Read new_tumbuka_bible Marango gha Chiŵiri 10 Bible Online

Marango gha Chiŵiri 10 - new_tumbuka_bible bible

Marango gha Chiŵiri 10

¹“Pa nyengo yira FUMU yikati kwa ine, ‘Uŵaje mawe ghapapati ghaŵiri ghakuyana waka nga mphakudanga ghara ndipo ukhomeso bokosi la mathabwa ntheura ukwerere nayo kwa ine kuno ku phiri.

²Ndipo pa mawe agho nditi ndilembeposo mazgu agho ghakalemba pa mawe ghapapati gha pakudanga ghara agho ukaswa ndipo wamkughaŵika mu bokosi ilo.’ ”

³“ ‘Ntheura nkhakhoma bokosi la mathabwa gha khuni la akesha na kuŵaja mawe ghapapati ghaŵiri nga gha pakudanga ghara ndipo nkhakwerera ku phiri uku ndayegha mawe ghaŵiri ghapapati ghara mu mawoko ghane.

⁴Ntheura FUMU yikalembapo pa mawe ghara, nga mphakudanga para, marango khumi agho yikayowoya kwa imwe pa phiri mukati mu moto pa zuŵa ilo mukawungana musi mwa phiri. Ndipo FUMU yikandipa mawe ghara.

⁵Ndipo nkhawerako na kwikha phiri na kuŵika mawe ghara mu Bokosi la Phangano ilo nkhakhoma. Ndipo ghali mwenemumo nga ndi umo FUMU yikandilangulira.’ ”

⁶(ŴaIsraele ŵakawuka ulendo wawo kufuma pa visimi vya Beyeroti Bene Yaakani ndipo wakaruta ku Mosera uko Aroni wakafwira na kusungika. Eleyazara mwana wakhe ndiyo wakatora mlimo wa usofi mu malo gha ŵawiske.

⁷Kufuma pa malo ghara, ŵakaruta ku Gudigoda ndipo wakarutilira mpaka ŵakafika ku Yotibata, charu cha mironga ya maji.

⁸Pa nyengo yira FUMU yikapatula fuko la Levi kuti liyeghenge Bokosi la Phangano la FUMU na kwima panthazi pa FUMU kuyiteŵetera nga mbasofi na kutumbika ŵanthu mu zina lakhe mpaka kufika na sono wuwo.

⁹Pa chifukwa ichi ŵa fuko la Levi kuti ŵakaŵa na phande panji chiharo nga ndi umo mafuko ghanyakhe gha ŵabali ŵawo. FUMU ndiyo yikaŵa chiharo nga ndi umo FUMU, Chiuta winu wakayowoyera.)

¹⁰Ntheura nkhakhara pa phiri mazuŵa 40 muhanya na usiku nga mpha nyengo ya pakudanga yira. Pa nyengo iyi naposo FUMU yikandipulika kuti yikakhumba chara kumumarani.

¹¹Penepapo FUMU yikati rutanga, ndipo rongozga ŵanthu pa ulendo wawo mwakuti ŵakanjire na kupoka charu icho nkhapangana mwakurapa ku ŵasekuru ŵawo kuti ndiŵapenge.

¹²Ntheura sono, imwe ŵaIsraele, FUMU, Chiuta winu kuti wakukhumba kanthu kanyakhe chara kwa imwe, kweni kuti mopenge iyo Chiuta winu na kwenda mu nthowa zakhe zose, kumutemwa na kuteŵetera FUMU, Chiuta winu na mtima winu wose ndiposo na umoyo winu wose.

¹³Musungenge marango na vilayizgo gha FUMU agho nkhumupani muhanya uno mwakuti kumuŵirani makora.

¹⁴Kuchanya na vyose ivyo vili kwenekura ndi vya FUMU, Chiuta winu nanga ndi charu cha pasi na vyose ivyo vili mwenemumo.

¹⁵Ndipouli FUMU yikaŵikapo mtima na kuŵatemwa ŵasekuru ŵinu. Iyo yikasankha ŵa mphapu ya ŵasekuru ŵinu awo ndimwe na kureka ŵa mitundu yinyakhe nga ndi umo kuliri muhanya uno.

¹⁶Ntheura mujikotore pakuwuskako uheni wa mitima yinu ndipo mureke kuŵaso na mitima yinonono.

¹⁷Pakuti FUMU, Chiuta winu ndi Chiuta wa ŵachiuta na FUMU ya mafumu, Chiuta mukuru, wankhongono na wakofya mweneuyo kuti wakurumba chisko cha munthu chara nesi kupokera vimbundi.

¹⁸Wakuvikirira ŵalanda na vyokoro ndipo wakutemwa ŵalendo awo ŵakukhara mukati mwinu pakuŵapa vyakurya na vyakuvwara.

¹⁹Ndipo imwe namwe mukwenera kutemwa ŵalendo pakuti namwe mukaŵa ŵalendo mu charu cha Eguputo.

²⁰Muchindikenge FUMU, Chiuta winu na kumusopa iyo yekha, ndipo muŵe ŵakugomezgeka kwa iyo na kurapira mu zina lakhe pera.

²¹Iyo ndiyo mumurumbenge pakuti ndi Chiuta winu mweneuyo wakamuchitirani vinthu vikuru na vyakofya vira vyeneivyo mukaviwona na maso ghinu.

²²Ŵasekuru ŵinu awo ŵakakhilira mu Eguputo ŵakaŵa 70, ndipo sono FUMU Chiuta wamwandaniskani nga ndi nyenyezi za kuchanya.