakuwona kuti walije kubisama, wakiza na kutenthema, wakawa pa malundi gha Yesu na kuphara pakweru chifukwa icho wakamukhwaskira na umo wakachizgikira pa nyengo yeneyira.

⁴⁸Yesu wakati ku mwanakazi yura, “Mwana wane, chipulikano chako chakuchizga. Rutanga mu mutende.”

⁴⁹Apo Yesu wakaŵa wachali kuyowoya, kukiza munthu kufuma ku nyumba ya murara wa nyumba ya kusoperamo ndipo wakati kwa Yayiro, “Mwana wako wafwa, ungasuzganga Musambizgi chara.”

⁵⁰Kweni pakupulika ichi Yesu wakamuphalira kuti, “Ungopanga, kweni pulikana ndipera, ndipo mwana wako wati waŵenge wamoyo.”

⁵¹Para wakafika ku nyumba ya Yayiro, kuti wakazomerezga munthu kunjira nayo chara, kweni Petrosi, Yohane na Yakhobe pera na ŵapapi ŵa mwana.

⁵²Pa nyengo iyi, ŵanthu wose ŵakaliranga na kutengera, kweni iyo wakati, “Mungaliranga chara, chifukwa mwana kuti wafwa chara, kweni wagona tulo.”

⁵³Ŵanthu ŵakamuseka pakumanya kuti mwana wafwa kale.

⁵⁴Yesu wakamukora pa woko, wakamuchema wakati, “Wa msungwana, wuka!”

⁵⁵Umoyo wakhe ukawereramo, ndipo penepapo wakawuka. Ntheura Yesu wakaŵaphalira kuti ŵamupe chakurya.

⁵⁶Ŵapapi ŵakhe ŵakazizwa, kweni wakaŵalangula kuti ŵareke kuphalirapo munthu nanga njumoza na icho chikachitika.