Read new_tumbuka_bible Marango gha Chiŵiri 1 Bible Online

Marango gha Chiŵiri 1 - new_tumbuka_bible bible

Marango gha Chiŵiri 1

¹Agha ndi mazgu agho Mozesi wakayowoya ku ŵaIsraele apo wakaŵa mu mapopa, ku sirya linyakhe la mronga wa Yorodani. Uku kukaŵa ku chigaŵa cha Araba kuthyana na Sufu pakati pa Parani na Tofele, Labani, Hazeroti na Dizahabu.

²(Pali ulendo wa mazuŵa 11 kufuma pa Phiri la Sinayi kufika ku Kadeshi Baraneya pa kwendera nthowa ya mu Phiri la Edomu.)

³Pa zuŵa lakudanga la mwezi wa 11 mu chirimika cha 40, Mozesi wayowoya vyose ivyo FUMU yikalangula kuti wayowoya ku ŵaIsraele.

⁴Ichi chikachitika Mozesi wakati wathereska Sihoni, karonga wa ŵaAmori uyo wakawusanga mu Heshiboni na Ogi, karonga wa Bashani uyo wakawusanga mu misumba ya Ashitaroti na Edireyi.

⁵Mozesi wakamba kuŵarongosorera ŵaIsraele marango agha apo wakaŵa ku sirya linyakhe la mronga wa Yorodani mu charu cha Mowabu. Iyo wakati,

⁶“Para tikaŵa mu Phiri la Sinayi, FUMU, Chiuta withu wakayowoya kwa ise wakati, ‘Mwakhara nyengo yitali pa phiri ili.

⁷Sono wukani murutenge ku charu cha mapiri cha ŵaAmori na kose uko kukukhara ŵanyawo mu chigaŵa cha Araba, mu mapiri na mu charu chakuwa, ku mwera na mu mphepete mwa nyanja ya Meditereniya, mu charu cha ŵaKanani na ku Lebanoni, ndiposo na uko ku mafumiro gha dazi ku mronga ukuru wa Yufurate.

⁸Cheneichi ndicho charu nkhuchipereka kwa imwe. Ntheura rutani kuti mukahare charu icho ine FUMU nkharapa kupereka ku ŵasekuru ŵinu, Abrahamu, Yisake na Yakhobe ndiposo na ku ŵa mphapu yawo.’ ”

⁹Mozesi wakati ku ŵanthu, “Para tikaŵa mu Phiri la Sinayi, nkhamuphalirani kuti, ‘Mlimo uzitu wakumurongozgani imwe wandiŵira ukuru chomene. Ine ndekha kuti ndingakwaniska chara.

¹⁰FUMU, Chiuta winu wamwandaniskani, sono muli ŵanandi nga ndi nyenyezi kuchanya.

¹¹FUMU, Chiuta wa ŵasekuru ŵinu wamwandaniskani kuti muŵe vikwi na vikwi kuruska umo muliri sono ndipo wamutumbikani nga ndi umo wakapanganirana namwe.

¹²Kweni kasi ine ndekha ndingakwaniska uli kuyegha mlimo uzitu wakumurongozgani na kweruzga mirandu mukati mwinu?

¹³Ntheura soranipo ŵanthu ŵamahara, ŵakupulikiska na ŵakumanya vinthu makora, kwakulingana na mafuko ghinu ndipo ine nditi ndiŵimike kuŵa ŵarongozgi ŵinu.’ ”

¹⁴Ndipo imwe mukandizgora mukati, “Icho mwasachizga nchiweme, ise titi tichite.”

¹⁵Ntheura nkhatora ŵanthu ŵavinjeru na ŵakumanya vinthu kufuma mu mafuko awo mukaghasora na kuŵimika kuŵa ŵarongozgi pa ŵanthu 1,000, pa ŵanthu 100, pa ŵanthu 50 na pa ŵanthu khumi ndipo ŵanyakhe kuŵa nduna pakati pamafuko ghinu ghose.

¹⁶Ndipo nkhaŵalangula ŵeruzgi ŵinu pa nyengo yira nkhati, “Mupulikenge mirandu ya ŵabali ŵinu, ndipo mweruzgenge mu urunji mirandu yose, manyi nja pakati pa ŵabali ŵinu pera panji pakati pa ŵalendo awo ŵakukhara mukati mwinu.

¹⁷Mungaŵanga ŵakurumba chisko pa kweruzga. Munthu waliyose manyi ngwa kuzirwa panji wambula kuzirwa, mumweruzgenge kwakuyana waka. Mureke kopa munthu waliyose chifukwa weruzgi uwo mukupereka ukufuma kwa Chiuta. Mrandu uwo ngunonono kwa imwe, mwizenge nawo kwa ine ndipo ine nditi ndimweruzge.”

¹⁸Pa nyengo yira nkhamuphalirani vyose ivyo mukwenera kuchita.

¹⁹“Ntheura nga ndi umo FUMU, Chiuta withu wakatilangulira, tikafumapo pa Phiri la Sinayi ndipo tikasorota mu mapopa ghakuru na ghakofya ghara agho mukaghawona mu nthowa yakuruta ku charu cha mapiri cha ŵaAmori. Para tikati tafika ku Kadeshi Baraneya,

²⁰nkhamuphalirani kuti, ‘Sono mwafika mu charu cha mapiri cha ŵaAmori cheneicho FUMU, Chiuta withu wakutipa.

²¹Wonani, FUMU, Chiuta withu watipa charu ichi. Ntheura rutani mukachihare kuti chiŵe chinu nga ndi umo FUMU, Chiuta wa ŵasekuru ŵithu wakalangulira. Mureke kopa nesi kugongoweskeka.’ ”

²²Mose mukiza kwa ise ndipo mukati, “Tiyeni titume ŵanthu kuti ŵakatipachirire charu ndipo para ŵayakawerako, ŵizakatiphalire nthowa yiweme iyo tingendamo na msumba uwo tamkufikirako.”

²³Ichi chikaŵa chiweme ndipo nkhasankha ŵanarume 12, yumoza kufuma ku fuko lirilose.

²⁴Iwo ŵakawuka na kuruta ku charu cha mapiri, mpaka ŵakaya kafika ku Dambo la Eshikolo ndipo ŵakachipacha charu.

²⁵Ŵakaya katorako vipambi vya mu charu chira ndipo ŵakiza navyo kwa ise na kutiphalira kuti, “Charu icho FUMU, Chiuta withu wakutipa nchiweme.”

²⁶“Ndipouli imwe mukakhumba chara kurutako. Kweni mukagarukira languro la FUMU, Chiuta winu.

²⁷Mukasinginika mu mahema ghinu ndipo mukati, ‘FUMU yatitinkha ise. Ichi ndicho chifukwa yikatifumyira mu charu cha Eguputo na kutipereka mu mawoko gha ŵaAmori kuti watikome.

²⁸Kasi sono tirutenge nkhu? Pakuti ŵabali ŵithu ŵara tikaŵatuma ŵatigongoweska pakutiphalira kuti, “Ŵanthu ŵa kwenekura mbankhongono ndipo ndi vitali kuruska ise. Misumba yawo nayo njikuru ndipo nja malinga ghatali kufika kuchanya. Tikawonaso kwenekura ŵanthu ŵakuruŵakuru, ŵazukuru ŵa ŵaAnaki!” ’ ”

²⁹Penepapo ine nkhati kwa imwe, “Mureke kofyeskeka panji nesi kuŵawopa iwo.

³⁰FUMU, Chiuta winu mweneuyo wakumudangirirani ndiyo wati wamurwerani nga ndi umo mukamuwonera wakumurwerani mu Eguputo,

³¹na mu mapopa. Imwe mukawona mu nthowa yose iyo mukendamo umo FUMU, Chiuta winu wakamuyegherani nga ndi umo wiske wakuyeghera mwana wakhe, mpaka mukafika pa malo ghano.”

³²Ndipouli nanga vyose ivi vikachitika, kuti mukugomezga FUMU, Chiuta winu chara.

³³Iyo wakamudangiriraninge nyengo yose mu nthowa yinu kuti wamusangireni malo gha kuzengapo mahema ghinu. Iyo wakendanga panthazi pinu mu mawonekero gha moto mu nyengo ya usiku, kweni na muhanya wakaŵa na mawonekero gha bingu.

³⁴“FUMU yikati yapulika icho mukayowoya, yikakaripa ndipo yikarapa yikati,

³⁵‘Palije na yumoza wa ŵanthu ŵaheni ŵa muwiro uwu mweneuyo wati wanjire mu charu chiweme icho nkhapangana kuŵapa ŵasekuru ŵawo.

³⁶Kweni Kalebu pera, mwana wa Yefune, ndiyo wamkuchiwona. Ndipo nditi ndimupe na ŵa mphapu yakhe charu icho wali kukandapo na malundi ghakhe chifukwa waŵa wakugomezgeka kwa FUMU na mtima wakhe wose.’

³⁷Chifukwa cha imwe, FUMU yikandikaripira na ine wuwo ndipo yikati, Nanga ndiwe kuti wamkunjiramo chara.

³⁸Kweni Yoshuwa, mwana wa Nuni, movwiri wako, ndiyo wamkunjira mu charu. Ntheura umukhwimiske, pakuti iyo ndiyo wati warongozge ŵaIsraele pakunjira kuti ŵahare charu.”

³⁹“Ndipo ŵana ŵinu awo mukayowoyanga kuti ŵatorekerenge ku uzga ŵeneawo kuti ŵakumanya chiweme panji chiheni chara, ndiwo ŵamkunjira mu charu. Ine nditi ndiŵape charu ichi ndipo iwo ŵati ŵachitore kuŵa chiharo chawo.

⁴⁰Kweni imwe wererani, murazgire ku mapopa ku dera la Nyanja ya Matete.”

⁴¹“Penepapo imwe mukandizgora mukati, ‘Tanangira FUMU. Titi tirute kuya karwa nkhondo nga ndi umo FUMU, Chiuta withu wakatilangulira.’ Ntheura waliyose wa imwe wakatora mahomwa ghakhe gha nkhondo na kughanaghana kuti nchipusu kuthereska charu cha mapiri chira.

⁴²“Kweni FUMU yikati kwa ine, ‘Uŵaphalire uti: Rekani kurutako nanga nkhuya karwa nkhondo, pakuti ine ndili mukati mwinu chara, mzire mukathereskeke panthazi pa ŵarwani ŵinu.’ ”

⁴³Ntheura ine nkhamuphalirani icho FUMU yikayowoya, kweni imwe kuti mukandipulika chara. Mukagarukira languro la FUMU ndipo mu kujikuzga kwinu, mukaruta ku charu cha mapiri.

⁴⁴Penepapo ŵaAmori awo ŵakakharanga mu charu cha mapiri chira, ŵakafuma kwimikana namwe na kumuchimbizgani nga ndi njuchi ndipo ŵakamutimbani kufuma ku Edomu mpaka ku Horima.

⁴⁵Imwe mukati mwawerako, mukalirira kwa FUMU, ndipo iyo kuti yikamupulikani chara nanga nkhutegherezga kwa imwe.

⁴⁶Ichi ndicho chifukwa mukakhakira mu Kadeshi mazuŵa ghanandi.