Read new_tumbuka_bible Luka 9 Bible Online

Luka 9 - new_tumbuka_bible bible

Luka 9

¹Yesu wakaŵachemera pamoza ŵasambiri ŵakhe 12, ndipo wakaŵapa nkhongono na mazaza vyakufumyira viŵanda vyose na kuchizga ŵarwari.

²Wakaŵatuma kuti ŵakapharazge Ufumu wa Chiuta na kuchizga ŵanthu ŵarwari.

³Wakaŵaphalira kuti, “Pa ulendo uwu mungayeghanga kanthu chara, nga ndi ndodo, thumba, chakurya, ndarama. Ndipo mureke kuŵa na malaya ghaŵiri.

⁴Mu nyumba yose iyo mwamkunjiramo, kharani mwenemumo mpaka mufumemo mu msumba ura.

⁵Usange ŵakumupokererani chara, para mukufumamo mu muzi ura kung'unthani fuvu la ku malundi ghinu kuti chiŵenge chipanikizgo kwa iwo.”

⁶Ŵasambiri ŵara ŵakaruta, ŵakaporota mu vikaya kupharazga Uthenga Uweme na kuchizga ŵanthu kosekose.

⁷Sono Herode uyo wakawusanga mu Galileya yikapulika vyose ivyo Yesu wakachitanga, yikazizikika chomene, pakuti ŵanthu ŵanji ŵakayiphalira kuti ndi Yohane Mubapatizi wali kuwuka ku ŵakufwa.

⁸Ŵanji ŵakatenge ndi Eliya wali kwiza, ŵanjiso ŵakatenge njumoza wa nchimi za kale wawuka ku ŵakufwa.

⁹Kweni Herode wakati, “Yohane nkhamudumula mutu. Kweni uyu ndi njani mweneuyo nkhumupulika na vya ntheura?” Ndipo wakanwekanga kuti wamuwone.

¹⁰Para ŵakutumika ŵakawera, ŵakamuphalira Yesu ivyo ŵakaya kachita. Ndipo wakaŵatora na kuruta nawo ku udesi ku msumba zina lakhe Betesaida.

¹¹Kweni ŵanthu ŵakati ŵamanya ichi, ŵakamurondezga. Ndipo iyo wakaŵapokerera, na kuŵaphalira vya Ufumu wa Chiuta, na kuŵachizga awo ŵakakhumbanga kuchizgika.

¹²Apo zuŵa likaŵa pafupi kunjira, ŵasambiri ŵakhe, 12 ŵakiza kwa iyo ŵakati, “Ŵawezgani ŵanthu, mwakuti ŵarute ku vikaya na malo agho ghali pafupi kuti ŵakasange malo gha kugona na chakurya, pakuti pano tili, mpha mapopa.”

¹³Kweni iyo wakaŵaphalira wakati, “Imwe ndimwe muŵape chakurya.” Ŵakamuzgora ŵakati, “Ise tili navyo vingwa vinkhonde pera na somba ziŵiri. Kasi tirute kuya kaŵagulira vyakurya ŵanthu wose aŵa?”

¹⁴(Pakuti ŵanthu ŵara ŵakaŵa ŵanarume vikwi vinkhonde.) Kweni Yesu wakaŵaphalira ŵasambiri ŵakhe wakati, “Ŵakharikani pasi ŵanthu mu viwuruviwuru vya 50.”

¹⁵Ndipo ŵakachita ntheura, ŵakaŵakhazika wose pasi.

¹⁶Ndipo wakati watora vingwa vinkhonde vira na somba ziŵiri zira, wakalaŵiska kuchanya, wakawonga Chiuta, wakavimenya ndipo wakavipereka ku ŵasambiri kuti ŵakharikire ŵanthu.

¹⁷Ndipo ŵanthu wose ŵakarya na kukhuta, ndipo ŵasambiri ŵakasora vimenyu ivyo vikakharapo ndipo vikazura vidunga 12.

¹⁸Apo Yesu wakarombanga pa yekha, ŵasambiri ŵakhe ŵakaŵa nayo. Ndipo wakaŵafumba wakati, “Kasi ŵanthu ŵakuti ine ndine njani?”

¹⁹Ŵakazgora ŵakati, “Ŵanthu ŵanji ŵakuti ndimwe Yohane Mubapatizi, ŵanji ŵakuti ndimwe Eliya, kweni ŵanyakheso ŵakuti ndimwe yumoza wa nchimi za kale iyo yili kuwuka ku ŵa kufwa.”

²⁰Wakaŵafumbaso wakati, “Kweni imwe mukuti ndine njani?” Petrosi wakazgora wakati, “Imwe ndimwe Mesiya wa Chiuta.”

²¹Yesu wakaŵachinyinthizga na kuŵalangula kuti ŵareke kuphalirapo munthu nanga njumoza pa cheneichi.

²²Yesu wakati, “Mwana wa Munthu wakwenera kukomwa pa vinandi na kukanika na ŵarara ŵa ŵaYuda, na ŵasofi ŵarara pamoza na ŵamanyi-marango, na kukomeka, ndipo na kuwuskika ku ŵakufwa pa zuŵa la chitatu.”

²³Ntheura wakati kwa iwo wose, “Usange munthu wakukhumba kundirondezga, wakwenera kujipata na kunyamura mphinjika yakhe zuŵa na zuŵa na kundirondezga.

²⁴Pakuti yose uyo wakukhumba kuponoska umoyo wakhe wati wawutayenge, ndipo yose uyo wati wawutayenge chifukwa cha ine, wati wawuponoskenge.

²⁵Kasi kungamovwirachi munthu, kwandula charu chose cha pasi, kweni wataye umoyo wakhe?

²⁶Pakuti yose uyo wati waŵenge na soni na ine na mazgu ghane, Mwana wa Munthu nayo wamkuŵa nayo na soni para wamkwiza mu uchindami wakhe na mu uchindami wa Ŵawiske na wa ŵangelo ŵatuŵa.

²⁷Kweni nkhumuphalirani unenesko, ŵalipo ŵanji awo ŵakwimilira pano, awo kuti ŵati ŵafwenge chara ŵasuke ŵawone Ufumu wa Chiuta.”

²⁸Sono pakati pajumphapo mazuŵa pafupi ghankhonde na ghatatu, wakati waŵayowoyera mazgu agha, Yesu wakatora Petrosi, Yohane na Yakhobe, wakakwera nawo ku phiri kuya karomba.

²⁹Ndipo apo wakaŵa ŵachali kuromba, kawonekero ka chisko chakhe kakasintha ndipo malaya ghakhe ghakabuta na kugadima.

³⁰Penepapo ŵanthu ŵaŵiri ŵakiza, ŵakayowoyanga nayo, ŵeneawo ŵakaŵa Mozesi na Eliya.

³¹Ŵanthu aŵa kawonekero kawo kakaŵa ka uchindami, ndipo ŵakadumbanga na vya ulendo wakhe uwo wakenera kufiska mu Yerusalemu.

³²Petrosi na ŵanyakhe ŵaŵiri ŵakaŵa mu tulo twakufwa nato. Kweni ŵakati ŵawuka ŵakawona uchindami wa Yesu, ndiposo na ŵanthu ŵaŵiri awo ŵakimilira nayo.

³³Apo ŵanthu ŵara ŵakafumangapo, Petrosi wakayowoya na Yesu wakati, “Musambizgi, nkhuweme kuti ise tili pano. Tizomerezgani kuti tizenge misasa yitatu, umoza winu, unyakhe wa Mozesi ndiposo unyakhe wa Eliya.” (Wakamanya chara icho wakayowoyanga.)

³⁴Ŵachali kuyowoya vyeneivi, kukiza bingu ilo likaŵabenekerera ndipo ŵasambiri ŵara ŵakatenthemanga apo wakanjiranga mu bingu.

³⁵Mazgu ghakafuma mu bingu ghakati, “Uyu ndi Mwana wane wakusankhika. Mupulikani iyo.”

³⁶Mazgu ghakati ghareka kupulikikwa, Yesu wakasangika kuti wali yekha. Ndipo ŵakakhara chete mazuŵa gheneghara kwambula kuphalirapo munthu nanga njumoza na ivyo ŵakaviwona.

³⁷Na machero ghakhe, apo ŵakati ŵikha kufuma ku phiri kura, ŵanthu ŵanandi ŵakakumana nayo.

³⁸Ndipo munthu yumoza mu mzinda wakachemerezga wakati, “Musambizgi, nkhumuŵeyani kuti mundiwonere mwana wane msepuka. Pakuti ndi mwana wane yekha na yekha.

³⁹Ndipo mzimu ukumukora, ndipo wakuchirukira waka kuti wakulira, na kumunyutuska mpaka wamokore mphovu. Ukurutilira kumusuzga mpaka umupweteke ndipo ukufumamo na unonono chomene.

⁴⁰Ndanguŵeya ŵasambiri ŵinu kuti ŵawufumye, kweni ŵatondeka.”

⁴¹Yesu wakazgora wakati, “Okwe! Imwe ŵamuwiro wambula chipulikano, na wakubendera! Kasi nditi ndiŵe namwe na kumuzizipizgirani kufikira pauli? Zanga nayo kuno mwana wako.”

⁴²Wiske wa mwana wachali kwiza nayo, chiŵanda chikamuthenyura pasi mwana ndipo wakazirikanga chomene. Kweni Yesu wakachenya mzimu uheni ura na kumuchizga msepuka. Ndipo wakamuwezgera ku ŵawiske.

⁴³Ŵanthu wose ŵakazizwa na ukuru wa Chiuta. Apo wose ŵakazizwanga na vinthu vyose ivyo wakachitanga, Yesu wakayowoya na ŵasambiri ŵakhe wakati,

⁴⁴“Rekani mazgu agha ghanjire mu makutu ghinu. Mwana wa Munthu wamkuperekeka mu mawoko gha ŵanthu.”

⁴⁵Kweni kuti ŵakapulikiska mazgu agha chara, chifukwa ghakabisika kwa iwo, mwakuti ŵareke kughamanyiska. Ndipo ŵakopanga na kumufumba wuwo pa mazgu agha.

⁴⁶Ndipo mphindano yikawuka mukati mu ŵasambiri ŵa Yesu yakuti, mukuru kuruska wose ndi njani mukati mwawo.

⁴⁷Kweni Yesu wakati wamanya maghanoghano ghawo, wakatora mwana na kumwimika pafupi na iyo.

⁴⁸Ndipo wakaŵaphalira wakati, “Yose uyo wakupokerera mwana muchoko uyu mu zina lane, wakupokerera ine. Ndipo yose uyo wakupokerera ine, wakupokerera uyo wakandituma. Chifukwa uyo ndi muchoko chomene mukati mwinu, ndiyo wati waŵenge mukuru.”

⁴⁹Yohane wakati, “Musambizgi, ise tikawona munthu wakufumya viŵanda mu zina linu, ndipo tikamukanizga chifukwa wakaŵa yumoza wa ise chara.”

⁵⁰Kweni Yesu wakati, “Mungamukanizganga chara, chifukwa uyo ngwambula kwimikana namwe, wali pamoza namwe.”

⁵¹Apo mazuŵa ghakhe ghakaneng'enera kuti iyo wakapokerereke, Yesu wakadumula kuti warute ndipera ku Yerusalemu.

⁵²Wakatuma nthumi munthazi mwakhe kuti ŵarute ku chikaya cha ŵaSamariya, kuti ndiko ŵakamunozgere malo.

⁵³Kweni ŵanthu ŵa mu muzi ura kuti ŵakamupokerera chara chifukwa ŵakawona kuti mtima wakhe ukarata pa Yerusalemu.

⁵⁴Para ŵasambiri ŵakhe, Yohane na Yakhobe ŵakawona ichi, ŵakamufumba Yesu ŵakati, “Fumu, kasi mukukhumba kuti ticheme moto kufuma kuchanya kuti uŵamare ŵanthu aŵa?”

⁵⁵Kweni Yesu wakang'anamuka na kuŵachenya. [Ndipo wakati, “Imwe mukumanya chara kuti muli na mzimu wa mtundu uli. Pakuti mwana wa Munthu wakiza kuti waparanye umoyo wa ŵanthu chara kweni kuti wawuponoske.”]

⁵⁶Penepapo Yesu na ŵasambiri ŵakhe ŵakarutilira kuya ku chikaya chinyakhe.

⁵⁷Apo ŵakendanga mu nthowa, munthu yunji wakati kwa Yesu, “Fumu, ndimurondezganinge kose uko mukuruta.”

⁵⁸Yesu wakati, “Ŵakambwe ŵali na michembo yawo, ndipo viyuni vya mudera vili na vivimbo, kweni Mwana wa Munthu walije malo apo wangagoneka mutu wakhe.”

⁵⁹Ku munthu munyakhe Yesu wakati, “Rondezga ine.” Kweni wakazgora wakati, “Fumu, rekani nkhasunge danga ŵadada.”

⁶⁰Kweni Yesu wakati kwa iyo, “Ŵareka ŵakufwa ŵasunge ŵakufwa ŵawo. Kweni iwe rutanga ukapharazge mazgu gha Ufumu wa Chiuta.”

⁶¹Munthu munyakheso wakaphalira Yesu wakati, “Nkhukhumba kumurondezgani, Fumu. Kweni rekani danga nkhaŵalayire ŵa mu nyumba yane.”

⁶²Yesu wakati, “Munthu uyo wakora jembe kuti wagawule ndipo wakulaŵiska kumanyuma walije kwenera kuŵa mu Ufumu wa Chiuta.”